4. ČLANKO PROUČIBASE
ĐILI 30 Mo Dad, Amal hem Devel
O Jehova but mangela amen
O Jehova tano pherdo mangipaja (PS. 103:8)
SO KA SIKLJOVA?
E Jehovaso mangipe ka pomožini amen te ova pana popaše oleja, te osetina amen sigurno, te haljova so brinini pe amendar hem so dela amen snaga.
1. So avela tuće ki godi ked razmislineja ando Jehova?
DA LI nekad pokušinđan te zamisline savo tano o Jehova? Ked vaćereja oleja ki molitva, so avela tuće ki godi? Iako našti te dikha e Jehova, i Biblija opisujini le ko nekobor načinija. Na primer, koro late pisini so o Devel tano o „kham“ o „štit“ hem i „jag koja sa nakhavi“ (Ps. 84:11; Jevr. 12:29). O prorok Jezekilj ki jekh vizija opisujinđa e Jehova soj tano sar safir, sar o parno zlato kova sjajini hem sar i duga koja sjajini (Jezek. 1:26-28). Ked razmislinaja ando akala buća tegani šaj te ovel amen pana pobaro poštovanje premalo Jehova ja čak šaj te mislina so na hijam vredna te služina lese.
2. So šaj te ćhinavi nekas te ovel paše e Jehovaja?
2 Odolese so našti te dikha e Jehova šaj te ovel amenđe pharo te verujina so ov mangela amen. Disave mislinena so o Jehova našti te mangel len sebepi o buća kola desinđe pe lenđe angleder. Na primer, na hine len dad kova manglja len. O Jehova haljola asavke osećanja hem đanela sar odova šaj te utičini upro amende. Te šaj te pomožini amenđe, ov ko po Lafi mothovi savo tano.
3. Sose valjani te razmislina ando Jehovaso mangipe?
3 Najšukar lafi kova opisujini e Jehova tano mangipe (1. Jov. 4:8). Ki Biblija pisini so ov tano mangipe. Odova značini so sa so ćerela, ćerela ando mangipe. Oleso mangipe tano odobor baro hem zoralo so čak mothovi le hem okolenđe kola na mangela le (Mat. 5:44, 45). Ko akava članko ka vaćera hari pobuter ando Jehova hem ando oleso mangipe. So pobuter sikljovaja ando Devel, pobuter ka manga le.
O JEHOVA BUT MANGELA AMEN
4. Sar osetinaja amen sebepi e Jehovaso mangipe? (Dikh i slika.)
4 „O Jehova tano Devel kova tano pherdo mangipaja“ (Ps. 103:8). Ki Biblija, ov kokri pes uporedini jekha saosećajno dajaja (Is. 66:12, 13). Zamislin jekha daja koja saosećajno brinini pe kotar pi beba. Oj nežno lela e beba ki angalja hem nežno vaćeri olaja. Ked rovela ja ked diso dukhala la, oj dela la odova so valjani laće. Ked amen diso dukhala, šaj te ova sigurna so o Jehova ka mothovi amenđe po mangipe. Jekh psalmista pisinđa: „Ked ki mi godi isi but brige, tu utešineja man hem deja man mir“ (Ps. 94:19).
„Sar so e ćhave tešini olesi daj, ađahar me ka utešinav tumen“ (Dikh o 4. odlomko)
5. So e Jehovaso verno mangipe značini tuće?
5 O Jehova tano verno Devel (Ps. 103:8). Ov na vazdela pe vasta amendar ked amen ćeraja diso soj tano pogrešno. O Izraelcija but putija razočarinđe le. Ama, ked hine lenđe pharo hem ked pokajinđe pe, ov uverinđa len so pana mangela len. Na primer, ando odova narodo phenđa: „Tu hijan vredno ko me jaćha, me ceninava tut hem mangava tut“ (Is. 43:4, 5). E Devleso mangipe na meninđa pe. Amen šaj uvek te oslonina amen upro leste. Čak hem ked ćeraja disavi ozbiljno greška, ov na irini amenđe po dumo. Ako kajinaja amen hem irinaja amen olese, amen ka dikha so ov pana mangela amen. O Jehova obećini amenđe so „spremno ka oprostini“ amare grehija (Is. 55:7). Ki Biblija pisini so ked o Devel oprostini, tegani hem „zorjaćeri amen“ (Dela 3:19).
6. So sikljovaja ando Jehova kotar Zaharija 2:8?
6 Čitin Zaharija 2:8. Odolese so mangela amen, o Jehova haljola sar osetinaja amen hem spremno tano te zaštitini amen. Ov tano tužno ked amen hijam tužna. Sebepi odova, amen šaj te phena lese: „Arakh man sar i zenica andi ti jakh“ (Ps. 17:8). I jakh tani jekh but važno hem osetljivo deo ando amaro telo. Odolese, ked o Jehova phenela so hijam sar i zenica andi olesi jakh, ov samći phenela: „Ko povredini me slugen, povredini nekas koj tano manđe but dragoceno.“
7. Sose valjani te zorjaćera amaro poverenje ko Jehovaso mangipe?
7 O Jehova mangela te ova uverime so ov mangela amen lično. Ama, ov đanela so sebepi odova so angleder nakhljam šaj pućaja amen da li ov ćaće šaj te mangel amen. Ja šaj doživinaja disavi kušnja sebepi koja tano amenđe pharo te ovel amen poverenje ko Jehovaso mangipe. So šaj te pomožini amen te ova sigurna so o Jehova mangela amen? Akana ka dikha sar o Jehova mothovi po mangipe premalo Isus, o pomazanikija hem premalo sa pe sluge.
SAR O JEHOVA MOTHOVI PO MANGIPE?
8. Sose o Isus hine sigurno so oleso Dad mangela le?
8 Milionija berša, o Jehova hem oleso manglo Ćhavo hine zajedno ko nebo. Sebepi odova, on hine but paše hem but manglje jekh jekhe. O Jehova jasno mothovđa kobor mangela pe Ćhave sar so pisini ko Matej 17:5. Ov šaj hine samo te phenel: „Akava tano okova kova tano pali mi volja“. Ama, o Jehova manglja amen te đana kobor manglja e Isuse hem odolese phenđa soj tano oleso „manglo Ćhavo“. O Jehova hine ponosno upro Isus, posebno sebepi odova so hine spremno te del po životi amenđe (Ef. 1:7). O Isus niked na sumnjinđa da li oleso Dad mangela le. Ov hine sigurno ko odova. O Isus nekobor putija phenđa so o Jehova mangela le (Jov. 3:35; 10:17; 17:24).
9. Kola lafija mothovena e Jehovaso mangipe premalo pomazanikija? Objasnin. (Rimljanima 5:5)
9 O Jehova mothovi po mangipe hem e pomazanikonenđe. (Čitin Rimljanima 5:5.) Razmislin ando lafi „pherđa“ kotar akava stih. Ki originalno ćhib akava lafi prenosini i slika ando odova so e Jehovaso mangipe tano odobor zoralo soj tano sar potok kova đala hem pherela o vilo ando pomazanikija. Ćaće šuži slika koja mothovi kobor o Jehova mangela e pomazanikonen! O pomazanikija đanena so o Jehova mangela len (Jud. 1). O apostol Jovan, kova hem kokri hine pomazaniko, pisinđa: „Dikhen savo mangipe mothovđa amenđe o Dad! Phenđa amenđe so hijam olese ćhave“ (1. Jov. 3:1). Ama, da li o Jehova po mangipe mothovi samo e pomazanikonenđe? Na, ov mothovđa po mangipe sarinenđe.
10. Kova tano najbaro dokaz ando Jehovaso mangipe?
10 O najbaro dokaz ando Jehovaso mangipe tani i otkupnina. Asavko mangipe niko niked na mothovđa (Jov. 3:16; Rimlj. 5:8). O Jehova dinđa e Isuse sar žrtva te šaj amare grehija te oven oprostime hem te ova olese amala (1. Jov. 4:10). So pobuter razmislinaja andi cena koja o Jehova hem o Isus platinđe, pana pobuter haljovaja kobor mangena svakone amendar (Gal. 2:20). I otkupnina na hine platimi samo sebepi te zadovoljini pe e Jehovasi pravda, već tani dindi sar poklon amenđe. O Jehova mothovđa po mangipe ađahar so žrtvujinđa diso soj tano najvredno olese, pe Ćhave, e Isuse. Ov dozvolinđa o Isus te patini hem te merel sebepi amaro.
11. So sikljovaja ando Jeremija 31:3?
11 O Jehova na samo so osetini mangipe premalo amende, već hem mothovi amenđe kobor mangela amen. (Čitin Jeremija 31:3.) Ov privucinđa amen koro peste sose mangela amen. (Uporedin Pon. zak. 7:7, 8.) Niko hem ništa našti te cidel amen kotar oleso mangipe (Rimlj. 8:38, 39). Sar osetineja tut sebepi odova? Čitin o 23. psalam hem dikh sar e Jehovaso mangipe hem briga utičinđe upro David hem sar odova šaj te utičini upro amende.
SAR E JEHOVASO MANGIPE UTIČINI UPRO TUTE?
12. Sostar vaćeri pe ko 23. psalam?
12 Čitin Psalam 23:1-6. Ko 23. psalam o David opisujini kobor o Jehova manglja le hem brininđa pe olestar. O David, o pisco kotar akava psalam, opisujini kobor hine paše ov hem oleso Pastiri, o Jehova. Ov mukhlja e Jehova te vodini le hem uvek osloninđa pe upro leste. Đanđa so o Jehova ka mothovi lese po mangipe sa đi tano đivdo. Sose o David hine le asavko poverenje?
13. Sose o David hine sigurno so o Jehova ka brinini pe olestar?
13 „Sa ka ovel man“. O David osetinđa e Jehovasi briga odolese so uvek dinđa le sa odova so valjanđa lese. Isto ađahar, đanđa so o Jehova tano oleso amal hem so mangela le. Odolese hine potpuno sigurno so god te desini pe ki budućnost, o Jehova uvek ka brinini pe ando odova so valjani lese. Odolese so hine sigurno so o Jehova mangela le hem so brinini pe olestar, ov na brininđa pe već hine bahtalo hem zadovoljno (Ps. 16:11).
14. Sar šaj o Jehova te brinini pe amendar?
14 Amaro Dad, o Jehova brinini pe amendar, posebno ked desinena pe amenđe lošna buća ko životi. I Klara a, koja prekalo 20 berš služinđa ko Betel, na đanđa so te ćerel ked olaki porodica hine la ozbiljna problemija. Olako dad hine le moždano udar, jekh andi olaki phen hine isključimi, olaki porodica morandilji te phanel pi firma hem našalđe po ćher. Sar o Jehova mothovđa so brinini pe olendar? I Klara phenela: „O Jehova uvek brininđa pe te ovel amen sa odova so valjani amenđe. Disavo puti, hine amen čak pobuter ando odova. But putija razmislinava ando odova sar o Jehova pomožinđa amenđe hem niked na ka bistrav o mangipe kova mothovđa amenđe. Akana ked isi man avera problemija, odova so nakhljum pomožini man hem ponodri radosno te služinav e Jehovase.“
15. Ko pomožinđa e Davidese te ovel le snaga? (Dikh i slika.)
15 „Dela man snaga“. Podijekhvar, o David na hine le snaga sebepi o problemija hem o kušnje (Ps. 18:4-6). Ama, e Jehovaso mangipe hem briga dinđa le snaga. O Jehova pe umorno amale legarđa ki „zeleno poljana“ hem „ko mirna thana ko kola isi but pani“. Odolese, o David hine le snaga hem šaj hine hem ponodri radosno te služini e Jehovase (Ps. 18:28-32).
Čak hem ked hine le bare pharipa, e Jehovaso mangipe hem briga zorjaćerđe e Davide (Dikh o 15. odlomko)
16. Sar e Jehovaso mangipe dinđa tuće snaga?
16 Ked avdije isi amen pharipa hem kušnje, but putija „sebepi e Jehovaso verno mangipe pana hijam đivde“ (Tužb. 3:22; Kol. 1:11). Te dikha o primer andi Rejčel. Đi trajinđa i pandemija kotar koronavirus, olako rom mukhlja hem ola hem e Jehova. Tegani hine laće but pharo. Sar o Jehova pomožinđa la? Oj phenela: „Osetinđum sar o Jehova mothovi maje po mangipe. Celo vreme uzo mande hine me amala, anđe maje habe, pisinđe maje šuže poruke hem stihija, asandilje mancar hem uvek setinćerđe man kobor o Jehova brinini pe mandar. Zahvalno hijum e Jehovase so dinđa man asavki porodica.“
17. Sose o David šaj hine te phenel „na darava ando lošnipe“?
17 „Na darava ando lošnipe, sose tu hijan mancar“. O David but putija hine ki opasnost ando pe dušmanija. Ama, ipak e Jehovaso mangipe pomožinđa le te osetini pe sigurno. Ki svako situacija, o David osetinđa soj tano o Jehova oleja hem odova dinđa le snaga. Odolese šaj hine te phenel: „Svako dar koja hine man, ov cidinđa mandar“ (Ps. 34:4). O David hine le razlog te daral, ama e Jehovaso mangipe hine pobaro andi olesi dar.
18. Sar e Jehovaso mangipe šaj te del tut snaga ked daraja?
18 Sar odova so đanaja so o Jehova mangela amen, dela amen snaga ked isi amen bare pharipa? Jekh pionirka koja vićini pe Suzi, mothovi sar oj hem olako rom osetinđe pe ked olengo ćhavo mudarđa kokri pes. Oj phenela: „Ked asavke tragedije desinena pe tuće ko životi, tegani osetineja bari rana ko vilo hem daraja so pana lošna buća ka desinen pe. Ama, e Jehovaso mangipe pomožini amen te osetina amen sigurno.“ I Rejčel, kola angleder pominđam, phenela: „Jekh rat osetinđum bari dukh ko vilo. But brininđum man hem darandiljum. Rovindoj molinđum man e Jehovase. Tegani osetinđum sar o Jehova utešini mo vilo hem smirini man, sar so i daj smirini pe beba. Palo odova, ljela man o sojba. Niked na ka bistrav odija rat.“ Jekh starešina, kova vićini pe Tasos, hine štar berš ko phanlipe sose na manglja te đal ki vojska. Sar osetinđa so o Jehova mangela le hem brinini pe olestar? Ov phenela: „O Jehova dinđa man sa odova so valjanđa maje, disavo puti hem pobuter ando odova. Odova zorjaćerđa mo poverenje upro leste. Odolese potpuno uzdajinđum man upro leste. Isto ađahar, prekalo po sveti duh o Jehova pomožinđa man te služinav lese radosno iako o phanlipe hine but lošno than. So pobuter uzdajinđum man upro Jehova, pana pobuter osetinđum oleso mangipe. Odolese, počminđum te služinav sar stalno pionir đi hijum le ko phanlipe.“
OV PAŠE E DEVLEJA
19. (a) Sar odova so đanaja so o Jehova mangela amen ka utičini upro amare molitve? (b) Kova opis ando Jehovaso mangipe tuće najviše sviđini pe? (Dikh o okvir „ O stihija kola pomožinena amen te osetina e Jehovaso mangipe“)
19 O iskustvija kolendar akana vaćerđam, mothovena so o Jehova, kova tano „o Devel ando mangipe“, tano uvek amencar (2. Kor. 13:11). Ov svakonese mothovi pi briga. Uverime hijam so ako osloninaja amen upro Jehova ka „arakhi [amen] oleso verno mangipe“ (Ps. 32:10). So pobuter razmislinaja sar o Jehova mothovi amenđe po mangipe, ov ovela amenđe pana postvarno hem pana popaše hijam oleja. Amen šaj te molina amen olese hem te phena lese kobor valjani amenđe oleso mangipe. Šaj te phena lese sa so mučini amen hem te ovel amen poverenje so haljola amen hem soj tano spremno te pomožini amenđe (Ps. 145:18, 19).
20. Sar e Jehovaso mangipe pomožini amen te ova paše oleja?
20 Sar so ko jekh šudro dive i jag taćari amen, ađahar taćari amen hem e Jehovaso mangipe. Iako e Jehovaso mangipe tano but zoralo, ov tano hem nežno. Odolese, ov bahtalo sebepi so o Jehova mangela tut. Ama, hem tu šaj te phene: „Mangava e Jehova“ (Ps. 116:1).
SAR BI ODGOVORINEJA?
-
So bi tu pheneja, savo tano e Jehovaso mangipe?
-
Sose šaj te ove uverimo so o Jehova but mangela tut?
-
Sar osetineja tut sebepi e Jehovaso mangipe?
ĐILI 108 E Devleso mangipe
a Disave anava tane menime.
