1. So ćerđa o Jehova sigate palo odova so o Adam hem i Eva grešinđe? (Postanak 3:15)

 SIGATE palo odova so o Adam hem i Eva grešinđe, o Jehova dinđa jekh proročanstvo kova tano pisimo ko Postanak 3:15. (Čitin.) Sa e Adamese hem e Evake potomkija isi len nada sebepi odova proročanstvo.

2. Sose tano akava proročanstvo odobor važno?

² Akava proročanstvo tano pisimo ki prvo knjiga andi Biblija. Ama, sa avera knjige ki Biblija tane ko disavo način povezime oleja. Sar so o lepako spojini sa o listija andi jekh knjiga, ađahar hem o lafija ando Postanak 3:15 povezinena sa e biblijake knjige. Sa odola knjige zajedno prenosinena jekh poruka. A odija poruka tani so o Devel ka bićhali jekhe Spasitelje kova ka uništini e Benge hem okolen kola đana palo leste. * Odova ka ovel baro blagoslov okolenđe kola mangena e Jehova.

3. Sostar ka vaćera ko akava članko?

³ Ko akava članko ka dobina odgovorija ko akala pućiba: Ko pomini pe ko proročanstvo ando Postanak 3:15? Sar ispunini pe akava proročanstvo? Sar pomožini amenđe avdije?

4. Koj tano „o sap“ hem sar odova đanaja?

⁴ Ko Postanak 3:14, 15 pomini pe o „sap“, oleso „potomstvo“, i „đuvli“ hem olako „potomstvo“. I Biblija  pomožini amen te haljova kas on predstavinena. * Hajde te dikha kas predstavini o sap. O doslovno sap našti hine te haljol so o Jehova vaćerđa ko edensko vrt. Odolese, ked ko proročanstvo phenela pe so o Jehova ka osudini e sape sigurno na mislini pe ko doslovno sap. Kas tegani predstavini akava sap? Ando Otkrivenje 12:9 jasno haljovaja so ov tano „o najpurano sap“, o Satana, o Beng. Ama, koj tano oleso potomstvo?

5. Koj tano sa e sapeso potomstvo?

⁵ Ki Biblija, o lafi potomstvo šaj te predstavini okolen kola odobor oponašinena jekhe manuše so šaj te phena lenđe soj tane olese ćhave. Odolese, e sapeso potomstvo tane o anđelija kola sar o Satana na hine verna e Jehovase hem disave olendar, ko Nojese dive, huljilje ando nebo tele. Isto ađahar, e sapeso potomstvo tane hem o lošna manuša kola protivinena pe e Jehovase hem olese narodose hem ponašinena pe sar po dad, o Beng (Post. 6:1, 2; Jov. 8:44; 1. Jov. 5:19; Juda 6).

6. Sose i Eva našti te ovel i đuvli ando proročanstvo?

⁶ Hajde te dikha kas predstavini i „đuvli“. Oj našti te predstavini e Eva. Sose phenaja odova? Razmislin akalestar: Ko proročanstvo pisini so e đuvljako potomstvo ka „zdrobini“ e sapeso šero. Sar so dikhljam, o sap tano o lošno anđeo, o Satana, a nijekh nesavršeno manuš ando Evako potomstvo nane le odija sposobnost te uništini le. Tegani, ko šaj te uništini le?

7. Premalo Otkrivenje 12:1, 2, 5, hem 10, koj tani i đuvli ando Postanak 3:15?

 ⁷ Ki zadnjo knjiga andi Biblija pisini koj tani i đuvli ando proročanstvo. (Čitin Otkrivenje 12:1, 2, 5, 10.) Akija nane obično đuvli! Oj talo pre isi la o mesec, upro šero kruna ando 12 zvezde hem bijani jekhe neobično ćhave, e Devleso Kraljevstvo. Odova Kraljevstvo tano ko nebo odolese hem i đuvli valjani te ovel ko nebo. I đuvli predstavini o nebesko deo andi Jehovasi organizacija kuri tane o verna anđelija (Gal. 4:26).

8. Koj tano o potomko andi đuvli hem ked odova ulo? (Postanak 22:15-18)

⁸ E Devleso Lafi pomožini amen te haljova upro kaste najangleder odnosinena pe o lafija e đuvljako potomstvo. Odova potomko mora te avel andi e Avrahamesi loza. (Čitin Postanak 22:15-18.) Sar so hine proreknimo, o Isus hine potomko ando odova verno manuš (Luka 3:23, 34). Ama, e đuvljako potomstvo valjani te ovel pozoralo ando jekh manuš, sose valjani te uništini e Satana, e Benge. Ked hine le 30 berš, o Isus hine pomazimo e Devlese sveto duhoja. Tegani, o Isus ulo o potomko andi đuvli, kova ka ovel le but važno uloga (Gal. 3:16). Palo odova so o Isus mulo hem uskrsninđa, o Jehova „dinđa le slava hem čast“ hem dinđa le „sa i vlast ko nebo hem ki phuv“ hem dinđa le vlast te „uništini e Bengese delija“ (Jevr. 2:7; Mat. 28:18; 1. Jov. 3:8).

9-10. (a) Koj tane pana deo ando đuvljako potomstvo hem ked on odova ovena? (b) Sostar akana ka vaćera?

⁹ Uzo Isus hem avera ka oven deo ando đuvljako potomstvo. O apostol Pavle mothovđa koj tane on ked aso pomazime Jevreja hem neznabožcija phenđa: „A ako hijen e Hristese, tegani hijen e Avrahameso potomstvo, naslednikija premalo obećanje“ (Gal. 3:28, 29). Ked o Jehova pomazini nekas pe sveto duhoja, ov tegani ovela deo ando đuvljako potomstvo. Znači e đuvljako potomstvo tano o Isus hem o 144 000 kola ka vladinen oleja (Otkr. 14:1). Sare on dena sa pestar te oponašinen pe Dade, e Jehova.

¹⁰ Đi akana dikhljam kas predstavinena okola kola pominena pe ko proročanstvo ando Postanak 3:15. Akana ka dikha so o Jehova već ćerđa te šaj te ispunini pe akava proročanstvo hem sar odova pomožini amenđe avdije.

11. Sar o sap raninđa e đuvljako potomstvo ki patum?

¹¹ Premalo proročanstvo ando Postanak 3:15, o sap ka ranini e đuvljako potomstvo „ki patum“. Akava deo ando proročanstvo ispuninđa pe ked o Beng ćhivđa e Jevrejen hem e Rimljanen te mudaren e Devlese Ćhave (Luka 23:13, 20-24). Sar so o manuš kova isi le rana ki patum našti jekh vreme te phirel, ađahar ni o Isus našti hine trin dive ništa te ćerel sose hine ko grobo (Mat. 16:21).

12. Sar hem ked ka ovel zdrobimo e sapeso šero?

¹² O proročanstvo ando Postanak 3:15 mothovđa so o Isus našti hine te aćhol ko grobo. Sose? Odolese so o proročanstvo vaćeri so e đuvljako potomstvo ka zdrobini e sapeso šero. Odova značinđa so o Isus valjanđa te uskrsnini. Ađahar hem hine. Trin dive palo odova so mulo, o Isus uskrsninđa sar besmrtno  duhovno biće. Ko vreme kova o Jehova odredinđa, o Isus ka uništini e Benge (Jevr. 2:14). O Isus hem okola kola ka vladinen oleja, zauvek ka uništinen e Devlese dušmanen – o potomstvo ando sap (Otkr. 17:14; 20:4, 10). *

13. Sar pomožini amen odova so ispunini pe akava proročanstvo?

¹³ Ako hijan e Devleso sluga, odova so ispunini pe akava proročanstvo šaj but te pomožini tut. Ked o Isus hine ki phuv, ov savršeno oponašinđa pe Dade (Jov. 14:9). Odolese, ked sikljovaja ando Isus amen šaj pana pošukar te penđara e Jehova hem te manga le. Isto ađahar, šaj but te pomožini amen odova so o Isus sikavi hem sar vodini i skupština. Uzo odova, ov sikavđa amen so valjani te ćera te šaj o Jehova te ovel zadovoljno amencar. Sarinenđe pomožini odova so o Isus dinđa po životi ja te phena so hine ranimo ki patum. Sar odova? Palo odova so o Isus uskrsninđa hem đelo ko nebo, o Jehova prihvatinđa oleso rat sar savršeno žrtva kova „čistini amen ando svako greh“ (1. Jov. 1:7).

14. Sar đanaja so o proročanstvo kova o Jehova phenđa ko Eden na ispuninđa pe odmah? Objasnin.

¹⁴ Ando lafija kola o Jehova phenđa ko edensko vrt dikhaja so o proročanstvo na valjanđa odmah te ispunini pe. Odolese so valjanđa vreme i romni te dobini potomstvo, o Beng te ćedel pe manušen hem te barjol o neprijateljstvo ja i mržnja maškaro odola duj grupe. Amare šukaripase tano te đana akava proročanstvo odolese so upozorini amen so o Beng ka ćhivel e manušen te mrzinen amen. Kasnije, hem o Isus vaćerđa pe učenikonenđe ando odova (Mar. 13:13; Jov. 17:14). Amen avdije dikhaja sar ispunini pe akava deo ando proročanstvo, pogotovo ko zadnja 100 berš. Sar odova?

15. Sose o sveto sa pobuter mrzini amen hem sose nane amen razlog te dara ando Beng?

¹⁵ Hari palo odova so o Isus ulo Kralj ko nebo, ko 1914. berš, ov fordinđa e Benge ki phuv. Pana hari, o Beng ka ovel uništimo (Otkr. 12:9, 12). Ama, o Beng na bešela phanle vastencar. Sebepi soj tano but holjamo, ov odija holji ikalji upro Devlese sluge (Otkr. 12:13, 17). Odolese, o manuša ko sveto but mrzinena amen. Ama, amen nane sose te dara ando Beng hem ando olese manuša. Šaj te phena isto odova so o apostol Pavle phenđa: „Ako tano o Devel amencar, ko ka ovel protiv amende?“ (Rimlj. 8:31). Amen šaj te ovel amen potpuno poverenje upro Jehova, sose sar so dikhljam već ispuninđa pe jekh pobaro deo ando Postanak 3:15.

16-18. Sar odova so haljilje o proročanstvo ando Postanak 3:15 utičinđa upro Kertis, upri Ursula hem i Džesika?

¹⁶ E Jehovaso obećanje ando Postanak 3:15, šaj te pomožini amen te ikljova ko krajo bilo kole problemeja. O Kertis, kova služini sar misionari ko Guam, phenela: „Disavo puti, sebepi disave pharipa kola hine man hijum le obeshrabrimo hem hine maje pharo te aćhovav verno e Jehovase. Ama, odova so razmislinđum ando Postanak 3:15 pomožinđa  man te ovel man pana pobaro poverenje upro mo nebesko Dad.“ O Kertis jedva ađićeri o dive ked o Jehova ka cidel sa amare pharipa.

¹⁷ Amari phen i Ursula andi Bavarska phenela so odova so haljilji o Postanak 3:15 pomožinđa laće te uverini pe so i Biblija avela ando Devel. Oj dikhlja so sa avera proročanstvija tane povezime odoleja so pisini ko Postanak 3:15 hem odova oduševinđa la. Oj pana phenela: „Ked haljiljum so o Jehova odmah ćerđa diso te šaj amen te ovel amen nada, odova ćhivđa man pana pobuter te mangav le.“

¹⁸ Amari phen i Džesika andi Mikronezija, phenela: „Pana setinava man sar osetinđum man ked prvo puti penđarđum o ćaćipe! O proročanstvo ando Postanak 3:15 ispunini pe. Ov pomožini man te haljovav so o problemija kola avdije isi amen nane deo andi Jehovasi namera. Akava proročanstvo but zorjaćerđa man sose haljiljum so odolese so služinava e Jehovase me već akana isi man šukar životi, a ki budućnost ka ovel man pana pošukar.“

19. Sose šaj te ova sigurna so ka ispunini pe hem o zadnjo deo ando proročanstvo kotar Postanak 3:15?

¹⁹ Sar so dikhljam, o proročanstvo ando Postanak 3:15 već ispunini pe. Đanaja koj tano o potomstvo andi đuvli hem o potomstvo ando sap. O Isus, upro kaste najangleder odnosini pe o proročanstvo ando đuvljako potomstvo, akana tano moćno, besmrtno Kralj. O Jehova već birinđa skoro sarinen kola zajedno e Isuseja tane potomstvo andi đuvli. Sebepi so već ispuninđa pe o prvo deo ando proročanstvo, šaj te ova sigurna so ka ispunini pe hem o zadnjo deo, kova vaćeri odolestar so e sapeso šero ka ovel zdrobimo. E Devlese sluge tane but bahtale so o Beng ka ovel uništimo. Ama, đi na avela odova vreme, ov zoralo hem nek ovel tut baro poverenje upro Jehova. Prekalo potomstvo andi đuvli, ov ka anel bare blagoslovija aso „sa o narodija ki phuv“ (Post. 22:18).