1-3. Sose e Jehovase sluge disavo puti rovena?

 KED zadnjo puti runđan? Disavo puti rovaja sose hijam bahtale. Ama, but putija rovaja sose isi amen disavi dukh ko vilo. Na primer, šaj te ovel amenđe pharo sose mulo amendar neko kas mangljam. I Lorilei, amari phen andi Amerika, phenela: „Disavo puti, mi dukh sose našalđum me ćhaja, hine odobor bari so ništa naštine te utešini man. Podijekh puti, pućljum man sar mo vilo izdržini sa odova.“ *

² Ama, disavo puti rovaja sebepi avera buća. I Hiromi, amari phen koja služini ko Japan sar pionir, phenela: „Podijekh puti hijum but tužno sose o manuša na mangena te šunen i šukar vest. Disavo puti rovindoj molinava e Jehova te pomožini man te arakhav nekas ko mangela te proučini.“

³ Da li podijekh puti hem tu osetineja tut sar akala phenja? Disave amendar osetinena pe baš ađahar (1. Petr. 5:9). Amen mangaja „radosno te služina e Jehovase“, ama disavo puti rovaja sose mulo amendar neko kas mangljam, hijam obeshrabrime ja isi amen disavo baro problemi sebepi kova tano amenđe pharo te aćhova verna e Jehovase (Ps. 6:6; 100:2). So šaj te ćera ked osetinaja amen ađahar?

4. Sostar ka vaćera ko akava članko?

⁴ Amen šaj but te sikljova ando Isus. Podijekh puti, olese hine odobor pharo so runđa (Jov. 11:35; Luka 19:41; 22:44; Jevr. 5:7). Akana ka dikha ked ov runđa hem so  šaj te sikljova olestar hem ando oleso Dad, o Jehova. Isto ađahar, ka dikha so šaj amen te ćera ked doživinaja disave pharipa.

5. So sikljovaja ando Isus kotar Jovan 11:32-36?

⁵ Ko jevend, ko 32. berš ki nevi era, e Isuseso amal o Lazar naborsalo hem mulo (Jov. 11:3, 14). O Lazar hine le duj phenja, i Marija hem i Marta. O Isus but manglja odole porodica. E Lazarese phenjenđe hine but pharo sose našalđe pe phrale. Palo odova so o Lazar mulo, o Isus đelo ki Vitanija, ko gav kuri bešlje i Marija hem i Marta. Ked i Marta šunđa so o Isus avela, oj prastandoj ikljilji anglo leste. Šaj samo te zamislina kobor hine laće pharo ked phenđa e Isusese akala lafija: „Gospode, te ove hine akate, mo phral na bi merela“ (Jov. 11:21). Palo odova, ked dikhlja sar i Marija hem avera manuša rovena hem „o Isus počminđa te rovel.“ (Čitin Jovan 11:32-36.)

6. Sose o Isus runđa?

⁶ Sose o Isus runđa? Ki jekh biblijaki enciklopedija pisini: „O Isus runđa sose oleso amal o Lazar mulo hem sose dikhlja kobor tano pharo e Marijaće hem e Martaće.“ * O Isus šaj razmislinđa kobor bare dukha o Lazar hine le sose hine nabormo hem sar hine lese ked haljilo so pana hari ka merel. Isto ađahar, ov runđa sose dikhlja kobor bari dukh isi len i Marija hem i Marta. Ako našalđan nekas kas mangljan, sigurno hem tuće tano but pharo. Akana ka dikha kola trin buća šaj te sikljova ando akava.

7. So sikljovaja ando Jehova kotar odova so o Isus runđa?

⁷ O Jehova haljola tut. O Isus tano isto sar po Dad (Jevr. 1:3). Ked o Isus runđa, ov ađahar mothovđa amenđe sar o  Jehova osetini pe ked neko merela (Jov. 14:9). Ako našalđan nekas kas mangljan, ov sigurno so o Jehova na samo so dikhela ti dukh, već olese tano pharo sebepi toklo. Ov mangela te saćari to phago vilo (Ps. 34:18; 147:3).

8. Sose šaj te ove sigurno so o Isus ka uskrsnini te manglen kola mulje?

⁸ O Isus jedva ađićeri te vazdel amare manglen kola mulje. Angleder so počminđa te rovel, o Isus phenđa e Martaće: „To phral ka uštel“ (Jov. 11:23-27). I Marta verujinđa ko odova so phenđa laće. Odolese so služinđa e Jehovase, oj đanđa so o Ilija hem o Jelisej uskrsninđe disave manušen (1. Kralj. 17:17-24; 2. Kralj. 4:32-37). Isto ađahar, verovatno šunđa so hem o Isus uskrsninđa disave manušen (Luka 7:11-15; 8:41, 42, 49-56). Ov sigurno so hem tu palem ka ove okolencar kola mulje tutar. Odova so o Isus runđa ked oleso amal o Lazar mulo mothovi so ov jedva ađićeri te vazdel te manglen kola mulje.

9. Sar šaj hem tu, sar o Isus, te pomožine okolenđe kola našalđe nekas? Vaćer jekh primer.

⁹ Pomožin okolenđe kola našalđe nekas. O Isus na samo so runđa e Martaja hem e Marijaja, već hem pažljivo šunđa len hem ohrabrinđa len. Hem tu šaj te ćere odova. O Dan, jekh starešina kova bešela ki Australija, phenela: „Ked mulji mi romni, valjanđa maje pomoć. Nekobor phralja hem olenge romnja dive-rat hine spremna te šunen man. On mukhlje man te rovav hem na hine lenđe neprijatno sebepi odova. Isto ađahar, pomožinđe man hem ko avera buća. Ked me naštine te thovav me vorda, te pazarinav ja te ćerav maje diso hajbase, on ćerđe odova. Uzo sa odova, but putija hem molinđe pe mancar. On ćaće mothovđe maje so o šukar amal ’ko phare dive phral ovela‘“ (Posl. 17:17).

10. Sostar vaćeri pe ko Luka 19:36-40?

¹⁰ O Isus alo ko Jerusalim ko 9. nisan ko 33. berš ki nevi era. Sar alo sa popaše, o manuša ćedinđe pe hem buljarđe pe fistanja anglo leste hem ađahar mothovđe so mangena ov te ovel olengo Kralj. Tegani, sare hine but bahtale. (Čitin Luka 19:36-40.) Ama, odova so o Isus ćerđa palo odova but iznenadinđa olese učenikonen. Ki Biblija pisini: „Ked alo paše uzi diz hem dikhlja la, počminđa te rovel sebepi odija diz.“ Ov rovindoj phenđa kola lošna buća ka oven e manušenđe kola bešena ko Jerusalim (Luka 19:41-44).

11. Sose o Isus runđa sebepi o manuša ando Jerusalim?

¹¹ O Isus osetinđa bari dukh, sose iako šukar dočekujinđe le, on na manglje te šunen i šukar vest. Sebepi odova, o Jerusalim hine uništimo hem o manuša hine legarde ko ropstvo (Luka 21:20-24). Nažalost, sar so phenđa, but manuša odbacinđe le. Sar reagujinena o manuša odothe kaj tu bešeja ked šunena i šukar vest? Ako samo disave manuša šunena, tegani so šaj te sikljove ando odova so o Isus runđa? Akana ka dikha pana trin buća.

12. So šaj te sikljova ando Jehova kotar odova so o Isus runđa sebepi o manuša?

¹² O Jehova brinini pe e manušenđe. Odova so o Isus runđa mothovi amenđe kobor o Jehova brinini pe ando manuša. Ki Biblija pisini: „Ov na mangela nijekh te merel, nego sare te pokajinen pe“ (2. Petr.  3:9). Avdije, amen mothovaja so mangaja e manušen ađahar so daja sa amendar te vaćera lenđe i šukar vest (Mat. 22:39). *

13-14. Sar o Isus mothovđa saosećanje premalo manuša hem sar šaj amen te ova asavke?

¹³ O Isus dinđa sa pestar te propovedini. Ov mothovđa so mangela e manušen ađahar so koristinđa svako prilika te vaćeri lenđe i šukar vest (Luka 19:47, 48). So podstakninđa le te ćerel odova? O Isus hine saosećajno premalo lende. Disavo puti, o manuša odobor manglje te šunen e Isuse so ov hem olese učenikija „na hine len vreme ni maro te han“ (Mar. 3:20). O Isus hine spremno čak hem raćate te propovedini jekhe manušese (Jov. 3:1, 2). But manuša kola šunđe odova sostar o Isus vaćerđa, na ulje olese učenikija. Ama, sare hine len prilika te šunen i šukar vest. Avdije, hem amen mangaja te vaćera i šukar vest sarinenđe (Dela 10:42). Odolese, valjani te ova spremna te vaćera i šukar vest ko razna načinija.

¹⁴ Đa ki služba ked šaj te arakhe e manušen. Ako ki služba uvek đaja ko isto vreme, šaj na ka arakha okolen kola mangena te šunen i šukar vest. Jekh pionirka koja vićini pe Matilda, phenela: „Mo rom hem me propovedinaja ko različito vreme. Sabale đaja ko poslovno područje. A oko 12 o sati terđovaja e kolicaja. Haljiljam so palo pladne šaj te arakha bute manušen ćhere.“ Umesto te đa ki služba ked amenđe odgovorini, valjani te ova spremna te menjina amaro raspored hem te đa tegani ked šaj te arakha e manušen ćhere. Ako ka ćera odova, šaj te ova sigurna so o Jehova ka ovel bahtalo.

15. Premalo Luka 22:39-44, so hine i rat angleder o Isus te merel?

¹⁵ Kasno raćate, ko 14. nisan ko 33. berš ki nevi era, o Isus đelo ko getsimansko vrt hem odothe phravđa po vilo e Jehovase.  (Čitin Luka 22:39-44.) Tegani, „bare dukhaja hem asvencar ando vilo molinđa pe“ e Jehovase (Jevr. 5:7). Aso kola buća o Isus molinđa pe odija rat? Ov molinđa pe o Jehova te del le snaga te aćhol lese verno hem te ćerel olesi volja. O Jehova šunđa odija molitva hem bićhalđa jekhe anđele te zorjaćeri le.

16. Sose o Isus brininđa pe đi molinđa pe ko getsimansko vrt?

¹⁶ O Isus runđa ko getsimansko vrt sose brininđa pe so o manuša ka dikhen le sar neko ko na poštujini e Devleso anav. Isto ađahar, ov đanđa so isi le bari odgovornost – te posvetini pe Dadeso anav. Da li hem tu isi tut disavo pharipe kuri valjani te mothove so hijan verno e Jehovase? Ako tano ađahar, tegani so šaj te sikljove ando odova so o Isus runđa? Te dikha pana trin buća.

17. So šaj te sikljova kotar Jehova ando odova sar odgovorinđa ki Isusesi molitva?

¹⁷ O Jehova šunela amare molitve. Ov šunđa pe Ćhavesi molitva sose olese hine najvažno te aćhol verno pe Dadese hem te posvetini oleso anav. Ako hem amenđe tano najvažno te aćhova verna e Jehovase hem te posvetina oleso anav, ov ka šunel amare molitve hem ka pomožini amenđe (Ps. 145:18, 19).

18. Sar tano o Isus sar amal kova haljola amen?

¹⁸ O Isus haljola sar tano amenđe. Ked isi amen disavo pharipe, but tano šukar ked uzo amende tano amaro šukar amal, posebno ako hem ov nakhlja disave slična buća. O Isus tano asavko amal. Ov đanela sar tano tuće ked isi tut pharipa hem ked valjani tuće pomoć. Ov haljola amare slabostija hem ka pomožini amen ko pravo vreme (Jevr. 4:15, 16). Ked e Isusese hine pharo, o Jehova bićhalđa jekhe anđele te zorjaćeri le. Isto ađahar, o Jehova mangela hem amenđe te pomožini prekalo publikacije, videa, govorija, starešine ja avera phralja hem phenja. Amen samo valjani te ova spremna te prihvatina odija pomoć.

19. So šaj te pomožini amen ked hijam ko pharipa? Vaćer jekh primer.

 ¹⁹ O Jehova ka del amen mir. Sar o Jehova zorjaćeri amen? Ked molinaja amen, dobinaja mir „kova tano upreder odova so o manuš šaj te haljol“ (Fil. 4:6, 7). O mir kova o Jehova dela amen pomožini amenđe te na sikirina amen odobor hem ispravno te dikha ko problemija. Te dikha o primer andi amari phen i Luz. Oj phenela: „But putija osetinava man so hijum kokri. Podijekh puti, mislinava so o Jehova na mangela man. Ama, ked ađahar osetinava man, odmah molinava man e Jehovase hem phenava lese sar tano maje. I molitva pomožini man pošukar te osetinav man.“ Kotar akava iskustvo dikhaja so prekali molitva šaj te ovel amen mir.

20. Kola buća sikljiljam ando odova so o Isus runđa?

²⁰ Kobor samo šukar buća sikljiljam ando situacije ked o Isus runđa! Sikljiljam so valjani te pomožina amare amalenđe ked našalena nekas kas manglje hem te verujina so o Jehova hem o Isus ka pomožinen amenđe ked našalaja nekas kas mangljam. Amen hijam podstaknime ked propovedinaja hem ked sikavaja averen te mothova saosećanje, sar o Jehova hem o Isus. Utešini amen odova so o Jehova hem oleso Ćhavo haljona sar tano amenđe, đanena save slabostija isi amen hem mangena te pomožinen amen te istrajina. Odolese mangaja hem ponodri te ićera amen ko odova so sikljiljam sa đi na avela o dive ked o Jehova ka „kosel svako asvi kotar [amare] jaćha“ (Otkr. 21:4).