1. So šaj te puća amen ked razmislinaja andi Avrahamesi vera?

 IAKO but manuša šunđe e Avrahamese, but olendar na đanena but buća olestar. Ama, tu đaneja koj tano o Avraham. Na primer, ki Biblija pisini so ov tano „dad sarinenđe kola verujinena“ (Rimlj. 4:11). Odolese, šaj pućeja tut: „Da li me šaj te đav palo Avrahamese korakija hem te ovel man sar olesi vera?“ Ja, šaj.

2. Sose tano važno te proučina e Avrahameso primer? (Jakovljeva 2:22, 23)

² Jekh način sar šaj te ovel amen sar e Avrahamesi vera tano ađahar so ka proučina oleso primer. Ov ko sa šunđa e Jehova. Odolese, selinđa pe ki jekh but dur phuv. Beršencar živinđa ko šatorija hem hine spremno te žrtvujini pe ćhave. Aso sa odova valjanđa lese bari vera. Sebepi olesi vera hem olese delija o Jehova hine bahtalo hem hine amal oleja. (Čitin Jakovljeva 2:22, 23.) O Jehova mangela sare amen te ćera le bahtalo hem te ova amala oleja. Sebepi odova, podstakninđa e Pavle hem e Jakove te pisinen ando Avrahameso primer. Akana ka dikha so on pisinđe ko Rimljanima 4. poglavlje hem ki Jakovljeva 2. poglavlje.

3. Kova stih citirinđe o Pavle hem o Jakov?

³ O Pavle hem o Jakov citirinđe o lafija ando Postanak 15:6. Uduri pisini: „O Avram verujinđa e Jehovase hem sebepi odova ov dikhlja le sar pravedno.“ O Jehova dikhela sar pravedno, avere lafencar, bizi krivica e manuše kasa tano ov zadovoljno. Kobor tano šukar so jekh nesavršeno manuš šaj te ovel pravedno anglo Devlese jaćha. Sigurno hem tu mangeja odova. Akana ka dikha sose o Jehova phenđa so o Avraham tano pravedno manuš  hem so valjani te ćera te šaj te ova pravedna anglo Devlese jaćha.

4. So ćhinavi e manušen te oven pravedna?

⁴ Ko po lil kova pisinđa e hrišćanenđe ko Rim, o Pavle phenđa so sa o manuša tane grešna (Rimlj. 3:23). Ama, sar šaj o Devel te ovel zadovoljno amencar hem te ova pravedna anglo lese jaćha? Te šaj te pomožini amen te odgovorina ko odova pućibe, o Pavle koristinđa e Avrahameso primer.

5. Sose o Jehova dikhlja e Avrahame sar pravedno? (Rimljanima 4:2-4)

⁵ O Jehova dikhlja e Avrahame sar pravedno pana đi hine ko Hanan. Sose? Da li odolese so o Avraham savršeno ićerđa pe ko Mojsijeso zakon? Na (Rimlj. 4:13). Odova Zakon hine dindo e Izraelcenđe pobuter ando 400 berš palo odova so o Jehova phenđa so o Avraham tano pravedno. Ama, sose tegani o Jehova phenđa odova? O Jehova mothovđa lese bizaslužimo šukaripe hem dikhlja le sar pravedno sebepi olesi vera. (Čitin Rimljanima 4:2-4.)

6. Sose o Jehova e grešna manušen šaj te dikhel sar pravedna?

⁶ O Pavle phenđa so ked jekh manuš isi le vera, „o Devel dikhela [le] sar pravedno“ (Rimlj. 4:5). Ov pana phenđa: „Ađahar hem o David vaćeri ando bahtalipe kotar manuš kole o Devel dikhela sar pravedno, ama na sebepi olese delija: ’Bahtale tane okola kase lošna delija tane oprostime hem kase grehija tane ućharde. Bahtalo tano o manuš kase grehija o Jehova na pamtini‘ “ (Rimlj. 4:6-8; Ps. 32:1, 2). O Devel oprostini ja ućhari o grehija ando manuša kola isi len vera. Ov potpuno oprostini lenđe. Asavke manuša, odolese so isi len vera, anglo Jehovase jaćha tane pravedna.

7. Sose šaj te phena so e Devlese sluge ko purano vreme hine pravedna?

⁷ Iako o Devel upro Avraham, David hem avera verna sluge dikhlja sar pravedna manuša, on ipak hine nesavršena. Ama, sebepi olengi vera o Jehova upro lende dikhlja sar nedužna manuša, posebno ked uporedinđa len okolencar kola na služinena lese (Ef. 2:12). Ko lil kova pisinđa e hrišćanenđe ko Rim, o Pavle objasninđa so valjani te ovel amen vera te šaj te ova e Devlese amala. O Avraham hem o David sebepi pi vera hine e Devlese amala. Hem amen šaj te ova olese amala ako isi amen vera.

8-9. Sar disave manuša pogrešno haljilje e Pavlese hem e Jakovese lafija hem sose?

⁸ Beršencar, o religiozna vođe raspravinena pe ando odova sar tani i vera hem o delija povezime. Disave sveštenikija phenena so aso spasenje tano dovoljno samo te verujini pe ko Gospod Isus Hrist. On često phenena: „Prihvatin e Isuse hem ka ove spasimo.“ Te šaj te dokažinen soj tane u pravu, on citirinena e Pavlese lafija ando Rimljanima 4:6 kuri pisini: „O Devel [e manuše] dikhela sar pravedno, ama na sebepi olese delija.“ Ki aver strana, disave mislinena so ako mangeja te spasine tut mora te đa ko sveta thana hem te oven tut šukar delija. On šaj citirinena o lafija andi Jakovljeva 2:24 kuri pisini: „O manuš  proglasini pe pravedno sebepi o delija, a na samo sebepi i vera.“

⁹ Odolese so but manuša isi len različita verovanja, disave izučavaocija mislinena so o Pavle hem o Jakov na složinđe pe ko odova sar tani i vera hem o delija povezime. Disave religiozna vođe phenena so o Pavle verujinđa soj tano dovoljno samo te ovel amen vera te šaj o Devel te ovel zadovoljno amencar. Isto ađahar, phenena so o Jakov verujinđa so o manuš valjani te ovel le samo šukar delija. Jekh teolog phenđa: „O Jakov na haljilo sose o Pavle istakninđa so o manuš šaj te ovel pravedno samo ako isi le vera.“ Ama, o solduj pisinđe ađahar sar so vodinđa len e Jehovaso sveti duh (2. Tim. 3:16). U stvari, isi jekh but jednostavno objašnjenje kova ka pomožini amen te haljova so manglje te phenen. Akana ka dikha o kontekst ando olenge lafija.

10. Kotar kola „delija“ o Pavle vaćerđa? (Rimljanima 3:21, 28; dikh i slika.)

¹⁰ Kotar kola „delija“ o Pavle vaćerđa ko 3. hem ko 4. poglavlje ki knjiga Rimljanima? Ov vaćerđa kotar „delija ando Zakon“, avere lafencar e Mojsijeso zakon kova hine dindo e Izraelcenđe ki gora Sinaj. (Čitin Rimljanima 3:21, 28.) Izgleda so ko Pavleso vreme disave Jevreja verujinđe so pana valjani te ićeren pe ko Mojsijeso zakon. Odolese, o Pavle koristinđa e Avrahameso primer te mothovi so o manuš na valjani te ićeri pe ko odova Zakon te šaj te ovel pravedno. Umesto odova, o Pavle vaćerđa so valjani te ovel amen vera. Akava  tano ohrabrujuće sose sikavi amen so ako isi amen vera ko Jehova hem ko Isus, o Devel šaj te ovel zadovoljno amencar.

11. Ando kola „delija“ o Jakov vaćerđa?

¹¹ Ki aver strana, o „delija“ kola pominena pe ki Jakovljeva 2. poglavlje nane isto so hem o „delija ando Zakon“ kola o Pavle pominđa. Ked o Jakov vaćerđa ando delija, ov mislinđa ko delija ili aktivnostija kola o hrišćanija ćerena ko po svakodnevno životi. Asavke delija mothovena da li jekh hrišćanin isi le bari vera ili na. Akana ka razmotrina duj primerija kola o Jakov koristinđa.

12. Sar o Jakov mothovđa so i vera hem o delija tane povezime? (Dikh i slika.)

¹² Ko prvo primer o Jakov vaćeri so o hrišćanija valjani te oven nepristrasna. Odova mothovđa ked vaćerđa ando manuš kova tano šukar premalo barvale, ama nane šukar premalo ćorore. O Jakov phenđa so asavko manuš šaj te vaćeri so isi le vera, ama olese delija na mothovena odova (Jak. 2:1-5, 9). Ko dujto primer o Jakov vaćeri andi jekh osoba koja dikhela pe phrale ja phenja so nane len so te uraven ja so te han, ama na pomožini len. Čak iako odija osoba phenela so isi la vera, olake delija mothovena so nane la. Sar so o Jakov phenđa, „ađahar tano hem e veraja, ako na mothovi pe ko delija, muli tani“ (Jak. 2:14-17).

13. Kova primer o Jakov koristinđa te šaj te mothovi so valjani te ovel amen hem vera hem šukar delija? (Jakovljeva 2:25, 26)

¹³ O Jakov pominđa e Rava sar neko ko pi vera mothovđa ko delija. (Čitin  Jakovljeva 2:25, 26.) Oj šunđa ando Jehova hem haljilji so ov pomožini e Izraelcenđe (Is. Nav. 2:9-11). Olake delija mothovđe so isi la vera. Sebepi pi vera, oj zaštitinđa duje uhoden. Odolese, akija nesavršeno romni koja na hine Izraelka, anglo Jehova hine pravedno isto sar o Avraham. Olako primer mothovi kobor tano važno amari vera te mothova ko delija.

14. Sar odova so o Pavle hem o Jakov pisinđe složini pe jekh jekheja?

¹⁴ O Pavle hem o Jakov vaćerđe andi isto tema, ama ko različita načinija. O Pavle vaćerđa e Jevrejenđe so našti te oven pravedna anglo Devlese jaćha ako ićerena pe ko Mojsijeso zakon. Ki aver strana, o Jakov vaćerđa ando odova so sa o hrišćanija valjani te mothoven pi vera ađahar so ka ćeren šukar buća averenđe.

15. Sar šaj te mothova so isi amen vera? (Dikh o slike.)

¹⁵ O Jehova na phenđa so ako mangaja te ova pravedna mora te ćera baš odova so o Avraham ćerđa. Isi but načinija sar šaj te mothova so isi amen vera. Na primer, šaj te pozdravina e neven ki dvorana. Šaj te pomožina amare phralenđe ili nekase andi amari porodica (Rimlj. 15:7; 1. Tim. 5:4, 8; 1. Jov. 3:18). Jekh ando najvažno način sar šaj te mothova vera tano ađahar so ka propovedina (1. Tim. 4:16). Sare šaj prekalo amare delija te mothova so verujinaja so o Jehova ka ispunini pe obećanja hem so ov đanela soj tano najšukar amenđe. Ako ađahar ćeraja, šaj te ova  sigurna so anglo Jehovase jaćha ka ova pravedna hem ka ova olese amala.

16. Savi nada hine le o Avraham hem ko so verujinđa?

¹⁶ Ko Rimljanima 4. poglavlje šaj te sikljova pana jekh važno buti ando Avraham. Ko odova poglavlje vaćeri pe andi nada. O Jehova dinđa po lafi so prekalo Avraham but manuša ka oven blagoslovime. Zamislin savi šuži nada hine le o Avraham (Post. 12:3; 15:5; 17:4; Rimlj. 4:17). Ama, ked o Avraham hine le 100 berš, a i Sara 90 on pana na hine len ćhave. Šaj hine te dićhol soj tano nemoguće te ovel len ćhave. Odija ćaće hine bari kušnja aso Avraham. Ama, „iako na hine sose te nadini pe, ipak hine le nada hem odolese verujinđa so ka ovel dad ando but narodija“ (Rimlj. 4:18, 19). Ama, ko krajo ispuninđa pe odova so o Avraham ađićerđa. Ov ulo dad sose dobinđa e Isake (Rimlj. 4:20-22).

17. Sar đanaja so šaj te ova pravedna anglo Devlese jaćha?

¹⁷ O Devel šaj te ovel zadovoljno amencar hem te ova pravedna anglo olese jaćha, sar so o Avraham hine. U stvari, akalestar o Pavle vaćerđa ked pisinđa: „Ama odova so upro leste ’dikhlja sar pravedno‘ na hine pisimo samo olese nego hem amenđe upro kola ka dikhel pe sar pravedna, sose verujinaja ko okova kova uskrsninđa e Isuse, amare Gospode“ (Rimlj. 4:23, 24). Sar o Avraham, hem amen valjani te ovel amen vera ko Jehova, te ćera šukar buća averenđe hem te ovel amen baro poverenje so o Jehova ka ispunini odova so phenđa. Ko Rimljanima 5. poglavlje o Pavle vaćerđa andi nada. Odolestar ka vaćera ko aver članko.