1. So o Isus phenđa e manušese kova hine uzo leste ko stubo? (Luka 23:39-43)

 O ISUS hem o duj zločincija osetinena bari dukh sose tane kovime ko stubo (Luka 23:32, 33). O solduj zločincija marena muj e Isusese so mothovi amenđe so nane olese učenikija (Mat. 27:44; Mar. 15:32). Ama, jekh olendar kotar jekhvar počmini averćhane te razmislini. Ov phenela: „Isus, setin tut koro mande ked ka ave ko toklo Kraljevstvo.“ A o Isus phenđa lese: „Obećinava tuće avdije, ka ove mancar ko raj.“ (Čitin Luka 23:39-43.) Nane amen nisavo dokaz so akava zločinco prihvatinđa i poruka ando „nebesko Kraljevstvo“, ando kova o Isus propovedinđa đi hine ki phuv. Isto ađahar, o Isus na phenđa lese so ov ka ovel deo ando nebesko Kraljevstvo (Mat. 4:17). O Isus vaćerđa oleja kotar raj kova ka ovel ki phuv. Sar đanaja odova?

2. Sar đanaja so o zločinco kova kajinđa pe hine Jevrejin?

² O zločinco kova kajinđa pe verovatno hine Jevrejin. Odova zločinco phenđa averese: „Na daraja li ando Devel? Pa hem tu dobinđan isto kazna sar oleste“ (Luka 23:40). O Jevreja služinđe jekhe Devlese. Ama, o manuša ando aver narodija služinđe bute devlenđe (Izl. 20:2, 3; 1. Kor. 8:5, 6). Ked akala duj zločincija bi ovena ando aver narodo, tegani o pućibe bi ovela: „Na daraja li ando devela?“ Isto ađahar, o Isus na hine bićhaldo e manušenđe ando avera narodija, već „e našalde bakrenđe ando izraelsko narodo“ (Mat. 15:24). O Jehova phenđa e Izraelcenđe so ka vazdel e mulen. Akava zločinco verovatno razmislinđa odolestar so o Jehova ka uskrsnini e  Isuse hem so ka ćhivel le te ovel Kralj ko oleso Kraljevstvo. Odolese nadinđa pe so hem ole ka vazdel.

3. So o zločinco verovatno haljilo ked o Isus vaćerđa lese ando raj? Objasnin. (Postanak 2:15)

³ Ako o zločinco kova kajinđa pe hine Jevrejin, tegani ov đanđa ko hine o Adam hem i Eva hem so o Jehova ćhivđa len te živinen ko raj ki phuv. Odolese ked o Isus vaćerđa lese ando raj, ov verovatno haljilo so odova tano jekh šužo vrt akate ki phuv. (Čitin Postanak 2:15.)

4. Ko so podstakninena amen o lafija kola o Isus phenđa e manušese kova hine oleja ko stubo?

⁴ E Isusese lafija kola phenđa akale manušese podstakninena amen te razmislina savo ka ovel o životi ko raj. U stvari, ando raj šaj but te sikljova ked razmislinaja odolestar savo hine o životi ked vladinđa o kralj Solomon. Ki Biblija pisini so o Isus tano pobaro ando Solomon. Odolese, o Isus hem okola so ka vladinen oleja ka ćeren i phuv te ovel raj (Mat. 12:42). Kotar akava dikhaja so o „avera bakre“ ka valjani diso te ćeren te šaj te živinen ko raj ki phuv (Jov. 10:16).

5. So mislineja, savo ka ovel o životi ko raj?

⁵ So mislineja, savo ka ovel o životi ko raj? Šaj zamislineja so odova ka ovel jekh šužo vrt sar so hine o Eden (Post. 2:7-9). Isto ađahar, šaj ki godi avela tuće o proročanstvo kova pisinđa o prorok Mihej, so e Devleso narodo „ka bešel tali pi drakh hem tali pi smokva“ (Mih. 4:3, 4). Ja razmislineja ando stihija kola vaćerena ando odova so ka ovel amen but hajbe (Ps. 72:16; Is. 65:21, 22). Zamislin kokri tut sar bešeja ko astali kova tano pherdo habe. Šaj osetineja kobor šukar mirišinena o luluđa kola tane othe. Ja zamislin sar tu, ti porodica, te amala hem okola kola uskrsninđe asana hem uživinena ko odova so šaj te oven zajedno. Akava nane samo suno. Šaj te ove sigurno so akala buća ćaće ka oven. Isto ađahar, šaj te ove sigurno so ko raj ka uživine ki ti buti.

6. So ka ćera ko raj? (Dikh i slika)

⁶ O Jehova ađahar ćerđa amen te šaj te uživina ko odova so ćeraja (Prop. 2:24). Đi ka trajini e Hristesi vladavina, amen ka ovel amen bari buti. Okola so ka preživinen i bari nevolja hem okola so ka uskrsninen, ka valjani lenđe hajbe, šeja hem ćher. Te šaj te ovel len odova, amen ka valjani te ćera but buti. Sar so o Adam hem i Eva valjanđe te ćeren celo phuv te ovel raj hem amen ka valjani te ćera odova palo Armagedon.  Isto ađahar, ka valjani te sikava okolen kola ka uskrsninen, a kola ništa na đanđe ando Jehova hem okolen kola hine verna e Jehovase, ama mulje but berš angleder o Isus.

7. Ko so šaj te ova sigurna hem sose?

⁷ Sose šaj te ova sigurna so ko raj ka ovel amen mir, sa odova so valjani amenđe hem so o buća ka oven šukar organizujime? Odolese so o Jehova već mothovđa amenđe savo ka ovel o životi ked oleso Ćhavo ka vladini. E Solomonesi vladavina mothovi amenđe odova.

8. Sar o lafija ando Psalam 37:10, 11, 29 ispuninđe pe palo odova so o David pisinđa len? (Dikh o „Pućiba ando čitaocija“ ko akava izdanje)

⁸ O Jehova phenđa e Davidese te pisini savo ka ovel o životi ked ki budućnost ka vladini o mudro hem o verno kralj. (Čitin Psalam 37:10, 11, 29.) Ked vaćeraja e manušencar ando raj, but putija čitinaja lenđe o lafija ando Psalam 37:11, sebepi so hem o Isus citirinđa akala lafija hem phenđa so ka ispuninen pe ki budućnost (Mat. 5:5). Ama, akala lafija mothovena amenđe savo hine o životi ked o Solomon vladinđa. Tegani, e Devleso narodo hine le baro mir, hine len sa so valjanđa lenđe. Ki odija phuv samći thavdinđa „thud hem avđin.“ O Devel phenđa: „Ako ka živinen premalo me odredbe... ka ćerav te ovel mir ki tumari phuv, ked ka đan ko sojbe na ka daran nikastar“ (Lev. 20:24; 26:3, 6). Akala lafija ispuninđe pe ked o Solomon vladinđa (1. Let. 22:9; 29:26-28). Isto ađahar, o Jehova phenđa so o lošna manuša više „na ka oven“ (Ps. 37:10). Odova so pisini ko Psalam 37:10, 11, 29 ispuninđa pe ko purano vreme. Ama, odola lafija ka ispuninen pe hem ki budućnost.

9. So i kraljica andi Sava phenđa ando Solomoneso kraljevstvo?

⁹ I kraljica andi Sava šunđa kobor baro mir hem šukaripe isi len o Izraelcija sebepi so vladini o kralj Solomon. Odolese,  oj nakhlja baro drumo hem alji ko Jerusalim te dikhel sar bešena o buća (1. Kralj. 10:1). Palo odova so dikhlja o baro šukaripe ko Solomoneso kraljevstvo, oj phenđa: „Ni ekvaš na hine maje vaćerdo... Blago te manušenđe hem te slugenđe kola tane uvek anglo tute hem šunena ti mudrost“ (1. Kralj. 10:6-8). Ama, o šukaripe kova hine ko Solomoneso kraljevstvo tano samo jekh primer so ka ćerel o Jehova ked o Isus ka vladini.

10. Sar tano o Isus pobaro kotar Solomon?

¹⁰ O Isus tano but pošukar vladari ando Solomon. Sose? O Solomon hine nesavršeno manuš, ćerđa bare greške hem sebepi odova e Devleso narodo hine le bare pharipa. Ki aver strana, o Isus tano savršeno vladari hem niked na grešinđa (Luka 1:32; Jevr. 4:14, 15). Ked hine ki phuv, ov aćhilo verno e Jehovase iako o Satana ćerđa lese bare pharipa. Odoleja mothovđa so ov niked na ka grešini hem na ka ćerel diso sova ka povredini e Devlese slugen. Ćaće, o Isus tano najšukar Kralj kova šaj te ovel amen.

11. Ko ka vladini e Isuseja ko nebo?

¹¹ O Isus hem o 144 000 pomazanikija zajedno ka brininen pe ando Devlese sluge hem ka ispuninen e Jehovasi namera (Otkr. 14:1-3). Ked hine ki phuv, on nakhlje bare pharipa hem odolese šaj najšukar te haljon e manušen kola ka živinen ki phuv. Ama, so on pana ka ćeren?

12. So o Jehova ka del e pomazanikonđe te ćeren?

¹² O Isus hem o pomazanikija ka ćeren but pobari buti ando Solomon. O izraelsko kralj valjanđa te vladini upro milionija manuša, ama samo ki jekh phuv. Ama, o Isus hem o pomazanikija ka vladinen ko Devleso Kraljevstvo upro milijarde manuša hem ki celo phuv. Ćaće, o Jehova e Isusese hem e pomazanikonđe mothovđa but bari čast!

13. Savi odgovornost ka ovel len o pomazanikija?

¹³ Sar o Isus hem o 144 000 ka oven kraljija hem ka služinen sar sveštenikija (Otkr. 5:10). Ko purano vreme, ked o Izraelcija valjanđe te ićeren pe ko Mojsijeso zakon, o sveštenikija pomožinđe e narodose te oven saste hem te oven popaše e Jehovaja. Odova zakon hine „samo senka ando blagoslovija kola valjani te aven“ (Jevr. 10:1). Ando akava sikljovaja so o Isus hem okola kola ka vladinen oleja, ka pomožinen e narodose te oven saste hem te oven e Jehovase amala. Amen na đanaja sar tegani odola kraljija hem sveštenikija ka vaćeren e Devlese narodoja. Ama, sar god te ovel e Jehovaso narodo tegani ka dobini vođstvo kova ka valjani lese (Otkr. 21:3, 4).

14. So ćerena o „avera bakre“ hem o „tikno stado“?

¹⁴ O Isus phenđa so okola kola ka vladinen oleja tane „o tikno stado“ (Luka 12:32). Ama, ov vaćerđa hem andi jekh aver grupa, o „avera bakre.“ Akala duj grupe tane ko jekhipe sar jekh stado (Jov. 10:16). On već akana zajedno sarađujinena, a odova ka ćeren hem ked ka ovel o raj. Tegani, okola kola tane deo ando „tikno stado“ ka vladinen e Isuseja ko nebo, a okola kola tane deo ando „avera bakre“ ka ovel len nada so zauvek  ka živinen ko raj. Ama, o „avera bakre“ već akana valjani te ćeren diso te šaj te živinen ko raj.

15. (a) Sar o „avera bakre“ sarađujinena e Hristese phralencar? (b) Sar šaj te oponašine akale phrale kotar slika?

¹⁵ O zločinco kova pokajinđa pe, na hine le prilika te mothovi e Isusese kobor tano zahvalno aso sa odova so ćerđa lese sose mulo. Ama, amen isi amen prilika te mothova e Isusese kobor mangaja le. Sar šaj te ćera odova? Ađahar so ka pomožina e Isusese phralenđe. O Isus phenđa so amenđe ka ovel sudimo premalo odova sar amen ponašinaja amen premalo olende (Mat. 25:31-40). Amen šaj te pomožina len ađahar so zajedno olencar ka vaćera i šukar vest averenđe hem ka pomožina e manušenđe te oven e Isusese učenikija (Mat. 28:18-20). Odolese daja sa amendar te sikljova te koristina o glavna publikacije sar soj tani i knjiga Ov bahtalo zauvek! Ako akana nane tut nijekh kurs, sose ne bi ćhiveja tuće cilj te nudine e biblijako kurs so pobuter manušenđe?

16. So već akana šaj te ćera te šaj te pripremina amen te živina ko Devleso Kraljevstvo?

¹⁶ Amen na valjani te ađićera te avel o raj pa te ova manuša save o Jehova mangela. Već akana šaj te pazina ko odova so vaćeraja, so ćeraja hem save navike isi amen. Isto ađahar, šaj te mothova so hijam verna amare romese ja romnjaće ja amare phralenđe ki skupština. Ako akana, ko akava lošno sveto, daja sa amendar te ićera amen ko Jehovase moralna merilija, ko nevo sveto ka ovel amenđe polokho te ćera odova. Isto ađahar, već akana šaj te razvijina disavi veština koja ka koristina ked ka avel o raj. Dikh o članko „Da li hijan spremno te ’nasledine i phuv‘?“, kova tano ko akava izdanje.

17. Da li valjani te mukha te peraven amen o grehija kola angleder ćerđam? Objasnin.

¹⁷ Isto ađahar, amen na valjani te osetina krivica sebepi o grehija kola angleder ćerđam. Naravno, amen ka pazina te  na grešina hem te na phena so o Jehova ka oprostini amenđe sebepi e Isusesi otkupno žrtva (Jevr. 10:26-31). Ama, šaj te ova uverime so ako ćaće kajinaja amen, ako rodinđam pomoć ando Jehova hem ando starešine hem promeninđam amen, o Jehova spremno ka oprostini amenđe (Is. 55:7; Dela 3:19). Ma bistri so o Isus phenđa e farisejenđe: „Na aljum te vićinav e pravedna manušen, nego okolen soj tane grešna“ (Mat. 9:13). I otkupno žrtva tani dovoljno zorali te šaj te ućhari sa amare grehija.

18. So bi mangeja te puće e zločinco kova mulo uzo Isus?

¹⁸ Šaj li te zamisline tut ko raj sar vaćereja e zločincoja kova vaćerđa e Isuseja? Sigurno o solduj bi vaćerena odolestar kobor hijen zahvalno asi Isusesi žrtva. Verovatno bi pućeja le te phenel tuće sar hine e Isusese nekobor satija angleder te merel hem sar ov osetinđa pe đi vaćerđa e Isuseja. Ki aver strana, tu šaj te vaćere lese sar hine o životi ko akala poslednja dive. Ćaće ka ovel amenđe baro zadovoljstvo te proučina e manušencar sar soj tano ov (Ef. 4:22-24).

19. Sose ko raj na ka ovel amenđe dosadno? (Dikh i slika ki naslovno strana.)

¹⁹ Ko raj niked na ka ovel dosadno. Uvek ka ovel amen so te ćera hem ka upoznajina neve manušen. Najšukar kotar sa tano so svako dive ka ovel amen prilika pošukar te upoznajina amare nebesko Dade hem te uživina ko odova so ka del amen. Uvek ka ovel amen prilika te sikljova ando odova so ov stvorinđa. So pobuter ka živina, amaro mangipe premalo oleste ka ovel sa pobaro. Amen hijam but zahvalna e Jehovase hem e Isusese so dinđe amen po lafi so ka živina večno!