1-2. Sar o Lot, save problemija hem amen avdije isi amen?

 KED dikhaja kobor baro nemoral isi avdije, osetinaja amen isto sar o Lot. Ov „patinđa sebepi o lošna manuša kola ćerđe grešna postupkija bizi lađ“, odolese so đanđa so asavke buća o Devel but mrzini (2. Petr. 2:7, 8). Odolese so hine le strahopoštovanje hem mangipe premalo Devel, o Lot mrzinđa o lošna buća kola ćerđe o manuša ko odova vreme. Avdije, hem amen živinaja maškaro manuša kola hari ili hić na poštujinena e Jehovase moralna merilija. Ama, amen ipak šaj te aćhova čista anglo Jehovase jaćha ađahar so ka barjaćera amaro mangipe hem strahopoštovanje premalo leste (Posl. 14:2).

² O Jehova pomožini amen te ćera odova ađahar so ohrabrini amen prekali knjiga Poslovice. Sarinenđe šaj te pomožinen o savetija kola arakhaja ki odija knjiga.

3. Premalo Poslovice 17:3, kova tano jekh razlog sose valjani te zaštitina amaro vilo? (Dikh i slika.)

³ O najvažno razlog sose valjani te zaštitina amaro vilo tano sose o Jehova ispitini le. Odova značini so ov koro amende dikhela o buća kola o manuša našti te dikhen hem đanela save hijam andral. (Čitin Poslovice 17:3.) Ov ka mangel amen ako hem ponodri razmislinaja ando olese savetija kola šaj te pomožinen amen te dobina o večno životi (Jov. 4:14). Amen na ka mukha than e Bengese hem olese lošno svetose te ćhiven disave lošna buća ki amari godi (1. Jov. 5:18, 19). Ked  hijam paše e Jehovaja, amaro mangipe hem poštovanje premalo leste barjola. Odolese so na mangaja te povredina amare Dade, čak ni ki godi na ka avel amenđe te ćera odova soj tano lošno. Ked hijam ko iskušenje te ćera diso soj tano pogrešno, amen ka puća amen: „Sar šaj namerno te povredinav nekas ko odobor mangela man?“ (1. Jov. 4:9, 10).

4. Sar o strahopoštovanje premalo Jehova zaštitinđa e Marta?

⁴ I Marta b, jekh phen andi Hrvatska koja hine ko iskušenje te ćerel nemoral, phenela: „Hine maje pharo te razmislinav ando odova soj tano ispravno hem te borinav man protiv i želja te ćerav odova soj tano neispravno. Ama, o strahopoštovanje premalo Jehova zaštitinđa man.“ Sar šaj hem amen te zaštitini? I Marta phenela so hor razmislinđa kola posledice bi ovena la ako bi ćerela odova soj tano pogrešno. Hem amen šaj te ćera odova. Ako bi ćeraja greh, najlošno so šaj te desini pe tano but te povredina e Jehova hem te našala i prilika te služina lese zauvek (Post. 6:5, 6).

5. So šaj te sikljova ando amaro phral o Leo?

⁵ Ako isi amen strahopoštovanje premalo Jehova, amen na ka opravdina o lošna buća kola ćeraja. O Leo, kova živini ko Kongo, sikljilo odova. Štar berš palo odova so krstinđa pe, khuvđa ko lošno društvo. Ov mislinđa so sa đi na ćerela lošna buća, na ćerela ništa pogrešno. Ama, o društvo ćhivđa le te pijel hem te ćerel nemoral. Palo odova, počminđa te razmislini odolestar so olese roditeljija sikavđe le hem kobor hine bahtalo đi služinđa e Jehovase. Odolese, počminđa te ćerel odova soj tano šukar. O starešine pomožinđe lese hem ov irinđa pe e Jehovase. Avdije, služini sar starešina hem sar specijalno pioniri.

6. Ando kola duj simbolična romnja akana ka vaćera?

 ⁶ Akana ka razmotrina o 9. poglavlje andi knjiga Poslovice. Odothe vaćeri pe ando duj simbolična romnja. Jekh olendar tani mudro, a jekh tani bigođali. c Đi ka razmotrina akava poglavlje, ma bistri so ko Satanaso sveto isi pherdo nemoral hem pornografija (Ef. 4:19). Odolese tano but važno hem ponodri te ovel amen dar ando Devel hem te cida amen ando lošna buća (Posl. 16:6). Sarinenđe, bizo obzir da li hijam murša ja đuvlja, but ka pomožini akava poglavlje. Akala romnja o solduj vićinena e neiskusno manušen. Svako olendar ka phene vaćeri lenđe: „Aven ko mo ćher te han maro“ (Posl. 9:1, 5, 6, 13, 16, 17). Ama, ando odova kaso poziv ka prihvatinen o manuša, ka zavisini so ka ovel olencar.

7. Premalo Poslovice 9:13-18, so ovela okolencar kola prihvatinena o poziv andi bigođali romni? (Dikh i slika.)

⁷ Te dikha o poziv andi „bigođali romni“. (Čitin Poslovice 9:13-18.) Oj bizi lađ vićini okolen kola tane neiskusna te „aven koro late“ hem te slavinen olaja. So ovela olencar uduri? „Olake gostija tane hor ko grobo“. Šaj setineja tut so slična simbolična lafija angleder pominena pe ko Poslovice. Odola lafija upozorinena amen ki „grešno đuvli“ hem ki „bludnica“asi koja phenela pe: „Ko đala ko olako ćher, đala ko meribe“ (Posl. 2:11-19). O lafija kotar Poslovice 5:3-10 upozorinena amen ki jekh aver „grešno đuvli“ kase „pre huljena ko meribe“.

8. Savi odluka šaj ka valjani te ana?

⁸ Okola so šunena e „romnja koja tani bigođali“ valjani te odlučinen da li ka prihvatinen olako poziv ili ka odbacinen le. Isto ađahar, hem amen šaj ka valjani te ana asavki odluka. So ka ćera ako neko mangela te ćhivel amen te ćera diso soj tano nemoralno ja ako ko internet kotar jekhvar ikljona amenđe disave pornografska slike?

9-10. Sose valjani te cida amen ando nemoral?

⁹ Isi but važna razlogija sose valjani te cida amen ando nemoral. I „bigođali romni“ koja pomini pe ko Poslovice phenela: „O ćordane panja tane gudle“. Soj tane odola „ćordane panja“? Ki Biblija o seksualna odnosija ko brako tane uporedime e svežo panjeja (Posl. 5:15-18). O rom hem i romni kola tane venčime, šaj te uživinen ko seksualna odnosija. Ama, odova nane ađahar e „ćordane panjencar“. O ćordane panja šaj te  odnosinen pe ko seksualna odnosija avrijal ando brak. O manuša kola ćerena nemoral mangena odova te garaven averendar, isto sar so jekh ćor mangela te garavi averendar ked diso ćorela. O „ćordane panja“ šaj te izgledinen soj tane gudle ako okola so ćerena nemoral mislinena so niko na ka saznajini aso odova. Ama, odova nane ađahar. On hovavena kokri pes! O Jehova sa dikhela. Nane ništa pološno, nego ked neko našalji po amalipe e Jehovaja. A odova nane hić gudlo (1. Kor. 6:9, 10). Ama, isi pana disave buća.

¹⁰ O manuš kova ćerela nemoral osetini bari lađ hem so na vredini nisose. Isto ađahar, but porodice šaj te rasturinen pe hem i đuvli šaj te aćhol khamni iako na manglja. Odolese, but tano mudro te na prihvatina o poziv kova avela andi bigođali romni. Uzo odova so duhovno merena, avere lafencar našalena po amalipe e Jehovaja, o manuša kola ćerena nemoral šaj te astaren disave nabormipa kotar kola šaj doslovno te meren (Posl. 7:23, 26). Ko 9. poglavlje a ko 18. stiho pisini: „Olake gostija tane hor ko grobo.“ Tegani, sose but manuša prihvatinena olako poziv kova legari ko meribe? (Posl. 9:13-18).

11. Save šaj te oven o posledice ked neko dikhela pornografija?

¹¹ Jekh uobičajeno zamka tani i pornografija. Disave mislinena so i pornografija nane opasno. Ama, oj tani but opasno! Sebepi so dikhena pornografija, but manuša na poštujinena ni pes ni averen hem ulje zavisna andi pornografija. O nemoralna slike isi len odobor zorali moć so beršencar palo odova tano but pharo te ikalen pe andi godi. Isto ađahar, i pornografija na pomožini e manušenđe te ciden pestar o neispravna želje, već ćerela len te oven pana pobare (Kol. 3:5; Jak. 1:14, 15). But manuša kola dikhlje pornografija ko krajo ćerđe nemoral.

12. So valjani te ćera ako pojavinena pe amenđe slike kola tane nemoralna?

¹² So valjani te ćera ako ko amaro uređaj kotar jekhvar pojavinena pe pornografska slike? Amen valjani odmah te cida odija slika hem te na dikha la. Polokho ka ovel amenđe te ćera odova ako setinaja amen kobor tano amenđe vredno amaro amalipe e Jehovaja. Čak iako disave slike nane pornografska, ipak šaj te ćeren te oven amen disave nemoralna mislija. Sose na valjani te dikha odova? Odolese so na mangaja ni ki godi te avel amenđe diso soj tano nemoralno (Mat. 5:28, 29). O Dejvid, jekh starešina kotar Tajland, phenela: „Me pućava man: ’Čak iako disave slike šaj nane pornografska, da li bi o Jehova ovela bahtalo ako bi me dikhava len?‘ Ked ađahar razmislinava, odova pomožini man mudro te postupinav.“

13. So pomožini amen te postupina mudro?

¹³ I dar te na ćera diso so ka dukhavi e Jehova šaj te pomožini amenđe te postupina mudro. O strahopoštovanje premalo Jehova tano „prvo so e manušese valjani te šaj te ovel le mudrost“ (Posl. 9:10). Odova tano šukar mothovdo ko Poslovice ko početko kotar 9. poglavlje kuri i „ćaćutni mudrost“ tani uporedimi jekha avera simbolično romnjaja.

14. Kotar kova poziv vaćeri pe ko Poslovice 9:1-6?

¹⁴ Čitin Poslovice 9:1-6. Ko akala stihija čitinaja ando poziv kova avela e Jehovastar, kova tano amaro Stvoritelj hem kastar avela i mudrost (Posl. 2:6; Rimlj. 16:27). Ko akala stihija pomini pe jekh baro ćher kova isi le efta stubija. Akava primer mothovi amenđe so o Jehova tano velikodušno hem so mangela sa o manuša te sikljon olestar te šaj te oven mudra.

15. So o Devel vićini amen te ćera?

 ¹⁵ O Jehova tano ćaće but velikodušno. Ando primer kotar romni koja predstavini i „ćaćutni mudrost“, koja pomini pe ko Poslovice 9. poglavlje, amen sikljovaja so o Jehova tano velikodušno hem so dela amen but buća. Ko akala stihija asi akija romni phenela pe so pripreminđa but mas, ćhivđa začinija ko vino hem sa odova ćhivđa ko astali (Posl. 9:2; fusn.). Isto ađahar, ko 4. hem 5. stiho pisini so i „ćaćutni mudrost“ ja i simbolično romni phenela okolese kova tano neiskusno: „Ava, ha o maro kova pripreminđum“. Sose valjani te prihvatina o poziv andi akija romni? O Jehova mangela olese ćhave te oven mudra hem bezbedna. Ov na mangela te ćera disave greške kola šaj but te povredinen amen. Odolese, „e čestito manušenđe pomožini te postupinen mudro“ (Posl. 2:7). Ked isi amen strahopoštovanje premalo Jehova, amen mangaja te ugodina lese. Šunaja olese mudra savetija hem primeninaja len (Jak. 1:25).

16. Sar o strahopoštovanje premalo Devel pomožinđa e Alanese te anel mudro odluka hem so ulo sebepi odova?

¹⁶ Te dikha sar o strahopoštovanje premalo Devel pomožinđa e Alanese te anel jekh mudro odluka. O Alan služini sar starešina hem ćerela buti ki škola sar profesori. Ov phenela: „But ando me kolege mislinena so o pornografska filmija tane način sar šaj te dobini pe seksualno obrazovanje.“ Ama, o Alan đanela so odova nane tačno. Ov pana phenela: „Odolese so mangava e Jehova hem poštujinava le, me na mangljum te dikhav odola filmija. Odova objasninđum hem me kolegenđe ki buti.“ Ov primeninđa o savet andi ćaćutni mudrost te đal „ko drumo andi razboritost“ (Posl. 9:6). Ked dikhlje e Alaneso stav, olese kolege hine oduševime hem disave olendar akana proučinena i Biblija hem avena ki dvorana.

17-18. Kola šukar buća isi len o manuša kola prihvatinena o poziv andi „ćaćutni mudrost“ hem so jedva ađićerena? (Dikh i slika.)

¹⁷ O Jehova koristini o primer ando duj simbolična romnja te mothovi amenđe sar šaj te ovel amen bahtali budućnost. Okola so prihvatinena o poziv andi „bigođali romni“ trudinena pe te arakhen zadovoljstvo ko nemoral. Ama, na haljona so odova so akana ćerena ka utičini ko odova so ka ovel olencar ki budućnost. Olenge postupkija legarena len „hor ko grobo“ (Posl. 9:13, 17, 18).

¹⁸ A okola so prihvatinena o poziv andi romni koja predstavini i „ćaćutni mudrost“, akana uživinena ki gozba koja oj pripreminđa hem bahtale tane sose isi len sa so valjani lenđe te šaj te oven paše e Jehovaja  (Is. 65:13). Prekalo prorok Isaija o Jehova phenđa: „Pažljivo šunen man hem han o habe kova tano šukar hem ka uživinen ko najšukar habe“ (Is. 55:1, 2). Amen sikljovaja te manga odova so o Jehova mangela hem te mrzina odova so ov mrzini (Ps. 97:10). Isto ađahar, hijam but bahtale so šaj hem averen te vićina te prihvatinen o poziv andi „ćaćutni mudrost“. Amen hijam sar o sluge kola vićinena „kotar najuće thana ki diz: ’Koj tano neiskusno, nek avel akari!‘“ Amen hem okola so prihvatinena akava poziv, nane amen korist samo akana. Ako hijam istrajna, odova šaj te pomožini amenđe zauvek te živina đi phiraja „ko drumo andi razboritost“ (Posl. 9:3, 4, 6).

19. Premalo Propovednik 12:13, 14, so hijam odlučna te ćera? (Dikh o okvir „ Sar pomožini amen o strahopoštovanje premalo Jehova?“)

¹⁹ Čitin Propovednik 12:13, 14. Amaro hor poštovanje premalo Jehova ka pomožini amenđe te aćhova moralna čista hem te aćhova paše oleja ko akala poslednja hem phare dive. I ispravno dar ando Devel ka podstaknini amen hem ponodri te vićina so pobuter manušen te roden i „ćaćutni mudrost“ hem te sikljon olatar.