Da li đanđan?
Sose hine šukar so hem i grlica hem o golubi šaj hine te den pe sar žrtva?
PREMALO Mojsijeso zakon, sar žrtva šaj hine te den pe hem o grlice hem o golubija. Akala duj ćiriklja uvek zajedno pominena pe ko zakon ando žrtve hem šaj hine te den pe jekh umesto aver (Lev. 1:14; 12:8; 14:30). Sose odova hine šukar? Jekh razlog hine sose na hine but grlice. Ama, sose na hine?
Grlica
O grlice živinena ko Izrael samo ko masekija ked tano baro tatipe. Svako berš, ko oktobar on đana ko jug ko phuvja kuri tano tato hem irinena pe palem ko Izrael ked avela o nilaj (Pesma 2:11, 12; Jer. 8:7). Sebepi odova, ked hine jevend, e Izraelcenđe ko purano vreme hine pharo te den sar žrtva e grlicen.
Golub pećinar
Ki aver strana, o golubija na đana te živinen ki aver phuv hem odolese on šaj hine te den pe sar žrtva prekalo celo berš. O golubi tano ćiriklji koja šaj hine te ćeren te ovel pitomo (Uporedin e stihonencar ando Jovan 2:14, 16). Ki jekh knjiga (Bible Plants and Animals) pisini so „ko sa o gava hem dizja o manuša ki Palestina hine len golubija ko po ćher. Svako manuš kova hine le po ćher hine le golubarnik ja jekh rupa ko zido kuri o golubija šaj hine te živinen“ (Uporedin e stihoja ando Isaija 60:8).
O golubi ko golubarniko
O Jehova mothovđa soj tano hem pherdo mangipe hem razumno ađahar so prihvatinđa o žrtve kola o Izraelcija hine len prekalo celo berš.
