1. ČLANKO PROUČIBASE
„Okola so rodena e Jehova sa ka ovel len“
AMARO BERŠESO STIHO ASO 2022: Okola so rodena e Jehova sa ka ovel len (PS. 34:10)
ĐILI 4 „Jehova je moj Pastir“
SOSTAR KA VAĆERA *
Čak hem ked hine ko bare pharipa, o David uvek sa hine le (Dikh kotar 1-3. odlomko) *
1. Ki koja phari situacija hine o David?
O DAVID morandilo te našel, sose o Saul, o kralj ando Izrael, manglja te mudari le. Sebepi so na hine le so te hal, o David đelo ki diz Nov hem ando sveštenik Ahimeleh rodinđa samo panđ mare (1. Sam. 21:1, 3). Kasnije, ov hem olese manuša arakhlje jekh pećina kuri garavđe pe (1. Sam. 22:1). Ama, sar o David alo ki akija situacija?
2. Kola lošna buća o Saul ćerđa? (1. Samuilova 23:16, 17)
2 O Saul hine ljubomorno upro David, sose o manuša manglje le hem sose pobedinđa ko but mariba. Isto ađahar, o Saul đanđa so o Jehova odbacinđa le hem so e Davide birinđa te ovel kralj. (Čitin 1. Samuilova 23:16, 17.) Ama, o Saul pana hine kralj ko Izrael. Hine le bari vojska hem but manuša hine ki olesi strana. Odolese, o David morandilo te našel. Da li o Saul ćaće mislinđa so šaj te ćhinavi e Jehova te ćhivel e Davide te ovel kralj? (Is. 55:11). I Biblija na vaćeri odolestar. Ama, ko jekh šaj te ova sigurna: Odoleja so ćerđa, o Saul ulo protiv o Jehova, a okola kola borinena pe protiv o Devel niked na ka pobedinen.
3. Sar hine e Davidese?
3 O David hine ponizno manuš. Ov na ćhivđa kokri pes te ovel kralj ko Izrael, već o Jehova ćhivđa le ko odova than (1. Sam. 16:1, 12, 13). O Saul upro David dikhlja sar najbaro dušmani. Ama, o David na krivinđa e Jehova sebepi odova so doživinđa, na žalinđa pe so nane le dovoljno so te hal hem so mora te živini ki pećina. Umesto odova, đi hine ki pećina, ov pisinđa jekh but šuži đili. O lafija andi odija đili tane lende aso amaro beršeso stiho: „Okola so rodena e Jehova sa ka ovel len“ (Ps. 34:10).
4. Ando kola pućiba ka vaćera hem sose tane on važna?
4 Avdije, but amare phralja hem phenja nane len dovoljno so te han hem avera buća kola valjani lenđe. * Sebepi i pandemija kotar koronavirus, but olendar aćhilje bizi buti. Sar i bari nevolja tani sa popaše, sa popharo ka ovel (Mat. 24:21). Odolese, akana ka vaćera ando štar pućiba: Sar o David hine le sa? Sose valjani te sikljova te ova zadovoljna odoleja so isi amen? Sose šaj te ova sigurna so o Jehova ka brinini pe amendar? Sar šaj te pripremina amen aso pharipa kola ađićerena amen?
„SA KA OVEL MAN“
5-6. Sar o Psalam 23:1-6 pomožini amen te haljova ko so o David mislinđa ked phenđa so e Devlese sluge „sa ka ovel len?“
5 Ko so o David mislinđa ked phenđa so e Jehovase sluge „sa ka ovel len?“ O lafija ando 23. psalam pomožinena amen te haljova odova. (Čitin Psalam 23:1-6.) O David odova psalam počminđa e lafencar: „O Jehova tano mo Pastiri. Sa ka ovel man.“ Ko odova psalam o David vaćerđa ando but šukar buća kola o Jehova dinđa le sebepi so mukhlja ov te ovel oleso Pastiri. O Jehova legarđa le ki „staza andi pravednost“ hem hine oleja hem ked hine lese šukar hem ked hine lese lošno. Ked o David phenđa so o Jehova legarđa le ki „zeleno poljana“, odova na značinđa so na hine le problemija. Disavo puti, ov hine obeshrabrimo, samći phirđa „ki dolina kuri isi bari tomina“, hem hine le dušmanija. Ama, sebepi so o Jehova hine oleso Pastiri, ov na hine le sostar te daral.
6 Tegani, ko so o David mislinđa ked phenđa „sa ka ovel man?“ Ov hine le sa so valjanđa lese te aćhol paše e Jehovaja. Olese na valjanđe but buća te ovel bahtalo. O David hine zadovoljno odoleja so o Jehova dinđa le. Najvažno hine lese odova so o Jehova blagoslovinđa le hem arakhlja le.
7. Premalo Luka 21:20-24, kola pharipa hine len o hrišćanija kola živinđe ki Judeja?
7 Ando Davidese lafija šaj te dikha kobor tano važno o materijalna buća te na oven amenđe ko prvo than. Amen šaj te uživina ko materijalna buća kola isi amen, ama na valjani te ćhiva len ko prvo than ko amaro životi. Odova haljilje hem o hrišćanija ando prvo veko kola živinđe ki Judeja. (Čitin Luka 21:20-24.) O Isus phenđa so ka avel o vreme ked „i vojska ka ćedel pe oko Jerusalim.“ Tegani, on valjanđe te „našen ko bregija.“ Sebepi so našlje, on aćhilje đivde. Ama, morandilje te mukhen but buća. Angleder nekobor berš, ki Stražarsko kula pisinđa: „On morandilje te mukhen pe njive, po ćher hem sa so hine len. Odola hrišćanija ćhivđe e Jehova ko prvo than sose verujinđe so ov ka arakhi len hem so ka pomožini lenđe.“
8. Koja važno buti sikljovaja kotar hrišćanija andi Judeja?
8 Koja važno buti sikljovaja kotar hrišćanija andi Judeja? Ki odija isto Stražarsko kula pisinđa: „O kušnje kola ka ovel amen ka mothoven amenđe sar dikhaja ko materijalna buća hem soj tano amenđe považno – o materijalna buća ja amaro životi? Ked ka avel o kraj, šaj hem amen ka ovel amen disave pharipa ja ka valjani diso te aćhava. Sar o hrišćanija ando prvo veko kola morandilje te našen hem amen valjani te ova spremna ko sa.“ *
9. Sar o savet kova o Pavle dinđa e Jevrejenđe šaj te pomožini hem amenđe?
9 Šaj samo te zamisline kobor pharo hine odole hrišćanenđe te mukhen sa so hine len hem te živinen ko nevo than kuri ništa na hine len. On valjanđe te verujinen so o Jehova ka del len odova so valjanđa lenđe. Ama, hine pana diso so šaj hine te pomožini len. Panđ berš angleder i rimsko vojska te ćedel pe oko Jerusalim, o Pavle dinđa jekh but šukar savet e Jevrejenđe. Ov phenđa: „Ko tumaro životi ma te ovel mangipe premalo pare, nego oven zadovoljna odoleja so isi tumen. Sose o Devel phenđa: ’Niked na ka aćhavav tut hem niked na ka irinav tuće mo dumo.‘ Odolese šaj hrabro te phena: ’O Jehova tano mo pomoćniko, na ka darav. So šaj te ćerel maje o manuš?‘“ (Jevr. 13:5, 6). Okolenđe kola ićerđe pe ko akava savet angleder te avel i rimsko vojska, na hine pharo te oven zadovoljna, iako na hine len but buća uduri kaj đelje. On hine sigurna so o Jehova ka brinini pe olendar. E Pavlese lafija uverinena amen so o Jehova hem amendar ka brinini pe.
OV ZADOVOLJNO ODOLEJA SO ISI TUT
10. So o Pavle sikljilo?
10 Slično savet o Pavle dinđa hem e Timotejese, a ko kova hem amen valjani te ićera amen. Ov phenđa: „Odolese, ked isi amen so te ha, so te urava hem kaj te živina, te ova zadovoljna odoleja“ (1. Tim. 6:8). Da li o Pavle akaleja manglja te phenel so amen na valjani te uživina ko disavo šužo habe, te ovel amen šužo ćher ja podijekh puti te ćina amenđe disavo nevo šej? Naravno so na. Ov manglja te phenel so valjani te ova zadovoljna odoleja so isi amen (Fil. 4:12). O Pavle sikljilo te ovel zadovoljno odoleja so hine le. I najvredno buti koja isi amen avdije tani amaro amalipe e Jehovaja, a na o materijalna buća (Avak. 3:17, 18).
O Izraelcija uvek hine len sa, iako 40 berš hine ki pustinja. Da li hem amen šaj te ova zadovoljna odoleja so isi amen akana? (Dikh o 11. odlomko) *
11. So sikljovaja ando lafija kola o Mojsije phenđa e Izraelcenđe?
11 Disavo puti, odova so amen mislinaja so valjani amenđe šaj te ovel averćhane ando odova so o Jehova mislini. Te dikha so o Mojsije phenđa e Izraelcenđe palo odova so 40 berš hine ki pustinja. Ov phenđa: „O Jehova, tumaro Devel blagoslovinđa tumen ko sa so ćerđen. Đi putujinđen ki akija bari pustinja o Jehova hine tumencar. Akala 40 berš o Jehova, tumaro Devel, hine tumencar. Hine tumen sa“ (Pon. zak. 2:7). O Jehova 40 berš dinđa e Izraelcenđe mana. O šeja kola hine len pana ked ikljilje ando Egipat, na pharavdilje (Pon. zak. 8:3, 4). Disave Izraelcija mislinđe so nane len but buća, ama o Mojsije setinćerđa len so hine len sa odova so valjanđa lenđe. Avdije, o Jehova mangela hem amen te ova zadovoljna odoleja so isi amen, te cenina čak hem o tikne buća kola ov dela amen hem te dikha len sar blagoslov kova avela olestar.
OV SIGURNO SO O JEHOVA KA BRININI PE TUTAR
12. So mothovi so o David hine le poverenje ko Jehova, a na upro peste?
12 O David đanđa so o Jehova tano verno hem so brinini pe okolendar kola mangena le. Iako hine ki opasnost ked pisinđa o 34. psalam, o David hine le odobor zorali vera ko Jehova so hine sigurno so oleso anđeo arakhi le (Ps. 34:7). Šaj o David manglja te phenel so e Jehovaso anđeo tano sar jekh vojniko kova dikhela da li avena o dušmanija. Iako hine hrabro vojniko hem iako o Jehova obećinđa lese so ka ovel kralj, ked valjanđa te pobedini pe dušmanen, o David na osloninđa pe ko odova kobor šukar đanela te koristini i praćka ja o mač (1. Sam. 16:13; 24:12). Ov verujinđa e Jehovase hem hine sigurno so e Jehovaso anđeo ka izbavini okolen kola darana olestar. Naravno, avdije na ađićeraja o Jehova prekalo disavo čudo te arakhi amen. Ama, okola so isi len poverenje ko Jehova na ka doživinen nisavo lošnipe kova ka trajini zauvek.
Ked o Gog ando Magog ka napadini amen ki bari nevolja, o naoružana vojnikija šaj ka khuven ko amare ćhera. Ama, šaj te ova sigurna so o Isus hem olese anđelija ka dikhen so ćerena hem so ka arakhen amen (Dikh o 13. odlomko)
13. Sose o Gog ando Magog ka mislini so šaj lokho te pobedini amen, ama sose na valjani te dara? (Dikh i slika kotar naslovno strana.)
13 Pana hari, hem amen ka valjani te mothova kobor tano baro amaro poverenje ko Jehova. Ked o Gog ando Magog ja i koalicija ando narodija ka napadini e Devlese narodo, amen šaj ka mislina so ka mudaren amen. Tegani ka ovel potrebno te verujina so o Jehova šaj te spasini amen hem so ka ćerel odova. Olenđe amen ka dićhova sar o bakre bizo pastiri (Jezek. 38:10-12). Amen na ka ovel amen oružje hem na ka branina amen. Odolese, on ka mislinen so šaj lokho te pobedinen amen. Ama, on na ka đanen odova so amen đanaja, so but anđelija ka oven spremna te braninen amen. On na đanena odova sebepi so na verujinena ko Devel. Odova dive on ka oven but iznenadime sose e Devlese anđelija ka borinen pe amenđe (Otkr. 19:11, 14, 15).
AKANA PRIPREMIN TUT ASO ODOVA SO KA OVEL
14. Sar šaj akana te pripremina amen aso odova so ka ovel?
14 Sar šaj akana te pripremina amen aso odova so ka ovel? Najangleder, na valjani te mislina so o materijalna buća tane najvažna, sose jekh dive ka valjani te aćhava len. Isto ađahar, valjani te ova zadovoljna hem te ova bahtale sose o Jehova tano amaro amal. So pošukar penđaraja e Devle, pana pobuter ka ova uverime so ov ka arakhi amen ked ka napadini amen o Gog ando Magog.
15. Sar odova so o David doživinđa pomožinđa lese te haljol so o Jehova niked na ka aćhavi le?
15 Te dikha so pana pomožinđa e Davidese, a so šaj hem amenđe te pomožini te pripremina amen aso pharipa kola ađićerena amen. O David phenđa: „Probinen hem dikhen kobor tano o Jehova šukar. Bahtalo tano o manuš kase tano ov than kuri šaj te garavi pe“ (Ps. 34:8). Akala lafija mothovena amenđe sose o David hine sigurno so o Jehova ka pomožini lese. But putija osloninđa pe upro Jehova hem ov niked na mukhlja le. Ked hine terno, o David borinđa pe e Golijateja hem phenđa odole zorale vojnikose: „O Jehova avdije ka del tut ko me vasta“ (1. Sam. 17:46). Disavo vreme palo odova, đi o David služinđa e kralje, e Saule, ov nekobor putija manglja te mudari le. Ama, „o Jehova hine e Davideja“ (1. Sam. 18:12). Sebepi so dikhlja sar o Jehova angleder pomožinđa lese, o David hine sigurno so o Jehova hem akana ka pomožini lese.
16. Sar šaj te dikha kobor tano o Jehova šukar?
16 So pobuter osloninaja amen upro Jehova, pana pobuter ka ova uverime so o Jehova hem tajsato dive ka pomožini amen. Amen valjani te ovel amen vera hem te oslonina amen upro Jehova ked valjani te puća amare šefe te del amen slobodna dive te đa ko kongres ja te ćera aver smena sose mangaja te đa ko sa o sastankija hem te đa pana pobuter ki služba. Ama, zamislin so to šef na dela tut slobodna dive hem na mukhela tut te ćere aver smena hem čak fordela tut andi buti. Da li ka verujine e Jehovase so niked na ka aćhavi tut hem so uvek ka brinini pe te ovel tut odova so valjani tuće? (Jevr. 13:5). But amare phralja hem phenja kola tane ki punovremeno služba šaj te phenen amenđe sar o Jehova pomožinđa lenđe. Ando odova šaj te dikha kobor tano o Jehova verno premalo pe sluge.
17. Kova tano akale beršeso stiho hem sose tano odova ko than?
17 Ked tano o Jehova amencar, nane amen sostar te dara. Sa đi ćhivaja o Kraljevstvo ko prvo than ko amaro životi, o Jehova niked na ka aćhavi amen. Te šaj te setinćeri amen kobor tano važno akana te pripremina amen aso pharipa kola ka ovel amen hem te verujina so o Jehova niked na ka aćhavi amen, o Vodeće telo birinđa akale beršeso stiho te ovel o Psalam 34:10, kuri pisini: „Okola so rodena e Jehova sa ka ovel len.“
ĐILI 38 Ov ka del tut snaga
^ Amaro beršeso stiho tano lendo ando Psalam 34:10, kuri pisini: „Okola so rodena e Jehova sa ka ovel len.“ But ando e Jehovase verna sluge nane len but pare. Ama, sar šaj te phena so „sa ka ovel len?“ Ko akava članko, ka haljova so značinena akala lafija hem sar šaj te pomožinen amen te pripremina amen aso pharipa kola ka ovel amen.
^ Dikh o „Pućiba ando čitaocija“ ki Stražarsko kula kotar 15. septembar 2014. berš.
