1-2. Kola problemija šaj te ovel len e Jehovase sluge?

 AMARO životi šaj prekali rat te menini pe sebepi disave lošna buća. Na primer, jekhe phralese, kova vićini pe Luis a, o doktori arakhlja so isi le rak. O doktori phenđa so aćhilo lese samo pana nekobor masekija te živini. I Monika hem olako rom ćerđe but buća e Jehovase ki služba. Ama, jekh dive i Monika haljilji so olako rom beršencar ćerđa greh. I Olivija, jekh phen koja nane ko brak, morandilji te aćhavi po ćher odolese so hine jekh baro uragan. Ked irinđa pe ćhere, dikhlja so i bavlal uništinđa olako ćher. Aso kratko vreme akale manušengo životi potpuno meninđa pe. Da li tu nekad doživinđan disavo pharipe kova iznenada meninđa to životi?

² Iako verno služinaja e Jehovase, hem amen šaj te naborsaljova hem te oven amen pharipa sar sa avera manuša. Čak disave ka protivinen pe amenđe hem ka progoninen amen sose mrzinena e Devlese narodo. O Jehova na ka zaštitini amen ando sa odola problemija. Ama, ov obećini amenđe so ka pomožini amen (Is. 41:10). Uzi Jehovasi pomoć šaj te aćhova bahtale, te ana šukar odluke hem te aćhova lese verna. Ko akava članko ka vaćera ando štar buća sar o Jehova pomožini amen ked isi amen pharipa. Isto ađahar, ka dikha so valjani te ćera te šaj odola buća te pomožinen amen.

 O JEHOVA KA VODINI AMEN

3. So šaj te ovel amenđe but pharo ked doživinaja disavo tragično događaj?

³ So šaj te ovel amenđe pharo? Ked doživinaja disavo tragično događaj, šaj te ovel amenđe pharo jasno te razmislina hem te ana odluke. Sose? Amaro vilo tano pherdo dukh hem amari godi tani pherdi brige. Osetinaja amen so samći hijam ki jekh bari tomnina hem na dikhaja kaj te đa. Te dikha so vaćerđe okola duj phenja kolen pominđam ki početka. I Olivija phenela: „Ked o uragan uništinđa mo ćher, na đanđum kaj tano mo šero. Hijum le sar našaldi.“ I Monika, kola o rom prevarinđa, phenela: „Na hijum le samo razočarimi, već osetinđum man so samći neko ćhurikaja posavđa man ko vilo. Na đanđum sar te živinav. Niked ne bi perela maje ki godi so diso ađahar te desini pe.“ So o Jehova obećini amenđe ked ka ukljen amen o problemija?

4. Premalo Filipljanima 4:6, 7, so o Jehova obećini amenđe?

⁴ Sar o Jehova ka pomožini amen? Ov obećini amenđe so ka del amen po mir. (Čitin Filipljanima 4:6, 7.) E Devleso mir odnosini pe ko mir kova isi amen ki godi hem ko vilo sose hijam paše amare nebesko Dadeja. Isto ađahar, odova „mir tano upreder odova so o manuš šaj te haljol“, so značini so asavko mir našti ni te zamislina. Na primer, da li disavo puti celone vileja molinđan tut e Jehovase hem palo odova osetinđan baro mir ko vilo? Odova tano sose o Devel dinđa tut mir.

5. Sar e Devleso mir šaj te arakhi amari godi hem amaro vilo?

⁵ Ko Filipljanima 4:7 pisini hem so e Devleso mir „ka arakhi“ ja ka zaštitini „amaro vilo hem amari godi“. O grčko lafi „arakh“ koristinđa pe te opisujini e vojnikonen kola arakhena i diz hem zaštitinena la ando napadija. O manuša kola živinđe ki diz, osetinđe pe bezbedno hem sigurno odolese so đanđe so o vojnikija arakhena la. Isto ađahar, ked e Devleso mir arakhi amaro vilo hem amari godi, tegani osetinaja mir sose đanaja so hijam sigurna (Ps. 4:8). Sar i Ana, čak iako amari situacija na ka menini pe odmah, amen šaj te ovel amen mir ko vilo (1. Sam. 1:16-18). Ked isi amen mir, polokho tano jasno te razmislina hem te ana šukar odluke.

6. So šaj te ćera te šaj te pomožini amen e Devleso mir? (Dikh i slika.)

⁶ So valjani te ćera? Sar so o manuša ki diz šaj hine te vićinen e vojnikonen te  zaštitinen len, hem amen šaj te puća e Jehova te pomožini amen. Sar? Ađahar so ka molina amen olese sa đi na dobinaja oleso mir (Luka 11:9; 1. Sol. 5:17). O Luis, kole angleder pominđam, phenela so pomožinđa olese hem olese romnjaće, e Anaće, ked šunđe so ov samo pana nekobor masek ka živini. Ov phenela: „Tegani tano but pharo o manuš te odlučini sar te lečini pe hem te anel avera odluke. Ama ked hine najpharo, hine amen mir odolese so molinđam amen.“ O Luis hem olesi romni phenena so but putija celone vileja molinđe pe. Ando Jehova rodinđe te ovel len mir ki godi, ko vilo hem te del len mudrost te anen šukar odluke. Odova ćaće pomožinđa lenđe. Ako hem tu isi tut disave pharipa, istrajin ki molitva hem ka dikhe sar e Jehovaso mir ka arakhi ti godi hem to vilo (Rimlj. 12:12).

O JEHOVA KA DEL TUT SNAGA

7. Sar šaj te osetina amen ked isi amen disavo baro problemi?

⁷ So šaj te ovel amenđe pharo? Ked isi amen disavo baro problemi, amaro razmislibe, amare postupkija hem osećanja meninena pe. Amare emocije tegani šaj te oven sar o brodo kas o talasija legarena akari-ukuri. I Ana, kola pominđam angleder, hine la pomešime osećanja palo lako romeso meribe. Oj phenela: „Podijekh puti hijum le depresivno hem tegani bi počminava te žalinav kokri man. Čak hijum le holjami so mo rom mulo.“ I Ana hine usamljeno hem ko baro stres ked valjanđa te anel odluke ando buća kolendar o Luis angleder but šukar brininđa pe. Kotar jekhvar, osetinđa pe samći tani ko more kuri isi jekh bari oluja. Sar o Jehova pomožini amen ked osetinaja amen ađahar?

8. Premali 1. Petrova 5:10, ko so o Jehova uverini amen?

⁸ Sar o Jehova ka pomožini amen? Ov uverini amen so ka del amen snaga te na pera. (Čitin 1. Petrova 5:10.) Ked isi oluja ko more, o brodo šaj but te ljuljini pe. Ama, te šaj o brodo te aćhol stabilno, ov valjani talo pani ko solduj strane te oven le stabilizatorija. Odola stabilizatorija šaj te pomožinen e brodose te na ljuljini pe but. Ađahar o manuša ko brodo ka osetinen pe bezbedno. Ama, akala stabilizatorija šaj te oven korisna jedino ked o brod đala. Isto ađahar, o Jehova šaj te del amen snaga jedino ked amen nastavinaja te služina lese verno, iako isi amen pharipa.

9. Sar šaj o proučibe te pomožini amen te kontrolišina amare emocije? (Dikh i slika.)

 ⁹ So valjani te ćera? Ked osetineja so nane tut snaga te kontrolišine te emocije, trudin tut hem ponodri te moline tut, te đa ko sastankija hem ki služba. Naravno, šaj na ka ovel tut snaga te ćere akala buća sar so angleder ćerđan. Ama, ma bistri so o Jehova na ađićeri tutar te ćere odova so tu našti (Uporedin Luka 21:1-4). Isto ađahar, odvojin vreme te proučine hem hor te razmisline. Sose? Odolese so o Jehova prekali pi organizacija dinđa amen šuže člankija hem videa kola šaj te pomožinen amen te aćhova zorale. Te šaj te arakhe odova so valjani tuće, šaj te koristine o alatija sar soj tane amari aplikacija JW Library^®, o Indeks publikacija hem o Vodič ando publikacije kotar Jehovase svedokija. I Monika, kola angleder pominđam, phenela so ked počmini te osetini bari dukh ko vilo, oj ljela te proučini diso ando amare publikacije. Na primer, istražini o lafi „holi“. Disavo puti istražini o lafi „prevara“ ja „vernost“. Tegani čitini sa đi na osetini pe pošukar. Oj phenela: „Ked počminava te proučinav, osetinava so hijum but uznemirimi. Ama, sar hem ponodri čitinava, osetinava so samći o Jehova zagrlini man.“ Asavki pomoć ando Jehova šaj te pomožini amen te kontrolišina amare emocije hem te ovel amen pana pobaro mir (Ps. 119:143, 144).

O JEHOVA KA PODRŽINI TUT

10. Sar šaj te osetina amen palo odova so doživinđam disavo stresno događaj?

¹⁰ So šaj te ovel amenđe pharo? Palo odova so doživinđam disavo stresno događaj, ka oven dive ked na ka ovel amen snaga nisose. Šaj ka osetina amen sar jekh sportista kova angleder šaj hine sigate te prastal, a akana jedva phirela. Šaj ka ovel amenđe pharo te ćera o buća kola angleder lokho ćerđam ili šaj na ka ovel amen volja te ćera o buća ko kola angleder uživinđam. Sar o Ilija, šaj ka ovel amenđe pharo te ušta hem samo ka manga te sova (1. Kralj. 19:5-7). So o Jehova ka ćerel ked ađahar ka osetina amen?

11. Premalo Psalam 94:18, sar o Jehova pana pomožini amenđe?

¹¹ Sar o Jehova ka pomožini amen? Ov dela amen po lafi so ka podržini amen.  (Čitin Psalam 94:18.) Ked jekh sportista tano povredimo, valjani lese pomoć te šaj te nastavini. Isto ađahar, ked amen hijam ko pharipa, valjani amenđe pomoć te šaj hem ponodri te služina e Jehovase. Tegani o Jehova phenela amenđe: „Sose me, o Jehova, to Devel, ićerava tut kotar to desno vas hem phenava tuće: ’Ma dara. Me ka pomožinav tut‘ “ (Is. 41:13). O kralj David osetinđa asavki pomoć ando Jehova. Ked hine le kušnje hem ked napadinđe le o dušmanija, ov phenđa e Jehovase: „To desno vas, podržini man“ (Ps. 18:35). Ama, sar o Jehova avdije podržini amen?

12. Prekalo kaste o Jehova šaj te pomožini amen?

¹² O Jehova često podržini amen ađahar so podstaknini averen te pomožinen amen. Na primer, jekh puti ked o David hine obeshrabrimo, o Jehova bićhalđa e Jonatane te ohrabrini le (1. Sam. 23:16, 17). Isto ađahar, ov bićhalđa e Jeliseje te ohrabrini e Ilija (1. Kralj. 19:16, 21; 2. Kralj. 2:2). Avdije, o Jehova šaj te koristini amare porodica, amalen ja e starešinen te pomožinen amen. Ama, ked tano but pharo, šaj mangaja te cida amen averendar. Šaj mangaja te ova kokri hem odova tano normalno. Ama, sar šaj tegani te prihvatina e Jehovasi pomoć?

13. So valjani te ćera te šaj o Jehova te pomožini amen? (Dikh i slika.)

¹³ So valjani te ćera? De sa tutar, te na cide tu ando manuša. Ked cideja tut averendar, tegani razmislineja samo tutar hem ando te problemija. Odova na ka pomožini tut te ane šukar odluke (Posl. 18:1). Naravno, svakonese valjani vreme te ovel kokri, posebno ked doživinđa disavo stresno događaj. Ama, ako jekh pobaro period hijam kokri, tegani šaj na ka prihvatina e Jehovasi pomoć. Odolese, kobor god te ovel tuće pharo, prihvatin i pomoć andi ti porodica, ando te amala hem starešine. Ma bistri so o Jehova mangela te pomožini tuće prekalo lende (Posl. 17:17; Is. 32:1, 2).

O JEHOVA KA UTEŠINI TUT

14. Sebepi kola buća šaj te dara?

¹⁴ So šaj te ovel amenđe pharo? Podijekh puti, sebepi disave buća kola ovena ko amaro životi, šaj te dara. Ki Biblija pisini so e Jehovase verna sluge but putija darandilje odolese so olenge dušmanija protivinđe pe lenđe (Ps. 18:4;  55:1, 5). Amen šaj te doživina progonstvo ki škola, ki buti, andi amari familija ja ando vlastija. Šaj isi amen disavo problemi amare sastipaja hem daraja so ka mera. Tegani, šaj te osetina amen bespomoćno sar jekh tikno ćhavoro. Sar o Jehova pomožini amen ko asavke situacije?

15. Premalo Psalam 94:19, sar o Jehova ka pomožini amenđe?

¹⁵ Sar o Jehova ka pomožini amen? Ov utešini amen hem dela amen mir. (Čitin Psalam 94:19.) Akava psalam šaj te ćhivel amen te razmislina andi jekh tikni ćhaj koja darala hem našti te sovel sose avri tani bari oluja. Šaj te zamislina sar olako dad khuvela ki soba, lela la ki angalja hem ićeri la sa đi na sovela. Iako i oluja pana trajini, odova soj tani ko pe dadesi angalja pomožini laće te osetini pe sigurno. Ked amen daraja andi disavi kušnja hem amenđe valjani amaro nebesko Dad te ićeri amen ki angalja sa đi na ovela amen mir. Sar šaj te dobina asavki uteha?

16. So šaj te ćera te šaj te dobina uteha ando Jehova? (Dikh i slika.)

¹⁶ So valjani te ćera? Redovno molin tut e Jehovase hem čitin oleso Lafi (Ps. 77:1, 12-14). Ako akana ćereja odova, ked ka ove ki disavi phari situacija prvo so ka perel tuće ki godi tano te rode pomoć ando Jehova. Vaćer e Jehovase sostar daraja hem sar osetineja tut. Mukh le hem ov te vaćeri tuvaja prekali Biblija (Ps. 119:28). Šaj ka arakhe disavi utešno misao koja posebno ka značini tuće. Na primer, šaj ka utešini tut odova so pisini ki knjiga Jov, Psalam, Poslovice ili e Isusese lafija ando Matej šovto poglavlje. Ako molinaja amen e Jehovase hem čitinaja oleso Lafi, tegani ka dozvolina e Jehovase te utešini amen.

17. Ko so šaj te ova sigurna?

¹⁷ Šaj te ova sigurna so o Jehova uvek ka ovel amencar ko amare pharipa. Niked na ka ova kokri (Ps. 23:4; 94:14). Ov obećini so ka vodini amen, ka zorjaćeri amen, ka podržini amen hem ka utešini amen. Ko Isaija 26:3 ando Jehova pisini: „Ka arakhe okolen kola osloninena pe upro tute. Ka de len trajno mir sose uzdajinena pe upro tute.“ Odolese, uzdajin tut upro Jehova hem koristin olesi pomoć. Ako odova ćereja, ka aćhove istrajno čak hem ko bare pharipa.