1. Savi hine e Jakovesi porodica?

 O JAKOV, e Isuseso phral, barilo ki porodica koja verno služinđa e Jehovase. * Olese roditeljija, o Josif hem i Marija, but manglje e Jehova hem dinđe sa pestar verno te služinen olese. Uzo odova, o Jakov hine le pana jekh blagoslov. Oleso phureder phral hine o Mesija. Kobor samo bari čast o Jakov hine le te barjol ki jekh asavki porodica.

2. Kola razlogija o Jakov hine le te ćhivel pe upro po phureder phral?

² O Jakov hine le but razlogija te ćhivel pe upro po phureder phral (Mat. 13:55). Na primer, ked o Isus hine le 12 berš, ov odobor šukar penđarđa e Devleso Lafi so o učiteljija ko Jerusalim hine oduševime oleja (Luka 2:46, 47). O Jakov šaj ćerđa buti e Isuseja sar tesari. Ako odova ćaće hine ađahar, tegani ov but šukar penđarđa pe phrale. O phral o Natan Nor but putija phenđa: „Ked nekasa ćereja buti, tegani šaj šukar te penđare odole osoba.“ * O Jakov dikhlja sar „o Isus barjola hine hem [sar] ulo sa pomudro, hem o Devel hem o manuša but manglje le“ (Luka 2:52). Odolese, šaj te mislina so o Jakov ulo jekh ando Isusese prva učenikija. Ama, odova na hine ađahar.

3. Sar o Jakov reagujinđa ked o Isus počminđa pi služba?

 ³ Đi o Isus hine ki phuv, o Jakov na ulo oleso učenik (Jov. 7:3-5). U stvari, ov hine maškaro okola so phenđe so o Isus „ikljilo andi godi“ (Mar. 3:21). Isto ađahar, ništa na mothovi amenđe so o Jakov hine pe dajaja ked o Isus mulo ko mučeničko stubo (Jov. 19:25-27).

4. Sostar ka vaćera ko akava članko?

⁴ Palo odova, o Jakov počminđa te verujini ko Isus hem ulo starešina ki skupština. Ko akava članko, ka dikha duj buća kola šaj te sikljova ando Jakov. Sar prvo, sose valjani te aćhova ponizna? Sar dujto, sar šaj te ova šukar učiteljija?

5. Sar o Jakov reagujinđa ked o Isus pojavinđa pe lese palo odova so uskrsninđa?

⁵ Ked o Jakov ulo e Isuseso učenik? Palo odova so uskrsninđa, o Isus „pojavinđa pe e Jakovese, hem kasnije sa e apostolenđe“ (1. Kor. 15:7). Odova odobor utičinđa upro Jakov so ulo e Isuseso učenik. Ov hine odothe ked o apostolija dobinđe o sveti duh ked hine ki jekh soba ko Jerusalim (Dela 1:13, 14). Palo odova, o Jakov služinđa sar član ando vodeće telo (Dela 15:6, 13-22; Gal. 2:9). Hari angleder o 62. berš ki nevi era, ov pisinđa jekh lil e pomazano hrišćanenđe. Odova lil šaj hem amenđe avdije te pomožini bilo te ovel amen nada so ka živina ko nebo ja ki phuv (Jak. 1:1). Premalo odova so o jevrejsko istoričar, o Josif Flavije, pisinđa o jevrejsko prvosveštenik o Ananija, e Anaso ćhavo, naredinđa te mudaren e Jakove. O Jakov verno služinđa e Jehovase sa đi na završinđa po životi ki phuv.

6. Sar o Jakov hine averćhane ando verska vođe ko oleso vreme?

⁶ O Jakov hine ponizno. Sose šaj te phena odova? O Jakov hine but averćhane ando verska vođe ko oleso vreme. Ked o Jakov dikhlja o dokaz so o Isus tano e Devleso Ćhavo, ov hine spremno te menjini po mišljenje, ama odova našti te phena aso sveštenička poglavarija ko Jerusalim. Na primer, on đanđe so o Isus uskrsninđa e Lazare. Umesto te priznajinen so o Jehova bićhalđa e Isuse, on manglje te mudaren hem e Isuse hem e Lazare (Jov. 11:53; 12:9-11).  Ked o Isus uskrsninđa, on dinđe sa pestar te garaven odova ando manuša (Mat. 28:11-15). Sebepi so hine ponosna, on odbacinđe e Mesija.

7. Sose na valjani te ova ponosna?

⁷ So sikljovaja? Ma ov ponosno hem mukh e Jehova te sikavi tut. Sar so sebepi o nabormipe amaro vilo na ka ćerel šukar, isto ađahar, sebepi o ponos amenđe ka ovel pharo te šuna e Jehova. Iako o fariseija hine len jasno dokaz so o Devel dinđa e Isusese po duh hem so ov tano e Devleso Ćhavo, on na manglje te verujinen ko odova sose hine ponosna (Jov. 12:37-40). Ađahar, on našalđe i prilika te živinen večno (Mat. 23:13, 33). Odolese, but tano važno hem ponodri te mukha e Devleso Lafi hem oleso duh te pomožinen amen te menjina amen hem te utičinen ko odova sar razmislinaja hem save odluke anaja (Jak. 3:17). Odolese so hine ponizno, o Jakov mukhlja e Jehova te sikavi le hem ulo but šukar učitelj.

8. So ka pomožini amen te ova šukar učiteljija?

⁸ O Jakov na hine le but bari škola. O verska vođe ko odova vreme sigurno hem olestar mislinđe so nane školujimo hem soj tano obično manuš, sar o apostolija o Petar hem o Jovan (Dela 4:13). Ama, ked čitinaja i knjiga koja akhari oleso anav, dikhaja so ov sikljilo te ovel šukar učitelj. Sar o Jakov, šaj ni amen nane amen but bari škola. Ama, amen šaj te ova šukar učiteljija sose o Jehova prekalo po duho hem prekali pi organizacija pomožini amen. Akana ka dikha savo učitelj hine o Jakov hem so šaj te sikljova olestar.

9. Savo učitelj hine o Jakov?

⁹ O Jakov na koristinđa phare lafija hem hine jednostavno. Odolese, o phralja hem o phenja đanđe so valjani te ćeren hem sar te ćeren odova. Na primer, o Jakov ko jekh jednostavno način sikavđa e phralen so valjani te oven spremna te trpinen i nepravda hem so na valjani te ićeren holi. Ov  pisinđa: „Okolen so istrajinđe vićinaja bahtale. Šunđen asi Jovesi istrajnost hem đanena so o Jehova ko krajo ćerđa lese, đanena so o Jehova tano but samilosno hem milosrdno“ (Jak. 5:11). Sar so dikhaja, o Jakov koristinđa e Devleso Lafi ked sikavđa e phralen. Ađahar, ov pomožinđa lenđe te haljon so o Jehova uvek ka nagradini okolen soj tane verna olese, sar o Jov. Ked sikavđa e phralen, ov na koristinđa disave phare lafija. Ađahar, ov vazdinđa e Jehova, a na pes.

10. Sar šaj te ova sar o Jakov ked sikavaja e manušen?

¹⁰ So sikljovaja? Ov jednostavno hem koristin e Devleso Lafi. Ked sikavaja averen, amen na valjani te mothova kobor amen đanaja, već valjani te mothova kobor o Jehova đanela hem kobor brinini pe olendar (Rimlj. 11:33). Odova šaj te ćera ađahar so ka koristina e Devleso Lafi đi vaćeraja olencar. Umesto te phena lenđe so bi amen ćeraja ko olengo than, amen valjani te pomožina len te razmislinen ando biblijake primerija hem te haljon sar o Jehova razmislini hem sar osetini pe. Tegani, on ka ovel len želja te ćeren odova so o Jehova mangela, a na odova so amen mangaja.

11. Kola problemija hine len o hrišćanija ko Jakoveso vreme hem savo savet ov dinđa len? (Jakovljeva 5:13-15)

¹¹ O Jakov haljilo kola problemija hine len o phralja hem o phenja. Odova dićhola kotar oleso lil. Ov phravdo phenđa lenđe ko so valjani te ćeren. Na primer, disave phralja na primeninđe odmah o savetija kola dobinđe (Jak. 1:22). Avera hine pošukar premalo barvale manuša (Jak. 2:1-3). Disavenđe hine pharo te kontrolišinen pi ćhib (Jak. 3:8-10). Odola phralja hem phenja hine len bare problemija. Ama, o Jakov na vazdinđa pe vasta olendar. Ov hine ljubazno, ama phravdo dinđa len savet hem podstakninđa len te roden pomoć ando starešine. (Čitin Jakovljeva 5:13-15.)

12. So ka pomožini amenđe te dikha odova soj tano šukar ko manuša kolencar proučinaja?

¹² So sikljovaja? Ma ađićer but ando manuša hem dikh odova soj tano šukar koro lende. Bute manušenđe kolencar proučinaja nane lokho te ićeren pe ko odova so sikljona (Jak. 4:1-4). Olenđe valjani vreme te ćhinaven te ćeren disave lošna buća hem te menjinen pe. Sar o Jakov, hem amen valjani te ova hrabra hem te phena lenđe ko so valjani te ćeren. Isto ađahar, na valjani te našala amari nada hem te bistra so o Jehova tano okova kova privucini e manušen koro peste hem kova dela len snaga te menjinen pe (Jak. 4:10).

13. Premali Jakovljeva 3:2, so o Jakov phravdo phenđa?

¹³ O Jakov na mislinđa soj tano pošukar averendar. Ov na mislinđa soj tano považno averendar sose hine e Isuseso phral ja sose hine le disave važna zaduženja. Ov avere hrišćanen vićinđa „me manglje phralja“ (Jak. 1:16, 19; 2:5). O Jakov na ćerđa pe soj tano savršeno manuš. Umesto odova, ov phenđa: „Sare često grešinaja“, a na tumen često grešinena. (Čitin Jakovljeva 3:2.)

14. Sose valjani te ova spremna te phena so hem amenđe na hine uvek lokho te šuna e Jehova?

¹⁴ So sikljovaja? Ma bistri so sare hijam grešna manuša. Na valjani te mislina so hijam pošukar ando manuša kolencar proučinaja. Sose? Ako ćeraja amen so  niked na grešinaja, on šaj te obeshrabrinen pe hem te mislinen so niked na ka ćeren odova so o Devel rodela olendar. Ama, ked iskreno phenaja lenđe so hem amenđe na hine lokho te ićera amen ko odova so sikljiljam hem ked vaćeraja lenđe sar o Jehova pomožinđa amenđe te menjina amen, tegani ka haljon so hem on šaj te služinen e Jehovase.

15. Save primerija o Jakov koristinđa? (Jakovljeva 3:2-6, 10-12)

¹⁵ O Jakov koristinđa o primerija kola takinđe e manušengo vilo. Te šaj te ovel šukar učitelj, o sveti duh sigurno but pomožinđa e Jakovese. Isto ađahar, ov razmislinđa ando primerija kola oleso phureder phral koristinđa. O primerija kola o Jakov koristinđa ko po lil tane jednostavna hem lokho šaj te haljol pe i pouka. (Čitin Jakovljeva 3:2-6, 10-12.)

16. Sose valjani te koristina odgovarajuća primerija?

¹⁶ So sikljovaja? Koristin odgovarajuća primerija. Ked koristineja odgovarajuća primerija, tegani tu pomožineja e manušenđe te ćeren pese slika ki godi. Odola primerija šaj te pomožinen olenđe te na bistren o važna buća kola sikljilje. Niko na đanđa pošukar ando Isus te koristini o primerija, a oleso phral o Jakov ćhivđa pe upro leste. Akana ka dikha jekh primer kova o Jakov koristinđa hem ka dikha sose odova primer tano odobor šukar.

17. Sose o primer kova pisini ki Jakovljeva 1:22-25 tano odobor šukar?

¹⁷ Čitin Jakovljeva 1:22-25. O primer kova o Jakov koristinđa ando ogledalo tano šukar sebepi nekobor buća. Odoleja ov manglja te sikavi amen so na valjani samo te čitina e Devleso Lafi, već so valjani te ićera amen ko odova so čitinaja. Ov koristinđa o primer kova sa o manuša šaj hine but lokho te haljon. Ov vaćerđa so jekh manuš dikhlja pe ko ogledalo. Dikhlja kaj tano melalo, ama na ćerđa ništa te cidel odija mel. Isto ađahar, ked čitinaja e Devleso Lafi, amen šaj te dikha kaj valjani te menjina amen. Ama, odova nane dovoljno. Mudro tano hem diso te ćera.

18. Sostar valjani te razmislina ked valjani te koristina disavo primer?

 ¹⁸ Ked mangeja te koristine disavo primer, tu šaj te ove sar o Jakov, ađahar so ka ćere akala trin buća: (1) Puć tut da li odova primer đala uzi odija tema. (2) Koristin o primer kova o manuša šaj lokho te haljon. (3) Pomožin e manušenđe te haljon i pouka ando odova primer. Ako tano tuće pharo te arakhe šukar primer, tegani phrav o Indeks publikacija hem ko podnaslov „Poređenja“, ka arakhe but primerija kola šaj te pomožinen tut. Sar so o mikrofon ćerela to glaso te ovel pozoralo, ađahar o šukar primerija pomožinena i pouka te ovel pana pozorali. Ama, ako koristineja but primerija, o manuša ka oven zbunime. Odolese, najšukar tano te koristine o primerija samo aso glavna buća. Najvažno razlog sose mangaja pana pošukar te sikava e manušen tano sose mangaja te pomožina lenđe te oven deo andi Jehovasi porodica, a na te vazda kokri amen.

19. Sar šaj te mothova so mangaja amare phralen hem phenjen?

¹⁹ O Jakov hine le phureder phral kova hine savršeno. Ama, amen nane amen. Amen isi amen but bari čast te služina e Jehovase zajedno amare phralencar hem phenjencar. Amen mothovaja so mangaja len ađahar so družinaja amen olencar, sikljovaja olendar hem propovedinaja olencar. Ked daja sa amendar te ova sar o Jakov ko odova sar dikhaja ko avera, so ćeraja hem sar sikavaja, amen anaja čast e Jehovase hem pomožinaja e iskreno manušenđe te oven paše amare nebesko Dadeja.