1. Sose tani i Spomen-svečanost najvažno dive ko berš? (Luka 22:19, 20)

 ASO Jehovaso narodo, o dive ked o Isus mulo tano najvažno dive ko berš. Akava tano jedino događaj aso kova o Isus phenđa pe učenikonenđe te ićeren. (Čitin Luka 22:19, 20.) Isi amen nekobor razlogija sebepi kola jedva dikhaja te avel i Spomen-svečanost. Akana ka vaćera olendar.

2. Sose jedva ađićeraja i Spomen-svečanost?

² I Spomen-svečanost pomožini amen te razmislina kobor tani vredno i otkupnina. Pomožini amen te mothova zahvalnost asi Isusesi žrtva (2. Kor. 5:14, 15). Isto ađahar, dela amen prilika zajedno te ohrabrina amen e phralencar hem phenjencar (Rimlj. 1:12). Svako berš, but phralja hem phenja kola tane neaktivna avena ki Spomen-svečanost. Disave olendar čak tane podstaknime te irinen pe e Jehovase ked dikhena kobor šukar ađićerđe len o phralja hem o phenja. But manuša tane oduševime odoleja so šunena hem so dikhena hem odolese mangena te proučinen i Biblija. Sarinenđe amenđe i Spomen-svečanost tani but važno!

3. Sar i Spomen-svečanost pomožini amen te ova ko jekhipe? (Dikh i slika.)

³ Razmislin ando odova sar i Spomen-svečanost ćerela o phralja hem o phenja te oven ko jekhipe. E Jehovase  svedokija ćedena pe ked počmini te perel o kham. Tegani ka ovel ićerdo jekh govor kova mothovi kobor tani važno i otkupnina. Ko početko hem ko krajo đilabaja jekh đili. Đi trajini o govor, o simbolija nakhena kotar vas ko vas hem isi štar molitve palo kola phenaja amin. Odova dive sa o skupštine slavinena i Spomen-svečanost ko isto način. Šaj li te zamisline kobor o Jehova hem o Isus tane bahtale ked dikhena so ko odova dive sare hijam ko jekhipe?

4. Sostar ka vaćera ko akava članko?

⁴ Ko akava članko ka dobina odgovor ko akala pućiba: Sar šaj te pripremina amaro vilo asi Spomen-svečanost? Sar šaj te pomožina averenđe te aven? Sar šaj te pomožina okolenđe kola tane neaktivna? O odgovorija ko akala pućiba ka pomožinen amen te ova spremna aso akava događaj.

SAR ŠAJ TE PRIPREMINA AMARO VILO ASI SPOMEN-SVEČANOST?

5. (a) Sose valjani te razmislina andi otkupnina? (Psalam 49:7, 8) (b) So sikljiljan ando video Sose o Isus mulo?

⁵ Jekh ando najvažno način sar šaj te pripremina amaro vilo asi Spomen-svečanost tano ađahar so ka razmislina andi Isusesi žrtva. Amen kokri niked ne bi šaj te oslobodina amen ando greh hem ando meribe. (Čitin Psalam 49:7, 8; ili dikh o video Sose o Isus mulo?) a O Jehova hem o Isus ćerđe bare žrtve te šaj te spasinen amaro životi (Rimlj. 6:23). So pobuter razmislinaja andi Isusesi žrtva, pana pobuter ka cenina i otkupnina. Akana ka dikha kola žrtve o Jehova hem o Isus ćerđe te šaj te otkupinen amen. Ama, prvo ka dikha soj tani i otkupnina?

6. Soj tani i otkupnina?

⁶ I otkupnina tani cena koja valjani te platini pe te šaj neko te ovel oslobodimo. Ked o Adam hine stvorimo, ov hine savršeno manuš. Ama ked grešinđa, ov našalđa i prilika te živini zauvek. Odija prilika našalđe hem sa olese ćhave. Te šaj te dobini pe napalal odova so o Adam našalđa, o Isus dinđa po savršeno životi sar žrtva. Ked hine ki phuv, o Isus „na ćerđa nijekh greh hem nijekh hovavno lafi na ikljilo ando oleso muj“ (1. Petr. 2:22). Ked o Isus mulo, ov hine savršeno sar so o Adam hine ki početka. Odolese, ked dinđa po životi, o Isus šaj hine te platini i cena aso odova so o Adam našalđa (1. Kor. 15:45; 1. Tim. 2:6).

7. Save kušnje hine le o Isus đi hine ki phuv?

⁷ Ked hine ki phuv, o Isus šunđa pe Dade ko sa, iako na hine lese uvek lokho. Sar tikno, valjanđa te ovel poslušno pe roditeljenđe kola hine nesavršena, iako ov hine savršeno (Luka 2:51). Sar tinejdžer, ov valjanđa te cidel pe ando sa so šaj te ćhivel le te na šunel pe nebesko Dade. Sar baro manuš, ov valjanđa te suprotstavini pe e Satanase kova manglja te ćhivel le te grešini e Devlese hem te na ovel lese verno (Mat. 4:1-11). E Satanaso cilj hine te ćhinavi e Isuse te platini i otkupnina.

8. Kola pana kušnje hine le o Isus?

⁸ Đi hine ki phuv, o Isus hine le pana disave kušnje. Olese dušmanija progoninđe le, čak manglje te mudaren le (Luka 4:28, 29; 13:31). Isto ađahar, valjanđa te ovel strpljivo pe učenikonencar odolese so but putija ćerđe greške (Mar.  9:33, 34). Angleder te merel, ov hine mučimo hem marđe lese muj. Palo odova, hine mudardo sar zločinco hem hine le bare dukha (Jevr. 12:1-3). Angleder te merel, ko zadnjo deo ando pe kušnje, ov valjanđa te istrajini kokri bizi Jehovasi pomoć (Mat. 27:46). b

9. Sar osetineja tut sebepi e Isusesi otkupno žrtva? (1. Petrova 1:8)

⁹ O Isus ćerđa bare žrtve te šaj te obezbedini i otkupnina. So pobuter razmislinaja ando odova, amaro mangipe premalo leste ovela pana pobaro. (Čitin 1. Petrova 1:8.)

10. Savi žrtva o Jehova ćerđa sebepi i otkupnina?

¹⁰ So o Jehova hine spremno te žrtvujini te šaj o Isus te platini i otkupnina? Nijekh dad hem ćhavo na hine odobor paše sar so hine o Jehova hem o Isus (Posl. 8:30). Razmislin samo sar upro Jehova utičinđa ked dikhlja save kušnje hine le o Isus. Šaj samo te zamislina kobor hine lese pharo te dikhel pe Ćhave sar patini hem sar maltretirinena le.

11. Vaćer jekh primer kova mothovi sar o Jehova osetinđa pe ked o Isus hine mudardo?

¹¹ Svako roditelj kova našalđa pe ćhave đanela kobor tani bari odija dukh. Iako verujinaja ko uskrsenje, odova na značini so nane amen dukh. Akava pomožini amenđe te haljova sar o Jehova osetinđa pe ked dikhlja pe Ćhave sar patini hem sar merela ko 33. berš ki nevi era (Mat. 3:17). c

12. So šaj te ćera ko period andi Spomen-svečanost?

¹² Angleder i Spomen-svečanost, trudin tut te proučine pobuter andi otkupnina ko to lično ja porodično proučibe. Koristin o Vodič kotar publikacije ando Jehovase svedokija ja avera publikacije kola vaćerena pobuter andi otkupnina. d Isto ađahar, trudin tut te ićere tut ko raspored aso čitibe andi Biblija ko period andi Spomen-svečanost kova tano ćhivdo ki Radno sveska. Ko dive ked tani i Spomen-svečanost, ma bistri te dikhe o posebno biblijako jutarnjo program. Ked pripreminaja amaro vilo asi Spomen-svečanost, tegani šaj te pomožina hem averenđe (Jezd. 7:10).

 SAR ŠAJ TE POMOŽINA AVERENĐE?

13. Sar šaj te pomožina e manušenđe te ovel len korist andi Spomen-svečanost?

¹³ Sar šaj te pomožina e manušenđe te ovel len korist andi Spomen-svečanost? Najangleder, ađahar so ka vićina len. Uzo odova, šaj ko jekh lil te pisina e manušen kolen penđaraja te šaj te vićina len. Odova šaj te ovel amari familija, amare amala ki škola, ki buti ja avera. Ako nane amen dovoljno štampime pozivnice, šaj te bićhala lenđe i pozivnica ko elektronsko oblik. Šaj te ova iznenadime kobor manuša ka aven (Prop. 11:6).

14. Vaćer jekh primer kova mothovi kobor tano važno lično te da i pozivnica e manušenđe.

¹⁴ Ked lično vićineja nekas te avel ki Spomen-svečanost, ov šaj te ovel le pana pobari želja te avel. Jekh phen, kaso rom nane e Jehovaso svedoko, hine but iznenadimi ked ov phenđa laće so odova berš ka avel ki Spomen-svečanost. Sose hine iznenadimi? Odolese so oj but putija vićinđa le te avel, ama ov niked na alo. So hine averćhane akava puti? Jekh starešina kova penđarđa olake rome dinđa le pozivnica. Olako rom odova berš hine ki Spomen-svečanost, ama odova na hine jedino puti.

15. Sostar valjani te razmislina ked vićinaja e manušen ki Spomen-svečanost?

¹⁵ O manuša kolen vićinaja te aven ki Spomen-svečanost šaj te ovel len disave pućiba, posebno okola kola niked na hine ko amare sastankija. Odolese tano šukar te razmislina ando odola pućiba hem te pripremina amen te odgovorina lenđe (Kol. 4:6). Na primer, šaj te pućen: „Kobor ka trajini o program? Kaj ka ovel? Da li platini pe o ulaz? Da li ćedena pe prilogija? Sar valjani te uravav man? Sar ka izgledini odova program?“ Ked vićinaja e manušen ki Spomen-svečanost šaj te puća len: „Da li isi tumen disave pućiba?“ hem palo odova te odgovorina lenđe. Isto ađahar, šaj te mukha lenđe o  video Setin tut ko e Isuseso meribe hem Sar izgledinena amare sastankija ki amari dvorana? te šaj te pomožine lenđe te haljon so ćerela pe ko amare sastankija. Šaj te koristina i 28. lekcija andi knjiga Ov bahtalo zauvek! koja vaćeri pobuter andi Spomen-svečanost.

16. Kola pana pućiba šaj te ovel len o manuša kola avena ki Spomen-svečanost?

¹⁶ Pali Spomen-svečanost o manuša šaj te ovel len pana disave pućiba. Na primer, šaj te pućen sose samo disave manuša lelje o simbolija ja kobor putija ko berš ićeraja i Spomen-svečanost. A disave šaj ka mangen te đanen da li sa amare sastankija izgledinena ađahar. Iako ko govor hine vaćerdo ando disave buća, okola so prvo puti avena šaj ka ovel len avera pućiba. Te šaj te odgovorina lenđe, šaj te pomožini amen o članko ko amaro sajt „Sose e Jehovase svedokija slavinena i Spomen-svečanost averćhane ando avera religije?“ Amen mangaja te da sa amendar angleder, đi trajini i Spomen-svečanost hem palo odova te pomožina e manušenđe kola isi len „ispravno stav“ te haljon sar šaj te koristini lenđe odija svečanost (Dela 13:48).

POMOŽIN OKOLENĐE KOLA TANE NEAKTIVNA

17. Sar šaj o starešine te pomožinen okolenđe kola tane neaktivna? (Jezekilj 34:12, 16)

¹⁷ Ko period andi Spomen-svečanost, sar šaj o starešine te pomožinen okolenđe kola tane neaktivna? Mothov lenđe so brinineja tut olendar. (Čitin Jezekilj 34:12, 16.) Angleder i Spomen-svečanost vićin e neaktivno phralen hem phenjen. Phen lenđe so mislinđan upro lende hem so mangeja te pomožine lenđe ko bilo kova način. Vićin len te aven ki Spomen-svečanost. Ked ka aven, đa hem pozdravin tut olencar. Pali Spomen-svečanost, trudin tut te aćhove olencar ko kontakt te šaj te pomožine lenđe te irinen pe e Jehovase (1. Petr. 2:25).

18. Sar šaj sare te pomožina okolenđe kola tane neaktivna? (Rimljanima 12:10)

 ¹⁸ Sare ki skupština šaj te pomožinen okolenđe soj tane neaktivna ked ka aven ki Spomen-svečanost. Sar? Ađahar so ka oven ljubazna, ka mothoven mangipe hem poštovanje. (Čitin Rimljanima 12:10.) Na valjani te bistra so olenđe nane lokho te aven palem ko sastanak. Šaj darana sar avera ka dikhen upro lende. e Odolese, pazin te na puće diso so ka ćhivel len ki neprijatno situacija ja so ka povredini len (1. Sol. 5:11). Ma bistri so on tane pana amare phralja hem phenja. Amen but radujinaja amen ked o neaktivna irinena pe e Jehovase (Ps. 119:176; Dela 20:35).

19. Sar pomožini amenđe odova so avaja ki Spomen-svečanost?

¹⁹ Amen hijam but zahvalna so o Isus phenđa te ićera i Spomen-svečanost hem haljovaja sose tano odova dive odobor važno (Is. 48:17, 18). Ked hijam ki Spomen-svečanost, odova but pomožini amenđe hem averenđe. Amaro mangipe premalo Jehova hem o Isus ovela pana pobaro. Mothovaja kobor hijam zahvalna aso odova so o Jehova hem o Isus ćerđe amenđe. Ovaja popaše jekh jekheja. Pomožinaja averenđe te haljon save blagoslovija isi len sebepi i otkupnina. Odolese, hajde sare te da sa amendar te spremina amen asi Spomen-svečanost, aso najvažno dive ko berš!