1. Sar o Jehova but putija šaj te odgovorini ki nekasi molitva?

 DA LI đanđan so o Jehova šaj prekalo tute te odgovorini ki nekasi molitva? Tu šaj te pomožine averenđe bilo te ove starešina, sluga pomoćnik, pioniri ja samo objavitelj. Odova šaj te ćere iako hijan terno, phuro, phral ja phen. Ked neko ando Jehova rodela te pomožini lese, amaro Devel but putija prekalo starešine ja avera verna sluge „utešini“ odola osoba (Kol. 4:11). Amen hijam but bahtale so šaj ađahar te služina e Jehovase hem te pomožina amare phralenđe. Amen šaj te pomožina amare phralenđe hem te utešina len ked isi disavi epidemija, prirodno katastrofa ja progonstvo.

2. Sose šaj te ovel pharo te pomožina averenđe ked isi epidemija?

² Sebepi i epidemija šaj te ovel amenđe pharo te pomožina jekh jekhese. Na primer, mangaja te đa ko amare phralja te dikha len sar tane, ama šaj odova nane bezbedno. Ja šaj mangaja te vićina okolen kola nane len te aven koro amende te han maro, ama ni odova našti. Isto ađahar, šaj mangaja te pomožina averenđe, ama pharo tano te ćera odova sose neko amarendar tano nabormo. Ama, ipak mangaja te pomožina amare phralenđe hem o Jehova tano bahtalo ked dikhela so amen daja sa amendar te pomožina len (Posl. 3:27; 19:17). Ama, so šaj te ćera?

3. So sikljovaja ando starešine kotar Dezijaki skupština? (Jeremija 23:4)

³ So šaj o starešine te ćeren? Ako služineja sar starešina, trudin tut šukar te penđare e objaviteljen andi ti skupština. (Čitin Jeremija 23:4.) Amari phen i Dezi b, andi koja vaćerđam ko okova članko, phenela: „O starešine andi mi  grupa uvek đelje mancar hem averencar ki služba hem družinđe pe amencar.“ Odolese, hine lenđe polokho te pomožinen amare phenjaće ked sebepi i korona mulje latar nekobor ćherutne.

4. Sose o starešine šaj hine te pomožinen amare phenjaće hem so o starešine sikljona odolestar?

⁴ I Dezi phenela: „Sebepi so upro starešine dikhljum sar upro me amala, hine maje lokho te vaćerav olencar odolestar sar osetinava man hem so brinini man.“ So šaj o starešine te sikljon? Šukar penđar okolen kastar brinineja tut angleder te ovel len disave pharipa. Ov olengo amal. Ako sebepi i epidemija našti te đa ko phralja, tegani arakh aver način sar te brinine tut olendar.“ I Dezi phenela: „Disavo puti ko jekh dive nekobor starešine vićinđe man ja pisinđe maje poruka. Isto ađahar, o stihija kola čitinđe maje but ohrabrinđe man, iako hine maje but penđarutne.“

5. Sar šaj o starešine te đanen so valjani e phralenđe hem sar šaj te pomožinen lenđe?

⁵ Jekh način sar šaj te đane so valjani e phralenđe tano ađahar so ka ove taktično (Posl. 20:5). Da li isi len tablete, so te han ja diso aver so valjani lenđe? Da li isi mogućnost te aćhon bizi buti ja da li isi len dovoljno pare te platinen i kirija? Da li valjani te pomožine len te ćeren o lila asi disavi materijalno pomoć? Iako amare phralja materijalno pomožinđe e Dezijaće, odova so najviše pomožinđa laće tano o mangipe kova o starešine mothovđe hem odova so koristinđe e Devleso Lafi te ohrabrinen la. Oj phenela: „O starešine molinđe pe mancar. Iako našti te setinav man so tačno phenđe ki molitva, but šukar setinava man sar osetinđum man. Tegani, samći o Jehova phenđa maje: ’Na hijan kokri‘“ (Is. 41:10, 13).

6. So o objaviteljija šaj ćeren te pomožinen averenđe? (Dikh i slika)

⁶ So avera šaj te ćeren? Amen ađićeraja o starešine te pomožinen e phralenđe hem e phenjenđe. Ama, o Jehova phenela so sare amen valjani te ohrabrina hem te pomožina jekh jekhese (Gal. 6:10). Disavo puti šaj te ćera disavi tikni buti okolese kova tano nabormo, ama ole odova šaj but te ohrabrini. Na primer, amare tikne šaj te crtinen ja te pisinen diso so ka ohrabrini jekhe phrale. Jekh terni osoba šaj te pazarini ja te ćerel diso ko ćher jekha phenjaće. Avera šaj te pripreminen diso hajbase hem te legaren odova okolese kova tano nabormo.  Naravno, ked isi disavi epidemija, sarinenđe ki skupština valjani ohrabrenje. Odolese, šaj te aćhova hari palo sastanko te vaćera e phralencar hem e phenjencar, bilo o sastanko te ićeri pe uživo ja prekalo video-poziv. Hem e starešinenđe valjani ohrabrenje. Disave starešinenđe, kola sebepi i epidemija hine len pana pobari buti ki skupština, o objaviteljija bićhalđe jekh tikno lil kuri pisinđe soj tane zahvalna aso sa odova so ćerena. Kobor tano šukar ked svako amendar „tešini hem ohrabrini jekh jekhe“! (1. Sol. 5:11).

7. Kola pharipa šaj te anel i prirodno katastrofa?

⁷ I prirodno katastrofa šaj prekali rat te menjini nekaso životi. Disave šaj te našaljen sa pe buća, po ćher, čak hem pe mangljen. Odova šaj te desini pe hem amare phralenđe. Sar šaj tegani te pomožina lenđe?

8. So o starešine hem o poglavarija valjani te ćeren angleder te ovel disavi prirodno katastrofa?

⁸ So šaj o starešine te ćeren? Phraljalen kola služinena sar starešine, pomožinen e phralenđe angleder te pripreminen pe asi prirodno katastrofa. Trudinen tumen sa o objaviteljija te đanen sar te oven ko kontakt tumencar hem so valjani te ćeren te šaj te oven bezbedna. I Margaret, kolatar angleder vaćerđam, phenela: „Amare starešine, ko deo so valjani e skupštinaće, phenđe so palem šaj te ovel požarija ko than kaj živinaja. On vaćerđe so ako o vlastija phenena so valjani te mukha amare ćhera, amen valjani odmah te ćera odova.“ Odija informacija hine ko pravo vreme, sose panđ kurće palo odova ćaće hine baro požar. Ko porodično proučibe, o poglavarija andi porodica šaj te vaćeren pe ćherutnencar so valjani te ćeren ako ovela disavi prirodno katastrofa. Ako tumen hem tumare ćhave hijen pripremime aso odova, tegani sare ka ovel tumen mir.

9. So o starešine šaj te ćeren angleder te ovel disavi katastrofa hem palo odova?

⁹ Ako služineja sar nadglednik andi ti grupa, angleder te ovel disavi katastrofa valjani te ovel tut o broja ando telefoni hem o adrese ando sa o objaviteljija. Sar đala o vreme, proverin da li tane odola broja tačna. Odolese so, ako ka ovel diso, šaj sigate te vićine e objaviteljen hem te đane so valjani lenđe. Odmah vaćer odova e phralese kova služini sar koordinator ando starešinstvo hem ov ka vićini e pokrajinsko nadgledniko. Ked akala phralja šukar sarađujinena, on šaj but pošukar te pomožinen e phralenđe. Palo požar, o pokrajinsko nadgledniko andi amari phen i Margaret, na suća 36 satija. Ov celo vreme hine ko kontakt e starešinencar đi on trudinđe pe te roden hem te brininen pe ando 450 phralja hem phenja kola morandilje te mukhen po ćher (2. Kor. 11:27). Odolese, sarine šaj hine te oven smestime.

10. Sose tano važno o starešine te brininen pe ando objaviteljija? (Jovan 21:15)

¹⁰ O starešine isi len odgovornost te ohrabrinen e objaviteljen ađahar so ka koristinen e Devleso Lafi hem te pomožinen okolenđe kola tane depresivna (1. Petr. 5:2). Ked ovela disavi katastrofa, o starešine valjani te dikhen da li svako objavitelj tano smestimo ko bezbedno than, da li isi le so te hal, so te uravi hem kaj te ovel. Ama, masekoncar palo odova, odole phralenđe ka valjani neko ko ka ohrabrini len hem utešini len. (Čitin Jovan 21:15.) Amaro phral, o Harold, kova služini sar član ando Odbor hem kova vaćerđa bute phralencar hem phenjencar kola doživinđe disavi prirodno katastrofa, phenela: „Valjani  but vreme te nakhel đi na uštena ko pe pre. On šaj ka nastavinen te živinen sar angleder, ama ki olengi godi pana ka oven olenge mangle kola mulje, sa odova so našalđe hem so morandilje te nakhen. Sebepi odova, šaj te osetinen bari tuga hem dukh ko vilo. Ama, odova na značini so olengi vera nane zorali, već soj tane on samo manuša.“

11. So šaj pana ka valjani disave porodicenđe?

¹¹ Amare starešine primeninena o savet kova phenela te „roven okolencar kola rovena“ (Rimlj. 12:15). Okolen kola doživinđe disavi katastrofa šaj ka valjani te uverinen so o Jehova hem olenge phralja but mangena len. O starešine ka podstakninen len hem ponodri te brininen pe andi pi duhovnost, avere lafencar, redovno te molinen pe, te proučinen, te đan ko sastankija hem ki služba. Isto ađahar, ka podstakninen e roditeljen te pomožinen pe ćhavenđe te razmislinen ando buća kola nijekh prirodno katastrofa našti te uništini. Tumen o roditeljija, vaćeren tumare ćhavenđe so o Jehova uvek ka ovel olengo amal hem so uvek ka pomožini lenđe. Isto ađahar, vaćeren lenđe so on uvek ka oven deo andi Jehovasi porodica ki phuv hem so o phralja hem o phenja tane spremna te pomožinen lenđe ked god diso valjani (1. Petr. 2:17).

12. Sar šaj avera te pomožinen? (Dikh i slika)

¹² So avera šaj te ćeren? Ako uzo tute hine disavi prirodno katastrofa, tegani puć e starešinen sar šaj te pomožine. Šaj jekh vreme ko to ćher te oven o phralja kola našalđe po ćher ja o phralja kola alje te pomožinen. Ja šaj te spremine diso hajbase hem te legare odole objaviteljenđe. Ako i katastrofa hine dur ando to than, šaj te pomožine ađahar so ka moline tut odole phralenđe (2. Kor. 1:8-11). Isto ađahar, šaj te pomožine ađahar so ka de dobrovoljno prilog (2. Kor. 8:2-5). Ako šaj te đa odothe kuri hine i katastrofa, puć e starešinen sar šaj te pomožine. Ako ka ove vićimo te pomožine, verovatno o phralja ka den tut obuka te šaj te sikljove sar šaj ko najšukar način te pomožine e phralenđe.

13. Kola problemija isi len amare phralja ko phuvja kuri amaro delo tano zabranimo?

¹³ Ko phuvja kuri amaro delo tano zabranimo, o progonstvo šaj te ćerel bare problemija amare phralenđe. Uzo progonstvo, on isi len finansijska problemija,  naborme tane hem tugujinena palo okola kola mule lendar. Sebepi i zabrana, o starešine šaj našti te đan ko objaviteljija ja te vaćeren okolencar kase valjani ohrabrenje hem uteha. Odova desinđa pe amare phralese e Andrejese, kolestar vaćerđam ko okova članko. Jekh phen andi olesi grupa asi služba hine la finansijska problemija. Palo odova hine la udes. Valjanđa nekobor putija te ćeren la operacija hem naštinđa te ćerel buti. Sebepi i zabrana hem i pandemija, o phralja pomožinđe laće odobor kobor šaj, ama o Jehova dikhlja kobor hine laće pharo.

14. Sar o starešine mothovena so osloninena pe upro Jehova?

¹⁴ So šaj o starešine te ćeren? O Andrej molinđa pe hem ćerđa sa so šaj. Sar o Jehova odgovorinđa ko olese molitve? Ov podstakninđa avere phralen te pomožinen odola phenjaće. Disave olendar legarđe la ko lekari. Avera dinđe la pare. O Jehova podstakninđa len te ćeren sa so šaj hem blagoslovinđa olengo trud (Jevr. 13:16). Phraljalen, kola služinena sar starešine, ked ki tumari phuv isi zabrana, zamolinen averen te pomožinen e phralenđe (Jer. 36:5, 6). Soj tano najvažno, osloninen tumen upro Jehova. Ov šaj te pomožini tumenđe te brininen tumen ando phralja hem phenja.

15. Sar šaj te mothova so hijam ko jekhipe ked doživinaja progonstvo?

¹⁵ So avera šaj te ćeren? Đi trajini i zabrana, amen šaj te ćeda amen ko tikne grupe amare phralencar. Odolese, sar niked angleder, den sa tumendar te oven ko mir tumare phralencar. Borinen tumen protiv o Beng, a na jekh protiv aver. Nakhen prekalo greške hem sigate rešinen o problemi kova isi tumen maškar tumende (Posl. 19:11; Ef. 4:26). Spremno pomožinen jekh jekhese (Titu 3:14). Odova so o phralja andi Andrejesi grupa pomožinđe amare phenjaće, but šukar utičinđa upro avera. On ulje pana popaše, ulje sar porodica (Ps. 133:1).

16. Premalo Kološanima 4:3, 18, sar šaj te pomožina e phralenđe kola doživinena progonstvo?

¹⁶ But phralja hem phenja služinena e Jehovase, iako amaro delo ko olenge phuvja tano zabranimo ja ograničimo. Disave olendar tane ćhivde ko phanlipe sebepi pi vera. Amen šaj te molina amen olenđe hem aso olenge porodice. Isto ađahar, šaj te molina amen hem okolenđe  kola rizikujinena pi sloboda sose mangena te pomožinen len. On ohrabrinena len te verujinen so o Jehova ka pomožini lenđe te ovel len sa odova so valjani lenđe hem braninena len anglo sudo. c (Čitin Kološanima 4:3, 18.) Odolese, niked ma bistri kobor ti molitva šaj te pomožini okolenđe kola tane ko phanlipe (2. Sol. 3:1, 2; 1. Tim. 2:1, 2).

17. Sar šaj već akana te pripreminen tumen aso progonstvo?

¹⁷ Tu hem ti porodica šaj već akana te pripreminen tumen aso progonstvo (Dela 14:22). Ma razmislin ando lošna buća kola šaj te oven. Umesto odova, zorjaćer to amalipe e Jehovaja hem pomožin te ćhavenđe te ćeren odova. Ako disavo puti but brinineja tut, ćućar to vilo e Jehovase (Ps. 62:7, 8). Sar porodica, vaćeren ando odova sose šaj te ovel amen baro poverenje upro Jehova. d Sar so tumare ćhavenđe ka pomožini odova so ka pripreminen tumen asi prirodno katastrofa ađahar ka pomožini lenđe hem ako pripreminena tumen aso progonstvo. On ka oven hrabra hem ka ovel len mir sose tu angleder sikavđan len te ovel len poverenje upro Jehova.

18. So ka ovel amen ki budućnost?

¹⁸ O mir kova avela ando Devel šaj te arakhi amen (Fil. 4:6, 7). Ov dela amen mir ked hijam naborme, ked doživinaja disavi prirodno katastrofa ja progonstvo. Ov pomožini amen hem prekalo starešine kola but brininena pe amendar. Uzo odova, sare amen šaj te pomožina jekh jekhese. Akana valjani te da sa amendar te pripremina amen asi „bari nevolja“ (Mat. 24:21). Tegani, ka valjani te ovel amen mir hem te pomožina averenđe te ćeren odova. Ama palo odova, više na ka oven amen bare pharipa kola šaj te len amari snaga. Tegani ka ovel amen odova so o Jehova kotar početka manglja – savršeno hem trajno mir (Is. 26:3, 4).