30. ČLANKO PROUČIBASE
Barjaćer to mangipe premalo Jehova hem premalo avera
O mangipe nek pomožini amen ko sa (EF. 4:15)
ĐILI 2 Jehova tano toklo anav
SOSTAR KA VAĆERA a
1. Kola buća sikljiljan ked počminđan te proučine i Biblija?
DA LI setineja tut kola buća sikljiljan ked počminđan te proučine? Šaj hijan le but iznenadimo ked šunđan so o Devel isi le anav. Ja šaj hijan le but bahtalo ked haljiljan so o Devel na mučini e manušen ko pakao. Verovatno hijan le oduševimo ked šunđan so šaj palem te dikhe te mangljen kola mulje hem so šaj te živine zajedno olencar ko raj.
2. Kola promene ćerđan ked sikljiljan o ćaćipe andi Biblija? (Efešanima 5:1, 2)
2 So pobuter proučinđan e Devleso Lafi, to mangipe premalo leste ulo sa pobaro. Sebepi odova mangipe, primeninđan odova so sikljiljan. Tu anđan pana pošukar odluke kola temeljinđe pe ko načelija andi Biblija. Isto ađahar, meninđan to način razmišljanja hem ćhinavđan te ćere o lošna buća odolese so mangljan te ugodine e Devlese. Isto sar so jekh ćhavo mangela te oponašini pe dade, ađahar hem tu trudinđan tut te oponašine te nebesko Dade. (Čitin Efešanima 5:1, 2.)
3. So šaj te puća amen?
3 Amen šaj te puća amen: „Da li tano mo mangipe premalo Jehova akana pozoralo nego ked krstinđum man? Sar krstinđum man, da li trudinava man te oponašinav e Jehova, posebno ko odova te mothovav mangipe e phralenđe hem e phenjenđe?“ Ako o mangipe kova hine tut ko početko sebepi disave buća šudrilo, ma obeshrabrin tut. Odova desinđa pe hem e hrišćanenđe ko prvo veko. Ama, o Isus na odustajinđa olendar, a na ka odustajini ni tutar (Otkr. 2:4, 7). Ov đanela so šaj palem te ovel tut odova mangipe kova hine tut ked počminđan te proučine.
4. Sostar ka vaćera ko akava članko?
4 Ko akava članko ka vaćera odolestar sar šaj te barjaćera amaro mangipe premalo Jehova hem premalo amare phralja hem phenja. Isto ađahar, ka dikha kola blagoslovija šaj te oven amen ako barjaćeraja amaro mangipe.
BARJAĆER TO MANGIPE PREMALO JEHOVA
5-6. (a) Kola pharipa hine le o Pavle ki služba? (b) So podstakninđa le te nastavini te služini e Jehovase?
5 O apostol Pavle hine bahtalo đi služinđa e Jehovase, ama na hine lese uvek lokho. Često morandilo te putujini but dur, a tegani na hine lokho te putujini pe. Đi putujinđa, o Pavle hine ki opasnost ando reke „hem ki opasnost ando razbojnikija“. Isto ađahar, nekobor putija olese dušmanija čak marđe le (2. Kor. 11:23-27). Uzo odova, o phralja na ceninđe uvek odova so o Pavle pomožinđa lenđe (2. Kor. 10:10; Fil. 4:15).
6 So pomožinđa e Pavlese te nastavini te služini e Jehovase? Ov sikljilo but buća e Jehovastar kotar oleso Lafi hem kotar po iskustvo oleja. Odova uverinđa le so o Jehova mangela le (Rimlj. 8:38, 39; Ef. 2:4, 5). Sebepi odova, hem ov but manglja e Jehova. Odova mangipe mothovđa ađahar so pomožinđa olese slugenđe (Jevr. 6:10).
7. Kova tano jekh način sar šaj te barjaćera amaro mangipe premalo Jehova?
7 Amen šaj te barjaćera amaro mangipe premalo Jehova ađahar so hor ka proučina oleso Lafi. Đi čitineja i Biblija, trudin tut te haljove so svako deo kova čitinđan mothovi tuće ando Jehova. Puć tut: „Sar akava izveštaj mothovi so o Jehova mangela man? Sar odova pomožini man te mangav e Jehova?“
8. Sar šaj i molitva te pomožini amenđe te barjaćera amaro mangipe premalo Jehova?
8 Pana jekh način sar šaj te barjaćera amaro mangipe premalo Jehova tano ađahar so redovno ka phrava lese amaro vilo ki molitva (Ps. 25:4, 5). Šaj te ova sigurna so o Jehova ka odgovorini ko amare molitve (1. Jov. 3:21, 22). Amari phen i Hana, andi Azija, phenela: „Ki početka, mo mangipe premalo Jehova temeljinđa pe samo ko odova so đanđum olestar. Ama, ked dikhljum sar odgovorini ko me molitve, mo mangipe premalo leste ulo pana pobaro. Sebepi odova, mangljum te ćerav odova so ka radujini le.“ b
BARJAĆER TO MANGIPE PREMALO AVERA
9. So mothovi amenđe so o Timotej barjaćerđa po mangipe premalo phralja hem phenja?
9 Ko jekh ando pe misionarska putovanja, o Pavle reslja jekhe but šukar ćhave kova vićinđa pe Timotej. O Timotej manglja e Jehova hem e manušen. Palo nekobor berš, o Pavle olestar pisinđa e Filipljanenđe: „Nane man niko aver kova razmislini sar oleste, kova bi ćaće brinini pe tumenđe“ (Fil. 2:20). Sar so dikhaja, ov akate na pominđa kobor o Timotej šukar đanela te organizujini o buća ja kobor tano šukar govorniko, nego hine oduševimo kobor mangela e phralen hem e phenjen. Sigurno but skupštine jedva ađićerđe o Timotej te avel te posetini len (1. Kor. 4:17).
10. Sar i Ana hem olako rom mothovđe so mangena e phralen hem e phenjen?
10 Amen trudinaja amen te arakha način sar te pomožina amare phralenđe hem phenjenđe (Jevr. 13:16). Te razmotrina o primer andi Ana kola pominđam ko prethodno članko. Palo odova so hine jekh bari oluja, oj hem olako rom đelje ki jekh porodica hem dikhlje so olengo krov hine uništimo. Sebepi odova, akija porodica na hine len čista šeja. I Ana phenela: „Amen leljam olenge šeja thovđam len hem irinđam lenđe peglime hem kaplajime. Amenđe hine odova jekh tikni buti, ama olenđe but značinđa hem đi avdisutno dive amen hijam but šukar amala.“ I Ana hem olako rom pomožinđe e phralenđe odolese so but manglje len (1. Jov. 3:17, 18).
11. (a) Sar avera osetinena pe ked mothovaja lenđe mangipe? (b) Premalo Poslovice 19:17, so o Jehova ćerela ked dikhela so mothovaja mangipe?
11 Ked hijam šukar premalo avera hem ked mothovaja mangipe, on šaj te dikhen so trudinaja amen te oponašina e Jehova. Amen na hijam svesna kobor odova on ceninena. I Hana, kola pominđam angleder, setini pe sar avera pomožinđe laće. Oj phenela: „But hijum zahvalno sa e phenjenđe kola legarđe man ki služba ked hijum le but terni. On bi avena palo mande, vićinena man ko ručko, palo odova bi irinena man ćhere. Tek akana haljovava so na hine lenđe lokho sa odova te ćeren. Ama, on odova ćerđe mangipaja.“ Naravno na ka zahvalinen pe amenđe sare kase pomožinđam. I Hana pana phenela: „Ćaće bi mangava te irinav odole phenjenđe aso sa o šukaripe kova mothovđe maje, ama na đanava kaj akana živinena. Ama, o Jehova đanela hem ov ka irini lenđe aso olengo šukaripe.“ I Hana tani u pravu. O Jehova dikhela hem o najtikne buća kola ćeraja averenđe. Ov upro odova dikhela sar žrtva hem sar dugo kova ka irini lenđe. (Čitin Poslovice 19:17.)
Ked o manuš duhovno napredujini, ov razmislini sar šaj te pomožini averenđe (Dikh o 12. odlomko)
12. Sar šaj o phralja te mothoven mangipe ki skupština? (Dikh i slika.)
12 Ako hijan phral, sar šaj te mothove mangipe e phralenđe hem sar šaj te pomožine len? Jekh terno phral kova vićini pe Džordan pućlja jekhe starešina sar šaj pana pobuter te pomožini ki skupština. Odova starešina pohvalinđa le aso šukar buća kola đi akana ćerđa, ama hem phenđa lese so šaj pana te ćerel. Na primer, predložinđa lese te avel porano ko sastankija hem te pozdravini pe e phralencar, te učestvujini ko sastankija, te đal redovno ki služba pe grupaja hem te rodel načinija sar te pomožini e phralenđe. Ked o Džordan primeninđa akala predlogija, na samo so sikljilo sar te ćerel disave buća, nego hem sar pana pobuter te mangel e phralen hem e phenjen. Ov haljilo so ked jekh phral ovela sluga pomoćnik na počmini tegani te pomožini, nego samo nastavini te pomožini e phralenđe sar so ćerđa đi tegani (1. Tim. 3:8-10, 13).
13. Sar o mangipe podstakninđa e Kristijane palem te služini sar starešina?
13 Ama, so ako služinđan sar sluga pomoćnik ja starešina? O Jehova setini pe sa so tu angleder ćerđan hem so odova ćerđan ando mangipe (1. Kor. 15:58). Isto ađahar, dikhela o mangipe kova tu akana mothoveja. Amaro phral o Kristijan hine razočarimo ked više na hine starešina. Ama, ov phenela: „Odlučinđum so ka dav sa mandar te služinav e Jehovase bilo te ovav starešina ja na.“ Sar đelo o vreme, palem počminđa te služini sar starešina. Ov phenela: „Hari darandiljum palem te ovav starešina. Ama, odlučinđum so ako o Jehova odolese soj tano milosrdno dozvolinđa palem te služinav sar starešina, me ka služinav lese odolese so mangava ole hem e phralen hem e phenjen.“
14. So sikljiljan andi Elena?
14 E Jehovase sluge mothovena mangipe hem premalo pe pašutne (Mat. 22:37-39). Na primer, i Elena kotar Gruzija, phenela: „Ki početka, me propovedinđum samo odolese so mangljum e Jehova. Ama, sar mo mangipe premalo leste barilo, ađahar počminđum sa pobuter te mangav e manušen. Sebepi odova, razmislinđum save problemija isi len hem sostar bi mangena te vaćeren. So pobuter razmislinđum olendar, pana poviše mangljum te pomožinav len“ (Rimlj. 10:13-15).
O JEHOVA KA BLAGOSLOVINI AMEN AKO MOTHOVAJA MANGIPE AVERENĐE
Ked jekhe manušese mothovaja mangipe, odova šaj te pomožini butenđe (Dikh o 15. hem o 16. odlomko)
15-16. Sar soj tano mothovdo ko slike, save blagoslovija isi amen ked mothovaja mangipe averenđe?
15 Ked mothovaja mangipe amare phralenđe hem phenjenđe, tegani na pomožinaja samo olenđe. Ked počminđa i pandemija kotar koronavirus, o Paolo hem olesi romni pomožinđe bute phralenđe hem phenjenđe te sikljon te koristinen o elektronska uređaja te šaj te propovedinen. Ki početka, jekha amara phenjaće hine pharo te koristini o elektronska uređaja, ama palo odova sikljilji. Sebepi odova, oj šaj hine te vićini pe rođakonen ki Spomen-svečanost. Ko krajo, 60 olendar hine prisutna ki Spomen-svečanost prekalo video-poziv. Sar so dikhaja, o Paolo hem olesi romni na pomožinđe samo amara phenjaće, nego hem olake rođakonenđe. Kasnije, akija phen pisinđa e Paolose: „Ov sasto so pomožineja e phurenđe. Niked na ka bistrav e Jehovasi briga, ama hem odova so tu dinđan sa tutar te sikave amen.“
16 Asavke iskustvija sikavđe e Paolo jekh važno lekcija. Odova setinćerđa le so o mangipe tano považno ando đandipe hem ando sposobnostija. Ov phenela: „Me hijum le pokrajinsko nadgledniko. O objaviteljija šaj bisterđe me govorija, ama na bisterđe save buća ćerđum lenđe.“
17. Kase pana ka pomožina ked mothovaja mangipe?
17 Ked mothovaja mangipe averenđe, odova šaj te pomožini hem amenđe. O Džonatan, kova živini ko Novi Zeland, phenela soj tano odova ćaće. Jekh nedelja poslepodne, o Džonatan dikhlja sar jekh pioniri kokri đala ki služba. Odolese, odlučinđa svako nedelja poslepodne te đal akale pionireja ki služba. Tegani ni na haljilo kobor u stvari odova ka pomožini olese. O Džonatan phenela: „Ko odova period na uživinđum ki služba. Ama, ked šunđum sar akava phral propovedini hem kobor tano šukar ki služba, odova pomožinđa man te uživinav ki služba. Akava phral ulo mo but šukar amal hem pomožinđa man te sikljovav sar te uživinav ki služba hem te ovav pana popaše e Jehovaja.“
18. So o Jehova mangela te ćera?
18 O Jehova mangela te barjaćera amaro mangipe premalo leste hem premalo amare phralja hem phenja. Sar so dikhljam ko akava članko, amaro mangipe premalo Jehova šaj te barjaćera ađahar so redovno ka čitina e Devleso Lafi hem hor ka razmislina ando odova so čitinđam hem ađahar so redovno ka molina amen. O mangipe premalo phralja hem phenja šaj te barjaćera ađahar so ka pomožina len ko praktična načinija. Sar amaro mangipe premalo lende barjola, amen ka ova sa popaše hem e Jehovaja hem amare phralencar hem phenjencar. A odova amalipe šaj te trajini zauvek.
ĐILI 109 Te manga amen ando vilo
a Bizo obzir da li hijam neve ko ćaćipe ja beršencar služinaja e Jehovase, sare šaj hem ponodri te napredujina. Ko akava članko ka dikha sar šaj te barjaćera amaro mangipe premalo Jehova hem premalo amare phralja hem phenja. Đi razmotrinaja akava materijali, razmislin kobor đi akana napredujinđan hem sar šaj hem ponodri te napredujine.
b Disave anava tane menime.
