Na. Odova so ov pisinđa hine ćaće.

Ko akava hem ko avera stihija, o David pisinđa: „Ađahar zauvek điljaja ka hvalinav to anav hem ka ićerav man ko me zavetija dive palo dive.“ „Jehova, Devla moklo, hvalinava tut celone vileja hem zauvek ka slavinav to anav.“ „Ka hvalinav tut po celo dive, ka hvalinav to anav doveka, ki celo večnost“ (Ps. 61:8; 86:12; 145:1, 2).

Ked o David pisinđa akala lafija, ov na mislinđa so niked na ka merel. Ov đanđa so o Jehova phenđa so o manuša ka meren sebepi o greh. Isto ađahar, kokri phenđa so hem ov tano grešniko (Post. 3:3, 17-19; Ps. 51:4, 5). Ov đanđa so čak hem o verna manuša sar soj tane o Avraham, o Isak hem o Jakov ko krajo mulje. Isto ađahar, đanđa so ko krajo hem ov ka merel (Ps. 37:25; 39:4). Ama, olese lafija kola tane pisime ko Psalam 61:8 vaćerena odolestar kobor ov manglja hem kobor hine odlučno te hvalini e Jehova zauvek, avere lafencar, sa đi tano đivdo (2. Sam. 7:12).

Disavo puti, o David pisinđa ando odova so nakhlja ko po životi, sar so dikhaja ko uvod ando 18, 51 hem 52 psalam. Ko 23. psalam, o David kova hem kokri hine pastiri, phenđa so o Jehova tano pastiri kova mothovi vođstvo, uteha hem zaštita. Sebepi odova, o David manglja celo po životi te služini e Devlese (Ps. 23:6).

Na valjani te bistra so o Jehova phenđa e Davidese te pisini sa odova so pisinđa. Ov pisinđa o proročanstvija kola but vreme palo odova ispuninđe pe. Na primer, ko 110. psalam o David pisinđa ando vreme ked oleso Gospod ka „bešel ki [e Devlesi] desno strana“ ko nebo hem ka dobini bari moć. Sose ka dobini odija moć? Te uništini e Devlese dušmanen hem te „anel i presuda upro narodija“ kola tane ki phuv. O David hine e Isuseso pretko, kova hine o Mesija. A o Mesija ka vladini kotar nebo hem „zauvek ka ovel svešteniko“ (Ps. 110:1-6). Kasnije, o Isus phenđa so o proročanstvo ando 110. psalam odnosini pe upro leste hem so ka ispunini pe ki budućnost (Mat. 22:41-45).

O Jehova phenđa e Davidese te pisini hem ando po vreme hem ando vreme kova ka avel. Ki budućnost, ked ka uskrsnini, ov zauvek ka uživini ko odova te hvalini e Jehova. Odolese, o lafija ando Psalam 37:10, 11 hem 29, šaj te primeninen pe hem ki budućnost. Akala lafija već ispuninđe pe ko purano vreme. Ama, ka ispuninen pe hem ki budućnost ked o Devel ka ispunini sa pe obećanja. (Dikh o oftoto odlomko ko članko „Tu ka ove mancar ko Raj“, ko akava izdanje.)

O lafija ando Psalam 61:8 hem avera slična stihija mothovena so o David manglja te hvalini e Jehova sa đi tano đivdo. Ama, mothovena hem so o David odova ka ćerel ki budućnost ked o Jehova ka irini le ko đivdipe.