Ama, o Jehova očekujini amendar strpljivo te ađićera te ćerel o buća ko po vreme. Sose očekujini amendar odova? So šaj te pomožini amen te ova bahtale đi ađićeraja?

SOSE O JEHOVA OČEKUJINI AMENDAR TE AĐIĆERA?

Ki Biblija pisini: „Ama o Jehova strpljivo ađićeri te mothovi tumenđe šukaripe, ov ka mothovi tumenđe milost. Sose o Jehova tano pravedno Devel. Bahtale tane sare kola ađićerena upro leste“ (Is. 30:18). Akala lafija hine phende e Jevrejenđe kola hine tvrdoglava (Is. 30:1). Ama, maškaro odola Jevreja hine disave verna manuša hem akala lafija but ohrabrinđe len. Odola ista lafija avdije o Jehova phenela pe slugenđe.

Amen valjani te ova strpljiva hem te ađićera sose o Jehova strpljivo ađićeri. Ov odredinđa o vreme ked ka avel o krajo ando akava sveto hem ov ađićeri o dive hem o vreme aso odova (Mat. 24:36). Tegani ka ovel potpuno jasno so e Bengese optužbe protiv o Jehova hem okola kola služinena lese tane hovavne. O Jehova tegani ka cidel e Satana hem sa okolen kola tane ki olesi strana, a amenđe ka mothovi milosrđe.

Đi na avela odova vreme, o Jehova šaj na ka cidel amare kušnje. Ama, uverini amen so šaj te ova bahtale đi ađićeraja. Sar so o Isaija phenđa, amen šaj te ova bahtale đi nadinaja amen so ka avel odova soj tano šukar (Is. 30:18). a Sar šaj te ova bahtale? Akana ka dikha štar buća kola šaj te pomožinen amen.

SAR ŠAJ TE OVA BAHTALE ĐI AĐIĆERAJA?

Razmislin ando šukar buća kola isi tut. O kralj David dikhlja but lošna buća (Ps. 37:35). Ama, ov ipak phenđa: „Ćutin anglo Jehova hem ađićer le. Ma ov uznemirimo sebepi o manuš kova uspini te ćerel lošnipe“ (Ps. 37:7). O David primeninđa akava savet ađahar so razmislinđa ando Jehovaso obećanje so ka pomožini lese. Isto ađahar, razmislinđa ando svako blagoslov kova dobinđa olestar  (Ps. 40:5). Ako hem amen razmislinaja ando šukar buća kola isi amen, a na ando amare pharipa, ka ovel amenđe polokho te ađićera ko Jehova.

Koristin svako prilika te vaćere ando Jehova. O pisco kotar 71. psalam, kova izgleda hine o David, phenđa e Jehovase: „Me hem ponodri ka ađićerav tut hem pana pobuter ka hvalinav tut“ (Ps. 71:14). Sar ov hvalinđa e Jehova? Ađahar so averenđe vaćerđa ando Jehova hem đilabđa lese đilja ando hvale (Ps. 71:16, 23) Sar o David, hem amen šaj te ova bahtale đi ađićeraja ko Jehova. Amen hvalinaja le ked propovedinaja, vaćeraja olestar amare amalencar hem ćherutnencar hem ked đilabaja amare đilja. Aver puti ked ka đilabe disavi đili ki dvorana, razmislin ando lafija kotar odija đili hem sar on pomožinena tut te ove bahtalo.

Mukh te ohrabrinen tut o phralja hem o phenja. Ked o David hine le pharipa, ov ki molitva phenđa e Jehovase: „Anglo okola kola tane tuće verna ka mothovav so uzdajinava man ko to anav“ (Ps. 52:9). Amen šaj te ohrabrinen amare phralja hem phenja na samo ked hijam ko sastankija hem ki služba, već hem ked družinaja amen olencar (Rimlj. 1:11, 12).

Zorjaćer ti nada. Ko Psalam 62:5 pisini: „Me strpljivo ađićerava upro Devel, sose ov dela man nada.“ But tano važno te ovel amen zorali nada, posebno ako o kraj na avela odobor sigate sar so mislinđam. Amen valjani te ova uverime so o Jehova ka ispunini pe obećanja bizo obzir kobor valjani te ađićera. Amari nada šaj te zorjaćera ađahar so ka proučina e Devleso Lafi. Na primer, razmislin ando biblijake proročanstvija kola već ispuninđe pe, sar o različita piscija andi Biblija složinena pe jekh jekheja hem ando detaljija kola o Jehova mothovđa pestar (Ps. 1:2, 3). Isto ađahar, amen valjani hem ponodri te molina amen aso sveti duh te šaj te ova paše e Jehovaja đi ađićeraja te ispunini po obećanje so ka živina zauvek (Jud. 20, 21).

Sar o David, ov sigurno so o Jehova brinini pe ando okola kola ađićerena le hem so mothovi lenđe po mangipe (Ps. 33:18, 22). Strpljivo ađićer ko Jehova ađahar so ka razmisline ando šukar buća kola već isi tut, ka hvaline le, ka mukhe e phralen te ohrabrinen tut hem ka zorjaćere ti nada.