Da li pažljivo čitinđan akale beršese izdanja andi Stražarsko kula? Ako ja, tegani dikh šaj li te odgovorine ko akala pućiba:

So valjani te ćera te šaj te menina o način sar razmislinaja? (Rimlj. 12:2)

Nane dovoljno samo te ćera nekobor šukar buća. Amen valjani te razmislina save hijam hor andral hem te ćera promene te šaj te živina premalo Jehovase merilija (w23.01, str. 8-9).

Sar šaj te ova đangavde ked dikhaja so ovela ko sveto?

Amen valjani te đana sar o događaja ko sveto ispuninena e biblijake proročanstvija. Ama, na valjani te pretpostavina so on značinena, sose odoleja šaj te rumina o jekhipe ki skupština. Odolese, amare razgovorija valjani te temeljinen pe ko najneve informacije kola avena andi amari organizacija (1. Kor. 1:10; w23.02, str. 16).

Savi razlika isi maškaro Isuseso krštenje hem o krštenje ando olese učenikija?

O Isus bijandilo ki nacija koja već hine predajimi e Devlese hem odolese na valjanđa te predajini po životi e Jehovase. Ov hine savršeno manuš bizo greh. Na valjanđa te molini e Jehova te oprostini lese grehija (w23.03, str. 5).

So šaj te ćera te šaj hem avera te ovel len prilika te komentarišinen?

Ked tane amare komentarija kratka, amen mukhaja than averenđe te komentarišinen. Na valjani te vaćera ando but buća, sose ađahar hem avera ka ovel len so te phenen (w23.04, str. 23).

Ko so odnosini pe o „Drumo andi svetost“ kotar Isaija 35:8?

Odova simbolično drumo ko purano vreme odnosinđa pe ko drumo koleja o Judejcija irinđe pe kotar Vavilon ko Jerusalim. So odova drumo predstavini ko amaro vreme? Beršencar angleder o 1919. berš pripreminđa pe odova drumo. Na primer, prevodinđa pe hem štampinđa pe i Biblija. E Devleso narodo tano ko „Drumo andi svetost“ kova legari đi o večna blagoslovija kola ka oven ked ka vladini e Devleso Kraljevstvo (w23.05, str. 15-19).

Kova savet isi amen ko Poslovice enjato poglavlje?

Odothe opisujinena pe duj simbolična romnja. O poziv andi „bigođali romni“ legari đi o „meribe“, a o poziv andi „ćaćutni mudrost“, koja tani mothovdi sar romni, legari ko „drumo andi razboritost“ hem ko drumo ando životi (Posl. 9:1, 6, 13, 18; w23.06, str. 22-24).

Sar o Jehova mothovđa soj tano ponizno hem razumno ked vaćerđa e Loteja?

O Jehova phenđa e Lotese te ikljol andi Sodoma hem te našel ko planine. Ama, o Lot molinđa le te đal ki diz koja vićinđa pe Sigor hem ov mukhlja le (w23.07, str. 21).

So šaj jekh romni te ćerel ako olako rom dikhela pornografija?

Na valjani te bistrel so oj nane krivo. Valjani te razmislini ando po amalipe e Jehovaja hem ando izveštaija kola vaćerena ando romnja kola rodinđe uteha ando Jehova. Oj šaj te pomožini pe romese te cidel pe ando iskušavajuća situacije (w23.08, str. 14-17).

Sar i razumnost šaj te pomožini amenđe te ova blaga ked neko mangela te raspravini pe amencar sebepi amare verovanja?

Ko osetljiva pućiba na valjani te dikha sar kritika ja napad, već valjani te razmislina sar odova pućibe šaj te pomožini amen te haljova soj tano važno e manušenđe. Odova ka pomožini amen te ova blaga (w23.09, str. 17).

Sar i Marija dobinđa snaga koja valjanđa laće?

Ked saznajinđa so ka bijani e Mesija, i Marija rodinđa pomoć averendar. But ohrabrinđe la o Gavrilo hem i Jelisaveta. Avdije, hem amen šaj but te ohrabrinen amare phralja (w23.10, str. 15).

Sar o Jehova šaj te odgovorini ko amare molitve?

Ov obećini so ka šunel amare molitve hem razmislini sar tane amare molitve povezime olese nameraja (Jer. 29:12). Ov šaj ko različita načinija te odgovorini ko slična molitve, ama uvek ka podržini amen (w23.11, str. 21-22).

Ko Rimljanima 5:2 vaćeri pe andi nada, ama sose palem pomini pe ko 4. stiho?

Ked neko šunela i šukar vest, ov šaj te počmini te ovel le nada aso večno životi. Ama, ked isi le pharipa, istrajini hem osetini e Devleso priznanje, tegani olesi nada ovela pana pozorali (w23.12, str. 12-13).