Da li hijan spremno te „nasledine i phuv“?
SARE jedva ađićeraja te ispunini pe e Isuseso obećanje: „Bahtale tane okola soj tane krotka, sose ka nasledinen i phuv“ (Mat. 5:5). O pomazanikija ka nasledinen i phuv ked ka oven kraljija hem ked ka vladinen e Isuseja ko nebo (Otkr. 5:10; 20:6). Avera hrišćanija jedva ađićerena večno te živinen ki phuv. Tegani on ka oven savršena, bahtale hem ka ovel len mir. Đi na avela odova, on valjani te ćeren diso but važno. Na primer, on valjani te pomožinen i phuv te ovel raj, te obezbedinen sa so valjani okolenđe kola ka uskrsninen hem te sikaven len. Razmislin sar šaj akana te mothove so mangeja te ćere akala buća ko nevo sveto.
DA LI HIJAN SPREMNO TE ĆERE I PHUV RAJ?
Ked o Jehova phenđa e manušenđe „pheren i phuv hem vladinen upro late“, u stvari ov phenđa so celo phuv valjani te ovel raj (Post. 1:28). Okola kola ka živinen večno ka valjani te šunen odija isto zapovest. Ki početka, i phuv na ka ovel raj odolese so o edenski vrt više na postojini. Palo Armagedon, ka ovel amen but buti. Ka valjani te čistina disave delovija kola ka oven uništime. Odija na ka ovel lokhi buti!
Odova setinćeri amen ko odova so o Izraelcija valjanđe te ćeren ked irinđe pe ando Vavilon. Ki olengi phuv 70 berš niko na živinđa. Ama, o Isaija prorekninđa so uzi e Jehovasi pomoć on ka uspinen te obnovinen i phuv. Ko proročanstvo hine phendo: „Ka ćerel olesi pustinja te ovel sar o Eden hem olesi pusto ravnica sar e Jehovaso vrt“ (Is. 51:3). O Izraelcija uspinđe te obnovinen pi phuv. Isto ađahar, okola kola ka nasledinen i phuv uzo e Jehovaso blagoslov ka uspinen i phuv te ćeren te ovel raj. Pana akana, tu šaj te mothove so mangeja te učestvujine ko odova.
Jekh način sar šaj te mothove odova tano ađahar so ka trudine tut to ćher te ovel čisto. Odova valjani te ćere, čak iako te komšije na ćerena odova. Isto ađahar, šaj te pomožine te čistini pe hem te održini pe i dvorana ili i kongresno dvorana. Ako te okolnostija dozvolinena tuće, šaj te pomožine ked ovena disave prirodna katastrofe. Ađahar ka mothove so mangeja te pomožine e phralenđe hem e phenjenđe ked valjani lenđe. Puć tut: „Da li šaj te sikljovav disave veštine kola šaj te koristinav ko raj ako ka ovav othe?“
DA LI HIJAN SPREMNO TE POMOŽINE OKOLENĐE KOLA KA USKRSNINEN?
Odmah palo odova so uskrsninđa e Jairese ćhaja, o Isus phenđa te den la diso te hal (Mar. 5:42, 43). Na hine pharo te brininen pe andi jekh ćhaj koja hine la 12 berš. Ama, ka ovel amen but buti ked o Isus ka ispunini o obećanje so „sare kola tane ano grobo ka šunen o glaso ando e Devleso Ćhavo hem ka ikljon“ (Jov. 5:28, 29). Ki Biblija na pisini but ando odova, ama verovatno okolenđe kola ka uskrsninen ka valjani habe, šeja hem ćher. Da li akana spremineja tut odolese? Isi nekobor buća kola šaj te ćere.
So šaj te ćere akana te bi mothoveja so hijan spremno te nasledine i phuv?
Ked šuneja so o pokrajinsko nadgledniko avela ki ti skupština da li vićineja le ko ručko? Ked neko ikljola ando Betel hem avela ki ti skupština ili ked jekh pokrajinsko nadgledniko na služini više ki putujućo služba, da li hijan spremno te pomožine len te arakhen pese stan? Ako o regionalno ili o posebno kongres ka ovel ićerdo ko than kaj živineja, da li hijan spremno te pomožine angleder hem palo kongres hem da li ka ađićere e delegaten?
OV SPREMNO TE SIKAVE OKOLEN KOLA KA USKRSNINEN
Sebepi odova so pisini ko Dela 24:15 amen očekujinaja so milijarde manuša ka oven uskrsnime. But olendar na hine len prilika angleder te upoznajinen e Jehova. Palo uskrsenje on ka ovel len prilika aso odova. a E Jehovase verna iskusna sluge ka sikaven len (Is. 11:9). I Šarlot koja propovedinđa ki Evropa, Južno Amerika hem Afrika jedva ađićeri odova vreme. Oj radosno phenela: „Jedva ađićerava te sikavav okolen kola ka uskrsninen. Ked razmislinava nekastar kova živinđa angleder, često mislinava: ’Ked bi akija osoba hine đanela e Jehova, olako životi bi ovela skroz averćhane.‘ Jedva ađićerava te vaćerav okolenđe kola ka uskrsninen ando Jehova hem kobor olengo životi ka ovel pošukar ako ka služinen lese.“
Čak hem e Jehovase verna sluge kola živinđe angleder o Isus ka valjani te sikljon but buća. Zamislin kobor bari čast hem radost ka ovel amen te objasnina e Danilose sar ispuninđe pe o proročanstvija kola ov pisinđa, ama na haljilo so značinena. Zamislin sar ka ovel ked ka phena e Rutaće hem e Nojeminaće so ando olengo potomko alo o Mesija. Amen ka uživina đi ka sikava e manušen ki celo phuv hem tegani akava lošno sveto na ka ćerel amenđe problemija!
So šaj akana te ćere te bi oveja spremno ko nevo sveto te sikave okolen kola ka uskrsninen? Valjani te de sa tutar te ove pošukar učitelj hem redovno te đa ki služba (Mat. 24:14). Čak hem ako našti but te ćere ki služba, sebepi o berša ili disave avera okolnostija, ako deja toklo najšukar odoleja ka mothove so mangeja ko raj te sikave okolen kola ka uskrsninen.
Šukar tano te razmisline ando akala važna pućiba: Da li jedva ađićereja te nasledine i phuv? Da li radujineja tut so ka ćere i phuv te ovel raj, so ka sikave okolen kola ka uskrsninen hem ka pomožine len te ovel len sa so valjani lenđe? Tu šaj te mothove so hijan spremno te živine večno ki phuv ađahar so akana ka ćere o buća kola ka valjani te ćere ako ka nasledine i phuv!
a Dikh o članko „Buten anena đi i pravednost“ ki Stražarsko kula ando septembar 2022. berš.
