1. Kova savet o apostol Petar dinđa e hrišćanenđe hem sose šaj te dićhol amenđe so našti te ićera amen ko odova savet?

SARE amen, bilo te ovel amen nada so ka živina ko nebo ja ko raj ki phuv, šaj but te sikljova ando savet kova o apostol Petar dinđa e hrišćanenđe ko prvo veko. Ov pisinđa lenđe: „Oven sveta ko sa so ćerena, sar soj tano sveto o Devel kova vićinđa tumen, sose pisimo tano: ’Oven sveta, sose me hijum sveto‘“ (1. Petr. 1:15, 16). Kotar akala lafija sikljovaja so amen šaj te oponašina e Jehova, kastar i svetost avela. Amen šaj hem valjani te ova sveta ko sa so ćeraja. Sebepi so hijam nesavršena, šaj mislinaja so amen našti te ova sveta. O apostol Petar ćerđa disave greške ko po životi, ama oleso primer mothovi so amen šaj te ova sveta.

2. Sostar ka vaćera ko akava članko?

² Ko akava članko, ka dobina odgovorija ko akala pućiba: Soj tani svetost? So i Biblija vaćeri andi Jehovasi svetost? Sar šaj te ova sveta ko sa so ćeraja? Savi veza isi maškaro odova te ova sveta hem te ova paše e Jehovaja?

3. So but manuša mislinena, sar izgledini neko koj tano sveto, ama so šaj te pomožini amen te haljova soj tani svetost?

³ Ked šunena o lafi „sveto“ bute manušenđe ki godi avela neko ko niked na asala, ko uravi pe averćhane averendar hem koj tano but ozbiljno. Ama, odova nane ađahar. I Biblija vaćeri so o Jehova, kova tano sveto, tano „bahtalo Devel“ (1. Tim. 1:11). Isto ađahar, hem okola so služinena  lese tane bahtale (Ps. 144:15). Ked hine ki phuv, o Isus osudinđa okolen so uravđe pe averćhane averendar hem kola ćerđe šukar buća samo te dikhen len avera manuša (Mat. 6:1; Mar. 12:38). I Biblija šaj te pomožini amen te haljova soj tani svetost. Uverime hijam so amaro sveto Devel kova but mangela amen niked na bi rodela amendar diso so amen našti te ćera. Odolese, ked o Jehova phenela amenđe: „Oven sveta“, odova značini so amen šaj te ova sveta. Ama, te šaj te ova sveta ko sa so ćeraja, najangleder valjani te haljova soj tani svetost.

4. So značinena o lafija „sveto“ hem „svetost“?

⁴ Soj tani svetost? Ki Biblija, o lafija „sveto“ hem „svetost“ odnosinena pe ki moralno hem ki religiozno čistoća. Isto ađahar, odola lafija odnosinena pe upro nekaste koj tano odvojimo te služini e Devlese. Avere lafencar, amen šaj te ova sveta ako hijam moralno čista, ako služinaja e Devlese ađahar sar so ov rodela hem ako hijam paše oleja. Iako amen hijam samo grešna manuša, amaro Devel kova tano sveto mangela te ovel paše amencar. Odova ćaće takini amen ko vilo.

5. So šaj te sikljova ando Jehova kotar olese verna anđelija?

⁵ O Jehova tano sveto hem čisto ko sa. Odova dićhola kotar lafija kola o serafimija, o anđelija kola služinena paše uzo Jehovaso presto, phenđe: „Sveto, sveto, sveto tano o Jehova, o Komandanti upro sa o vojske“ (Is. 6:3). O anđelija šaj te oven paše e Devleja kova tano sveto sebepi so hem on tane sveta. Odolese, ked o anđelija podijekh puti alje ki phuv te phenen e manušenđe e Devlese lafija, šaj hine te phenel pe so hem odova than ulo sveto. Jekh asavko primer hine ked o Mojsije dikhlja o grm kova nisar te thabljol (Izl. 3:2-5; Is. Nav. 5:15).

6-7. (a) Premalo Izlazak 15:1, 11, sar o Mojsije mothovđa so o Jehova tano sveto? (b) So setinćerđa e Izraelcen so o Jehova tano sveto? (Dikh i slika ki naslovno strana.)

⁶ Palo odova so nakhlje o Crveno more, o Mojsije phenđa e Izraelcenđe so olengo Devel, o Jehova, tano sveto. (Čitin Izlazak 15:1, 11.) O Egipćanija kola služinđe pe hovavne devlenđe sigurno na hine sveta. Isto odova šaj te phena hem ando manuša ko Hanan. Ked služinđe pe hovavne devlenđe on dinđe pe ćhaven sar žrtva hem ćerđe nemoral (Lev. 18:3, 4, 21-24; Pon. zak. 18:9, 10). Ki aver strana, o Jehova niked kotar pe sluge na bi rodela te ćeren diso lošno. Ov tano sveto ko sa. Te šaj te setinćeri e Izraelcen ko odova, ko turban ando prvosveštenik hine jekh zlatno pločica ki koja hine pisimo: „O Jehova tano sveto“ (Izl. 28:36-38).

⁷ O lafija kola pisinđe ki odija pločica valjanđe te setinćeren sarinen so o Jehova tano sveto. Ama, so ako jekh Izraelac hine but dur ando prvosveštenik hem našti hine te dikhel so pisini ki odija pločica? Da li sebepi odova ov na đanđa so o Jehova tano sveto? Naravno so na. O Zakon čitinđa pe anglo sa o manuša hem tegani svako šaj hine te šunel odolese (Pon. zak. 31:9-12). Ked bi tu oveja hine odothe, sigurno bi šuneja akala lafija: „Me hijum o Jehova, tumaro Devel. Oven... sveta, sose me hijum sveto.“ „Oven mo sveto narodo, sose me, o Jehova hijum sveto“ (Lev. 11:44, 45; 20:7, 26).

8. So sikljovaja andi Levitska 19:2 hem andi 1. Petrova 1:14-16?

 ⁸ Akana ka vaćera kotar lafija kola o Jehova phenđa te čitinen pe anglo sa o Izraelcija. Odola lafija pisinena ki Levitska 19:2. O Jehova phenđa e Mojsijese: „Vaćer sa e Izraelcenđe: ’Oven sveta sose me o Jehova, tumaro Devel, hijum sveto.‘“ Ked podstakninđa e hrišćanen te „oven sveta“, o apostol Petar šaj citirinđa akala lafija. (Čitin 1. Petrova 1:14-16.) Amen avdije na ićeraja amen ko Mojsijeso zakon. Ama, e Petarese lafija mothovena so odova so pisini ki Levitska 19:2 tano ćaće – so o Jehova tano sveto hem so okola kola mangena le valjani te den sa pestar te oven sveta. Odova valjani te ćera savi god nada te ovel amen (1. Petr. 1:4; 2. Petr. 3:13).

9. Sose tano šukar te proučina o 19. poglavlje andi knjiga Levitska?

⁹ Sebepi so mangaja amaro Devel te ovel zadovoljno amencar, amen mangaja te sikljova sar te ova sveta. O Jehova sikavi amen sar te ova sveta. O 19. poglavlje andi knjiga Levitska šaj but te pomožini amen. O jevrejsko izučavalac, o Markus Kališ pisinđa: „O 19. poglavlje andi knjiga Levitska šaj tano najvažno poglavlje ki odija knjiga hem maškaro prva panđ e biblijake knjige.“ Akana hari pobuter ka vaćera ando disave savetija ando akava poglavlje kola mothovena amenđe sar te ova sveta. Ama, đi ćeraja odova, važno tano te na bistra so akava poglavlje počmini e lafencar: „Oven sveta.“

10-11. Premali Levitska 19:3, so valjani te ćera hem sose tano odova važno?

¹⁰ Palo odova so phenđa e Izraelcenđe so valjani te oven sveta, o Jehova pana phenđa: „Svako nek poštujini pe daja hem pe dade... Me hijum o Jehova, tumaro Devel“ (Lev. 19:2, 3).

¹¹ But tano važno te ićera amen ki odija zapovest hem te poštujina amare roditeljen. Ked jekh manuš pućlja e Isuse: „Kola šukar buća valjani te ćerav te dobinav o večno životi?“, jekh andi buti koja o Isus phenđa lese hine so valjani te poštujini pe  dade hem pe daja (Mat. 19:16-19). Ov čak osudinđa e farisejen hem okolen so šukar đanđe o Zakon, ama na brininđe pe kotar pe roditeljija. Ađahar, on „peravđe e Devleso Lafi“ (Mat. 15:3-6). Avere lafencar, on peravđe i panđto zapovest, sar hem i zapovest koja pisini ki Levitska 19:3 (Izl. 20:12). Palem, ma bistri so o lafija andi Levitska 19:3, te poštujina amare dade hem amare daja, avena odmah palo lafija: „Oven sveta sose me o Jehova, tumaro Devel, hijum sveto.“

12. Sar šaj te ićera amen ko odova so pisini ki Levitska 19:3?

¹² Ked razmislineja so o Jehova phenđa so valjani te poštujina amare roditeljen, šaj pućeja tut: „Da li me poštujinava me roditeljen?“ Šaj ki godi avena tuće o situacije ked valjanđan te ćere diso pobuter olenđe. Ama, ma mislin so akana tano kasno. O vreme našti te irine, ama akana šaj te de sa tutar te ćere lenđe diso pobuter. Šaj te odvojine to vreme olenđe, te đa te pazarine olenđe, te pomožine len te aćhon paše e Jehovaja, te ohrabrine len hem te utešine len. Ked ćereja ađahar, tu mothoveja so ićereja tut ko odova so pisini ki Levitska 19:3.

13. (a) Kova savet tano pana dindo ki Levitska 19:3? (b) Premalo Luka 4:16-18, sar šaj hem amen avdije te ova sar o Isus?

¹³ Andi Levitska 19:3 šaj te sikljova pana diso kotar odova sar te ova sveta. Odothe vaćeri pe ando sabat. Amen avdije na ićeraja amen ko Mojsijeso zakon hem odolese na valjani te ićera o sabat. Ama, but šaj te sikljova ando odova sar o Izraelcija ićerđe o sabat hem sar o sabat pomožinđa olenđe. O sabat hine vreme ked valjanđe te odmorinen pe kotar pi buti hem te odvojinen vreme e Devlese. * Odolese, ked o Isus hine ki phuv, ko odova dive ov đelo ki sinagoga koja hine ki olesi diz hem odothe čitinđa e Devleso Lafi. (Izl. 31:12-15; čitin Luka 4:16-18.) O lafija „ićeren o sabat“ andi Levitska 19:3 valjani te podstakninen amen svako dive te odvojina vreme e Devlese. Da li mislineja so valjani diso te menjine te šaj te ćere odova? Ako deja sa tutar te odvojine vreme e Devlese, tegani tu ka ove pana popaše e Jehovaja, a odova tano but važno te šaj te ova sveta.

14. Ando kova važno ćaćipe vaćeri pe ko 19. poglavlje andi knjiga Levitska?

¹⁴ Ko 19. poglavlje andi knjiga Levitska ko nekobor thana pomini pe jekh važno ćaćipe kova šaj te pomožini amen te aćhova sveta. Ko krajo ando 4. stiho pisini: „Me hijum o Jehova, tumaro Devel.“ Odola ja slična lafija 16 putija pominena pe ko akava poglavlje. Odola lafija setinćerena amen ki prvo zapovest: „Me hijum o Jehova, toklo Devel... Ma te ovel tut avera devela, osim mande“ (Izl. 20:2, 3). Svako ko mangela te ovel sveto na ismini te mukhel nikase hem nisose te ovel lese považno ando Jehova. Amen akharaja anav e Jehovase svedokija hem odolese mangaja te cida amen kotar sa so šaj te meljaćeri oleso sveto anav (Lev. 19:12; Is. 57:15).

15. Ko so podstakninena amen o stihija andi Levitska 19. poglavlje kola vaćerena ando odova sar valjanđe te den pe o žrtve?

¹⁵ O Izraelcija mothovđe so prihvatinđe e Jehova sar pe Devle ađahar so ićerđe pe  ko olese zakonija. Ki Levitska 18:4 pisini: „Ićeren tumen ko me zakonija hem ko me smernice hem živinen premalo lende. Me hijum o Jehova, tumaro Devel.“ Ko 19. poglavlje vaćeri pe hem ando disave smernice kola hine dinde e Izraelcenđe. Na primer, kotar 5. đi o 8. stiho, hem ko 21. hem ko 22. stiho vaćeri pe ando životinje kola valjanđe te den pe sar žrtva. Ked valjanđe te den žrtve, o Izraelcija valjanđe te pazinen te na meljaćeren „odova soj tano sveto e Jehovase.“ Odola stihija valjani te podstakninen amen te ćera odova so o Jehova mangela hem amare žrtve ja amare lafija kolencar hvalinaja le te oven ugodna olese, sar so pisini ko Jevrejima 13:15.

16. Kova načelo andi Levitska 19. poglavlje mothovi so okola so služinena e Devlese tane averćhane okolendar so na služinena olese?

¹⁶ Te šaj te ova sveta, amen valjani te ova spremna te ova averćhane averendar. Odova šaj te ovel pharo. Disavo puti amare amala, kolege, ja rođakija šaj te pheren amari godi te ćera diso so na sviđini pe e Jehovase. Tegani, svako amendar valjani te odlučini so ka ćerel. So šaj te pomožini amen te ana šukar odluka? Te dikha jekh zanimljivo načelo kova pisini ki Levitska 19:19. Odothe pisini: „Ma akhar o šeja kola tane ćerde ando duj različita materijalija.“ Odova zakon hine dindo sose o Izraelcija valjanđe te oven averćhane ando avera narodija. Amen avdije na ićeraja amen ko Mojsijeso zakon hem šaj te akhara različita šeja kola tane ćerde ando različita materijalija, sar soj tane pamuk, poliester, vuna hem viskoza. Ama, amen na mangaja te ova sar o manuša kola vaćerena hem ćerena o buća kola nane premalo Devleso Lafi, čak iako odola manuša tane amare amala, kolege ja rođakija. Amen mangaja amare rođakonen hem avere manušen, ama ked valjani te ana disave važna odluke, mangaja te šuna e Jehova, iako sebepi odova ka ova averćhane averendar. Odova tano but važno sose te ova sveta šaj te značini hem te ova odvojime asi služba e Devlese (2. Kor. 6:14-16; 1. Petr. 4:3, 4).

17-18. So sikljovaja andi Levitska 19:23-25?

¹⁷ O lafija „me hijum o Jehova toklo Devel“ valjanđe te setinćeren e Izraelcen so olengo amalipe e Jehovaja valjani te ovel lenđe ko prvo than. Sar on šaj hine te mothoven odova? O lafija andi Levitska 19:23-25 mothovena sar. (Čitin.) Te dikha so akala lafija značinđe aso Izraelcija kola  khuvđe ki Obećimi phuv. Ako jekh manuš sadinđa disavo kaš, trin berš na valjanđa te hal kotar odova kaš. Štarto berš, o plod valjanđa te del ko sveto šatori. Tek panđto berš šaj hine te hal o plod kotar odova kaš. Akava zakon valjanđa te pomožini e Izraelcenđe te haljon so olenge potrebe na valjani te oven lenđe ko prvo than. On valjanđe te mothoven so verujinena so o Jehova ka brinini pe olendar hem ole te ćhiven ko prvo than. O Jehova ćaće brininđa pe on te ovel len so te han. Isto ađahar, o Jehova podstakninđa len te oven phravde vastese hem odova so isi len te den ko sveto šatori, ko than kuri služinđa pe e ćaćutne Devlese.

¹⁸ O lafija kola pisinena ki Levitska 19:23-25 setinćerena amen ko lafija kola o Isus vaćerđa ked ićerđa i Propoved ki gora. Ov phenđa: „Ma brininen tumen… so ka han ja so ka pijen… tumaro nebesko Dad đanela so sa odova valjani tumenđe.“ O Devel ka brinini pe amendar sar so brinini pe hem ando ćiriklja (Mat. 6:25, 26, 32). Ked pomožinaja averenđe hem ked daja dobrovoljna prilogija, amen mothovaja so isi amen poverenje ano leste. O Jehova na bistrela odova so ćeraja hem but ka blagoslovini amen (Mat. 6:2-4). Ked hijam phravde vastese, amen mothovaja so haljovaja so značinena o lafija andi Levitska 19:23-25.

19. Sar pomožinđa tuće odova so sikljiljan kotar 19. poglavlje andi knjiga Levitska?

¹⁹ Ko akava članko razmotrinđam disave stihija kotar 19. poglavlje andi knjiga Levitska hem on pomožinđe amen te dikha sar šaj te ova sveta sar amaro Devel. Ked daja sa amendar te ova sar oleste, amen mothovaja so mangaja te ova sveta ko sa so ćeraja (1. Petr. 1:15). But manuša kola na služinena e Jehovase dikhena odova so amen ćeraja hem sebepi odova hvalinena e Devle (1. Petr. 2:12). Ama, isi pana but buća kola šaj te sikljova kotar 19. poglavlje andi knjiga Levitska. Ko aver članko, ka razmotrina pana disave stihija kotar odova poglavlje kola ka pomožinen amen te dikha sar šaj te ova sveta, sar so o apostol Petar podstakninđa amen.