1. Sose o Avraham nadinđa pe so jekh dive ka ovel le ćhavo?

 O JEHOVA obećinđa e Avrahamese so sa o narodija ka oven blagoslovime prekalo oleso potomstvo (Post. 15:5; 22:18). Odolese so o Avraham hine le bari vera ko Jehova, ov hine uverimo so o Jehova ka ispunini po obećanje. Ama, ked hine le 100 berš, a olesi romni 90, on pana na hine len ćhave (Post. 21:1-7). Ki Biblija pisini: „Iako na hine sose te nadini pe, ipak hine le nada, hem odolese verujinđa so ka ovel dad ando but narodija“ (Rimlj. 4:18). Amen đanaja so ispuninđa pe odova so o Avraham nadinđa pe, ov dobinđa ćhave kole beršencar ađićerđa. Ama, sose verujinđa so o Jehova ka ispunini po obećanje?

2. Sose o Avraham hine uverimo so o Jehova ka ispunini pe obećanja?

² Odolese so hine paše e Jehovaja, o Avraham „hine potpuno uverimo so o [Devel] šaj te ćerel odova so obećinđa“ (Rimlj. 4:21). O Jehova upro Avraham dikhlja sar pravedno manuš sebepi olesi vera (Jak. 2:23). Sar so pisini ko Rimljanima 4:18, o Avraham hine le hem vera hem nada. Akana ka dikha so o apostol Pavle phenđa andi nada sar so pisini ko 5. poglavlje ki knjiga Rimljanima.

3. So o Pavle vaćerđa andi nada?

³ O apostol Pavle objasninđa sose šaj te ova sigurna so „i nada na ka razočarini amen“ (Rimlj. 5:5). Ov pomožinđa  amen te haljova sar šaj te zorjaćera amari nada. Đi ka razmotrina odova so vaćerđa ko Rimljanima 5:1-5, razmislin sar ti nada asi budućnost ulji sa pozorali. Isto ađahar, ka vaćera ando odova sar šaj te zorjaćera amari nada. Najangleder, hajde te vaćera andi nada asi koja o Pavle phenđa so na ka razočarini amen.

4. Sostar vaćeri pe ko Rimljanima 5:1, 2?

⁴ Čitin Rimljanima 5:1, 2. Akala lafija o apostol Pavle pisinđa e hrišćanenđe ko Rim. Ki odija diz o phralja hem o phenja već sikljilje ando Jehova hem ando Isus, hine len vera hem ulje hrišćanija. Odolese, o Devel proglasinđa len „pravedna“ sebepi olengi vera hem pomazinđa len sveto duhoja. On jedva ađićerđe te dobinen pi nagrada hem hine sigurna so ka dobinen la.

5. Savi nada isi len o pomazanikija?

⁵ O Pavle kasnije pisinđa e pomazanikonenđe ko Efes andi olengi nada. On valjanđe te dobinen i „nagrada aso sveta“ (Ef. 1:18). Isto ađahar, ov phenđa e hrišćanenđe ko Kolos so ka dobinen pi nagrada. Ov phenđa lenđe: „[Nadinena tumen] so ka dobinen okova so tumenđe garavi pe ko nebo“ (Kol. 1:4, 5). Sa o pomazanikija isi len nada so ka živinen večno ko nebo kuri ka vladinen e Isuseja (1. Sol. 4:13-17; Otkr. 20:6).

6. So jekh pomazaniko phenđa andi pi nada?

⁶ O pomazanikija but ceninena i nebesko nada. Jekh olendar, o phral Frederik Franc, ando vilo phenđa: „Amari nada sigurno ka ispunini pe hem svako amendar ando 144 000 ka dobini odova so o Devel obećinđa. Amari nagrada ka ovel but pošukar nego bilo so aver so hine amen.“ Palo odova so beršencar verno služinđa e Jehovase,  ko 1991. berš o phral Franc pana phenđa: „Amen pana ceninaja but amari nada. . . So pobuter ađićeraja la, pana poviše hijam zahvalna. Amen hijam spremna te ađićera, ako valjani hem milionija berša. Akana pana pobuter ceninava amari nada.“

7-8. Savi nada isi len pobuter manuša? (Rimljanima 8:20, 21)

⁷ But amendar isi amen nada savi hine le hem o Avraham. Amen nadinaja amen so ka živina večno ko raj ked ka počmini te vladini e Devleso Kraljevstvo ki phuv (Jevr. 11:8-10, 13). O Pavle pisinđa andi akija but šuži nada. (Čitin Rimljanima 8:20, 21.) Ked prvo puti šunđan aso obećanja andi Biblija, so najviše sviđinđa pe tuće? Da li odova so jekh dive ka ova savršena? Ili so jekh dive amare mangle kola mulje palem ka ušten? Ćaće, jedva ađićeraja o buća kola ka oven ki budućnost.

⁸ Bilo te očekujina te živina ko nebo ili ki phuv, amen hijam bahtale sebepi amari nada. Odija nada šaj te ovel pana pozorali. Sar? Hajde te dikha sar o lafija kola pisinđa o apostol Pavle šaj te pomožinen amen te ovel amen pana pobaro poverenje so ćaće ka ispunini pe odova ko so nadinaja amen.

9-10. Sar so mothovi amenđe e Pavleso primer, so o hrišćanija šaj te očekujinen? (Rimljanima 5:3; dikh o slike.)

⁹ Čitin Rimljanima 5:3. O Pavle phenđa so ked isi amen pharipa amari nada ovela pana pozorali. Odova šaj te iznenadini amen. Ama, sa e Isusese učenikija ka ovel len pharipa. Te dikha e Pavleso primer. Ov e hrišćanenđe ki Solun phenđa: „Ked hijam le koro tumende, angleder phenđam tumenđe so ka ovel amen pharipa hem sar so đanena ađahar hem ulo“ (1. Sol. 3:4). E hrišćanenđe ko Korint pisinđa:  „Sose mangaja phraljalen te đanen aso pharipe kova hine amen hem mislinđam so na ka preživina“ (2. Kor. 1:8; 11:23-27).

¹⁰ Avdije, o hrišćanija očekujinena te ovel len pharipa (2. Tim. 3:12). Sar tano tuvaja? Da li hijan le progonimo sose mothovđan vera ko Isus hem uljan oleso učeniko? Te amala hem ti familija šaj te maren tuće muj ja šaj te oven but lošna premalo tute. Da li to šef ili te kolege ki buti ćerena tuće problemi sose mangeja te ove pošteno? (Jevr. 13:18). Da li o vlastija protivinena pe tuće sose vaćereja i šukar vest? Save god pharipa te oven amen, o Pavle phenđa so valjani te ova bahtale. Sose?

11. Sose valjani te ova odlučna te istrajina ki bilo savi kušnja?

¹¹ Amen šaj te ova radosna čak ked isi amen pharipa odolese so đanaja so odova ka pomožini amen te razvijina jekh but važno osobina. Sar so pisini ko Rimljanima 5:3, „o pharipe legari đi i istrajnost“. Sa o hrišćanija ka ovel len pharipa. Odolese, valjani te ova odlučna te istrajina ki bilo savi kušnja, sose samo tegani šaj te dobina amari nagrada. Amen na mangaja te ova sar o seme kotar Isuseso poređenje kova tano sejimo ki phuv pherdi barencar. O manuša kola tane sar odova seme, ki početka prihvatinena o ćaćipe. Ama ked avela o pharipe ja o progonstvo, on spotakninena pe (Mat. 13:5, 6, 20, 21). Naravno, amenđe nane lokho ked isi amen protivljenje ili kušnje. Ama, ked istrajinaja hem aćhovaja verna e Jehovase odova šaj but te pomožini amen. Ko kova način?

12. Sar šaj i istrajnost te pomožini amen?

¹² O učenik Jakov istakninđa sar šaj te pomožini amen i istrajnost ked isi amen kušnje. Ov pisinđa: „Mukhen i istrajnost te ćerel pi buti, te šaj te oven savršena hem potpuna, bizi mana“ (Jak. 1:2-4). Akate o Jakov phenela so i istrajnost ćerela jekh buti. Koja tani odija buti? I istrajnost šaj te pomožini amen te barjaćera avera osobine, sar soj tane strpljenje, vera hem poverenje upro Jehova. Ama, odija osobina šaj pana te pomožini amen.

13-14. Đi soste i istrajnost šaj te legari hem sar šaj odova te utičini upri amari nada? (Rimljanima 5:4)

¹³ Čitin Rimljanima 5:4. O Pavle phenđa so i istrajnost legari „đi e Devleso priznanje“. Ked hijam istrajna, o Jehova tano zadovoljno amencar. Odova na značini so e Jehovase tano drago ked isi amen problemija već tano bahtalo ked aćhovaja lese verna. But tano ohrabrujuće te đana so amari istrajnost radujini e Jehova (Ps. 5:12).

¹⁴ Setin tut ki Avrahamesi istrajnost hem so o Jehova hine zadovoljno oleja. O Jehova phenđa lese soj tano oleso amal hem dikhlja le sar pravedno (Post. 15:6; Rimlj. 4:13, 22). O Jehova šaj hem amen ađahar te dikhel. O Devel nane zadovoljno amencar sebepi odova kobor buti ćereja ki olesi organizacija ili sebepi o odgovornostija kola isi amen. Ov tano zadovoljno amencar sebepi amari vernost hem istrajnost. Sare šaj te ova istrajna bizo obzir ko amare berša, okolnostija ili sposobnostija. Da li trenutno isi tut disavo pharipe? Ma bistri so e Jehova šaj te ćere bahtalo ađahar so ka aćhove  lese verno. Ked haljovaja so o Devel tano zadovoljno amencar, amari nada ko olese obećanja šaj te ovel pana pozorali.

15. So o Pavle phenđa ko Rimljanima 5:4, 5 hem so disave šaj te pućen pe?

¹⁵ O Pavle objasninđa so o Jehova tano zadovoljno amencar ked hijam lese verna hem ked istrajinaja ko amare pharipa. Zapazin so o Pavle pana phenela: „E Devleso priznanje dela amen nada, a i nada na ka razočarini amen“ (Rimlj. 5:4, 5). Disaven akala lafija šaj te buninen. Sose? Odolese so angleder, ko Rimljanima 5:2, o Pavle pominđa so o hrišćanija već hine len nada. On hine len nada so ka priminen e Devlesi slava. Odolese, neko šaj te pućel pe: „Ako odola hrišćanija već hine len nada, sose o Pavle palem vaćeri andi nada?“

16. Sar šaj nekasi nada te počmini te barjol? (Dikh o slike.)

¹⁶ Pošukar ka haljova ko so o Pavle mislinđa ako ka razmislina odolestar so i nada šaj te barjol. Aće jekh primer: Da li setineja tut ked prvo puti šunđan diso ando Devleso Lafi kotar amari nada? Tegani šaj mislinđan so o večno životi tano samo suno. Ama, so pobuter sikljiljan ando Jehova hem olese obećanja, pobuter uverinđan tut so odija nada ćaće ka ispunini pe.

17. Sar ti nada ulji pana pozorali palo odova so predajinđan tut hem krstinđan tut?

¹⁷ Palo odova so predajinđan to životi e Jehovase hem krstinđan tut, nastavinđan te upoznajine e Jehova hem uljan pana popaše oleja. Odolese, ti nada ulji pana pozorali (Jevr. 5:13–6:1). Verovatno hem tu doživinđan disave buća kolendar vaćeri pe ko Rimljanima 5:2-4. Šaj hine tut razna kušnje, ama istrajinđan hem osetinđan so isi tut e Devleso  priznanje. Odolese so uverinđan tut so o Jehova mangela tut, akana hijan pana posigurno so ka dobine odova so obećinđa. Ti nada ulji pozorali nego so hine ko početko. Oj tani tuće akana pana postvarno hem pana polično doživineja la. Ti nada utičini ko svako deo ko to životi. Na primer, sar ponašineja tut te porodicaja, save odluke aneja hem čak sar koristineja to vreme.

18. Koja garancija dela amen o Jehova?

¹⁸ O apostol Pavle phenela pana diso važno andi nada koja razvijinđan palo odova so dobinđan e Devleso priznanje. Ov uverini tut so ti nada ka ispunini pe. Sose šaj te ove sigurno ko odova? O Jehova prekalo Pavle dinđa te pisinen pe o lafija kola tane amenđe avdije sar garancija. O Pavle phenđa: „A i nada na ka razočarini amen. Sose e Devleso mangipe pherđa amare vile prekalo sveti duh, kova tano amenđe dindo“ (Rimlj. 5:5). Ćaće, šaj te ove potpuno sigurno ki ti nada koja o Jehova dinđa tut.

19. Ko so šaj te ove potpuno sigurno?

¹⁹ Razmislin ando obećanje kova o Jehova dinđa e Avrahamese hem odolestar so upro leste dikhlja sar pravedno manuš hem so phenđa soj tano oleso amal. E Avrahamesi nada na hine uzaludno. Ki Biblija pisini: „Ađahar o Avraham palo odova so mothovđa strpljenje, dobinđa odova obećanje“ (Jevr. 6:15; 11:9, 18; Rimlj. 4:20-22). Ov sigurno na hine razočarimo. Tu šaj isto te ove sigurno so ako aćhoveja verno e Jehovase ka dobine ti nagrada. Ti nada tani ćaćutni hem isi tut but razlogija te radujine tut, sose ti nada niked na ka razočarini tut (Rimlj. 12:12). O Pavle pisinđa: „O Devel, kova dela tumen nada, nek del tumen bahtalipe hem mir sose verujinena koro leste hem o sveti duh neka barjaćeri tumari nada“ (Rimlj. 15:13).