1-2. Ko kova način jekh hrišćanin šaj te uporedini pe jekha bare zgradaja? (1. Korinćanima 15:58)

 KO 1978. berš ko Tokio gradinđa pe jekh but bari zgrada. O manuša pućlje pe da li odija zgrada ka izdržini, odolese so ki odija phuv but putija isi zemljotresija. Ama, so o inženjerija ćerđe te ne bi odija zgrada perela ked isi zemljotresija? On ćerđe te ovel dovoljno zorali, ama ko isto vreme hem fleksibilno te šaj te izdržini o zemljotres. O hrišćanija tane sar odija zgrada. Ama, ko kova način?

² Jekh hrišćanin valjani te ovel le ravnoteža maškaro odova ked valjani te ovel zoralo hem istrajno, a ked valjani te ovel prilagodljivo. Ov mothovi soj tano zoralo hem odlučno ked valjani te šunel e Jehovase zakonija hem merilija. (Čitin 1. Korinćanima 15:58.) Ov tano „spremno te šunel“ hem na ćerela kompromis, čak hem ked lese pharo. Ki aver strana, valjani te ovel razumno ili prilagodljivo ked odova tano moguće ili ked odova valjani (Jak. 3:17). Jekh hrišćanin kova sikljilo te ovel le asavki ravnoteža nane previše strogo ni previše popustljivo. Ko akava članko ka dikha sar šaj te ova zorale hem istrajna. Isto ađahar, ka dikha kola panđ načinija o Satana koristini te šaj te ovel amenđe pharo te aćhova zorale hem ka dikha sar šaj te borina amen protiv oleste.

3. Ando kola e Jehovase zakonija vaćeri pe ko Dela apostolska 15:28, 29?

³ O Jehova isi le najbaro pravo te del amen zakonija hem olese zakonija šaj lokho te haljon pe (Is. 33:22). Na primer,  o vodećo telo ko prvo veko pominđa trin buća ko kola o hrišćanija valjani te aćhon zorale: (1) valjani te služinen samo e Jehovase, a na e idolenđe, (2) valjani te poštujinen e Jehovaso zakon soj tano o rat sveto hem (3) valjani te poštujinen e Jehovase moralna merilija. (Čitin Dela apostolska 15:28, 29.) Sar šaj o hrišćanija avdije te mothoven soj tane poslušna e Jehovase ko akala trin buća?

4. Sar šaj te mothova so služinaja samo e Jehovase? (Otkrivenje 4:11)

⁴ Amen služinaja samo e Jehovase, a na e idolenđe. O Jehova zapovedinđa e Izraelcenđe te služinen samo olese (Pon. zak. 5:6-10). Ked o Beng iskušinđa le, o Isus phenđa lese so amen valjani te služina samo e Jehovase (Mat. 4:8-10). Odolese, amen na služinaja e idolenđe. Isto ađahar, na ćeraja idolija ando manuša, bizo obzir da li tane on religiozna vođe, političarija, poznata muzičarija, glumcija ili sportistija. Amen hijam ki Jehovasi strana hem služinaja samo olese sose ov sa stvorinđa. (Čitin Otkrivenje 4:11.)

5. Sose ićeraja amen ko Jehovaso zakon ando životi hem ando rat?

⁵ Amen poštujinaja e Jehovaso zakon so o životi hem o rat tane sveta. Sose? Odolese so o Jehova phenđa so o rat predstavini o životi, a odova tano jekh but šukar poklon kova dinđa amen (Lev. 17:14). Ked o Jehova prvo puti phenđa e manušenđe so šaj te han o mas ando životinje, ov phenđa lenđe so na valjani te han o rat (Post. 9:4). Ov ponovinđa odija zapovest hem ko Mojsijeso zakon (Lev. 17:10). Uzo odova, o vodeće telo ko prvo veko phenđa e hrišćanenđe so valjani te ciden pe „ando rat“ (Dela 15:28, 29). Avdije, amen ićeraja amen ki akija zapovest ked valjani te odlučina savo lečenje ka prihvatina. b

6. Sose valjani te trudina amen te ićera amen ko Jehovase moralna merilija?

⁶ Amen ićeraja amen ko Jehovase moralna merilija (Jevr. 13:4). O apostol Pavle phenđa: „Ciden sa o želje ando tumaro telo.“ Odova značini so valjani te cida amendar sa o pogrešna želje. Amen na ka dikha hem na ka ćera odova so šaj te ćhivel amen te ćera nemoral (Kol. 3:5; Jov 31:1). Ked hijam ko iskušenje te ćera diso soj tano lošno, valjani odmah te cida amen sose odova šaj te rumini amaro amalipe e Devleja.

7. So valjani te ova odlučna te ćera hem sose?

⁷ O Jehova ađićeri amendar „vilestar“ te ova lese poslušna (Rimlj. 6:17). Sa e Jehovase zakonija tane aso amaro šukaripe, odolese na valjani te birina ko kova zakon ka ićera amen, a ko kova na (Is. 48:17, 18; 1. Kor. 6:9, 10). Amen daja sa amendar te ugodina e Jehovase hem te mothova isto stav savo hine le o psalmista. Ov phenđa: „Odlučinđum te ićerav man ko te propisija celo đivdipe, đi o krajo“ (Ps. 119:112). Ama, o Satana ka del sa pestar te ćhinavi amen te ćera odova soj tano šukar. Kola buća koristini te šaj te ćerel odova? Akana ka dikha.

8. Sar o Satana koristini o progonstvo te peravi amen?

⁸ Progonstvo. O Beng mangela prekalo nasilje hem o pritisak kova doživinaja te peravi amen. Oleso cilj tano „te hal“ amen, te uništini amaro amalipe e Jehovaja (1. Petr. 5:8). Hari palo odova so  o Isus mulo, o manuša pretinđe, marđe hem čak mudarđe e hrišćanen odolese so hine odlučna hem ponodri te aćhon zorale (Dela 5:27, 28, 40; 7:54-60). O Satana hem avdije koristini o progonstvo. Na primer, dikhaja kobor tane o vlastija okrutna premalo amare phralja hem phenja ki Rusija hem ko avera phuvja. Ko celo sveto, o protivnikija progoninena amare phralen hem phenjen ko razna načinija.

9. Sose valjani te pazina amen ando Satanase garavde zamke?

⁹ Garavde zamke. O Satana na napadini amen samo direktno, prekalo progonstvo, nego hem koristini disave „garavde zamke“ (Ef. 6:11). Te dikha o primer ando amaro phral o Bob kova valjanđa te ovel le jekh bari operacija. Ov phenđa pe doktorenđe so na mangela te primini rat. O doktori kova valjanđa te operisini le phenđa so ka poštujini olesi odluka. Ama, jekh rat angleder te ovel i operacija, o anesteziolog alo ko Bob palo odova so olesi familija đelji pese ćhere. Ov phenđa lese so on najverovatno ka poštujinen olesi odluka te na den le rat, ama so ka ovel len rat ki strana ako slučajno ka valjani te den le. Ov mislinđa so o Bob ka menini po stav odolese so olesi porodica nane uzo leste. Ama, amaro phral hine le zoralo stav hem phenđa so niked ne bi prihvatini o rat.

10. Sose „akale svetosi mudrost“ šaj te ovel amenđe sar zamka? (1. Korinćanima 3:19, 20)

¹⁰ „Akale svetosi mudrost.“ E manušenđe ko akava sveto nane važna e Jehovase merilija. Ako mukhaja olengo razmišljanje te utičini upro amende, hari pohari amen šaj te ćhinava te ićera amen ko Jehovase moralna merilija. (Čitin 1. Korinćanima 3:19, 20.) But putija, „akale svetosi mudrost“ šaj te utičini upro amare želje. Na primer, nekobor hrišćanija ki skupština Pergam hem Tijatira mukhlje te utičinen upro lende o manuša kola služinđe e hovavne devlenđe hem kola ćerđe nemoral. Odolese, o Isus dinđa len ozbiljno savet te ciden pe ando nemoral (Otkr. 2:14, 20). Avdije, e manušengo razmišljanje šaj te utičini hem upro amende. Amari porodica hem amare amala šaj te phenen amenđe so hijam but stroga hem so na valjani te ićera amen ko sa e Jehovase zakonija. Na primer, šaj te phenen amenđe so nane odobor važno te aćhova čista anglo Jehovase jaćha hem so olese moralna merilija tane staromodna.

11. Ko so valjani te pazina?

¹¹ Podijekh puti šaj te mislina so e Jehovase smernice nane dovoljno jasna. Čak šaj te ova ko iskušenje te đa „prekalo odova soj tano pisimo“ (1. Kor. 4:6). O religiozna vođe ko Isuseso vreme ćerđe baš odova. On ko Zakon dodajinđe pe pravilija hem ađahar ćerđe e manušenđe te ovel pana popharo te ićeren pe ko Devleso zakon (Mat. 23:4). O Jehova dela amen jasna smernice prekalo po Lafi hem pi organizacija. Nane amen nisavo razlog te dodajina diso ko odola smernice (Posl. 3:5-7). Odolese, na valjani te đa prekalo odova so pisini ki Biblija ili te ćera pravilija e phralenđe ando buća kola na pominena pe ki Biblija.

12. Sar o Beng koristini „o hovavne lafija“?

¹² „Hovavne lafija.“ O Satana koristini „o hovavne lafija“ hem o manušikane tradicije te prevarini e manušen hem te ćerel podele maškaro lende (Kol. 2:8). Ko prvo veko, odova hine i filozofija, o sikljoviba kola na hine premalo e Devleso zakon hem o sikljovibe so o hrišćanija mora te ićeren pe ko Mojsijeso zakon. Sebepi akala  buća, o manuša našti hine te sikljon o ćaćipe ando Jehova. Avdije, o Satana prekalo medije hem društvena mreže širini i teorija andi zavera hem o hovavne vestija kola podržinena o politička vođe. Odova šaj hine te dikha đi trajinđa i pandemija kotar koronavirus. c E Jehovase svedokija kola šunđe o smernice kola dobinđe andi organizacija, na brininđe pe odobor kobor o manuša kola šunđe odola hovavne informacije (Mat. 24:45).

13. Sose valjani te pazina te na len amari pažnja disave buća?

¹³ O buća kola lena amari pažnja. Amen valjani te usredsredina amen ko „buća kola tane ćaće važna“ (Fil. 1:9, 10). Ked disave buća lena amari pažnja, amen našalaja but vreme hem snaga. Disave uobičajena buća sar soj tane o habe, o pibe, i rekreacija hem i buti šaj te len amari pažnja ako tane amenđe najvažna ko životi (Luka 21:34, 35). Isto ađahar, svako dive šunaja hem čitinaja ando protestija hem politička rasprave. Valjani te pazina odola buća te na utičinen upro amende. Ako na pazinaja, lokho šaj te desini pe ko amaro vilo hem ki amari godi te ova ki nekasi strana. O Satana prekalo sa akala buća mangela te ćhivel amen te ćera odova soj tano pogrešno. Hajde te dikha sar šaj te borina amen protiv oleste hem te aćhova zorale.

14. So ka pomožini tut te aćhove ki Jehovasi strana?

¹⁴ Razmislin ando to predanje hem krštenje. Tu anđan odija odluka odolese so mangljan te ove ki Jehovasi strana. Počminđan te sikljove ando Jehova, te mange le hem te poštujine le sar te nebesko Dade. Barjaćerđan ti vera hem odova podstakninđa tut te pokajine tut. Ćhinavđan te ćere o buća kola ov mrzini hem počminđan te ćere odova so ov mangela. Osetinđan tut but šukar ked haljiljan so o Jehova oprostinđa te grehija (Ps.  32:1, 2). Počminđan redovno te đa ko sastankija hem te vaćere averenđe odova so sikljiljan ando Jehova. Ked predajinđan to životi e Jehovase hem ked krstinđan tut, počminđan te đa ko drumo ando životi hem odlučno hijan te aćhove ko odova drumo (Mat. 7:13, 14).

15. Sose tano važno te proučina hem hor te razmislina?

¹⁵ Proučin e Devleso Lafi hem hor razmislin ando odova so proučinđan. Sar so jekh kaš aćhola zoralo ako isi le hor korenija, ađahar hem amen ka aćhova zorale ako isi amen zorali vera ko Devleso Lafi. Sar jekh kaš barjola, olese korenija ovena sa pohor hem sa poviše širinena pe. Ked proučinaja hem hor razmislinaja, amen zorjaćeraja amari vera hem ovaja uverime so e Jehovase drumija tane najšukar (Kol. 2:6, 7). Razmislin sar o Jehova ko purano vreme pomožinđa pe slugenđe prekalo savetija hem smernice kola dinđa len. Na primer, o Jezekilj pažljivo posmatrinđa sar o anđeo merini o hram kova dikhlja ki vizija. Akija vizija but zorjaćerđa e Jezekilje, a amen olatar šaj te sikljova sar ko ispravno način te služina e Jehovase (Jezek. 40:1-4; 43:10-12). d Hem amenđe but ka pomožini ako ka odvojina vreme te proučina hem te razmislina ando pohor buća kotar Devleso Lafi.

16. Sar e Bobe zaštitinđa odova so hine verno ko po vilo? (Psalam 112:7)

¹⁶ To vilo nek ovel verno. O kralj David phenđa so niked na ka našalji po mangipe premalo Jehova. Ov đilabđa: „Mo vilo tano verno tuće, o Devla“ (Ps. 57:7). Hem amaro vilo šaj te ovel verno e Jehovase ađahar so ka ovel amen potpuno poverenje upro leste. (Čitin Psalam 112:7.) Te dikha so pomožinđa e Bobese, kolestar angleder vaćerđam. Ked hine lese phendo so o rat ka ovel odothe ako ka valjani te den le, ov odmah vaćerđa so na mangela te lel rat hem so ako ka ćeren odova, ov odmah ka ikljol kotar bolnica. Kasnije, o Bob phenđa: „Ko nijekh trenutko na hijum le ko duj gođa so  te ćerav hem na brininđum man so ka ovel.“

17. So sikljovaja ando Bob? (Dikh i slika.)

¹⁷ O Bob aćhilo verno odolese so but vreme angleder te đal ki bolnica, ov odlučinđa so na ka primini rat. So pomožinđa lese te anel odija odluka? Sar prvo, ov manglja te ćerel e Jehova bahtalo. Sar dujto, pažljivo proučinđa so i Biblija hem amare publikacije phenena ando životi hem ando rat. Sar trito, hine uverimo so ako šunela e Jehovase smernice, odova ka anel lese but bare blagoslovija. Hem amen šaj te aćhova verna bizo obzir save problemija isi amen.

18. So sikljovaja ando Varak? (Dikh i slika ki naslovno strana.)

¹⁸ Nek ovel tut poverenje upro Jehova. Te dikha sar odova so o Varak hine le poverenje upro Jehova pomožinđa lese te šunel olese smernice. Ko odova vreme, o manuša ko Izrael na hine pripremime aso maribe, čak na hine len ni oružje. Ama, o Jehova phenđa e Varakese te đal hem te borini pe protiv o zapovedniko o Sisara hem olesi vojska koja hine la but oružje (Sud. 5:8). I proročica Devora phenđa e Varakese te huljel kotar planina tele hem te borini pe odole zapovednikoja kova hine le 900 kočije. Iako e Izraelcenđe bi ovela but pharo te borinen pe ko odova ravno than protiv i vojska kase kočije đana but sigate, o Varak ipak šunđa akava uputstvo. Đi o vojnikija huljilje kotar planina Tavor, o Jehova mukhlja jekh baro boršim. E Sisarese kočije batinđe ki ćik, a uzi Jehovasi pomoć o Varak pobedinđa (Sud. 4:1-7, 10, 13-16). Isto ađahar, o Jehova hem amenđe ka pomožini ako isi amen poverenje upro leste hem ako ićeraja amen ko smernice kola dobinaja andi olesi organizacija (Pon. zak. 31:6).

19. Sose mangeja te aćhove zoralo?

¹⁹ Sa đi živinaja ko akava sveto, amen ka valjani te trudina amen te aćhova zorale (1. Tim. 6:11, 12; 2. Petr. 3:17). Na valjani te dozvolina te peraven amen o progonstvo, o garavde zamke, akale svetosi mudrost, o hovavne lafija hem o buća kola lena amari pažnja (Ef. 4:14). Umesto odova valjani te aćhova zorale, te šuna e Jehovase smernice hem te mothova so mangaja le. Ko isto vreme, valjani te ova hem razumna. Ko aver članko, ka vaćera sar tano o Jehova hem o Isus najšukar primer ko odova.