1. Ko so hijam sigurna hem sose?

 AVDIJE o sveto ovela sa pološno. Odolese, disavo puti tano amenđe pharo te ova pozitivna. O ćherutne na mangena jekh jekhe sar angleder. O manuša tane but nasilna hem sebična. Butenđe tano pharo te verujinen okolenđe kola tane ki vlast. Ama, ko sa akava isi diso šukar. Odoleja sar o manuša ponašinena pe, ispunini pe o proročanstvo ando „poslednja dive“ (2. Tim. 3:1-5). Odova so ispunini pe akava proročanstvo tano dokaz so o Isus Hrist vladini sar Kralj ko Devleso Kraljevstvo. Nijekh iskreno manuš našti te phenel so na ispunini pe akava proročanstvo. Ama, akava nane jedino proročanstvo kova vaćeri ando Devleso Kraljevstvo. Ko poslednja nekobor berš, ispuninđe pe hem avera proročanstvija. Akana ka razmotrina disave olendar.

2. So ka dikha ko akava članko hem sose? (Vaćer andi slika kotar naslovno strana.)

² Ko akava članko ka dikha (1) o proročanstvo kova pomožini amenđe te haljova ked e Devleso Kraljevstvo počminđa te vladini, (2) o proročanstvo kova pomožini amenđe te haljova so o Isus već vladini sar Kralj ko nebo hem (3) o proročanstvija kola mothovena sar e Devlese dušmanija ka oven uništime. Sar so ka dikha, akala proročanstvija tane povezime sar o delovija andi  jekh slagalica hem dena amen jasno slika te šaj te haljova ko kova vreme amen živinaja.

3. Ko so uverini amen o proročanstvo ando Danilo 7:13, 14?

³ O proročanstvo ando Danilo 7:13, 14 uverini amen so o Isus Hrist, sar Kralj ko Devleso Kraljevstvo, ka ovel najšukar vladari. O manuša ka mangen „te služinen lese“ hem niko aver na ka vladini ko oleso than. Aver proročanstvo andi knjiga Danilo vaćeri so o Isus ka ovel Kralj ked ka završini pe o period kova vićini pe efta vremenija. Da li šaj te đana ked o Isus ulo Kralj?

4. Objasnin sar o stihija ando Danilo 4:10-17 pomožinena amen te haljova ko kova berš o Isus ulo Kralj. (Dikh i fusnota.)

⁴ Čitin Danilo 4:10-17. O „efta vremenija“ predstavinena o period ando 2 520 berš. Odova period počminđa ko 607. berš angl. n. e., ked o Vaviloncija cidinđe e zadnjo kralje kotar Jehovaso presto ko Jerusalim. A završinđa pe ko 1914. berš n. e., ked o Jehova ćhivđa e Isuse, „okova kova isi le zakonsko pravo“, te ovel Kralj ko Devleso Kraljevstvo (Jezek. 21:25-27). *

5. Sar šaj te pomožini amenđe o proročanstvo ando „efta vremenija“?

⁵ Sar šaj te pomožini amen akava proročanstvo? O proročanstvo ando „efta vremenija“ uverini amen so o Jehova ispunini pe obećanja ko pravo vreme. Ov tačno odredinđa o vreme ked o Isus ka ovel Kralj. Ked alo odova vreme, o Jehova ćhivđa le te vladini. Odolese šaj te ova sigurna so o Jehova ka ispunini hem sa avera proročanstvija ko vreme kova ov odredinđa. Ćaće, e Jehovaso dive „na ka harini“ (Avak. 2:3).

6. (a) So dikhaja ki phuv so mothovi amenđe so o Isus već vladini ko nebo? (b) Sar tano odova mothovdo ko Otkrivenje 6:2-8?

⁶ Đi hine ki phuv, o Isus prorekninđa disave buća kola ka pomožinen olese učenikonenđe te haljon so ov počminđa te vladini ko nebo. Ov phenđa so ka ovel mariba, bokhalipa hem zemljotresija. Isto ađahar, phenđa so ka ovel nabormipa ko „razna thana“, sar soj tani na primer i pandemija andi koronavirus. Sa odova tano „znak“ so o Isus već vladini ko nebo (Mat. 24:3, 7; Luka 21:7, 10, 11). Pobuter ando 60 berš, palo po meribe hem palo odova so đelo ko nebo, o Isus e Jovanese dinđa jekh vizija kaj potvrdinđa so akala događaja ćaće ka oven. (Čitin Otkrivenje 6:2-8.) Sa odova so akana ovela anglo amare jaćha tano dokaz so o Isus počminđa te vladini sar Kralj ko Devleso Kraljevstvo kotar 1914. berš.

7. Sose ki phuv isi but lošna buća sar o Isus ulo Kralj?

⁷ Sar o Isus ulo Kralj ko nebo, ki phuv ovena but lošna buća. Sose? O odgovor arakhaja ko Otkrivenje 6:2, odothe dikhaja so i prvo buti koja o Isus ćerđa ked ulo Kralj ko nebo hine so borinđa pe e Satanaja hem olese demonencar. Ko Otkrivenje 12. poglavlje dikhaja so o  Satana na pobedinđa hem hine fordimo ki phuv pe demonencar. Kotar tegani, ov tano but holjamo hem pi holi ikali upro manuša (Otkr. 12:7-12).

8. Sar upro amende utičini odova ked dikhaja so ispuninena pe o proročanstvija?

⁸ Sar šaj te pomožinen amen akala proročanstvija? O buća kola isi ko sveto hem odova so o manuša ovena sa pološna, tano dokaz so o Isus već vladini sar Kralj. Ked dikhaja so o manuša tane okrutna hem sebična, šaj te ova uznemirime. Ama, na valjani te bistra so odoleja ispuninena pe o proročanstvija. Isto ađahar, odova tano dokaz so o Kraljevstvo vladini (Ps. 37:1). Sar tano o Armagedon sa popaše, šaj te očekujina so o stanje ko sveto ka ovel sa pološno (Mar. 13:8; 2. Tim. 3:13). Amen hijam but zahvalna e Jehovase so pomožini amen te haljova sose ovena o lošna buća ko sveto.

9. Premalo proročanstvo ando Danilo 2:28, 31-35 sar tani opisujimi i poslednjo svetsko sila hem ked počminđa te vladini?

⁹ Čitin Danilo 2:28, 31-35. Amen avdije dikhaja so ispunini pe akava proročanstvo. O suno kova o Navuhodonosor dikhlja vaćeri so ka ovel ko „poslednja dive“, palo odova so o Isus ka ovel Kralj ko nebo. Maškaro e Isusese dušmanija ki phuv ka ovel hem i poslednjo svetsko sila andi koja vaćeri i Biblija. O „stopala kola hine mešime sastroneja hem glinaja“ predstavinena odija sila. Akija svetsko sila već vladini. Oj počminđa te vladini đi trajinđa o Prvo svetsko rat, ked i Velika Britanija  hem o Sjedinjena Države ulje saveznikija. Isto ađahar, o kip ando Navuhodonosoreso suno prorekninđa najhari duj buća ko kola akija sila tani averćhane ando avera.

10. (a) Sar e Daniloso proročanstvo jasno opisujini i angloameričko svetsko sila? (b) So valjani te pazina te na ćera? (Dikh o okvir „ Da li dikheja i opasnost?“)

¹⁰ Sar prvo, o Danilo ki vizija dikhlja so avera svetska sile tane predstavime disave zorale materijalencar, sar soj tano o zlato ja o srebro. Ama, asi angloameričko svetsko sila phenela pe soj tani mešimi sastroneja hem glinaja. I glina predstavini o obično narodo (Dan. 2:43, fusn.). Avdije jasno dikhaja kobor baro uticaj isi len o manuša ko izborija, sar borinena pe aso pe pravija prekalo razna kampanje, protestija hem radnička sindikatija. Sebepi sa akava, odija svetsko sila našti te ćerel odova so mangela.

11. Sar odova so akana vladini i angloameričko svetsko sila zorjaćeri amaro uverenje so živinaja ko vreme ando krajo?

¹¹ Sar dujto, sebepi so predstavini o stopala ando kip, i angloameričko svetsko sila tani i poslednjo sila koja tani proreknimi ki Biblija. Palo late više na ka ovel aver sila. Ked ka avel o Armagedon, e Devleso Kraljevstvo ka uništini hem ola hem sa avera manušikane vladavine (Otkr. 16:13, 14, 16; 19:19, 20). *

12. Sar pana e Daniloso proročanstvo utešini amen hem dela amen nada?

¹² Sar šaj te pomožini amen akava proročanstvo? Ko Daniloso proročanstvo isi pana disave dokazija kola mothovena so živinaja ko vreme ando krajo. Pobuter ando 2 500 berš angleder, o Danilo prorekninđa so palo Vavilon ka aven pana štar svetska sile kola posebno ka utičinen upro Devleso narodo. Uzo odova, ov phenđa so i Anglo-Amerika ka ovel i poslednjo svetsko sila. Odova šaj but te utešini amen hem te del amen nada so e Devleso Kraljevstvo pana hari ka uništini sa o manušikane vladavine hem ka vladini upri celo phuv (Dan. 2:44).

13. Kas predstavinena o „oftoto kraljo“ hem o „deš kraljija“ kola pominena pe ko Otkrivenje 17:9-12 hem sar ispuninđa pe akava proročanstvo?

¹³ Čitin Otkrivenje 17:9-12. O Prvo svetsko rat mukhlja bare posledice palo peste hem sebepi odova šaj hine te ispunini pe pana jekh proročanstvo kova vaćeri ando poslednja dive. O svetska vođe manglje te ovel mir ki phuv. Odolese, ko januar ko 1920. berš on osnujinđe jekh organizacija koja vićinđa pe Društvo naroda. Ama, ko oktobar ko 1945. berš ko olako than osnujinđa pe aver organizacija koja vićini pe Ujedinjena nacije. Ki Biblija, akija organizacija vićini pe „oftoto kraljo“. Ama, oj nane svetsko sila, već olaki moć hem olako uticaj avela ando politička sile kola podržinena la. Ko jekh simbolično način, ki Biblija akala politička sile vićinena pe „deš kraljija“.

14-15. (a) So o Otkrivenje 17:3-5 mothovi ando „Baro Vavilon“? (b) So ovela disave manušencar andi hovavni religija?

¹⁴ Čitin Otkrivenje 17:3-5. Ki vizija koja dobinđa ando Devel, o apostol Jovan dikhlja e bludnica, o „Baro Vavilon“, koja predstavini o svetsko carstvo  andi hovavni religija. So akija vizija mothovi? I hovavni religija već beršencar sarađujini e svetsko vladarencar hem podržini len. Ama pana hari, o Jehova ka ćhivel o politčka sile „te ćeren olesi zamisao“. So ka ovel sebepi odova? Odola politička sile, o „deš kraljija“, ka napadinen i hovavni religija hem ka uništinen la (Otkr. 17:1, 2, 16, 17).

¹⁵ Sar đanaja soj tano paše o kraj ando Baro Vavilon? Te šaj te dobina odgovor ko odova pućibe, šukar tano te razmislina andi purani diz Vavilon. O panja andi bari reka Eufrat zaštitinđe jekh deo andi odija diz. Ko Otkrivenje pisini so o manuša kola podupirinena i hovavni religija tane uporedime „panjencar“ (Otkr. 17:15). Ama, ko Otkrivenje isto pisini so odola panja ka „šućon“. Odova značini so o manuša kola podupirinena i hovavni religija ka ciden pe olatar (Otkr. 16:12). Avdije ispunini pe akava proročanstvo, sose dikhaja so but manuša cidena pe andi hovavni religija hem rodena rešenje aso pe problemija ko aver than.

16. Sar koristini amenđe odova so haljovaja o proročanstvija ando odova sar pojavinđe pe o Ujedinjena nacije hem sar ka ovel uništimo o Baro Vavilon?

 ¹⁶ Sar šaj te pomožinen amen akala proročanstvija? Odova so osnujinđe pe o Ujedinjena nacije hem so o manuša cidena pe andi hovavni religija tano dokaz so živinaja ko poslednja dive. Iako o simbolična panja ando Baro Vavilon šućona, so značini so but manuša više na podržinena i hovavni religija, odova na ka uništini la. Sar so angleder vaćerđam, o Jehova ka ćhivel ko vilo ando „deš kraljija“ – o politička sile kola podržinena o Ujedinjena nacije – „te ćeren olesi zamisao“. Odola politička sile iznenada ka irinen pe protiv o Baro Vavilon hem ka uništinen le, a odova ka iznenadini celo sveto (Otkr. 18:8-10). * O uništenje ando Baro Vavilon ka utičini upro sa o manuša hem šaj ka anel bare pharipa. Ama, e Devleso narodo ka ovel le najhari duj razlogija sose te ovel bahtalo. I hovavni religija, koja beršencar hine e Devleso dušmani, više na ka ovel hem pana hari amen ka ova izbavime kotar akava lošno sveto (Luka 21:28).

17-18. (a) Sar šaj hem ponodri te zorjaćera amari vera? (b) Sostar ka vaćera ko aver članko?

¹⁷ O Danilo prorekninđa so „o pravo đandipe ka ovel pana pobaro.“ Baš ađahar hem ulo! Amen akana haljovaja o proročanstvija kola vaćerena kotar amaro vreme (Dan. 12:4, 9, 10). Akala proročanstvija tane tačna hem sebepi odova amen pana pobuter ceninaja e Jehova hem oleso Lafi (Is. 46:10; 55:11). Odolese, hajde hem ponodri te zorjaćera amari vera ađahar so hor ka proučina e Devleso Lafi hem ađahar so ka pomožina averenđe te oven e Jehovase amala. O Jehova ka arakhi sa okolen kola osloninena pe upro leste hem ka del len trajno mir (Is. 26:3).

¹⁸ Ko aver članko, ka razmotrina o proročanstvija kola vaćerena andi hrišćansko skupština ko vreme ando krajo. Sar so ka dikha, odola proročanstvija tane pana jekh dokaz so živinaja ko poslednja dive. Isto ađahar, ka dikha pana disave dokazija sar o Isus, kova akana vladini sar Kralj ko nebo, vodini pe učenikonen.