KI SREDA ko 18. januar ko 2023. berš, ko amaro sajt jw.org hine jekh posebno obaveštenje. O phral Gejdž Fligl hem o Džefri Vinder hine naimenujime te služinen ko Vodeće telo ando Jehovase svedokija. Solduj već beršencar verno služinena e Jehovase.

O phral Fligl barilo ki zapadno Pensilvanija. Olese roditeljija sikavđe le ando ćaćipe. Ked hine tinejdžer, olesi porodica selinđa pe ki jekh tikni diz kuri hine potreba ando objaviteljija. Sigate palo odova, ko 20. novembar ko 1988. berš, ov krstinđa pe.

Olese roditeljija uvek ohrabrinđe le te služini ki punovremeno služba. But putija, on vićinđe e pokrajinsko nadgledniko hem disave phralen hem phenjen kotar Betel te aven koro lende. O phral Fligl šaj hine te dikhel kobor tane bahtale odola phralja hem phenja. Na nakhlja but, hem ov kotar 1. septembar 1989. berš počminđa te služini sar stalno pioniri. Duj berš palo odova, ov ispuninđa po cilj kova hine le pana ko 12 berš, te služini ko Betel. Ko oktobar ko 1991. berš počminđa te ćerel buti ko Bruklin ko Betel.

Najangleder, ćerđa buti ki knjigoveznica hem odothe hine ofto berš. Palo odova, služinđa ko Službeno odeljenje. Ko odova vreme, nekobor berš služinđa ki skupština ki rusko ćhib. Ko 2006. berš, ženinđa pe. Olesi romni, i Nađa počminđa oleja te služini ko Betel. Zajedno služinđe ko područje ki portugalsko ćhib. Palo odova, oko deš berš služinđe ko područje ki špansko ćhib. Palo odova so nekobor berš služinđa ko Službeno odeljenje, o phral Fligl počminđa te služini ki kancelarija ando Odbor aso sikavibe, a kasnije ki kancelarija ando Službeno odbor. Ko mart ko 2022. berš, dobinđa zadatko  te služini sar pomoćniko ko Službeno odbor ando Vodeće telo.

O phral Vinder barilo ki diz Murijeta, ki Kalifornija. Olese roditeljija sikavđe le o ćaćipe. Krstinđa pe ko 29. mart ko 1986. berš. Jekh masek palo odova, ov ulo pomoćno pioniri. Odova but sviđinđa pe lese, odolese nastavinđa nekobor masek te služini sar pomoćno pioniri. Palo odova, ko 1. oktobar ko 1986. berš, ulo stalno pioniri.

Ked hine tinejdžer, ov posetinđa pe duje phralen ko Betel. Sebepi odija poseta, hine le bari želja te predajini i molba aso Betel ked ka ovel pobaro. Ko maj ko 1990. berš, hine vićimo te služini ko Betel ko Volkil.

Ko Betel, o phral Vinder služinđa ko razna odeljenja, sar soj tane odeljenje aso čistibe, palo odova ki farma hem ki kancelarija ando Betel. Ko 1997. berš ženinđa pe. Ov hem olesi romni i Andžela zajedno služinđe ko Betel. Ko 2014. berš, dobinđe nevo zadatko ko Vorvik, kuri o phral Vinder pomožinđa te gradinen pe o objektija ando amaro glavno sedište. Ko 2016. berš, selinđe pe ko obrazovno centar ando Jehovase svedokija ko Paterson. Odothe o phral Vinder ćerđa buti ki Služba aso audio hem video projektija. Panđ berš palo odova, on palem selinđe pe ko Vorvik hem o phral Vinder dobinđa zadatko te ćerel buti ki kancelarija ando Odbor aso manuša. Ko mart ko 2022. berš, hine naimenujimo sar pomoćniko ko Odbor aso manuša ko Vodeće telo.

Amen molinaja e Jehova te blagoslovini akale phralen kola tane „sar dar“ đi ponodri trudinena pe verno te služinen lese (Ef. 4:8).