1. So o Isus phenđa pe učenikonenđe ando „kraj kotar akava sveto“ hem so valjanđe on te ćeren?

 NEKOBOR dive angleder o Isus te merel, štar ando olese učenikija pućlje le: „So ka ovel znak... ando kraj kotar akava sveto?“ (Mat. 24:3). On verovatno manglje te đanen ked o Jerusalim hem o hram ka oven uništime. O Isus na phenđa lenđe samo ked odova ka ovel, nego hem vaćerđa lenđe ando kraj kotar akava sveto ko kova amen živinaja. Kotar vreme ando krajo, o Isus phenđa: „Niko na đanela ked ka avel odova dive hem o sati, ni o anđelija ko nebo ni o Ćhavo, nego samo o Dad.“ Palo odova, ov phenđa pe učenikonenđe so valjani te den sa pestar te „oven đangavde“ hem te „pazinen“ (Mar. 13:32-37).

2. Sose o hrišćanija ko prvo veko valjanđe te oven đangavde?

² O hrišćanija ko prvo veko valjanđe te oven đangavde, sose olengo životi zavisinđa kotar odova. O Isus phenđa pe učenikonenđe so ka desini pe angleder te ovel uništimo o hram hem o Jerusalim. Ov phenđa: „Ked ka dikhen so i vojska ćedinđa pe oko Jerusalim, te đanen soj tano oleso kraj but paše.“ Ked odova ulo, on valjanđe te „našen ko bregija“, sar so o Isus phenđa lenđe (Luka 21:20, 21). Okola kola šunđe e Isusese lafija, aćhilje đivde ked o Rimljanija uništinđe o Jerusalim.

3. Sostar ka vaćera ko akava članko?

 ³ Pana hari, akava lošno sveto ka ovel uništimo. Odolese tano but važno hem amen te pazina hem te ova đangavde. Ko akava članko, ka dikha sar šaj te ova đangavde ked dikhaja so ovela ko sveto, sar šaj te pazina ko amaro vilo hem sar šaj ko najšukar način te koristina amaro vreme.

4. Sose valjani te đana sar o događaja ko sveto ispuninena e biblijake proročanstvija?

⁴ Amen valjani te đana sar o događaja ko sveto ispuninena e biblijake proročanstvija. Sose? Na primer, o Isus vaćerđa kola buća ka oven ko vreme ando krajo (Mat. 24:3-14). O apostol Petar podstakninđa amen te dikha sar ispuninena pe e biblijake proročanstvija, sose odova šaj te zorjaćeri amari vera (2. Petr. 1:19-21). I zadnjo knjiga ki Biblija počmini e lafencar: „O Otkrivenje ando Isus Hrist, kova dinđa le o Devel, te mothovi pekle robonenđe odova so pana hari ka desini pe“ (Otkr. 1:1). Odolese, amen mangaja te đana so desini pe ko sveto hem te dikha sar ispuninena pe e biblijake proročanstvija. Isto ađahar, šaj jedva ađićeraja te vaćera e phralencar odolestar.

5. So na valjani, a so valjani te ćera? (Dikh i slika)

⁵ Amen valjani te vaćera ando biblijake proročanstvija, ama na valjani te pretpostavina so on značinena. Sose? Odolese so na mangaja te vaćera diso so ka rumini o jekhipe ki skupština. Na primer, amen šaj te šuna sar o politička vođe vaćerena so on šaj te rešinen o problemija hem te anen mir hem sigurnost ko sveto. Amen na valjani te pretpostavina so odoleja ispunini pe o proročanstvo andi 1. Solunjanima 5:3. Umesto odova, valjani te dikha so ko amare najneve publikacije pisini ando odova. Ked amare razgovorija temeljinena pe ko najneve informacije kola avena andi amari organizacija, amen ka ćera ki skupština „te ovel jekhipe hem sare te razmislinen ko isto način“ (1. Kor. 1:10; 4:6).

6. So sikljovaja andi 2. Petrova 3:11-13?

⁶ Čitin 2. Petrova 3:11-13. O apostol Petar pomožini amenđe te haljova sose valjani te razmotrina e biblijake proročanstvija. Ov phenđa so valjani te ovel amen „ki godi e Jehovaso dive“. Sose? Na odolese so mangaja te otkrijina o tačno „dive hem o vreme“ ked ka avel o Armagedon, nego odolese so mangaja te koristina o vreme kova aćhilo amen amare delija „te oven sveta hem premalo lende te dićhol so hijam odana e Devlese“ (Mat. 24:36; Luka 12:40). Avere lafencar, amen mangaja te pazina ko odova so ćeraja hem te da sa amendar ki služba e Jehovase odolese so but mangaja le. Te šaj te ćera odova, amen valjani te pazina ko amaro vilo.

7. Sar šaj te mothova so pazinaja ko amaro vilo? (Luka 21:34)

⁷ O Isus phenđa pe učenikonenđe te pazinen hem ko po vilo, a na samo ko događaja kola ovena ko sveto. Odova jasno pisini ko Luka 21:34. (Čitin.) O Isus phenđa: „Pazinen tumaro vilo.“ O manuš kova pazini ko po vilo dela  sa pestar te cidel pe ando buća kola šaj te ruminen oleso amalipe e Devleja. Ađahar, ov aćhola ko Devleso mangipe (Posl. 22:3; Juda 20, 21).

8. Kova savet o apostol Pavle dinđa e hrišćanenđe?

⁸ O apostol Pavle phenđa e hrišćanenđe te pazinen ko po vilo. Na primer, e hrišćanenđe ko Efes phenđa: „Pazinen sar živinena, ma živinen sar okola so nane gođale, nego sar okola soj tane gođale“ (Ef. 5:15, 16). E Satanaso najbaro cilj tano te cidel amen ando Jehova. Odolese, i Biblija podstaknini amen: „Trudinen tumen te haljon soj tani e Jehovasi volja“ (Ef. 5:17). Odova ka pomožini amen te arakha amen ando Satanase zamke.

9. Sar šaj te haljova so o Jehova mangela te ćera?

⁹ Ki Biblija na pominena pe sa o buća kola šaj te ruminen amaro amalipe e Jehovaja. Amen često valjani te ana odluke kolendar na vaćeri pe direktno ki Biblija. Te šaj te ana mudra odluke, valjani te dikha so o Jehova mangela te ćera. Ko odova šaj te pomožini amen ako redovno proučinaja i Biblija hem hor razmislinaja odolestar so čitinđam. Ked haljovaja soj tani e Jehovasi volja hem ked daja sa amendar te „razmislina sar o Hrist“, tegani ka đana sar te ana mudra odluke, iako ki Biblija na vaćeri pe direktno odolestar (1. Kor. 2:14-16). Disavo puti tano lokho te haljova ando kola buća valjani te cida amen, ama disavo puti nane lokho.

10. Sostar valjani te cida amen?

¹⁰ Amen valjani te pazina te na flertujina, te na maćova, te na vaćera diso so ka povredini averen. Isto ađahar, valjani te cida amen andi zabava kaj isi nasilje, pornografija ili avera lošna buća (Ps. 101:3). Amaro dušmani, o Beng, samo dikhela sar te rumini amaro amalipe e Jehovaja (1. Petr. 5:8). Ako na hijam đangavde, o Satana šaj ki amari godi hem ko amaro vilo te sejini zavist, pohlepa, mržnja, ponos hem ogorčenost (Gal. 5:19-21). Ki početka, amen šaj te mislina so akala buća nane odobor opasna. Ama, ako na trudinaja amen te cida len ando amaro vilo, on ka barjon sar disavi otrovno biljka hem odova ka anel amenđe problemija (Jak. 1:14, 15).

11. Ko so pana valjani te pazina hem sose?

¹¹ Jekh zamka koja ki početka na dićhola kobor tani opasno tani o lošno društvo. Zamislin jekh situacija. Tu ćereja buti nekasa ko nane e Jehovaso Svedoko. Tu mangeja ov te ovel le šukar mišljenje ando Svedokija, odolese trudineja tut te ove ljubazno hem uvek hijan spremno te pomožine le. Podijekh puti, čak hem hana maro zajedno. Hari pohari, tumen redovno hana maro zajedno. Ando jekh puti, ov počmini te vaćeri ando disave nemoralna buća. Ki početka tuće odova na sviđini pe. Ama sar nakhela o vreme, te kana sikljona te šunen asavke buća hem odova više na smetini tuće. Jekh dive, ov vićini tut te ikljon negde pali buti hem tu prihvatineja. Tu čak počmineja te primetine so složineja tut oleja ko but buća. Ov sigurno so na ka nakhel but vreme đi tu na počmineja te ćere o buća kola ov ćerela. Sar Svedokija, amen hijam ljubazna hem poštujinaja sa e manušen, ama na  valjani te bistra so amare amala šaj but te utičinen upro amende (1. Kor. 15:33). Ako pazinaja ko amaro vilo, sar so o Isus phenđa, amen na ka družina amen e manušencar kola na ićerena pe ko Jehovase merilija (2. Kor. 6:15). Amenđe ka ovel jasno so odija tani bari opasnost hem ka cida amen.

12. So ćerđe e Isusese učenikija đi ađićerđe te avel o krajo?

¹² O Isus manglja olese učenikija te ćeren diso đi ađićerena te avel o krajo ando akava sveto. Odolese, ov phenđa lenđe te propovedinen i šukar vest „ko Jerusalim, ki celo Judeja hem ki Samarija hem sa đi o najdur thana ki phuv“ (Dela 1:6-8). Odija hine bari buti. Te šaj te ćeren odova, on valjanđe mudro te koristinen po vreme.

13. Sose valjani mudro te koristina amaro vreme? (Kološanima 4:5)

¹³ Čitin Kološanima 4:5. Ako mangaja te pazina ko amaro vilo, amen mora mudro te koristina amaro vreme. „O događaja kola na očekujinaja“ šaj te desinen pe svakonese amendar (Prop. 9:11). Šaj iznenada te desini pe te našala amaro životi.

14-15. Sar šaj mudro te koristina amaro vreme? (Jevrejima 6:11, 12; dikh i slika.)

 ¹⁴ Amen šaj mudro te koristina amaro vreme ako zorjaćeraja amaro amalipe e Jehovaja hem ćeraja olesi volja (Jov. 14:21). Valjani te ova „zorale hem istrajna, uvek te ćera buti e Jehovase“ (1. Kor. 15:58). Ako ađahar ćeraja, amen na ka žalina kaj đelo amaro vreme ako desini pe te našala amaro životi ili ako alo o krajo ando akava sveto (Mat. 24:13; Rimlj. 14:8).

¹⁵ Avdije, o Isus hem amen vodini đi propovedinaja ando Devleso Kraljevstvo. Ov phenđa so ka pomožini amen hem ićeri pe ko po lafi. Prekali organizacija, o Isus sikavi amen sar te propovedina hem dela amen sa so valjani amenđe asi služba (Mat. 28:18-20). Amen šunaja e Isuse ađahar so daja sa amendar te propovedina hem te sikava e manušen. Isto ađahar, trudinaja amen te ova đangavde đi na avela o krajo kotar akava sveto. Primeninaja o savet ando Jevrejima 6:11, 12 hem hijam sigurna so amari „nada ka ispunini pe.“ (Čitin.)

16. So valjani te ova odlučna te ćera?

¹⁶ O Jehova odlučinđa ked ka uništini e Satanaso sveto. Ked ka ovel odova, o Jehova ka ispunini sa pe obećanja andi Biblija. Ama, podijekh puti šaj te mislina so o krajo harini. Tegani, na valjani te bistra so e Jehovaso dive „na ka harini“ (Avak. 2:3). Amen valjani te ova odlučna te ova „đangavde hem te ađićera e Jehova [amare] Spasitelje“ (Mih. 7:7).