1. Soj tano „e Devleso mir“ hem sar šaj te pomožini amen? (Filipljanima 4:6, 7)

 DA LI ćaće šaj te ovel amen mir? Ja. Ama, but manuša na đanena kova tano odova mir hem kastar avela. Ki Biblija pisini so odova tano „e Devleso mir“ hem šaj te dobina le ako hijam olese amala. Ked isi amen mir kova avela ando Devel, tegani osetinaja amen sigurno. (Čitin Filipljanima 4:6, 7.) Amen uživinaja te ova paše e Devleja kastar avela o mir hem okolencar kola mangena le (1. Sol. 5:23). Ked šukar penđaraja e Devle, isi amen poverenje upro leste hem šunaja le, ov šaj te pomožini amen te ovel amen mir iako isi amen bare pharipa.

2. Sose šaj te ova sigurna so šaj te ovel amen mir kova avela ando Devel?

² Disavo puti, ko than kaj živinaja kotar jekhvar šaj te ovel disavi epidemija, građanska nemirija, prirodno katastrofa ja progonstvo. Sebepi odova šaj te osetina bari dar. Da li tegani ćaće šaj te ovel amen mir? Ja, šaj. O Isus phenđa: „Ma te ovel uznemirimo tumaro vilo hem ma te daral“ (Jov. 14:27). But amare phralja hem phenja ićerena pe ko akava savet. Uzi Jehovasi pomoć, on ikljona ko krajo pe problemencar hem isi len mir.

3. Sar šaj i epidemija ja i pandemija te lel amaro mir?

³ I epidemija ja i pandemija šaj kotar jekhvar te menjini to životi. Te dikha sar i pandemija andi koronavirus utičinđa upro but manuša. Jekh istraživanje mothovi so but manuša phenđe so ko period andi pandemija našti hine te soven. Sebepi odova, but olendar hine anksiozna hem depresivna. Isto ađahar, disave počminđe te pijen, te koristinen  droga, te oven nasilna ja čak manglje te mudaren pe. Ako odothe kuri tu živineja ovela disavi epidemija, so šaj te pomožini tut te na sikirine tut hem te ovel tut e Devleso mir?

4. Sar e Isuseso proročanstvo ando poslednja dive utičini upro amende?

⁴ O Isus phenđa so ko poslednja dive ka oven zarazna nabormipa ko „razna thana“ (Luka 21:11). Sar odova so đanaja akava šaj te anel amenđe mir? Amen na hijam iznenadime ked negde ovela disavi epidemija. Haljovaja so ispunini pe odova so o Isus phenđa. Odolese ićeraja amen ko Isuseso savet kova dinđa okolenđe kola živinena ko poslednja dive: „Pazinen te na daran“ (Mat. 24:6).

5. (a) Premalo Filipljanima 4:8, 9, aso so valjani te molina amen ked ovela disavi epidemija? (b) Sar šaj te pomožinen tut amare snimime publikacije?

⁵ Ked kotar jekhvar ovela epidemija, odova šaj te daravi e manuše hem te ćhivel le but te sikirini pe. Baš odova desinđa pe amare phenjaće koja vićini pe Dezi. b Sebepi i korona oj našalđa pe kako, pe kakose ćhave hem pe doktore. But darandilji so hem oj ka zarazini pe, a palo odova hem olaki daj koja hine but phuri. Mislinđa so sebepi i pandemija ka našalji pi buti hem so na ka ovel la sova te ćinel diso hajbase hem te platini o računija hem i kirija. Odobor sikirinđa pe so našti hine te sovel. Ama, palo disavo vreme, i Dezi palem hine la mir. Sar? Oj molinđa e Jehova te pomožini laće te na brinini pe odobor hem te cidel latar odola lošna mislija. (Čitin Filipljanima 4:8, 9.) Trudinđa pe te šunel sar o Jehova „vaćeri“ olaja ađahar so šunđa amare audio-snimkija andi Biblija. Oj phenela: „Đi šunđum e phraleso glaso kova čitinđa hine man mir ko vilo hem setinćerđa man ko odova kobor tano o Jehova milosrdno“ (Ps. 94:19).

6. Sar šaj te pomožinen tut o sastankija hem o lično proučibe?

⁶ Ked ovela disavi epidemija, našti uvek te ćera sa so angleder ćerđam. Ama, ma dozvolin sebepi odova te na ovel tut to lično proučibe ja te na đa ko sastankija. O iskustvija ko amare publikacije ja videa mothovena amenđe kobor amare phralja hem phenja trudinena pe verno te služinen e Jehovase, iako isi len bare problemija (1. Petr. 5:9). O sastankija ka pomožinen tut te phere ti godi šuže bućencar kola avena ando Devleso Lafi. Isto ađahar, ko sastankija šaj disavo phral ja phen te ohrabrini tut, ama hem tu olen (Rimlj. 1:11, 12). Ked razmislineja odolestar sar o  Jehova pomožinđa pe slugenđe kola hine naborme, kola darandilje ja hine kokri, ti vera ka ovel pana pozorali hem odova ka uverini tut so o Jehova na ka aćhavi ni tut.

7. So šaj te sikljova ando apostol Jovan?

⁷ De sa tutar te družine tut e phralencar hem e phenjencar. Disavo puti, sebepi i epidemija šaj ka valjani te ova ki distanca čak kotar amare phralja. Tegani, šaj te osetina amen sar o apostol Jovan. Ov manglja te dikhel pe pekle amaleja kova vićinđa pe Gaj (3. Jov. 13, 14). Ama, o Jovan haljilo so jekh vreme na ka šaj te dikhen pe. Odolese, pisinđa lese lil. Ako našti te dikhe tut te phralencar hem te phenjencar, tegani pisin lenđe lil, vićin len ko telefoni ja pisin lenđe poruka. Ked deja sa tutar te aćhove ko kontakt te phralencar, na ka osetine tut so hijan kokri hem ka ovel tut mir. Isto ađahar, ked tano tuće but pharo, vićin e starešinen hem mukh len te pomožinen tut (Is. 32:1, 2).

8. Sar šaj disavi katastrofa te lel to mir?

⁸ Da li ko than kaj živineja hine poplava, zemljotres ja požar? Tegani, sigurno but vreme palo odova hine tuće pharo. Da li neko mulo tutar ja našalđan to ćher? Verovatno tegani osetinđan tut tužno, bizi nada ja čak holjanđan. Ama, odova na značini so but mangeja o materijalna buća ja so ti vera nane zorali. Tu hine tut bare pharipa hem avera ka haljoven sose reagujineja ađahar (Jov 1:11). Ama, iako nakheja asavke phare situacije, tu šaj te ovel tut mir. Sar?

9. Sar o Isus pripreminđa amen aso prirodna katastrofe?

⁹ Iako disave manuša mislinena so on niked na ka doživinen disavi katastrofa, amen đanaja so sar đala o vreme, on ka oven pana pobare. O Isus phenđa so angleder te avel o krajo, ki phuv ka ovel „bare zemljotresija“ hem avera katastrofe (Luka 21:11). Isto ađahar, phenđa so „o lošnipe ka barjol“ hem odolese isi baro kriminal, nasilje hem teroristička napadija (Mat. 24:12). O Isus niked na phenđa so akala pharipa ka ovel len samo okola kola na služinena e Jehovase. But e Jehovase verna sluge isi len baš odola pharipa (Is. 57:1; 2. Kor. 11:25). Avdije, o Jehova na ćerela čudija te zaštitini amen, ama šaj te del amen mir.

10. Sar odoleja so akana pripreminaja amen asi katastrofa mothovaja so isi amen vera? (Poslovice 22:3)

¹⁰ Ked ovela disavi katastrofa, amen šaj te arakha amaro mir ako angleder pripreminaja amen aso odova. Da li odova značini so amari vera ko Jehova nane zorali? Na. U stvari, ako angleder pripreminaja amen, ađahar mothovaja so verujinaja so ov ka pomožini amenđe. Sar? Ko Devleso Lafi pisini so valjani angleder te pripremina amen aso odova so šaj te ovel. (Čitin Poslovice 22:3.) Prekalo amare časopisija, sastankija hem smernice, e Devlesi organizacija uvek podstaknini amen te pripremina amen aso hitna situacije. c Da li isi amen poverenje upro Jehova? Ako ja, tegani već akana ka šuna odova savet, angleder te ovel disavi katastrofa.

11. So sikljovaja andi Margaret?

 ¹¹ Te dikha o iskustvo andi amari phen i Margaret. O vlastija phenđe so sare valjani te ikljon ando po ćher sebepi o požar. Odolese so but manuša kotar jekhvar ikljilje ando po ćher, ki ulica hine bari gužva hem našti hine te nakhe vordancar. I Margaret našti hine te ikljol ando vorda sose avri hine baro ćuro. Ama, oj preživinđa sose angleder pripreminđa pe. Ki torba hine la karta andi diz koja pomožinđa laće te arakhi aver drumo. Oj čak angleder vozinđa odole drumoja, te šaj ked ka ovel diso, te đanel o drumo. Sebepi sa odova so angleder ćerđa, oj šaj hine te preživini.

12. Sose tano šukar te šuna o smernice?

¹² Te šaj te zaštitinen e manušen, o vlastija šaj te phenen te ovel policijski čas, te phenen so valjani te đa ko disavo aver than ja diso aver te ćera. Disave manuša na mangena te ćeren odova sose na mangena te aćhaven pe buća. Ama, so amen valjani te ćera? I Biblija phenela: „Sebepi o Gospod oven podložna svakonese kova tano ki vlast: bilo e kraljese sose tano ko pobaro than bilo okolenđe kolen ov bićhali“ (1. Petr. 2:13, 14). Isto ađahar, amen dobinaja smernice hem andi amari organizacija. Na primer, svako puti ked menjinaja amaro broj ando telefoni, amen hijam podstaknime te bićhala odova broj amare starešinenđe te šaj te pomožinen amenđe ked tano diso hitno. Da li ćerđan odova? Uzo odova, šaj te dobina smernice aso odova kuri šaj te garava amen ja kaj šaj te la diso hajbase, ja sar hem ked šaj te pomožina averenđe. Ako na šunaja odola smernice, šaj te rizikujina amaro hem e starešinengo životi. Niked ma bistri so odola verna phralja brininena pe amendar (Jevr. 13:17). I Margaret phenela: „Uverimi hijum so odova so šunđum o smernice kola dobinđum ando starešine hem andi organizacija spasinđa mo životi.“

13. So pomožini e phralenđe kola morandilje te aćhaven po ćher te oven bahtale hem te ovel len mir?

¹³ But amare phralja hem phenja morandilje te aćhaven po ćher sebepi disavi prirodno katastrofa ja o maribe. Ama, on dena sa pestar te prilagodinen pe ko  neve okolnostija hem ćerena pana pobuter ki služba e Jehovase. Sar o hrišćanija ko prvo veko, kola morandilje te aćhaven pe ćhera sebepi o progonstvo, hem akala phralja dena sa pestar te vaćeren i šukar vest (Dela 8:4). I služba pomožini lenđe te razmislinen ando Kraljevstvo, a na ando pe pharipa. Sebepi odova, on tane bahtale hem isi len mir.

14. Sar šaj sebepi o progonstvo te našala amaro mir?

¹⁴ Ked hijam progonime, našti te ćera but buća kola anena amenđe mir. Amen hijam bahtale ked šaj te ova amare phralencar, te propovedina ja te ćera diso aver bizo te dara so ka phanen amen. Ama, ked našti te ćera odova, tegani šaj te brinina amen hem te dara so ka ovel ponodri. Nane pogrešno te razmislina akalestar. Ama, mora te pazina. O Isus phenđa so sebepi o progonstvo disave šaj te spotakninen pe (Jov. 16:1, 2). Odolese, so šaj te pomožini amen te arakha amaro mir ked isi amen progonstvo?

15. Sose na valjani te dara ando progonstvo? (Jovan 15:20; 16:33)

¹⁵ Ki Biblija pisini: „Sare kola mangena te živinen verno e Devlese ko jekhipe e Hristeja e Isuseja, ka oven progonime“ (2. Tim. 3:12). Amare phralese kova vićini pe Andrej hine pharo te haljol so sa o phralja ki olesi phuv ka oven progonime sebepi so amaro delo odothe hine zabranimo. Ov phenđa: „Akate isi but Svedokija. Sar o vlastija sarinen ka ćhiven ko phanlipe?“ Ama, odova so o Andrej razmislinđa odolestar na anđa lese mir, već ćhivđa le pana pobuter te brinini pe. Avera phralja mukhlje odova ko Jehovase vasta hem na razmislinđe odolestar da li ka oven ćhivde ko phanlipe. On đanđe so i policija šaj te astari len, ama na brininđe pe odobor sar o Andrej. Odolese, ov odlučinđa te menjini po način sar razmislini hem te mukhel o buća e Jehovase. Sigate palo odova, ov osetinđa baro mir hem akana tano bahtalo iako isi le pharipa. Odova šaj te desini pe hem amenđe. O Isus na phenđa samo so ka ovel amen progonstvo nego hem so ka  pomožini amen te aćhova verna. (Čitin Jovan 15:20; 16:33.)

16. Kola smernice valjani te šuna ked isi amen progonstvo?

¹⁶ Ked amaro delo tano zabranimo ja ograničimo, amen šaj te dobina disave smernice andi podružnica hem ando starešine. Odola smernice šaj te zaštitinen amen, te pomožinen amen te ovel amen duhovno hrana hem te nastavina te propovedina kobor god šaj. De sa tutar te ićere tut ko odola smernice, čak iako disavo puti šaj na ka haljove len (Jak. 3:17). Isto ađahar, niked ma vaćer o poverljiva informacije ando amare phralja hem phenja ja disave buća andi skupština okolenđe kola nane len pravo te đanen (Prop. 3:7).

17. So hijam odlučna te ćera sar o apostolija ando prvo veko?

¹⁷ Jekh ando najvažno razlog sose o Beng borini pe protiv e Devleso narodo tano odolese so on „svedočinena ando Isus“ (Otkr. 12:17). Odolese, ma mukh o Beng hem oleso sveto te daraven tut. Ked propovedinaja hem sikavaja averen, iako isi amen progonstvo, amen hijam bahtale hem isi amen mir. Ko prvo veko, ked o vlastija zapovedinđe e apostolenđe te na propovedinen, odola verna phralja šunđe e Devle. On hem ponodri propovedinđe hem sebepi odova hine bahtale (Dela 5:27-29, 41, 42). Naravno, ked amaro delo tano ograničimo, amen valjani te ova mudra đi propovedinaja (Mat. 10:16). Ama, ked daja sa amendar te ćera odova so o Jehova phenela hem ked na ćhinavaja te propovedina, amen ka ovel amen mir.

18. Kastar avela o pravo mir?

¹⁸ Ov sigurno so hem ked ka ovel tuće najpharo, ka ovel tut mir. Tegani, na valjani te bistre so valjani tuće o mir kova avela ando Devel, avere lafencar, o mir kova samo o Jehova šaj te del tut. Oslonin tut upro leste ked isi disavi epidemija, katastrofa ja progonstvo. Aćhov paše uzi olesi organizacija. Razmislin ando odova so ka ovel ki budućnost. Ked ka ćere sa akava, „o Devel ando mir“ ka ovel tuvaja (Fil. 4:9). Ko aver članko ka dikha sar šaj te pomožina e phralenđe hem e phenjenđe kola isi len bare pharipa te ovel len e Devleso mir.