1. Kobor tano e Jehovase vredno amaro životi?

 ZAMISLIN so to amal dinđa tut jekh but purani, ama but skupo slika. Iako isi la disave fleke hem hari tani oštetimi, oj tani procenimi so koštini milionija dolarija. Sigurno bi cenineja odova poklon hem bi arakheja le. Isto ađahar, o Jehova dinđa amen jekh but vredno poklon – amaro životi. O Jehova mothovđa kobor cenini amaro životi ađahar so dinđa pe Ćhave sar otkupnina amenđe (Jov. 3:16).

2. Premali 2. Korinćanima 7:1, so o Jehova ađićeri amendar?

² Ando Jehova avela o životi (Ps. 36:9). O apostol Pavle phenđa: „Sebepi oleso isi amen životi, phiraja hem postojinaja“ (Dela 17:25, 28). Odolese, šaj te phena so amaro životi tano poklon ando Jehova. Ov dela amen sa so valjani amenđe te šaj te aćhova đivde (Dela 14:15-17). Ama, o Jehova na ćerela disavo čudo te šaj te arakhi amaro životi. Umesto odova, ov ađićeri amendar te brinina amen ando amaro sastipe hem andi amari duhovnost najšukar so šaj. (Čitin 2. Korinćanima 7:1.) Sose valjani te arakha amaro sastipe hem amaro životi hem sar šaj te ćera odova?

3. Sose valjani te da sa amendar te arakha amaro sastipe?

³ Jekh razlog sose valjani te arakha amaro sastipe tano sose mangaja te služina e Jehovase najšukar so šaj (Mar.  12:30). Amen mangaja te da amaro telo „sar žrtva koja tani đivdi, sveto hem ugodno e Devlese“, hem odolese na ćeraja o buća sebepi kola šaj te našala amaro sastipe (Rimlj. 12:1). Amen đanaja so našti uvek te ova saste, ama valjani te da sa amendar te arakha amaro sastipe sose ađahar ka mothova e Jehovase so ceninaja o poklon kova dinđa amen – amaro životi.

4. So o David manglja te ćerel?

⁴ O kralj David phenđa sose cenini o životi. Ov pisinđa: „Savo šukaripe isi ando mo meribe, ando odova te đav ki grobosi jama? Da li o praho ka hvalini man? Da li ov ka vaćeri kobor hijum le verno?“ (Ps. 30:9). O David akala lafija šaj pisinđa hari angleder te merel. Ama, hine odlučno te aćhol sasto hem đivdo te šaj te služini e Jehovase. Sigurno sare amen mangaja te ćera odova.

5. Kobor god te ova phure ja naborme, so šaj svako amendar te ćerel?

⁵ O nabormipe hem o phuripe šaj te ćhinaven amen te ćera odova so angleder ćerđam. Odolese šaj te osetina amen tužna hem so ništa na vredinaja. Ama, na valjani sebepi odova te vazda amare vasta ando amaro sastipe. Sose? Odolese so kobor god te ova phure ja naborme, amen pana šaj te hvalina e Jehova, sar so ćerđa o David. But ohrabrini amen odova so đanaja so anglo Jehovase jaćha amen hijam but vredna, iako hijam phure ja naborme (Mat. 10:29-31). Čak ako jekh dive ka mera, o Jehova ka uskrsnini amen (Jov 14:14, 15). Đi pana hijam đivde, mangaja te ćera sa so šaj te arakha amaro sastipe hem amaro životi.

6. So o Jehova ađićeri amendar ked valjani te odlučina so hem kobor ka ha hem ka pija?

⁶ Iako i Biblija nane knjiga koja phenela amenđe sar te brinina amen ando amaro sastipe ja so valjani te ha, oj ipak vaćeri amenđe so o Jehova mislini ando odola buća. Na primer, ov phenela so valjani te „cida amen ando lošnipe“ sebepi kova šaj te našala amaro sastipe (Prop. 11:10). I Biblija phenela so na valjani but te ha ja te maćova, sose odola buća šaj lošno te utičinen upro amaro sastipe hem ko krajo čak šaj te mera (Posl. 23:20). O Jehova ađićeri amendar te mothova samokontrola ked valjani te odlučina so hem kobor ka ha hem ka pija (1. Kor. 6:12; 9:25).

7. Sar o savet ando Poslovice 2:11 pomožini amen te brinina ando amaro sastipe?

⁷ Amen šaj te mothova so hijam zahvalna e Jehovase so dinđa amen o životi ađahar so ka razmislina angleder diso te ćera (Ps. 119:99, 100; čitin Poslovice 2:11.) Na primer, valjani te pazina so haja. Ako đanaja so disavi hrana nane šukar aso amaro sastipe, tegani valjani te izbegina odova. Isto ađahar, valjani dovoljno te sova, redovno te vežbina, te ova čista hem te čistina amaro ćher.

8. So i Biblija vaćeri ando odova kobor tano e Jehovase važno te pazina ko amaro hem ko averengo životi?

⁸ Ko Zakon kova o Jehova dinđa e Izraelcenđe pisinđa so valjanđe te ćeren te šaj te oven bezbedna ćhere ja ki buti  (Izl. 21:28, 29; Pon. zak. 22:8). Ako jekh manuš slučajno mudarđa avere manuše, tegani o posledice hine but bare (Pon. zak. 19:4, 5). Ko Zakon pisinđa so čak hem okola kola bi nenamerno povredinena e beba koja pana na bijandilji, valjanđe te oven kaznime (Izl. 21:22, 23). Ki Biblija jasno pisini so o Jehova mangela te pazina ko amaro hem ko averengo životi.

9. Sar šaj te mothova so pazinaja ko amaro životi? (Dikh i slika)

⁹ Amen mothovaja so ceninaja o životi ađahar so pazinaja o buća ko amaro ćher ja ki buti te oven ko bezbedno than. Na primer, o oštra buća, o otrovna hemikalije ja o lekija, valjani te ćhiva ko than kaj našti te doljen o ćhave. Valjani but te pazina ako valjani te thara jag, te ćera buti tate panjeja ja te koristina disavo alati. Isto ađahar, na valjani te vozina ako leljam disave lekija palo kola sovela pe amenđe, ako piljam alkohol ja ako na sućam šukar. Uzo odova, na ka ićera o telefoni ko vas đi vozinaja.

10. So valjani te ćera angleder hem đi trajini disavi vanredno situacija?

¹⁰ Amen našti te sprečina te oven o prirodna katastrofe, o epidemije ja o nasilje. Ama, ked asavke buća ovena, valjani te šuna ako o vlastija phenena amenđe te na ikljova avri sose isi policijski čas ja ako phenena te mukha odova than (Rimlj. 13:1, 5-7). Aso disave situacije šaj angleder te đana, odolese tano šukar te šuna so o vlastija phenena te šaj te pripremina amen. Na primer, šaj bi ovela šukar ko ćher te ovel amen dovoljno pani, hrana ja disave buća kotar prva pomoć.

11. So valjani te ćera ako ovela disavo zarazno nabormipe?

¹¹ So valjani te ćera ako ovela disavo zarazno nabormipe? Valjani te šuna odova so o vlastija phenena te ćera. Na primer, te thova amare vasta, te ova ki distanca, te akhara maska hem te ova ko karantin. Ked ćeraja akala buća, amen ađahar mothovaja so ceninaja o životi kova dinđa amen o Devel.

12. Sar o lafija ando Poslovice 14:15 šaj te pomožinen amen te odlučina kas valjani te šuna ked isi vanredno situacija?

¹² Ked isi disavi vanredno situacija, podijekh puti ko vestija ja ando amare amala hem komšije šaj te šuna disave buća kola nane ćaće. Umesto te verujina ko sa odova so šunaja, amen valjani te šuna okolen kola isi len tačna informacije sar soj tane o vlastija ja o doktorija. (Čitin Poslovice 14:15.) O phralja ando Vodeće telo hem ando podružnice dena sa pestar te dobinen tačna informacije angleder so dena disavi smernica aso sastankija ja asi služba (Jevr. 13:17). Ked ićeraja amen ko odola smernice, amen zaštitinaja amen hem averen. Ađahar pomožinaja hem avera te ovel len šukar mišljenje ando Jehovaso narodo (1. Petr. 2:12).

13. Sar mothovaja so ceninaja o životi?

¹³ But manuša đanena so e Jehovase svedokija ko rat dikhena sar diso sveto. Amen ićeraja amen ko Jehovaso zakon ando rat ađahar so na laja transfuzija, čak ni ked valjani amenđe disavi hitno medicinsko pomoć (Dela 15:28, 29). Ama, odova na značini so amen mangaja te mera, već mangaja te mothova so ceninaja o životi kova dinđa amen o Devel. Amen rodaja najšukar lečenje ando doktorija kola tane spremna te lečinen amen bizo rat.

14. So valjani te ćera te na ova ki situacija kuri ka valjani amenđe disavi hitno medicinsko pomoć?

¹⁴ Ako pazinaja ko amaro sastipe, ađahar so ćeraja o buća kolendar vaćerđam ko akava članko, amenđe šaj na ka valjani disavi operacija ja disavi aver ozbiljno medicinsko pomoć. Ama, ako uljam operacija posigate ka oporavina amen ako pazinaja ko amaro sastipe. Isto ađahar, ako pazinaja o buća ko amaro ćher ja ki buti te oven ko bezbedno than hem ako poštujinaja o saobraćajna znakija đi vozinaja šaj na ka valjani amenđe disavi hitno operacija.

15. (a) Sose tano važno uvek te akhara amencar i kartica asi posebno medicinsko punomoć? (Dikh i slika) (b) Sar so dikhljam ko video, so ka pomožini amenđe te ana šukar odluke ando rat ked lečinaja amen?

¹⁵ Amen ceninaja o životi kova dinđa amen o Devel, odolese pheraja i kartica asi posebno medicinsko punomoć  (pismeno izjava sar mangaja te lečina amen) hem uvek akharaja la amencar. b Akava dokumenti mothovi savo tano amaro stav ando rat ja premalo medicinska postupkija. Da li ki ti kartica isi o najneve informacije? Ako nane ja ako valjani te phere nevi, odmah ćer odova. Ma mukh odova tajsase. Odova ka pomožini tuće posig te dobine medicinsko pomoć sose na ka našale to vreme tegani te vaćere e doktorenđe to stav ando rat. Isto ađahar, ko asavko način ka pomožina e doktorenđe te na den amen disave lekija ja terapije kola šaj lošno te utičinen upro amaro sastipe. c

16. So šaj te ćera ako na đanaja sar te phera i PMP kartica?

¹⁶ Bizo obzir kobor berš isi amen ja savo sastipe isi amen, svako amendar šaj te doživini disavi nesreća ja te naborsaljol (Prop. 9:11). Odolese bi ovela but mudro te phera amari PMP kartica. Ako na đaneja sar te phere akava dokumenti, puć te starešinen te pomožinen tut. Ama, iako on mangena te pomožinen  tut te phere i kartica, on našti te anen odluka ko to than. Tu valjani te odlučine (Gal. 6:4, 5). On šaj te pomožinen tut te haljove so šaj te ćere hem odova so tu odlučineja te pisine ko lil.

17. Sar šaj te mothova so hijam razumna?

¹⁷ But amare odluke kola anaja ando amaro sastipe hem sar ka lečina amen temeljinena pe ki amari savest koja tani oblikujimi premalo biblijake načelija (Dela 24:16; 1. Tim. 3:9). Ked anaja disavi odluka hem ked vaćeraja averencar ando odova, šukar bi ovela te primenina o načelo kova pisini ko Filipljanima 4:5, odothe pisini: „Tumari razumnost nek ovel penđardi sa e manušenđe.“ Ked hijam razumna, na ka brinina amen but so ka ovel amare sastipaja niti ka ćhiva averen te ćeren odova so amen odlučinđam. Amen mangaja hem poštujinaja amare phralen hem phenjen, čak iako olenge odluke tane averćhane ando amare (Rimlj. 14:10-12).

18. Sar šaj te mothova so hijam zahvalna aso životi kova dobinđam?

¹⁸ Amen mothovaja so hijam zahvalna e Jehovase, kastar avela o životi, ađahar so arakhaja amaro životi hem ađahar so daja olese amaro najšukar (Otkr. 4:11). Akana hijam naborme hem isi amen pharipa. Ama, amaro Stvoritelj na manglja te ovel amen asavko životi. Pana hari, ov ka del amen večno životi, kuri na ka oven dukha ni meribe (Otkr. 21:4). Ama, đi na avela odova vreme valjani te uživina đi služinaja amare nebesko Dadese, e Jehovase!