1-2. (a) Sose tano butenđe pharo te verujinen e manušenđe kola tane ki vlast? (b) Sostar ka vaćera ko akava članko?

 AVDIJE butenđe tano pharo te verujinen e manušenđe kola tane ki vlast. But putija on dikhlje sar o vlastija hem o zakonija arakhena e barvalen, a na pomožinena e ćororenđe. Ćaće tano odova so pisini ko Devleso Lafi: „Ked o manuš vladini upro manuš odova anela samo lošnipe“ (Prop. 8:9). Uzo odova, disave verska vođe ćerena but lošna buća. Sebepi odova, disave manuša više na verujinena ko Devel. Odolese, ked počminaja te proučina olencar amen valjani te pomožina lenđe te ovel len poverenje ko Jehova hem ko okola kas ov ćhivđa te predvodinen ki phuv.

² Ama, na valjani samo o manuša kola proučinena te ovel len poverenje ko Jehova hem ki olesi organizacija. Čak hem okola soj tane beršencar ko ćaćipe niked na valjani te našalen pi vera so odova so o Jehova ćerela tano uvek ispravno. Podijekh puti, ka ovel potrebno te mothova kobor baro poverenje isi amen ko Jehova. Ko akava članko, ka dikha sar šaj te dićhol kobor tani bari amari vera (1) ked čitinaja disave izveštaja andi Biblija, (2) ked dobinaja smernice andi Jehovasi organizacija, hem (3) ked ka ovel amen disave pharipa.

3. Sar šaj te dićhol da li isi amen poverenje ko Jehova ked čitinaja i Biblija?

³ Ked čitinaja e Devleso Lafi, šaj pućaja amen sose o Jehova ađahar postupinđa disave manušencar hem sose anđa disave odluke. Na primer, ko Brojevi šaj te čitina so o Jehova osudinđa jekhe Izraelco ko meribe sose ćedinđa kašta ko sabat. Ki Dujto Samuilova šaj te čitina so beršencar palo odova o Jehova oprostinđa e Davidese, iako ćerđa preljuba e Vitsavejaja hem mudarđa olake rome (Br. 15:32, 35; 2. Sam. 12:9, 13). Šaj pućaja amen: „Sose o Jehova oprostinđa e Davidese asavke ozbiljna grehija, a odole manuše osudinđa ko meribe, iako na ćerđa odobor baro greh?“ Te šaj te dobina odgovor ko odova pućibe, ka vaćera kotar trin buća kola valjani te ićera ki godi ked čitinaja i Biblija.

4. Premalo Postanak 18:20, 21 hem Ponovljeni zakoni 10:17, sose šaj te ova sigurna so e Jehovase odluke tane uvek ispravna?

⁴ I Biblija na vaćeri amenđe uvek sa o detaljija ando disavo izveštaj. Na primer, amen đanaja so o David celone vileja pokajinđa pe aso odova so ćerđa (Ps. 51:2-4). Ama, savo hine o manuš kova na ićerđa pe ko zakon ando sabat? Da li ov celone vileja kajinđa pe aso odova so ćerđa? Da li hem angleder na manglja te ićeri pe ko Jehovase zakonija? Da li hine zorale šereso? I Biblija na vaćeri odolestar hem premalo informacije kola isi amen našti te đana sose o Jehova anđa asavki odluka. Ama, ko jekh šaj te ova sigurna: O Jehova tano uvek pravedno (Pon. zak. 32:4). Ov pe odluke anela premalo odova so đanela hem so dikhela. Ov na ćerela razlika maškaro manuša hem upro olese odluke na utičini odova so šunela ja disave avera buća kola utičinena upro manuša. (Čitin Postanak 18:20, 21; Ponovljeni zakoni 10:17.) So pobuter sikljovaja ando Jehova hem ando olese načelija, pana pobaro poverenje ka ovel amen ko olese odluke. Iako đi čitinaja i Biblija nane amen odgovorija ko sa amare pućiba, amen đanaja dovoljno te ova sigurna so o Devel tano pravedno ko sa so ćerela (Ps. 145:17).

5. Sar amari nesavršenost šaj te utičini ko odova sar dikhaja ko buća? (Isto ađahar, dikh o okvir „ Sebepi so hijam nesavršena našti uvek ispravno te haljova sa o buća.“)

 ⁵ Sar nesavršena manuša našti uvek ispravno te dikha ko buća. O Devel ćerđa amen premali pi slika hem odolese niko amendar na mangela ked tano neko nepravedno premalo avera (Post. 1:26). Ama, sebepi so hijam nesavršena, amen šaj pogrešno te haljova disave buća iako mislinaja so sa đanaja. Setin tut sar o Jona holjanđa ked o Jehova odlučinđa te ovel milosrdno premalo manuša ki Niniva (Jona 3:10–4:1). Ama, so ulo sebepi odova? Prekalo 120 000 manuša aćhilje đivde! Sar so dikhaja, o Jona valjanđa averćhane te dikhel ko manuša, a na o Jehova.

6. Sose o Jehova na valjani te objasnini amenđe sose anđa disavi odluka?

⁶ O Jehova nane dužno te objasnini e manušenđe sose anđa disavi odluka. Ćaće tano so o Jehova angleder mukhlja pe slugen te phenen so mislinena ando disave olese odluke (Post. 18:25; Jona 4:2, 3). Podijekh puti, ov objasninđa sose mangela diso te ćerel (Jona 4:10, 11). Ama, o Jehova nane dužno te objasnini amenđe sose anela disavi odluka. Sebepi soj tano amaro Stvoritelj, ov na valjani te pućel amen angleder diso te ćerel ja palo odova (Is. 40:13, 14; 55:9).

7. So šaj te ovel amenđe pharo hem sose?

⁷ Sare amen verujinaja so o Jehova uvek ćerela odova soj tano najšukar. Ama, šaj te ovel amenđe pharo te ovel amen poverenje upro okola kas o Jehova ćhivđa te predvodinen ki phuv. Podijekh puti šaj pućaja amen da li odola phralja ćaće ćerena premalo Jehovase smernice ja ćerena odova so on mangena. Šaj isto odova pućlje pe hem o manuša ando purano vreme. I familija ando manuš kova na ićerđa pe ko zakon ando sabat šaj pućlja pe da li o Mojsije ćaće pućlja e Jehova so te ćerel angleder so odova manuš hine osudimo ko meribe. Ja šaj e Urijase amala mislinđe so o David koristinđa po than te našel andi kazna. So sikljovaja ando akala primerija? O Jehova isi le poverenje upro okola kas ćhivđa te predvodinen ki olesi organizacija hem ki skupština. Ako nane amen poverenje ko akala manuša, našti te phena so isi amen poverenje ko Jehova.

8. Premalo Dela apostolska 16:4, 5, sar o buća ćerđe pe ki skupština ko prvo veko hem sar ćerena pe avdije?

⁸ Avdije, o Jehova vodini pi organizacija ki phuv prekalo „verno hem razborito robo“ (Mat. 24:45). Sar o vodeće telo ko prvo veko, akava robo brinini pe ando Devleso narodo ki celo phuv hem dela smernice e starešinenđe ko sa o skupštine. (Čitin Dela apostolska 16:4, 5.) Palo odova, o starešine dena odola smernice e phralenđe ki skupština. Ked šunaja o smernice kola dobinaja prekali Jehovasi organizacija hem prekalo starešine, amen mothovaja so isi amen poverenje ko Jehova.

9. Ked šaj te ovel amenđe pharo te podržina o odluke kola o starešine anena hem sose?

⁹ Podijekh puti, šaj te ovel amenđe pharo te podržina o odluke kola anena o starešine. Na primer, ko palune nekobor berša, but skupštine hem pokrajine hine hari averćhane organizujime. Sebepi odova, o starešine zamolinđe disave objaviteljen te nakhen ki aver skupština te šaj amare dvorane te oven pherde. Ako hem tu morandiljan  te nakhe ki aver skupština šaj hine tuće but pharo te mukhe te amalen ja te familija. Da li o Jehova dinđa disavo uputstvo e starešinenđe ki koja skupština te ćhiven svakone objavitelje? Na. Sebepi odova, šaj te ovel amenđe pharo te šuna o smernice kola dobinaja prekalo lende. Ama, o Jehova dinđa len odgovornost te anen asavke odluke hem odolese valjani te ovel amen poverenje upro lende. *

10. Premalo Jevrejima 13:17, sose valjani te podržina o odluke kola o starešine anena?

¹⁰ Sose valjani te podržina o odluke kola o starešine anena, čak iako odola odluke na sviđinena pe amenđe? Ked ćeraja odova, amen arakhaja o jekhipe maškaro amende (Ef. 4:2, 3). O skupštine šaj te napredujinen ked sare hijam ponizna hem ked podržinaja o odluke kola o starešine anđe. (Čitin Jevrejima 13:17.) Soj tano pana považno, ked spremno sarađujinaja okolencar kas o Jehova ćhivđa te brininen pe amendar, amen mothovaja e Jehovase so verujinaja olese (Dela 20:28).

11. Sose šaj te ova uverime so o odluke kola o starešine anena tane amare šukaripase?

¹¹ Angleder te anen disavi odluka o starešine molinena pe aso sveti duh. Ako odova na bistraja ka ova uverime so o odluke kola anena tane amare šukaripase. Isto ađahar, on razmotrinena o načelija andi Biblija hem o smernice kola dinđa e Jehovasi organizacija. On mangena te ćeren e Jehova bahtalo hem te brininen pe ando Devleso narodo najšukar so šaj. On đanena soj tane odgovorna e Devlese aso odova sar brininena pe ando oleso narodo (1. Petr. 5:2, 3). Razmislin akalestar: Sebepi i nacija, i religija hem i politika o manuša ko sveto tane podelime. Ama, e Jehovaso narodo tano ko jekhipe hem služini jekhe ćaćutne Devlese. Sa odova šaj te ovel samo sose o Jehova pomožini pe narodose!

12. Sostar o starešine valjani te razmislinen ked valjani te odlučinen da li neko ćaće kajini pe?

¹² O Jehova e starešinenđe dinđa but bari odgovornost, a odija tani te arakhen e skupština te ovel čisto. Ako neko ćerđa jekh ozbiljno greh, o Jehova rodela ando starešine te dikhen da li odija osoba šaj te aćhol deo andi skupština. On valjani te dikhen da li odija osoba ćaće kajini pe aso odova so ćerđa. Neko šaj te phenel soj tano olese žao, ama da li ćaće mrzini odova so ćerđa? Da li mothovi soj tano odlučno te na ćerel palem odova greh? Ako jekh razlog sose ćerđa odova greh hine o lošno društvo, da li tano spremno te ćhinavi te družini pe odole manušencar? O starešine molinena pe e Jehovase, pokušinena te haljon so ćaće ulo, dikhena so i Biblija vaćeri odolestar hem sar odija osoba dikhela ko odova so ćerđa. Palo odova, on odlučinena da li odija osoba šaj te aćhol ki skupština. Disavo puti, oj mora te ovel isključimi (1. Kor. 5:11-13).

13. So šaj pućaja amen ako amaro amal ja neko kotar amari porodica tano isključimo?

¹³ Ked posebno šaj te dićhol da li isi amen poverenje ko starešine? Ako tano isključimo neko ko nane amaro amal ja neko ko nane andi amari porodica, šaj nane amenđe pharo te prihvatina i odluka koja o starešine anđe. Ama, so ako tano isključimo amaro amal ja neko kotar amari porodica? Tegani šaj pućaja amen da li o starešine ćaće anđe šukar odluka hem da li bi o  Jehova anela asavki odluka. So šaj te pomožini amen ispravno te dikha ki odluka koja on anđe?

14. So na valjani te bistra ako amaro amal ja neko andi amari porodica tano isključimo?

¹⁴ Na valjani te bistra so o isključenje tano disciplina ando Jehova hem so odija disciplina šaj te pomožini hem averenđe ki skupština hem e osobaće koja grešinđa. Ako i osoba koja na kajini pe hem ponodri aćhola deo andi skupština, oj šaj lošno te utičini upro avera (Gal. 5:9). Uzo odova, oj na ka haljol kobor tano ozbiljno odova so ćerđa, na ka menjini po način sar razmislini hem odova so ćerela te šaj palem te ovel paše e Jehovaja (Prop. 8:11). Šaj te ova uverime so ked o starešine valjani te anen odluka da li neko ka ovel isključimo, on but ozbiljno dikhena ki odija odgovornost. Sar o sudije ko purano Izrael, on haljona so „na sudinena ko manušeso anav nego ko Jehovaso anav“ (2. Let. 19:6, 7).

15. Sose tano važno akana te ovel amen poverenje ko odova sar o Jehova vodini pi organizacija?

¹⁵ O krajo ando akava sveto tano but paše. Odolese, sar niked angleder valjani te ova uverime so sa odova so o Jehova ćerela tano ispravno. Odova tano važno sose ki bari nevolja šaj ka dobina disave smernice kola šaj na ka haljova. Tegani, o Jehova na ka vaćeri lično amencar, već ka del amen uputstvija prekalo manuša kolen ćhivđa te predvodinen ki phuv. Ko odova vreme na valjani te puća amen da li odola smernice ćaće avena ando Jehova ja ando manuša. Da li ko odova najvažno period ka ovel tut poverenje ko Jehova hem ki olesi organizacija? Ako mangeja te đane odgovor ko odova pućibe, razmislin sar već avdije dikheja ko smernice kola dobinaja andi Jehovasi organizacija? Ako već avdije isi tut poverenje ki Jehovasi organizacija hem spremno šuneja sa o smernice kola dobinaja, verovatno isto odova ka ćere hem ki bari nevolja (Luka 16:10).

16. Sar pana hari ka dićhol kobor tano baro amaro poverenje ko Jehova?

¹⁶ Valjani te razmislina hem sar ka reagujina ko odluke kola o Jehova ka anel ko krajo ando akava lošno sveto. Akana isi amen nada so but manuša kola na služinena e Jehovase, čak hem amare rođakija, šaj ka počminen te služinen e Jehovase. Ama, ko Armagedon o Jehova prekalo Isus ka odlučini so ka ovel olencar (Mat. 25:31-33; 2. Sol. 1:7-9). Nane amaro te odlučina  kase o Jehova valjani te mothovi milosrđe, a kase na (Mat. 25:34, 41, 46). Da li ko odova vreme ka verujina so e Jehovase odluke tane ispravna ja ka ćhinava te služina olese? Već akana valjani te zorjaćera amaro poverenje ko Jehova te šaj te ovel amen poverenje upro leste hem ki budućnost.

17. So ađićeri amen ako ko krajo ando akava sveto ka ovel amen poverenje ko Jehova?

¹⁷ Zamislin samo sar ka ovel amenđe ko nevo sveto. O religije kola o Devel na prihvatini više na ka oven. Isto ađahar, o političko hem o trgovačko sistemi, sebepi kola o manuša beršencar patinđe više na ka oven. O manuša više na ka oven naborme, na ka phurjon hem više niko na ka merel. O Beng hem o demonija hiljada berš ka oven phanlje. Sa o lošna buća kola ulje sebepi i pobuna više na ka oven (Otkr. 20:2, 3). Tegani ka ova but bahtale sose verujinđam so o Jehova uvek ćerela odova soj tano ispravno!

18. Premalo Brojevi 11:4-6 hem 21:5, so šaj te sikljova ando Izraelcija?

¹⁸ Da li hem ko nevo sveto ka ovel amen disave pharipa ko kola ka dićhol kobor tano baro amaro poverenje ko Jehova? Razmislin so hine sigate palo odova so o Izraelcija ikljilje ando Egipat. Disave počminđe te žalinen pe sebepi so na hine len hrana koja hine len ko Egipat hem na hine zadovoljna odoleja so o Jehova dinđa len mana. (Čitin Brojevi 11:4-6; 21:5.) Da li hem amen ađahar ka razmislina pali bari nevolja? Amen na đanaja kobor bari buti ađićeri amen hem kobor dugo valjani te čistina i phuv te šaj hari pohari te ovel raj. Tegani ka ovel amen but buti hem ko početko amaro životi na ka ovel lokho. Da li ka žalina amen ko odova so o Jehova tegani ka del amen? Jekh buti tani sigurno: Ako avdije hijam zahvalna aso sa o buća kola o Jehova dela amen, verovatno hem tegani ka ova zahvalna.

19. So sikljiljam ando akava članko?

¹⁹ Valjani te ova sigurna so o Jehova uvek ćerela odova soj tano ispravno. Isto ađahar, valjani te ovel amen poverenje upro okola kas o Jehova ćhivđa te den amen smernice. Niked na valjani te bistra o lafija kola o Jehova phenđa prekalo prorok Isaija: „Arakhen o mir hem o pouzdanje, odova ka ovel tumari snaga“ (Is. 30:15).