1. Premali 1. Petrova 5:2, savi odgovornost isi len o starešine?

 AVDIJE, o starešine isi len odgovornost te brininen pe kotar Jehovaso stado. On but ceninena odova zadatko so šaj te pomožinen pe phralenđe hem pe phenjenđe. Odolese, dena sa pestar te oven „pastirija kola šukar ka brininen pe olendar.“ (Jer. 23:4; čitin 1. Petrova 5:2.) But hijam zahvalna so isi amen asavke starešine ki skupština.

2. Kola pharipa šaj te ovel len o starešine?

² Đi ćerena pe zadatkija, o starešine šaj te ovel len but pharipa. Na primer, šaj te ovel lenđe pharo te brininen pe andi skupština. O Toni kova služini sar starešina ki Amerika, morandilo te sikljol te ovel poskromno ked valjanđa te odlučini kobor odgovornostija ka prihvatini. Ov phenela: „Ked počminđa i pandemija kotar koronavirus, dinđum sa mandar te pomožinav te organizujinen pe o sastankija hem i služba. Ama, kobor god trudinđum man, uvek hine pana so te ćerel pe. Sebepi odova, na resljum redovno te čitinav i Biblija, te ovel man mo lično proučibe hem te molinav man.“ O Ilir, kova služini sar starešina ki Kosovo hine le jekh aver problemi. Ked hine maribe, hine lese pharo te šunel o uputstvija kola dobinđa andi Jehovasi organizacija. Ov phenela: „Mi hrabrost hine ispitimi ked o phralja andi podružnica phenđe maje te pomožinav e phralenđe hem e phenjenđe kola živinđe ko opasna thana. Tegani, but darandiljum hem o smernice kola dobinđum dićhilje maje so našti te primeninen pe ki akija situacija.“ O Tim, kova služini sar misionari ki Azija, phenela so hine lese but pharo te resel te ćerel sa o buća. Ov phenela: „Disavo puti, hijum le odobor umorno so našti hine te brininav man ando phralja hem phenja.“ So šaj te pomožini e starešinenđe kola isi len slična pharipa?

3. So šaj sare te sikljova ando Gedeon?

 ³ O starešine šaj but te sikljon ando sudija o Gedeon (Jevr. 6:12; 11:32). Ov zaštitinđa e Devlese narodo hem brininđa pe olestar (Sud. 2:16; 1. Let. 17:6). Sar o Gedeon, hem o starešine dena sa pestar te brininen pe kotar Devleso narodo ko pharo vreme (Dela 20:28; 2. Tim. 3:1). Odolese, o starešine šaj but te sikljon andi Gedeonesi skromnost, poniznost, poslušnost hem istrajnost. Isto ađahar, sarinenđe ki skupština šaj te pomožini e Gedeoneso primer pana pobuter te ceninen e starešinen (Jevr. 13:17).

4. Sar o Gedeon mothovđa skromnost hem poniznost?

⁴ O Gedeon hine jekh skromno hem ponizno manuš. b Ked e Jehovaso anđeo phenđa lese so ov ka spasini e Izraelcen kotar moćna Madijancija, odova ponizno manuš phenđa: „Mi porodica tani najtikni ko Manasijaso pleme, a me na hijum odobor važno ko me dadeso ćher“ (Sud. 6:15). Ov mislinđa so nane sposobno te ćerel odova. Ama, o Jehova đanđa so ov šaj te ćerel odova. Odolese so o Jehova pomožinđa lese, o Gedeon but šukar ćerđa po zadatko.

5. Ked šaj e starešinenđe te ovel pharo te mothoven skromnost hem poniznost?

⁵ O starešine dena sa pestar te mothoven skromnost hem poniznost ko sa o buća (Mih. 6:8; Dela 20:18, 19). On na hvalinena pe odoleja so šaj te ćeren ili so već ćerđe angleder. Ki aver strana, na mislinena soj tane nisose odolese so isi len disave mane ja so ćerđe disave greške. Ama, podijekh puti šaj te ovel lenđe pharo te mothoven skromnost hem poniznost. Na primer, šaj prihvatinena but odgovornostija ki skupština, a palo odova tano lenđe pharo te ispuninen len. Ili podijekh puti šaj te ovel lenđe pharo te mothoven odola osobine ked neko hvalini len ja kritikujini len sebepi odova sar ćerena disave buća. So šaj te pomožini lenđe te oven sar o Gedeon ko asavke situacije?

6. So šaj o starešine te sikljon andi Gedeonesi skromnost? (Dikh i slika.)

⁶ Rode pomoć. O manuš kova tano skromno haljola so isi buća kola našti te ćerel. O  Gedeon hine skromno hem odolese pućlja averen te pomožinen lese (Sud. 6:27, 35; 7:24). O mudra starešine ćerena isto odova. O Toni, kolestar angleder vaćerđam, phenela: „Sebepi o način sar bariljum, me prihvatinđum sa pobuter hem pobuter odgovornostija. Odolese odlučinđum ko amaro porodično proučibe te vaćera kotar skromnost hem te pućav me romnja so mislini odolestar. Isto ađahar, ko amaro sajt dikhljum o video Ugledajmo se na Isusa poveravajući drugima zaduženja.“ O Toni počminđa averen te pućel te pomožinen lese. So ulo sebepi odova? O Toni phenela: „I buti ki skupština završinđa pe, a me hine man pobuter vreme te brininav man andi mi duhovnost.“

7. Sar šaj o starešine te oponašinen e Gedeone ked neko kritikujini len? (Jakovljeva 3:13)

⁷ Ma holjan ked avera kritikujinena tut. Pana jekh buti so šaj te ovel phari e starešinenđe tani ked avera kritikujinena len. E Gedeoneso primer šaj te pomožini len ko odova. Ov hine svesno so nane savršeno hem odolese mirno reagujinđa ked o manuša kotar Jefremeso pleme kritikujinđe le (Sud. 8:1-3). O Gedeon na holjanđa. Ov mothovđa poniznost ađahar so pažljivo šunđa len hem ljubazno vaćerđa olencar. O mudra starešine oponašinena e Gedeoneso primer ađahar so pažljivo šunena hem na holjanena ked avera kritikujinena len. (Čitin Jakovljeva 3:13.) Ked ćerena odova, ki skupština isi mir.

8. So o starešine valjani te ćeren ked avera hvalinena len? Vaćer jekh primer.

⁸ Den sa i slava e Jehovase. Ked o manuša hvalinđe e Gedeone so pobedinđa i diz Madijan, ov sa i slava dinđa e Jehovase (Sud. 8:22, 23). Sar šaj o starešine te oponašinen e Gedeoneso primer? Ađahar so sa i slava ka den e Jehovase aso odova so ćerena (1. Kor. 4:6, 7). Na primer, ako o phralja hvalinena jekhe starešina soj tano but šukar učitelj, ov šaj te phenel so sa odova sikljilo ando Devleso Lafi ja andi Jehovasi organizacija. O starešine šaj te razmislinen odolestar da li olengo govor dela slava e Jehovase ili samo mangena te oduševinen averen. Te dikha o primer ando Timoti. Ked počminđa te služini sar starešina, ov but manglja te ićeri govorija. Ov phenela: „Ko me govorija, o uvodija hem o poređenja hine len but detaljija hem hine zanimljiva averenđe. Odolese, but putija dobinđum pohvale ando avera. Sebepi odova, sa i pažnja hine usmerimi upro mande, a na upro Jehova hem i Biblija.“ Sar đelo o vreme, o Timoti valjanđa te menini o način sar ićeri o govorija te na bi sa i pažnja ovela usmerimi premalo leste (Posl. 27:21). So hine sebepi odova? Ov phenela: „Akana, o phralja phenena maje so mo govor pomožinđa len te ikljoven ko krajo pe problemencar, te istrajinen ko kušnje ja te oven pana popaše e Jehovaja. Pobahtalo hijum akana ked šunava sa akava, nego ked o manuša hvalinđe man.“

9. Ked e Gedeonese hine pharo te mothovi poslušnost hem hrabrost? (Dikh i slika.)

⁹ Palo odova so o Gedeon ulo sudija, ov valjanđa te ovel poslušno hem hrabro. Olese hine dindo jekh but pharo zadatko, te uništini o oltari kova oleso dad koristinđa te služini e Valese (Sud. 6:25, 26). Kasnije, ked ćedinđa e vojska, o Jehova duj putija phenđa lese so isi le but vojnikija hem so nekas valjani te bićhali ćhere (Sud. 7:2-7). Ko krajo, hine lese phendo te napadini pe dušmanen kasno raćate (Sud. 7:9-11).

10. Ked šaj jekhe starešinase te ovel pharo te mothovi poslušnost?

 ¹⁰ O starešine valjani te oven poslušna (Jak. 3:17). Jekh poslušno starešina uvek ićeri pe ko odova so pisini ko Devleso Lafi hem ko smernice kola avena andi Devlesi organizacija. Ađahar mothovi šukar primer averenđe. Ama, disavo puti šaj te ovel lese pharo te mothovi poslušnost. Na primer, podijekh puti šaj te dobini but smernice ja šaj on sigate meninena pe hem odolese tano lese pharo te primenini len. Tegani šaj te pućel pe, da li tane odola smernice praktična hem mudra. Isto ađahar, ako živini ki phuv kuri tane amare aktivnostija zabranime šaj te ovel zamolimo te prihvatini disavi odgovornost sebepi koja šaj te ovel ćhivdo ko phanlipe. Sar šaj ko asavke situacije o starešine te mothoven poslušnost sar o Gedeon?

11. So šaj te pomožini e starešinenđe te oven poslušna?

¹¹ Pažljivo šun o smernice hem primenin len. O Jehova phenđa e Gedeonese sar te uništini pe dadeso oltari, kuri te ćerel jekh nevo oltari olese hem save životinjen te del. O Gedeon na razmislinđa da li valjani odova te ćerel, već ćerđa sa odova so o Jehova phenđa lese. Avdije, e Jehovasi organizacija pomožini e starešinenđe te brininen pe amendar te aćhova bezbedna hem te ova paše e Jehovaja ađahar so dela len uputstvija prekalo lila, obaveštenja hem ko avera načinija. Amen but ceninaja e starešinen sose dena sa pestar te primeninen o smernice kola dobinena. Odova koristini sarinenđe ki skupština (Ps. 119:112).

12. Sar šaj o starešine te primeninen o savet ando Jevrejima 13:17 ako ovela disavi promena ki organizacija?

¹² Ov spremno te prihvatine o promene. O Jehova phenđa e Gedeonese te bićhali skoro sa pe vojnikonen te đan ćhere (Sud. 7:8). O Gedeon šaj hine te mislini: „Da li tano odova mudro? Da li ćaće ka uspina ađahar?“ Ama, ov ipak hine poslušno e Jehovase. Avdije, o starešine tane sar o Gedeon ako spremno prihvatinena sa o promene kola ovena ki organizacija. (Čitin Jevrejima 13:17.) Na primer, ko 2014. berš, o Vodeće telo meninđa o način sar finansirini pe i izgradnja ando dvorane hem kongresna dvorane (2. Kor. 8:12-14). Angleder, i organizacija pozajminđa pare e skupštinenđe te gradinen pe o dvorane, ama o skupštine valjanđe te irinen odola pare. Akana, i organizacija koristini o prilogija ando sa o skupštine ko celo sveto te gradinen pe o dvorane hem o kongresna dvorane uduri kaj valjani, čak ako i lokalno skupština nane la dovoljno prilogija. Ked o Hose šunđa asi akija promena, ov razmislinđa: „Akana nijekh dvorana niked na ka gradini pe. Odova na ka funkcionišini koro amende.“ So pomožinđa lese te prihvatini akija promena? Ov phenela: „O lafija ando Poslovice 3:5, 6 setinćerđe man so mora te  uzdajinav man upro Jehova. Ko krajo, sa hine but šukar! Na samo so gradinđam but dvorane, nego dikhljam so amare prilogija šaj te pomožinen okolenđe kola nane len but.“

13. (a) Ko so o Gedeon hine uverimo? (b) Sar o starešine šaj te oponašinen le? (Dikh i slika.)

¹³ Hrabro ćeren e Jehovasi volja. O Gedeon ćerđa sa odova so o Jehova phenđa lese, iako darandilo hem oleso zadatko hine opasno (Sud. 9:17). Palo odova so o Jehova phenđa lese soj tano oleja, o Gedeon hine le poverenje so ov ka pomožini le te zaštitini olese narodo. Avdije, o starešine kola živinena ko phuvja kuri tane amare aktivnostija zabranime, oponašinena e Gedeoneso primer. On hrabro predvodinena ko sastankija hem ki služba, iako tane svesna so šaj te oven phanle, ispitime, maltretirime ja šaj te našaljen pi buti. c Đi ka trajini i bari nevolja, o starešine ka valjani hrabro te ićeren pe ko smernice kola ka dobinen, čak iako olengo životi šaj ka ovel ki opasnost. Na primer, disave ando odola smernice šaj te oven sar te propovedina i poruka andi osuda hem so valjani te ćera te šaj te preživina o napad kotar Gog ando Magog (Jezek. 38:18; Otkr. 16:21).

14. Sose e Gedeonese hine pharo te istrajini?

¹⁴ O Gedeon hine sudija hem odija buti na hine lokhi. Ked o Madijancija raćate našlje andi bitka, ov prastandilo palo lende andi dolina Jezrael đi i reka Jordan koja hine okružimi šumaja (Sud. 7:22). Da li terdilo ked reslja ko Jordan? Na. Iako hine umorno, ov hem olese 300 manuša nastavinđe te prastan palo lende. Ko krajo, reslje len hem pobedinđe len (Sud. 8:4-12).

15. Sose podijekh puti šaj te ovel pharo e starešinenđe te oven istrajna?

¹⁵ Disavo puti, odolese so valjani te brininen pe andi skupština hem andi pi porodica, o starešine šaj te oven umorna. Ked osetinena pe ađahar, sar šaj te pomožini lenđe e Gedeoneso primer?

16-17. So pomožinđa e Gedeonese te istrajini hem ko so o starešine šaj te oven uverime? (Isaija 40:28-31; dikh i slika.)

 ¹⁶ Nek ovel tut poverenje so o Jehova ka del tut snaga. O Gedeon verujinđa so o Jehova ka del le snaga hem o Jehova odova ćerđa (Sud. 6:14, 34). Jekh puti, ov hem olese manuša prastandilje palo duj madijanska kraljija kola našlje olendar ko kamile (Sud. 8:12, 21). O Jehova tegani pomožinđa e Izraelcenđe te resen odole kraljen hem te pobedinen ki bitka. Isto ađahar, o starešine uzdajinena pe upro Jehova sose „ov niked na ćhinđola hem niked na našali pi snaga.“ Ov ka del len snaga ked ka valjani lenđe. (Čitin Isaija 40:28-31.)

¹⁷ Te dikha o primer ando amaro phral o Metju kova ćerela ko Odbor aso odnosija e bolnicencar. So pomožinđa lese te istrajini? O Metju phenela: „But pomožinđe man o lafija ando Filipljanima 4:13 kuri pisini so o Jehova dela snaga. But putija ked osetinđum so nane man snaga, usrdno molinđum man e Jehovase te pomožini man hem ponodri te brininav man ando me phralja. Tegani, osetinđum sar o Jehova prekalo po duho dela man snaga te istrajinav.“ Sar o Gedeon, hem amare starešine trudinena pe te brininen pe ando Jehovaso narodo, čak hem ked nane lenđe lokho. Naravno, on valjani te oven skromna hem te haljon so našti uvek te ćeren sa so mangena. Šaj te ovel len poverenje so o Jehova ka šunel len ked rodena lestar pomoć hem so ka zorjaćeri len te istrajinen (Ps. 116:1; Fil. 2:13).

18. Sar so dikhljam ko akava članko, sar šaj o starešine te oponašinen e Gedeone?

¹⁸ O starešine šaj but buća te sikljon ando Gedeon. On valjani te oven skromna ked prihvatinena disave odgovornostija. Isto ađahar, valjani te oven ponizna ked avera hvalinena len ja kritikujinena len. On valjani te mothoven poslušnost hem hrabrost, pogotovo soj tano o krajo akale svetoso but paše. Uzo odova, valjani te ovel len poverenje upro Jehova so ka del len snaga savo god problemi te ovel len. Amen but ceninaja amare starešinen sose dena sa pestar ki služba e Jehovase (Fil. 2:29).