I Biblija na vaćeri odolestar. Ama, mothovi amenđe disave zanimljiva detaljija kola šaj utičinđe ki olengi odluka.

Jekh anđeo phenđa e Marijaće so ka aćhol khamni hem so ka bijani. Ked o anđeo vaćerđa odova, i Marija hem o Josif živinđe ko Nazaret, ki Galileja kotar hine o Josif (Luka 1:26-31; 2:4). Kasnije, ked ikljilje ando Egipat, on irinđe pe ko Nazaret. O Isus barilo uduri hem ulo Nazarećanin (Mat. 2:19-23). Odolese, ked razmislinaja ando Nazaret ki godi avela amenđe o Isus, o Josif hem i Marija.

I Marija hine la jekh rođaka koja vićinđa pe Jelisaveta hem oj živinđa ki Juda. Olako rom hine o svešteniko Zaharija, a olako ćhavo o Jovan Krstitelj (Luka 1:5, 9, 13, 36). I Marija đelji te posetini e Jelisaveta hem aćhilji trin masek koro late. Palo odova, i Marija irinđa pe ko Nazaret (Luka 1:39, 40, 56). Sebepi odova, i Marija šukar đanđa i Juda.

Kasnije, o Josif ando Nazaret đelo ko Vitlejem odolese so o Rimljanija manglje sare te đan „ko popis, ...ki pi diz“. Premalo proročanstvo, o Mesija valjanđa te bijanđol ko Vitlejem (Luka 2:3, 4; 1. Sam. 17:15; 20:6; Mih. 5:2). I Marija bijanđa e Isuse uduri hem o Josif na manglja palo odova te mučini ola hem e beba te đan ko baro drumo te irinen pe ko Nazaret. On aćhilje ko Vitlejem kova hine dur ando Jerusalim enja kilometrija. Odothar hine lenđe polokho te igaren e tikne ko hram kuri valjanđe te den žrtva (Lev. 12:2, 6-8; Luka 2:22-24).

Angleder, e Devleso anđeo phenđa e Marijaće so olako ćhavo ka bešel ko Davideso presto hem „ka vladini sar Kralj“. Odolese, o Josif hem i Marija šaj haljilje kobor tano važno o Isus te bijanđol ki Davidesi diz (Luka 1:32, 33; 2:11, 17). On šaj mislinđe so bi ovela mudro te aćhon uduri sa đi o Devel na phenela lenđe so te ćeren aver.

Amen na đanaja kobor dugo on živinđe ko Vitlejem ked o astrologija alje koro lende. Ama, odova so đanaja tano so on tegani živinđe ko jekh ćher hem olengo ćhavo više na hine beba (Mat. 2:11). Umesto te irinen pe ko Nazaret, on verovatno disavo vreme aćhilje te živinen ko Vitlejem.

O Irod naredinđa te mudaren ko Vitlejem „sa e ćhaven đi o duj berš“ (Mat. 2:16). O anđeo upozorinđa e Josife hem ov lelja e Marija hem e Isuse, našlje ko Egipat hem uduri aćhilje sa đi o Irod na mulo. Kasnije, o Josif lelja pe porodica hem đelo ko Nazaret. Sose na irinđe pe ko Vitlejem? Odolese so ko odova vreme e Irodeso ćhavo, o Arhelaj, vladinđa ki Juda, a ov hine but lošno manuš. Isto ađahar, o anđeo upozorinđa e Josife kobor tano opasno te irinen pe uduri. Ko Nazaret, o Josif šaj hine bezbedno te barjaćeri e Isuse hem te sikavi le ando Jehova (Mat. 2:19-22; 13:55; Luka 2:39, 52).

O Josif mulo angleder so o Isus omogućinđa e manušenđe te đan upre ko nebo. Ov ka ovel uskrsnimo ki phuv. But đene ka ovel len prilika te upoznajinen le hem te pućen le sose ov hem i Marija aćhilje ko Vitlejem palo odova so o Isus bijandilo.