1. Sose valjani amenđe e Jehovasi pomoć? Vaćer jekh primer.

 ZAMISLIN so našaldiljan ki jekh šuma. Uduri tano but opasno sose isi divlja životinje, otrovna biljke hem insektija kola šaj te prenosinen disavo nabormipe. Isto ađahar, šaj te pere ki disavi rupa. Sigurno bi oveja but zahvalno ked bi tuvaja ovela jekh iskusno vodiči kova đanela kaj tani i opasnost hem sar šaj te izbegine la. Akava sveto tano sar odija šuma. Koro leste isi but buća kola tane opasna, a kola šaj te ruminen amaro amalipe e Jehovaja. Ama, amen isi amen savršeno Vodiči, o Jehova. Ov đi vodini amen pomožini amenđe te cida amen ando opasnostija hem igari amen premalo večno životi.

2. Sar vodini amen o Jehova?

² Sar o Jehova vodini amen? Najangleder, prekalo po Lafi, i Biblija. Isto ađahar, koristini hem e manušen. Na primer, prekalo „verno hem razborito robo“ dela amen duhovno hrana koja pomožini amen te ana mudra odluke (Mat. 24:45). O Jehova koristini hem e sposobna muršen te vodinen amen. Na primer, o pokrajinska nadglednikija hem o starešine ohrabrinena amen hem dena amen smernice kola pomožinena amen ked hijam ko pharipe. But hijam zahvalna e Jehovase so dela amen šukar vođstvo ko akala phare poslednja dive. Odova pomožini amen te ova paše oleja hem te aćhova ki trka aso životi.

3. Sostar ka vaćera ko akava članko?

³ Podijekh puti, šaj te ovel amenđe pharo te sledina e Jehovaso vođstvo, pogotovo ked vodini amen prekalo nesavršena manuša. Sose? Šaj na ka sviđinen pe amenđe o smernice kola dena amen. Ki aver strana šaj te mislina  so odola smernice nane logična hem odolese našti te aven ando Jehova. Tegani valjani te ovel amen poverenje ko odova so o Jehova vodini pe narodo hem soj tano amare šukaripase te prihvatina oleso vođstvo. Te šaj te barjaćera amaro poverenje, ko akava članko ka razmotrina (1) sar o Jehova vodinđa pe narodo ko purano vreme, (2) sar vodini amen avdije hem (3) sar pomožini amen odova so sledinaja oleso vođstvo.

SAR O JEHOVA VODINĐA E IZRAELCEN?

4-5. Sar o Jehova mothovđa so prekalo Mojsije vodinđa e Izraelcen? (Dikh i slika ki naslovno strana.)

⁴ O Jehova ćhivđa e Mojsije te ikalji e Izraelcen ando Egipat. Ov dinđa len jasno dokaz so vodini len prekalo leste. Na primer, prekalo stubo ando oblako vodinđa len diveste, a prekalo stubo andi jag raćate (Izl. 13:21). O Mojsije pratinđa akava stubo kova legarđa ole hem e narodo đi ko Crveno more. O manuša but darandilje sose mislinđe soj tane ki zamka. Anglo lende hine o more, a palo lende i egipatsko vojska. Mislinđe so o Mojsije grešinđa so anđa len ko Crveno more. Ama, ov na ćerđa greška sose o Jehova vodinđa len prekalo leste (Izl. 14:2). Tegani, o Devel ko jekh posebno način spasinđa len (Izl. 14:26-28).

⁵ Đi hine ki pustinja 40 berš, o Mojsije nastavinđa te verujini so o Jehova vodini pe narodo prekalo stubo ando oblako. a Podijekh puti, o Jehova ćhivđa o stubo upro Mojsijeso šator hem sa o Izraelcija šaj hine te dikhen odova (Izl. 33:7, 9, 10). O Jehova ando odova stubo vaćerđa e Mojsijeja, a palo odova ov prenosinđa e Jehovase smernice e narodose (Ps. 99:7). O Izraelcija šaj hine jasno te dikhen so o Jehova vodini len prekalo Mojsije.

6. Sar o Izraelcija reagujinđe ko Jehovaso vođstvo? (Brojevi 14:2, 10, 11).

⁶ Nažalost, but Izraelcija na manglje te prihvatinen o jasna dokazija so o Jehova vodini len prekalo Mojsije. (Čitin Brojevi 14:2, 10, 11.) But putija, buninđe pe protiv oleste. Odolese, o Jehova na mukhlja celo odija generacija te khuvel ki Obećimi phuv (Br. 14:30).

7. Kola manuša sledinđe e Jehovaso vođstvo? (Brojevi 14:24; dikh i slika.)

⁷ Ama, hine hem disave Izraelcija kola sledinđe e Jehovaso vođstvo. Na primer, o Jehova phenđa: „O Halev [. . .] hine maje poslušno celone vileja.“ (Čitin Brojevi 14:24.) O Jehova nagradinđa e Haleve hem čak dozvolinđa lese te birini kaj ka živini ki Obećimi phuv (Is. Nav. 14:12-14). Sar o Halev, hem avera Izraelcija kola khuvđe ki Obećimi phuv sledinđe e Jehovaso vođstvo. Isto ađahar, ked o Isus Navin ulo vođa umesto o Mojsije, on „hor poštujinđe le celo oleso životi“ (Is. Nav. 4:14). Odolese, o Jehova blagoslovinđa len ađahar so dinđa len i phuv koja obećinđa lenđe (Is. Nav. 21:43, 44).

8. Objasnin sar o Jehova vodinđa pe narodo ko vreme ked vladinđe o kraljija. (Dikh i slika.)

⁸ Beršencar palo odova, o Jehova ćhivđa e sudijen te vodinen olese narodo. Kasnije, ked vladinđe o kraljija, e prorokonenđe dinđa odova zadatak. O verna kraljija šunđe e prorokonenge savetija.  Na primer, o kralj David ponizno prihvatinđa o ukor ando Natan (2. Sam. 12:7, 13; 1. Let. 17:3, 4). O kralj Josafat sledinđa o vođstvo ando prorok Jazilo hem ohrabrinđa e narodo andi Juda te uzdajini pe „upro olese prorokija“ (2. Let. 20:14, 15, 20). Ked hine ko pharipe, o kralj Jezekija rodinđa pomoć ando prorok Isaija (Is. 37:1-6). Svako puti ked o kraljija sledinđe e Jehovaso vođstvo, on hine blagoslovime hem o narodo hine zaštitimo (2. Let. 20:29, 30; 32:22). Sarinenđe valjanđa te ovel jasno so o Jehova koristini e prorokonen te vodini pe narodo. Ama, but kraljija hem Izraelcija na šunđe e Jehovase prorokonen (Jer. 35:12-15).

SAR O JEHOVA VODINĐA E HRIŠĆANEN KO PRVO VEKO?

9. Prekalo kaste o Jehova vodinđa e hrišćanen ko prvo veko? (Dikh i slika.)

⁹ Ko prvo veko ki nevi era, o Jehova ćerđa i hrišćansko skupština. Sar o Jehova vodinđa e hrišćanen ko odova vreme? Ov ćhivđa e Isuse te ovel poglavari ki skupština (Ef. 5:23). Ama, o Isus na vaćerđa lično svakone učenikose so valjani te ćerel. Ov koristinđa e apostolen hem e starešinen ko Jerusalim te predvodinen (Dela 15:1, 2). Isto ađahar, hine naimenujime starešine kola predvodinđe ko skupštine (1. Sol. 5:12; Titu 1:5).

10. (a) Sar but hrišćanija ko prvo veko reagujinđe ko Jehovaso vođstvo? (Dela apostolska 15:30, 31) (b) Sose disave ko purano vreme na prihvatinđe e manušen prekalo kola o Jehova vodinđa len? (Dikh o okvir „ Sose disave na prihvatinđe o jasna dokazija?“)

¹⁰ Da li o hrišćanija ko prvo veko prihvatinđe e Jehovaso vođstvo? But đene ceninđe o smernice kola dobinđe hem spremno prihvatinđe len. U stvari, „on ohrabrinđe pe hem hine bahtale“ sebepi odova. (Čitin Dela apostolska 15:30, 31.) Ama, sar o Jehova vodini pe narodo ko amaro vreme?

SAR O JEHOVA VODINI AMEN AVDIJE?

11. Vaćer jekh primer kova mothovi sar o Jehova ko amaro vreme vodinđa okolen kola predvodinđe.

¹¹ O Jehova hem ponodri vodini pe narodo. Ov ćerela odova prekali Biblija  hem prekalo po Ćhavo, kova tano poglavari ki skupština. Da li dikhaja so hem avdije o Jehova koristini disave manušen te bi vodini amen? Ja. Na primer, razmislin so desinđa pe palo 1870. berš. O Čarls Tejz Rasel hem olese saradnikija haljilje so o 1914. berš ka ovel but važno aso Devleso Kraljevstvo (Dan. 4:25, 26). On odova haljilje sebepi e biblijake proročanstvija. Da li o Jehova vodinđa len đi istražinđe? Ja! Odova so desinđa pe ko sveto ko 1914. berš, mothovđa so e Devleso Kraljevstvo počminđa te vladini. Tegani počminđa o Prvo svetsko rat, hine zarazna nabormipa, zemljotresija hem bokhalipa (Luka 21:10, 11). Jasno hine so o Jehova koristinđa akale iskreno manušen te bi pomožini pe narodose.

12-13. So ćerđe o odgovorna phralja đi trajinđa o Dujto svetsko rat te bi napredujini o propovedibe?

¹² Razmislin so desinđa pe đi trajinđa o Dujto svetsko rat. Palo odova so proučinđe o stih ando Otkrivenje 17:8, o odgovorna phralja haljilje so odova maribe na ka legari đi o Armagedon. On đanđe so ka avel jekh mirno period ko kova šaj te propovedini pe pobuter manušenđe. Odolese, o odgovorna phralja ćerđe i škola Galad, iako odija odluka ko odova vreme na izgledinđa logično. Odija škola obučinđa e misionaren te propovedinen ko celo sveto. On hine bićhalde ko avera phuvja čak đi trajinđa odova maribe. Isto ađahar, o verno robo ćerđa jekh posebno škola koja vićinđa pe Kurs andi teokratsko služba b te bi pomožini sa e objaviteljenđe pošukar te propovedinen hem te sikaven. Ađahar, e Devleso narodo hine spremimo asi buti koja ađićerđa le.

¹³ Šaj jasno te dikha so o Jehova vodinđa pe narodo ko akava pharo vreme. Palo odova so završinđa pe o Dujto svetsko rat, e Jehovase sluge šaj hine slobodno te propovedinen ko but thana. U stvari, but manuša upoznajinena e Jehova odolese so olese sluge propovedinena ki celo Phuv.

14. Sose šaj te ovel amen poverenje ko vođstvo kova dobinaja andi Jehovasi organizacija hem ando starešine? (Otkrivenje 2:1; dikh i slika.)

 ¹⁴ Avdije, o Vodeće telo sledini e Hristeso vođstvo. On mangena o smernice kola dena te oven u skladu odoleja sar o Jehova hem o Isus dikhena ko buća. Odola smernice, o pokrajinska nadglednikija hem o starešine prenosinena e skupštinenđe. c O pomazime starešine, a hem sa avera starešine tane ko Hristeso „desno vas“. (Čitin Otkrivenje 2:1.) Naravno, sa o starešine tane nesavršena hem ćerena greške. O Mojsije, o Isus Navin hem o apostolija podijekh puti ćerđe greške (Br. 20:12; Is. Nav. 9:14, 15; Rimlj. 3:23). Amen šaj jasno te dikha so o Isus vodini e verno robe hem sa e starešinen, hem ov ka ćerel odova „sa o dive đi o svršetko ando akava poretko“ (Mat. 28:20). Odolese, isi amen šukar razlogija te ovel amen poverenje ko phralja kola predvodinena.

SAR POMOŽINI AMENĐE ODOVA SO SLEDINAJA E JEHOVASO VOĐSTVO?

15-16. So sikljiljan okolendar so sledinena e Jehovaso vođstvo?

¹⁵ Ako sledinaja e Jehovaso vođstvo, pana akana šaj te ova but bahtale. Na primer, o Endi hem i Robin šunđe o savet te pojednostavinen po životi (Mat. 6:22). Sebepi odova, on šaj hine te pomožinen ki gradnja. I Robin phenela: „Ponekad živinđam ko but tikno than, često čak na hine amen ni kuhinja. Iako but volinđum te slikinav, valjanđum te biknav me foto-aparatija hem avera buća andi mi oprema. Čak runđum sebepi odova. Ama, sar e Avrahamesi romni, i Sara, hijum le odlučno te dikhav odova so dobinđum, a na so aćhavđum“ (Jevr. 11:15). Da li hine šukar akija odluka so anđe? I Robin phenela: „But hijam radosna sose đanaja so daja e Jehovase sa so isi amen. Svako puti ked ćeraja disavi buti ki organizacija, zamislinaja sar ka ovel o životi ko nevo sveto.“ O Endi dodajini: „But hijam radosna so daja amaro vreme hem snaga te bi ćhivaja o Kraljevstvo ko prvo than.“

¹⁶ Sar pana pomožini amenđe odova so sledinaja e Jehovaso vođstvo? Palo odova  so završinđa i srednjo škola, i Marsija šunđa o savet te počmini e pionirsko službaja (Mat. 6:33; Rimlj. 12:11). Oj phenela: „Hine maje ponudimo te đav ko fakulteti štar berš bizo pare. Ama, mangljum te ispuninav me duhovna ciljija. Odolese, odlučinđum te sikljovav jekh zanati te bi šaj kasnije te izdržinav man. Odija hine i najšukar odluka koja anđum. Akana uživinava sar pioniri hem mi buti omogućini maje te pomožinav ko Betel hem te ćerav pana but avera buća.“

17. Kola blagoslovija pana ka oven amen ako sledinaja e Jehovaso vođstvo? (Isaija 48:17, 18)

¹⁷ Ponekad, e Jehovasi organizacija savetujini amen te arakha amen ando materijalizam hem ando avera buća kola šaj te ćhiven amen te ćera diso so o Jehova na mangela. Ako hem ko akala buća sledinaja e Jehovaso vođstvo, ka ova but blagoslovime, ka ovel amen čisto savest hem ka izbegina but problemija (1. Tim. 6:9, 10). Tegani, amen ka služina e Jehovase celone vileja, a odova anela ćaćutno bahtalipe hem mir. (Čitin Isaija 48:17, 18.)

18. Sose hijan odlučno te sledine e Jehovaso vođstvo?

¹⁸ Šaj te ova sigurna so o Jehova ki bari nevolja hem đi ka trajini e Hiljadaberšengi vladavina ka koristini e manušen te del amen vođstvo (Ps. 45:16). Da li tegani ka sledina olese uputstvija iako šaj na ka sviđinen pe amenđe? But ka zavisini ando odova da li akana prihvatinaja e Jehovaso vođstvo. Odolese, valjani te da sa amendar uvek te sledina e Jehovaso vođstvo hem te poštujina e manušen kolen ov ćhivđa te brininen pe amendar (Is. 32:1, 2; Jevr. 13:17). Đi odova ćeraja isi amen šukar razlogija te ovel amen poverenje upro amaro Vodiči, o Jehova, kova pomožini amen te cida amen andi duhovno opasnost hem igari amen đi ko nevo sveto.