Ked hine o Dujto svetsko rat, me roditeljija đelje kotar Estonija te živinen ki Nemačka. Othe me bijandiljum. Palo odova, počminđe te pripreminen pe te đan ki Kanada. Uduri živinđam uzi Otava ko jekh tikno ćher kuri hem o khanja živinđe. Tegani, hijam le but ćorore. Ama, barem hine amen jare aso doručak.

Jekh dive, e Jehovase svedokija čitinđe me dajaće o stihija ando Otkrivenje 21:3, 4. Odova odobor takinđa lako vilo, so počminđa te rovel. O seme kotar ćaćipe hari pohari barilo ko me roditeljengo vilo hem na nakhlja but vreme, on krstinđe pe.

Me roditeljija na đanđe odobor šukar te vaćeren engleski, ama hine but revna. Skoro svako subota, mo dad bi legari man hem me phenja, e Silvija, ki služba iako celo rat ćerđa buti ki jekh fabrika kuri topinđa pe o metali. Isto ađahar, svako kurko sar porodica proučinđam i Stražarsko kula. Mo dad hem mi daj pomožinđe man ko mo vilo te barjol o mangipe premalo Jehova. Sebepi odova, ko 1956. berš, ked hine man deš berš, odlučinđum te predajinav mo životi e Jehovase. Olengo zoralo mangipe premalo Jehova, podstaknini man hem ponodri te služinav e Jehovase.

Palo odova so završinđum i škola, hine disave buća kola ćhinavđe man te služinav pobuter e Jehovase. Mislinđum so ako ka ovav pioniri, niked na ka zaradinav dovoljno pare te ispuninav mo suno te putujinav ko avera phuvja. Khuvđum ki buti ki jekh radio stanica kuri mukhljum muzika hem but sviđinđa pe maje odova. Odija buti obično ćerđum uveče hem sebepi odova na đeljum ko sastankija hem družinđum man e manušencar kola na manglje e Devle. Palo disavo vreme, mi savest podstakninđa man te meninav diso koro mande.

Selinđum man ki diz Ošava, ko Ontario. Odothe upoznajinđum e phrale Rej Norman, olese phenja i Lesli hem avere pioniren. Sare but pomožinđe man. Ked dikhljum kobor tane bahtale, počminđum te pućav man so me ćerava me životoja. Odobor ohrabrinđe man so hem me počminđum te služinav sar pioniri ko septembar ko 1966. berš. Ćaće hijum le but bahtalo. Ama, palo odova ulje disave buća kola but utičinđe ko mo životi.

Pana đi hijum le ki srednjo škola, predajinđum i molba aso Betel ko Toronto, ki Kanada. Kasnije, đi služinđum sar pioniri, hijum le vićimo te služinav  štar berš ko Betel. Ama, ćaće sviđinđa pe maje i Lesli hem darandiljum so ako ka đav ko Betel, šaj više niked na ka dikhav la. Palo odova so usrdno molinđum man, odlučinđum te đav ko Betel, ama hine maje pharo so morandiljum te oprostinav man olatar.

Ko Betel ćerđum buti ki vešernica, a kasnije ćerđum sar sekretari. I Lesli počminđa te služini sar specijalno pioniri ki diz Gatino, ko Kvibek. But putija pućljum man sar tani hem da li anđum šukar odluka. Ama jekh dive, desinđa pe jekh but šužo iznenađenje. Olako phral o Rej hine vićimo te služini ko Betel hem hine mo cimeri. I Lesli hem me počminđam palem te družina amen. Ko 27. februar 1971. berš, ko zadnjo dive ando mo zadatko ko Betel, amen duj leljam amen.

I Lesli hem me dobinđam zadatko te služina ko Kvibek, ki jekh skupština ki francusko ćhib. Palo nekobor berš, hijum le iznenadimo ked o phralja vićinđe amen te služina ki putujućo služba. Tegani hine man samo 28 berš. Mislinđum so hijum but terno hem so nane man dovoljno iskustvo te služinav sar pokrajinsko nadgledniko, ama o lafija ando Jeremija 1:7, 8 but ohrabrinđe man. I Lesli hine la nekobor saobraćajna nesreće hem hine la problemija sojbaja. Odolese mislinđam so ka ovel amenđe but pharo te služina ki putujućo služba. Ama, i Lesli phenđa: „Ako o Jehova vićini amen te ćera diso, sose ne bi probinaja?“ Prihvatinđam odova zadatko hem 17 berš uživinđam ki odija služba.

Sar pokrajinsko nadgledniko hine man but buti hem odolese našti hine uvek te odvojinav dovoljno vreme te ovav me romnjaja. Ama, morandiljum te sikljovav jekh važno buti. Jekh dive, rano sabalje neko zvoninđa ko udara. Ked phravđum o udara, na hine niko. Ama, odothe hine jekh korpa hem andre hine jekh stolnjako, voće, ćiral, maro, jekh flaša vino, čaše hem jekh poruka, kuri pisinđa: „Legar te romnja ko piknik.“ Odova dive hine but šužo dive hem hine kham. Ama, phenđum me romnjaće so isi man te spreminav govorija hem so našti te đa. Oj haljilji man, ama hine hari tužno. Samo so bešljum te spreminav o govor, mi savest na mukhlja man ki mira. Razmislinđum kotar lafija ando Efešanima 5:25, 28. Prekalo odola stihija o Jehova setinćerđa man so valjani te brininav ando me romnjake osećanja. Palo odova so molinđum man, phenđum laće: „Hajde, ka đa“. Oj hine but bahtali. Vordancar đeljam ko jekh than uzi reka, ćhivđam amaro stolnjako hem hine amen but šužo dive. Iako hijam le ko piknik, me resljum te spreminav me govorija.

Amaro zadatko hine but šukar, odolese so posetinđam but skupštine, kotar Britansko Kolumbija đi ko Njufaundlend. Mo suno te putujinav ko avera phuvja, ispuninđa pe. Razmislinđum kotar škola Galad, ama na mangljum te služinav ki aver phuv.  Mislinđum so na hijum dovoljno šukar te bi ovava misionari. Isto ađahar, darandiljum so šaj te ova bićhalde ki Afrika kuri hine nabormipe hem maribe. Hijum le bahtalo uduri kaj hijum le.

Ko 1992. berš, e Jehovase svedokija šaj hine palem javno te svedočinen ko phuvja kola hine deo ando Sovjetsko Savez. Odolese, o phralja pućlje amen da li hijam spremna te služina ki Estonija hem te ova misionarija. Hijam le but iznenadime hem molinđam amen e Jehovase. Palem razmislinđam: „Ako o Jehova vićini amen te ćera diso, sose ne bi probinaja?“ Prihvatinđam odova zadatko hem razmislinđum: „Pa šukar, na valjani te đa ki Afrika.“

Odmah počminđam te sikljova estonski. Palo nekobor masek, ki odija phuv o phralja pućlje amen te služina ki pokrajinsko služba. Amen valjanđam te posetina 46 skupštine hem grupe, ki Estonija, ki Letonija, ki Litvanija hem ko Kalinjingrad ki Rusija. Sebepi odova, morandiljam te sikljova o ćhibja kola vaćerena pe uduri. Odova hine but pharo. Ama, o phralja hem o phenja hine but bahtale so dinđam sa amendar te sikljova odola ćhibja hem on pomožinđe amen ko odova. Ko 1999. berš, i Estonija ulji podružnica hem mo zadatko hine te služinav sar član ando Odbor e phralencar Tomas Edur, Lembit Rejle hem Tomi Kauko.

Uduri hine amen prilika te penđara bute Svedokonen kola angleder hine bićhalde ko Sibir. Odothe hine len bare pharipa hem hine odvojime kotar pi porodica, ama on niked na hine ogorčena. Uvek hine radosna hem revna ki služba. Olengo primer pomožinđa amen te haljova so hem amen šaj te istrajina hem te ova radosna, kobor god phare okolnostija te oven amen.

Beršencar ćerđam odija buti hem na leljam amenđe dovoljno vreme te odmorina amen. Sebepi odova, i Lesli osetinđa pe but umorno. Na haljiljam odmah so odova tano odolese so i Lesli hine la nabormipe kova vićini pe fibromijalgija. Tegani, počminđam ozbiljno te razmislina te irina amen ki Kanada. Ked hijam le vićime te đa ki škola aso članija ando Odbor kotar podružnica, ko Paterson, mislinđam so na ka šaj te prisustvujina uduri. Ama, palo odova so molinđam amen, prihvatinđam odova poziv hem o Jehova blagoslovinđa odija odluka. Đi hijam le ki odija škola, i Lesli dobinđa medicinsko pomoć koja valjanđa laće. Palo odova, šaj hine te nastavina te ćera amare zadatkija.

Jekh rat ko 2008. berš, đi hijam le ki Estonija, o phralja ando glavno sedište vićinđe man hem pućlje man da li mangaja te služina ko Kongo. Hijum le but iznenadimo, sose tajsato dive valjanđum te odgovorinav lenđe. Odija rat ništa na pominđum me romnjaće, sose đanđum so na ka sovel celo rat. Ama me na sućum celo rat, odolese so molinđum man e Jehovase hem phenđum lese sose darava te đav ki Afrika.

Tajsato dive phenđum me romnjaće: „O Jehova vićini amen te đa ki Afrika. Sar ka đana so našti te  ćera odova ili so našti te ova bahtale, ako na probinaja?“ Ađahar, palo 16 berš so hijam le ki Estonija, amen đeljam ki Kinšasa, ko Kongo. O Betel uduri hine but šužo. I prvo buti koja i Lesli ćhivđa ki amari soba hine i razglednica koja anđam andi Kanada, kuri hine pisimo: „Cveton odothe kuri hijan sadimo.“ Ked upoznajinđam e phralen, proučinđam e manušencar i Biblija hem dikhljam kobor tano uduri šukar te služina sar misionarija, amen hijam le but bahtale. Sar đelo o vreme, hine amen čast te posetina 13 podružnice ki Afrika. Uduri hine amen prilika te upoznajina različita manušen. Mi dar cidinđa pe hem hijam le zahvalna e Jehovase so bićhalđa amen te služina ki Afrika.

Ko Kongo hine amen prilika te probina različito habe, sar soj tane disave insektija. Mislinđum so niked na ka ćhivav ko muj diso asavko. Ama, palo odova so dikhljum so o phralja uživinena ko odola buća hem me probinđum hem hine maje drago so ćerđum odova.

Amen putujinđam ko istočno deo andi odija phuv te šaj te ohrabrina e phralen hem te legara lenđe odova so valjani lenđe. Ko odola thana i pobunjeničko vojska napadinđa o gava hem povredinđa e romnjen hem e ćhaven. But ando amare phralja hem phenja na hine len but materijalna buća. Ama olengi zorali nada ko uskrsenje, olengo mangipe premalo Jehova hem olengi vernost premali organizacija but ohrabrinđe amen. Olengo primer ćhivđa amen te razmislina sose služinaja e Jehovase hem but zorjaćerđa amari vera. Disave ando amare phralja našalđe pe ćhera hem sa so sadinđe. Akava setinćerđa man so o materijalna buća šaj but sigate te našala hem so amaro amalipe e Jehovaja tano najvažno. Iako o phralja hine len bare pharipa, skoro niked na žalinđe pe. Olengo stav ohrabrinđa amen te istrajina ked ka oven amen problemija ja disavo nabormipe.

Palo odova, dobinđam nevo zadatko. O phralja pućlje amen te služina ko Betel ko Hongkong. Amen niked ni na zamislinđam so ka živina ki Azija. Ama, odolese so dikhljam e Jehovaso vas ko svako amaro zadatko, amen prihvatinđam odova poziv. Ko 2013. berš, ked morandiljam te mukha i Afrika  hem amare phralen, but runđam. Tegani, na đanđam soj tano anglo amende.

Na hine amenđe lokho te živina ko Hongkong sose tani but bari diz hem uduri živinena razna manuša. Isto ađahar, i kinesko ćhib hine amenđe but phari. O phralja hem o phenja but šukar ađićerđe amen hem uživinđam ko olengo habe. I podružnica valjanđa te proširini pe sose hine sa pobari hem pobari buti, ama o cene ando nekretnine but sigate uštilje. Odolese, o Vodećo telo odlučinđa disave buća te ćeren pe ko aver than hem te biknen pe disave objektija andi podružnica. Hari palo odova so anđa pe odija odluka, ko 2015. berš, selinđam amen ki Južno Koreja hem odothe nastavinđam amari služba. Akate valjanđam te sikljova pana jekh ćhib. Iako tano amenđe pharo te vaćera e phralencar ki odija ćhib, ipak phenena amenđe so šukar napredujinaja.

Te oven tut neve amala nane uvek lokho, ama haljiljam so ako vićineja e phralen koro tute, šaj posigate te upoznajine len. But puti dikhljam so amare phralja tane pobuter slična nego različita hem so o Jehova ćerđa amen ađahar te phrava amaro vilo averenđe hem te manga len (2. Kor. 6:11).

Haljiljam so valjani te prihvatina e manušen sar o Jehova hem te roda dokazija so ov mangela amen hem so dela amen smernice aso amaro životi. Ked god hijam le obeshrabrime ili pućljam amen da li o phralja prihvatinena amen, amen bi palem čitinaja disave ohrabrujuća lila ja razglednice kola bićhalđe amenđe amare amala. Svako puti osetinđam sar o Jehova uslišini amare molitve, ađahar so dinđa amen snaga hem uverinđa amen so mangela amen.

Sar đelje o berša, i Lesli hem me sikljiljam kobor tano važno te arakha vreme jekh jekhese, bizo obzir kobor hijam zauzeta. Isto ađahar, haljiljam so valjani te asa ked ćeraja greške, posebno đi sikljovaja nevi ćhib. Svako rat, trudinaja amen te arakha diso aso so bi zahvalinaja e Jehovase.

Te ovav iskreno, niked na mislinđum so ka ovav misionari hem so ka živinav ko avera phuvja. Ama doživinđum odija radost hem haljiljum so sa o buća šaj te oven uzi Jehovasi pomoć. But putija avena maje ki godi o lafija kotar prorok Jeremija, kova phenđa: „Jehova, prevarinđan man“ (Jer. 20:7). Ja, o Jehova but putija iznenadinđa amen hem dinđa amen but bare blagoslovija. Čak hem ispuninđa mi želja te letinav avioneja. Ked hijum le tikno ni na zamislinđum so ko odobor thana ka letinav avioneja. Posetinđam panđ kontinentija. Isto ađahar, but ceninava odova so i Lesli podržinđa man ko sa o zadatkija kola dobinđam andi organizacija.

Uvek trudinaja amen te na bistra kase služinaja hem sose. O blagoslovija kola avdije isi amen, mothovena amenđe kobor šukar ka ovel ked ka živina zauvek, ked o Jehova ka „phravel po vas hem sarinenđe kola tane đivde ka del okova so mangena“ (Ps. 145:16).