1. Sar upro amende utičini odova so o Jehova mangela te del amen o večno životi?

 O Jehova obećinđa so ka del „večno đivdipe“ okolenđe kola šunena le (Rimlj. 6:23). Ked razmislinaja odolestar, amaro mangipe premalo leste ovela pana pobaro. Amaro nebesko Dad but mangela amen hem odolese mangela te živina večno hem zauvek služina lese.

2. Sar pomožini amenđe i nada ko večno životi?

² E Devleso obećanje so ka živina večno, pomožini amen te istrajina ked isi amen pharipa. Čak hem ako amare dušmanija phenena so ka mudaren amen, amen na ćhinavaja te služina e Jehovase. Sose? Odolese so đanaja so ako aćhovaja verna e Jehovase, ov ka uskrsnini amen hem ka ovel amen prilika te živina večno (Jov. 5:28, 29; 1. Kor. 15:55-58; Jevr. 2:15). Sose šaj te ova sigurna so amen šaj te živina večno? Akana ka razmotrina disave razlogija.

3. Sose šaj te ova sigurna so o Jehova šaj te del amen o večno životi? (Psalam 102:12, 24, 27)

³ O Jehova šaj te del amen o večno životi odolese so olestar avela o životi hem ov živini večno (Ps. 36:9). Nekobor stihija andi Biblija potvrdinena so o Jehova oduvek postojinđa hem so uvek ka postojini. Na primer, ko Psalam 90:2 pisini so o Jehova postojini „oduvek hem zauvek.“ Ko 102. psalam pisini diso slično. (Čitin Psalam 102:12, 24, 27.) A o prorok Avakum ando amaro  nebesko Dad pisinđa: „Na postojineja li tu oduvek, Jehova? Mo Devel, mo sveto Devel, tu na mereja“ (Avak. 1:12).

4. Da li valjani te brinina amen ako na haljovaja odova so o Jehova oduvek postojinđa? Objasnin.

⁴ Da li tano tuće pharo te haljove so o Jehova „večno“ postojini? (Is. 40:28). Butenđe tano odova pharo te haljon. O Elijuj ando Devel phenđa: „O broj ando olese berša amen našti te đena“ (Jov 36:26). Ako amen našti te haljova diso, odova na značini so odova nane tačno. Na primer, šaj našti te haljova sar ćerela buti jekh sijalica, ama odova na značini so oj na postojini. Isto ađahar, amen o manuša našti potpuno te haljova odova so o Jehova oduvek postojinđa hem so uvek ka postojini. Ama, odova so amen diso našti te haljova na značini so o Jehova našti te ćerel odova (Rimlj. 11:33-36). Ov hine angleder so o svemir postojinđa hem angleder te oven bilo save buća ko svemir, sar soj tane o kham hem o ćerenja. Amen hijam sigurna so o Jehova „pe silaja ćerđa i phuv“ hem so ov postojinđa angleder so „phravđa o nebo“ (Jer. 51:15; Dela 17:24). Kova tano pana jekh razlog sose hijam sigurna so amen šaj te živina večno?

5. Savi nada o Adam hem i Eva hine len?

⁵ O Jehova stvorinđa e životinjen te živinen jekh vreme hem palo odova te meren. Ama, samo e manušen stvorinđa te živinen večno. O Jehova phenđa e Adamese: „Kotar kaš ando penđaribe soj tano šukar hem soj tano lošno na ismineja te ha, sose odova dive ked ka ha olestar, sigurno ka mere“ (Post. 2:17). Ked bi o Adam hem i Eva šunena e Jehova, on ne bi merena. Verovatno bi o Jehova ko jekh trenutko mukhela len te han kotar „kaš ando životi.“ Ađahar bi ovela len e Devlesi garancija so šaj te „živinen večno“ b (Post. 3:22).

6-7. (a) So pana mothovi so o manuša nane stvorime te meren? b) So bi tu mangeja te ćere ko raj? (Dikh i slika)

⁶ Disave naučnikija arakhlje dokazija so amari godi šaj te ćedel but pobuter informacije nego so amen šaj te ćeda aso celo amaro životi. Ko 2010. berš, ko jekh časopis hine pisimo so amari godi šaj te ćedel skoro 2,5 milionija gigabajtija informacije (Scientific American  Mind). Odova tano isto sar ked bi 3 milionija satija ili 300 berš ovela diso snimimo ki televizija. Ama, amari godi šaj te ćedel pana but pobuter odolestar. Akava mothovi so o Jehova ćerđa amari godi te ćedel pobuter informacije nego so amen šaj te ćeda aso samo 70 ili 80 berš (Ps. 90:10).

⁷ O Jehova stvorinđa amen te ovel amen bari želja te živina večno. I Biblija phenela so o Jehova i „večnost e manušenđe ko vilo ćhivđa“ (Prop. 3:11). Odova tano pana jekh razlog sose ko meribe dikhaja sar ko amaro dušmani (1. Kor. 15:26). Ako bi jekh dive ovaja naborme, da li bi samo ađićeraja te mera? Na. Tegani, đaja ko doktori hem laja disave tablete te šaj te ovel amenđe pošukar. U stvari, amen ćeraja sa so šaj te ne bi meraja. A ked neko kas mangljam merela, bizo obzir da li hine phuro ili terno, amenđe tano but pharo (Jov. 11:32, 33). O Devel ne bi stvorini amen večno te živina hem te del amen odija želja ako na hine le namera večno te živina. Ama, isi pana razlogija sose šaj te verujina so šaj te živina večno. Hajde te dikha so o Jehova ćerđa angleder hem so akana ćerela so mothovi so na menjinđa pi namera.

8. Premalo Isaija 55:11, sose šaj te ova sigurna so o Jehova ka ispunini pi namera?

⁸ Iako o Adam hem i Eva grešinđe hem sebepi odova sare amen meraja, o Jehova na menjinđa pi namera (Čitin Isaija  55:11.) Ov pana mangela amen večno te živina. Ked razmislinaja ando odova so o Jehova phenđa hem so ćerđa, amen hijam sigurna so ov ka ispunini pi namera.

9. So o Jehova obećinđa? (Danilo 12:2, 13)

⁹ O Jehova obećinđa so ka vazdel okolen kola mulje hem so on večno ka živinen (Dela 24:15; Titu 1:1, 2). O verno manuš o Jov phenđa so o Jehova jedva ađićeri te vazdel okolen so mulje (Jov 14:14, 15). Isto ađahar, o prorok Danilo đanđa so o Jehova šaj te uskrsnini e manušen hem so šaj te živinen večno. (Ps. 37:29; čitin Danilo 12:2, 13.) O Judejcija ko Isuseso vreme isto đanđe so o Jehova pe verno slugenđe šaj te del o „večno životi“ (Luka 10:25; 18:18). Nekobor putija hem o Isus Hrist vaćerđa ando akava obećanje, a đanaja so o Jehova hem ole uskrsninđa (Mat. 19:29; 22:31, 32; Luka 18:30; Jov. 11:25).

10. Ko so uverinena amen o uskrsenja kola hine ko purano vreme? (Dikh i slika)

¹⁰ E Jehovastar avela o đivdipe hem ov isi le moć te irini e manušen ko životi. Asavki moć dinđa hem e prorokose e Ilijase te uskrsnini jekhe udovicake ćhave (1. Kralj. 17:21-23). Uzi Jehovasi pomoć hem o prorok Jelisej uskrsninđa jekhe Sunamkake ćhave (2. Kralj. 4:18-20, 34-37). Akala hem avera primerija mothovena amenđe so o Jehova isi le moć te irini e manušen ko đivdipe. Đi hine ki phuv, o Isus mothovđa so oleso Dad dinđa le asavki moć (Jov. 11:23-25, 43, 44). Akana, o Isus tano ko nebo hem olese tani „dindi sa i vlast ko nebo hem ki phuv.“ Odolese, ov šaj te ispunini o obećanje kova phenela so „sare kola tane ano grobo“ ka uskrsninen hem večno ka živinen (Mat. 28:18; Jov. 5:25-29).

11. So isi amen sebepi i otkupnina?

¹¹ Sose o Jehova mukhlja oleso manglo Ćhavo te merel? O Isus odgovorinđa amenđe ko akava pućibe ked phenđa: „O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jov. 3:16). Odoleja so dinđa pe Ćhave sar žrtva amenđe, o Devel phravđa o udara te šaj amen večno te živina (Mat. 20:28). O apostol Pavle akalestar phenđa: „Sose o meribe alo prekalo manuš, hem o uskrsenje ando mule avela prekalo manuš. Sar so sare merena sebepi o Adam, ađahar sebepi o Hrist sare ka uskrsninen“ (1. Kor. 15:21, 22).

12. Sar o Kraljevstvo ka ispunini e Jehovasi namera?

¹² O Isus sikavđa pe učenikonen te molinen pe e Devleso Kraljevstvo te avel hem te ćerel pe olesi volja ki phuv (Mat. 6:9, 10). E Jehovasi namera tani o manuša zauvek te živinen ki phuv. Te šaj te ispunini pe odova, o Jehova ćhivđa pe Ćhave te ovel Kralj ando leso Kraljevstvo. Isto ađahar, birinđa 144 000 manušen te vladinen olese Ćhaveja (Otkr. 5:9, 10).

13. So o Jehova akana ćerela hem so tu valjani te ćere?

¹³ Avdije, o Jehova ćedela o „baro mnoštvo“ ando manuša hem sikavi len save valjani te oven ked ka avel oleso Kraljevstvo (Otkr. 7:9, 10; Jak. 2:8). Sebepi o maribe hem i mržnja, o manuša  ko akava sveto nane ko jekhipe. Ama, amen daja sa amendar te na ova sar olende. Odolese ka phene, ando mačija ćeraja raonikija (Mih. 4:3). E Devlese sluge na đana ko maribe, već pomožinena e manušenđe te dobinen o pravo đivdipe, ađahar so sikavena len ando Devel hem andi olesi namera (1. Tim. 6:19). Disavo puti, šaj olengi porodica protivini pe lenđe ja isi len finansijska problemija sose podupirinena e Devleso Kraljevstvo. Ama, o Jehova niked na aćhavi len hem uvek dela len odova so valjani lenđe (Mat. 6:25, 30-33; Luka 18:29, 30). Sebepi sa akala buća, amen hijam uverime so e Devleso Kraljevstvo ćaće ka avel hem so o Devel prekalo leste ka ispunini pi namera.

14-15. Sar o Jehova ka uništini o meribe?

¹⁴ O Isus Hrist tano akana Kralj ko Devleso Kraljevstvo hem ov ka ćerel sa odova so o Jehova phenđa (2. Kor. 1:20). Ko 1914. berš, ov pobedinđa pe dušmanen (Ps. 110:1, 2). Ov hem okola kola ka vladinen oleja pana hari ka uništinen sa e lošno manušen (Otkr. 6:2).

¹⁵ Đi ka trajini e Isusesi hiljadaberšengi vladavina, o mule ka uskrsninen hem okola kola ka šunen e Jehova ka oven  savršena. Pali završno kušnja, sa okola kolen o Jehova ka proglasini soj tane pravedna „ka nasledinen i phuv hem zauvek ka živinen upro late“ (Ps. 37:10, 11, 29). Ko krajo, „o poslednjo dušmani... o meribe“ ka ovel „uništimo“ (1. Kor. 15:26).

16. Kova tano o najvažno razlog sose služinaja e Jehovase?

¹⁶ Ko akava članko dikhljam so amari nada temeljini pe ko Devleso Lafi. Odija nada pomožini amen te aćhova verna ko akala phare dive. Ama, amen na služinaja e Jehovase samo sebepi o večno životi. Amaro glavno razlog sose hijam verna e Jehovase hem e Isusese tano sose but mangaja len (2. Kor. 5:14, 15). Sebepi odova, amen mangaja te oponašina len hem averenđe te vaćera andi odija nada (Rimlj. 10:13-15). O Jehova ka ovel amaro amal ako daja sa amendar te na ova sebična, već velikodušna (Jevr. 13:16).

17. So valjani sare te ćera? (Matej 7:13, 14)

¹⁷ Da li hem tu ka ove maškaro okola kola ka živinen večno? O Jehova phravđa o udara aso odova. Ama, tutar zavisini da li ka aćhove ko drumo kova legari ko večno životi. (Čitin Matej 7:13, 14.) Savo ka ovel o životi ko raj ki phuv? O odgovor ko akava pućibe ka dobina ko aver članko.