O originalno lafi kova prevodinini pe e lafeja „kočija“ ko Novi svet prevod šaj te odnosini pe ko razna vrste ando kočije (Dela 8:28, 29, 38). Ama, izgleda so o Etiopljanin putujinđa kočijencar kola hine pobare ando obična kočije kola koristinđe pe ko mariba ja trke. Te dikha nekobor razlogija sose šaj te phena odova.

O Etiopljanin hine baro manuš hem putujinđa ko baro drumo. Ov hine „hine dvoranin kova služinđa e kandakaće, e etiopsko kraljicaće. Ov brininđa pe ando kraljicako barvalipe“ (Dela 8:27). I Etiopija ko purano vreme nalazinđa pe ko than kaj tano avdisutno Sudan hem o najjužno deo ando Egipat. Iako akava manuš verovatno na putujinđa celo vreme ko ista kočije, sigurno hine le but buća kola valjanđe lese aso odova baro drumo. Ko prvo veko aso prevoz koristinđe pe o kočije ko štar točkija kola hine ućharde. Ki jekh knjiga pisini: „Ko asavke kočije šaj hine te ćhivel pe but buća, sebepi kola o drumo šaj hine te ovel udobno hem šaj hine te putujini pe pobuter kilometrija“ (Acts–An Exegetical Commentary).

O Etiopljanin čitinđa ked o Filip alo uzo leste. Ki Biblija pisini so „o Filip prastandilo đi o kočije hem šunđa sar o Etiopljanin čitini i knjiga ando prorok Isaija“ (Dela 8:30). O kočije kola koristinđe pe aso putovanje našti hine te đan sigate. Sebepi so odola kočije đelje pohari, o evnuh šaj hine te čitini, a o Filip te prastal đi olende.

O Etipljanin „vićinđa e Filipe te ukljel ko vorda hem te bešel uzo leste“ (Dela 8:31). Ko kočije kola koristinđe pe aso maribe, o manuš valjanđa te terđol ko pre. Ama, ko kočije kola koristinđe pe aso putovanje hine pobuter than hem odolese o evnuh hem o Filip šaj hine te bešen.

Premalo odova so pisini ko Dela oftoto poglavlje hem premalo disave istorijska izveštaija, ko amare publikacije kola akana sigende ikljilje o etiopsko dvoranin tano mothovdo ko pobare kočije ando odola kola koristinđe pe ko maribe ja ki trka.