O ARHEOLOGIJA ko purano Vavilon otkrijinđe milionija cigle kola koristinđe pe te šaj te gradini pe i diz. Premalo arheolog o Robert Koldevaj, odola cigle ćerđe pe ko pećke kola nalazinđe pe „avrijal andi diz kuri i glina hine šukar hem hine kašta kola šaj hine te koristinen pe asi jag“.

O arhelogija arakhlje dokaz so o vavilonska službenikija koristinđe akala pećke hem aso diso odvratno. O Paul Alen Bolije, o profesor andi asiriologija, kotar univerzitet ko Toronto, phenela: „O vavilonska zapisija mothovena so o kralj naredinđa te forden pe ki peć hem te tharen pe o manuša kola na šunđe le ili na mothovđe poštovanje premalo sveta buća.“ Na primer, ko jekh zapis kotar vreme ando kralj Navuhodonosor pisini: „Uništin len, thar len, pek len,... ki peć... ćer olengo ćuro te đal upre, mudar len ađahar so ka forde len ki jag.“

E manušen kola čitinena i Biblija akava setinćeri ko događaj ando trito poglavlje kotar knjiga Danilo. O kralj Navuhodonosor ćerđa jekh baro kip ando zlato ki ravnica Dura, avrijal andi diz Vavilon. Ked o trin Jevreja o Sedrah, o Misah hem o Avdenago na manglje te klaninen pe anglo odova kip, o Navuhodonosor but holjanđa hem naredinđa i peć te taćari pe efta puti poviše hem te forden len andre. Jekh moćno anđeo spasinđa len (Dan. 3:1-6, 19-28).

O cigle kola arakhlje pe ko Vavilon mothovena so i Biblija tani tačno. Upro but cigle hine pisime disave natpisija kolencar hvalini pe o kralj. Ko jekh natpis pisinđa: „O Navuhodonosor, o vavilonsko kralj... I palata koja me, o baro kralj gradinđa... Nek me potomkija večno vladinena ki odija palata.“ Akava natpis tano but slično odoleja so pisini ko Danilo 4:30 kuri o Navuhodonosor hvalinđa pe: „Nane li akava o baro Vavilon, kova me ćerđum me snagaja te ovel kraljevsko prestonica hem te mothovi kobor me hijum baro?“