1-2. (a) Ked posebno mislinaja upro amare mangle kola mulje? (b) So o Isus ćerđa i rat angleder so mulo?

 KOBOR god berš te nakhel, amen našti te bistra amare manglen kola mulje. Posebno ko dive ked mulje, amen razmislinaja olendar.

² Svako berš amen hijam maškaro milionija manuša kola ćedena pe ko dive ked mulo neko kas but mangaja – o Isus Hrist (1. Petr. 1:8). Amen ćedaja amen ko odova dive sose mangaja te setina amen so ov dinđa po životi amenđe te oslobodini amen ando greh hem ando meribe (Mat. 20:28). U stvari, o Isus manglja olese učenikija te setinen pe ko oleso meribe. I rat angleder te merel, ov uspostavinđa jekh posebno svečanost hem phenđa pe učenikonenđe: „Ćeren akava te setinen tumen upro mande“ * (Luka 22:19).

3. Sostar ka vaćera ko akava članko?

³ Jekh tikno broj ando okola so avena ki Spomen-svečanost isi len nada so ka živinen ko nebo, a milionija avera manuša isi len nada so ka živinen ki phuv. Ko akava članko, ka dikha sose o solduj grupe jedva ađićerena te aven ki Spomen-svečanost hem sose tano šukar te ova ki  Spomen-svečanost. Najangleder te dikha sose o pomazanikija valjani te oven ki Spomen-svečanost.

4. Sose o pomazanikija lena o maro hem o vino ki Spomen-svečanost?

⁴ Svako berš, ki Spomen-svečanost o pomazanikija lena o maro hem o vino. Sose valjani te len odola simbolija? Šukar bi ovela najangleder te dikha so ulo i rat angleder o Isus te merel. Pali Pasha, o Isus uspostavinđa jekh svečanost koja tani amenđe penđardi sar e Gospodesi večera. Ov hem olese 11 apostolija hine zajedno hem ov dinđa len te han o maro hem te pijen o vino. Tegani, o Isus vaćerđa olencar ando duj savezija, ando nevo savez hem ando savez aso Kraljevstvo * (Luka 22:19, 20, 28-30). Sebepi odola duj savezija, olese apostolija hem jekh tikno broj ando manuša šaj te oven kraljija hem sveštenikija ko nebo (Otkr. 5:10; 14:1). Odolese soj tane deo ando odola duj savezija, o pomazanikija kola tane pana ki phuv šaj te len o maro hem o vino ki Spomen-svečanost.

5. So o pomazanikija đanena andi nada koja tani olenđe dindi?

⁵ Pana jekh razlog sose o pomazanikija valjani te oven ki Spomen-svečanost tano sose tegani isi len prilika te razmislinen kotar pi nada. O Jehova dinđa len but šuži nada. On ka ovel len besmrtno životi ko nebo, telo kova na ćirnjola, ka oven e Isuseja hem avere pomazanikonencar. Soj tano najvažno, on ka dikhen e Jehova (1. Kor. 15:51-53; 1. Jov. 3:2). O pomazanikija đanena so sa odova šaj te ovel samo sose o Jehova dela len odija nagrada. Ama, te šaj te dobinen pi nagrada, on valjani te aćhon verna sa đi o meribe (2. Tim. 4:7, 8). Ked o pomazanikija razmislinena kotar pi nebesko nada, odova ćerela len but bahtale (Titu 2:13). Ama, soj tano avere bakrencar? (Jov. 10:16). Sose on valjani te oven ki Spomen-svečanost?

6. Sose o avera bakre svako berš valjani te oven ki Spomen-svečanost?

⁶ Iako o avera bakre na lena o simbolija, on tane bahtale te oven ki Spomen-svečanost. Ko 1938. berš, prvo puti okola so isi len nada te živinen ki phuv hine vićime te oven ki Spomen-svečanost. Ki Stražarsko kula ando 1. mart 1938. berš, pisinđa: „Šukar tano hem o avera bakre te oven ko jekh asavko sastanak hem te dikhen so ćerela pe odothe. . . Odova tano vreme ked hem on radujinena pe.“ Sar soj tane bahtale o gostija kola alje ko bijav, isto ađahar hem o avera bakre tane bahtale ked avena ki Spomen-svečanost.

7. Sose o avera bakre jedva ađićerena te šunen o govor asi Spomen-svečanost?

⁷ Isto ađahar, hem o avera bakre but ceninena pi nada. On jedva ađićerena te šunen o govor asi Spomen-svečanost kova setinćeri len ko odova so o Hrist hem o pomazanikija ka ćeren ki Hiljadaberšengi vladavina. Ked o Isus ka ovel Kralj, ov hem o pomazanikija ka ćeren i phuv te  ovel raj hem ka pomožinen e manušenđe te oven savršena. Milionija manuša tane bahtale ked razmislinena sar ka ovel jekh dive ked ka ispuninen pe o lafija ando Isaija 35:5, 6; 65:21-23; hem ando Otkrivenje 21:3, 4. Ked zamislinena pes hem pe manglen ko nevo sveto, odova pomožini len te ovel len pana pozorali nada hem te oven odlučna te aćhon verna e Jehovase (Mat. 24:13; Gal. 6:9).

8. Sose pana o avera bakre valjani te oven ki Spomen-svečanost?

⁸ Pana jekh razlog sose o avera bakre avena ki Spomen-svečanost tano sose ađahar mothovena so mangena hem podržinena e pomazanikonen. E Devleso Lafi vaćerđa so o pomazanikija hem o avera bakre ka oven ko jekhipe. Sar? Hajde te dikha nekobor primerija.

9. Sar o proročanstvo ando Zaharija 8:23 mothovi so o avera bakre osetinena premalo pomazanikija?

⁹ Čitin Zaharija 8:23. Akava proročanstvo mothovi so o avera bakre osetinena premalo pomazanikija. O lafija „Judejco“ hem „tumencar“ odnosinena pe ki isto grupa – upro pomazanikija kola tane pana ki phuv (Rimlj. 2:28, 29). „O deš manuša ando sa o narodija“ predstavinena avere bakren. On „dolena“ e pomazanikonen ađahar so zajedno olencar verno služinena e Devlese. Odolese, ko dive ked tani i Spomen-svečanost, o avera bakre mothovena soj tane ko jekhipe e pomazanikonencar, ađahar so zajedno olencar tane ki Spomen-svečanost.

10. So o Jehova ćerđa te šaj te ispunini o proročanstvo ando Jezekilj 37:15-19, 24, 25?

¹⁰ Čitin Jezekilj 37:15-19, 24, 25. O Jehova ispuninđa akava proročanstvo ađahar so ćerđa o pomazanikija hem o avera bakre zajedno te služinen olese ko jekhipe. Ko proročanstvo pominena pe duj kašta. Okola so isi len nada te živinen ko nebo tane sar o kaš „aso Juda“ (o pleme kotar kova o izraelska kraljija hine birime), a okola so isi len nada te živinen ki phuv tane sar o kaš „aso Jefrem.“ * Te šaj te oven „jekh kaš“, o Jehova ćerđa odola duj grupe te oven ko jekhipe. Odova značini so sare on služinena ko jekhipe hem so olengo kralj tano o Isus Hrist. Svako berš, o pomazanikija hem o avera bakre zajedno ćedena pe ki Spomen-svečanost, sar „jekh stado jekhe pastireja“ (Jov. 10:16).

11. Sar o bakre kolendar vaćeri pe ko Matej 25:31-36, hem 40 podupirinena e Hristese phralen?

¹¹ Čitin Matej 25:31-36, 40. O „bakre“ kolendar o Isus vaćerđa predstavinena e pravedno manušen kola živinena ko vreme ando krajo hem kola isi len nada so ka živinen ki phuv. Odola tane o avera bakre. On podupirinena e Hristese phralen ađahar so pomožinena lenđe te ispuninen jekh but baro zadatko – te propovedinen hem te ćeren učenikonen ko celo sveto (Mat. 24:14; 28:19, 20).

12-13. Sar o avera bakre mothovena so podržinena e Hristese phralen?

¹² Svako berš, nekobor kurće angleder i Spomen-svečanost, o avera bakre mothovena so podupirinena e Hristese phralen, ađahar so vićinena e manušen ki Spomen-svečanost. (Dikh o okvir „ Da li hijan  spremno asi Spomen-svečanost?“) Isto ađahar, on pripreminena sa so valjani te šaj i Spomen-svečanost te ovel ićerdi ki svako skupština ko celo sveto, iako ko but skupštine nane niko ko ka lel o simbolija. Avera bakre tane but bahtale so šaj ko asavko način te podržinen e Hristese phralen. On đanena so o Isus ko odova so ćerena olese phralenđe dikhela samći olese ćerena (Mat. 25:37-40).

¹³ Kola pana razlogija o pomazanikija hem o avera bakre isi len te oven ki Spomen-svečanost?

14. Sar o Jehova hem o Isus mothovđe so mangena amen?

¹⁴ Amen hijam zahvalna aso mangipe kova o Jehova hem o Isus mothovđe amenđe. O Jehova ko but načinija mothovđa so mangela amen. Najbaro olendar tano so dinđa pe Ćhave sar otkupno žrtva amenđe (Jov. 3:16). Isto ađahar, hem o Isus mothovđa but baro mangipe ađahar so hine spremno te merel amenđe (Jov. 15:13). Amen našti te irina e Jehovase hem e Isusese aso odova so ćerđe amenđe. Ama, odoleja sar živinaja svako dive, šaj te mothova so hijam zahvalna olenđe (Kol. 3:15). Ked avaja ki Spomen-svečanost, tegani šaj te setina amen ko mangipe kova on mothovđe amenđe hem te mothova so mangaja len.

15. Sose hem o pomazanikija hem o avera bakre tane zahvalna asi otkupno žrtva?

¹⁵ Amen hijam but zahvalna asi otkupno žrtva (Mat. 20:28). O pomazanikija ceninena i otkupno žrtva sose sebepi odija žrtva on šaj te dobinen pi nagrada. Odolese so verujinena ki otkupno žrtva, on tane pravedna anglo Jehovase jaćha hem o Jehova usvojinđa len sar pe ćhaven (Rimlj. 5:1; 8:15-17, 23). Isto ađahar, hem o avera bakre tane zahvalna asi otkupno žrtva. Sebepi so verujinena ki Hristesi otkupno žrtva on šaj te oven čista anglo Devlese jaćha, šaj te služinen olese hem isi len nada so ka preživinen i bari nevolja (Otkr. 7:13-15). Jekh način sar o pomazanikija hem o avera bakre mothovena pi zahvalnost asi otkupno žrtva tano ađahar so avena ki Spomen-svečanost svako berš.

16. Kova tano pana jekh razlog sose avaja ki Spomen-svečanost?

¹⁶ Pana jekh razlog sose avaja ki Spomen-svečanost tano sose mangaja te šuna e Isuse. Bilo amari nada te ovel so ka živina večno ko nebo ja ki phuv, amen mangaja te šuna i zapovest koja o Isus dinđa odija rat ked uspostavinđa i Spomen-svečanost: „Ćeren akava te setinen tumen upro mande“ (1. Kor. 11:23, 24).

17. Sar i Spomen-svečanost pomožini amen te ova pana popaše e Jehovaja?

¹⁷ Ka ova pana popaše e Jehovaja (Jak. 4:8). Sar so dikhljam, i Spomen-svečanost pomožini amen te razmislina andi nada koja o Jehova dinđa amen hem ando mangipe kova mothovđa amenđe (Jer. 29:11; 1. Jov. 4:8-10). Ked razmislinaja odolestar, amaro mangipe premalo Jehova ovela pana pobaro hem ovaja pana popaše oleja (Rimlj. 8:38, 39).

18. Ko so hijam podstaknime ked razmislinaja ando Isuseso primer?

 ¹⁸ Podstaknime hijam te oponašina e Isuseso primer (1. Petr. 2:21). Nekobor dive angleder i Spomen-svečanost, ki Biblija čitinaja ando Isusese poslednja dive ki phuv, ando oleso meribe hem uskrsenje. Palo odova, o govor asi Spomen-svečanost setinćeri amen ko mangipe kova o Isus mothovđa amenđe (Ef. 5:2; 1. Jov. 3:16). Ked čitinaja hem ked hor razmislinaja ando odova so o Isus ćerđa, amen hijam podstaknime te živina ađahar sar so ov živinđa (1. Jov. 2:6).

19. Sar šaj te aćhova ko Devleso mangipe?

¹⁹ Ka ovel amen pana pobari želja te aćhova ko Devleso mangipe (Jud. 20, 21). Amen šaj te aćhova ko Devleso mangipe ađahar so ka ćera sa te šuna le, te posvetina oleso anav hem te ćera le bahtalo (Posl. 27:11; Mat. 6:9; 1. Jov. 5:3). I Spomen-svečanost pomožini amen svako dive te živina ko način kova mothovi e Jehovase so mangaja te aćhova ko oleso mangipe.

20. Kola šukar razlogija isi amen te ova ki Spomen-svečanost?

²⁰ Savi god nada te ovel amen, sare amen isi amen šukar razlogija te ova ki Spomen-svečanost. Svako berš, ked ćedaja amen ko odova dive, setinaja amen so mulo neko kas but mangaja – o Isus Hrist. Soj tano najvažno, tegani setinaja amen ko mangipe kova o Jehova mothovđa amenđe, ađahar so dinđa pe Ćhave sar otkupno žrtva. Akava berš, i Spomen-svečanost ka ovel ićerdi ko petak 15. april 2022. berš. But mangaja e Jehova hem olese Ćhave. Odolese, na mangaja te mukha ništa te ovel amenđe považno kotar odova te ova ki Spomen-svečanost.