O Jehova podstakinđa e Izraelcen te oven sveta. Sebepi odova, ov phenđa lenđe: „Ma vaćer o hovajba kola šaj te ruminen nekaso šukar anav. Ma ćer o buća sebepi kola to pašutno šaj te merel. Me hijum o Jehova“ (Lev. 19:2, 16).

O lafija „ma ćer o buća sebepi kola to pašutno šaj te merel“ ki hebrejsko ćhib bi ovena „ma ušti upro te pašutneso rat.“ Ama, so odola lafija značinena? Ki jekh jevrejsko knjiga koja vaćeri andi Levitska pisini: „Akava deo ando stih tano... pharo te haljova sose našti tačno te đana so akava hebrejsko izraz značini.“

Disave izučavaocija mislinena so akala lafija tane povezime odoleja so pisini ko jekh stiho angleder: „Ked sudineja, ma ov nepravedno. Ma ov milosrdno premalo nekaste samo sebepi soj tano ćororo hem ma ov ki barvalengi strana. Pravedno sudin te pašutnese“ (Lev. 19:15). Odolese, i zapovest koja tani dindi ko 16. stiho „ma ćer o buća sebepi kola to pašutno šaj te merel“ šaj te značini so jekh Izraelco na valjanđa te ovel nepošteno ked sudini, ked ćerela buti hem ki pi porodica. Ov na valjanđa te ovel nepošteno samo te bi ov nakhela šukar. Ćaće tano so amen na ka ćera akala buća, ama isi pana jekh način sar šaj te haljova akala lafija.

Te dikha so pisini ko početko ando akava stih. O Devel phenđa pe narodose so na valjani te vaćeren klevete. Ked neko ćerela averengo lafi, ov šaj te ćerel but bare problemija. Ama, i kleveta tani diso but poozbiljno (Posl. 10:19; Prop. 10:12-14; 1. Tim. 5:11-15; Jak. 3:6). Ked neko vaćeri klevete, ov vaćeri hovajba sose mangela te rumini nekaso šukar anav. Sebepi odola hovajba, neko čak šaj te našali po životi. Setin tut so disave manuša vaćerđe hovajba ando Navutej hem odolese ov hine mudardo (1. Kralj. 21:8-13). Ćaće, sebepi i kleveta neko šaj te ćerel oleso pašutno te merel, sar so vaćeri pe ko dujto deo andi Levitska 19:16.

Uzo odova, ked vaćeraja hovajba sebepi so mangaja te rumina nekaso šukar anav, odova mothovi so mrzinaja odola osoba. Ki 1. Jovanova 3:15, pisini: „Ko god mrzini pe phrale, ov tano ubica, a tumen đanena so nijekh ubica našti večno te živini.“ Odolese, palo odova so vaćerđa o lafija ando 16. stiho, o Devel pana phenđa: „Ma mrzin te phrale“ (Lev. 19:17).

Akija zanimljivo zapovest andi Levitska 19:16 tani jekh šukar savet sarinenđe amenđe. Amen na valjani te ovel amen lošno mišljenje averendar niti te vaćera hovajba sebepi kola nekaso šukar anav šaj te rumini pe. Ako vaćeraja hovajba nekastar samo sose ov na sviđini pe amenđe sar manuš ja sebepi so hijam ljubomorna, odova mothovi so mrzinaja le. Sar hrišćanija, amen na valjani nikas te mrzina (Mat. 12:36, 37).