1-2. Premalo Psalam 25:14, so valjani te ćera te šaj te ova paše amala e Jehovaja?

 SO MISLINEJA, kola osobine tane važna ako mangaja te ova paše amala nekasa? Verovatno bi pheneja so o amala valjani te mangen hem te podržinen jekh jekhe. Šaj ni ki godi ne bi avela tuće so jekh ando važna osobine aso amalipe tani i dar. Ama, sar so phenela o stih kova ka vodini amen ko akava članko, okola kola mangena te oven paše e Jehovaja valjani te daran olestar ili te ovel len strahopoštovanje. (Čitin Psalam 25:14.)

² Bizo obzir kobor berša služinaja e Jehovase, sare amen valjani te ovel amen dar ando Jehova ja strahopoštovanje. Ama, so značini te ovel amen dar ando Devel? Sar šaj te sikljova te ovel amen strahopoštovanje olestar? So andi dar kotar Devel šaj te sikljova kotar upravitelj o Avdija, o prvosveštenik o Jodaj hem kotar kralj Joas?

3. Vaćer sar šaj i dar te zaštitini amen.

³ Ked đanaja so diso šaj te povredini amen, tegani osetinaja dar. Asavki dar tani šukar sose šaj te pomožini amen te ana šukar odluke. Sebepi odija dar, na ka phira ki ivica ando disavo ućo than ja ako đanaja so diso šaj te povredini amen tegani ka cida amen andi opasno situacija. Isto ađahar, odolese so daraja te na našala amaro amalipe nekasa, amen niked na ka phena ja na ka ćera diso soj šaj te povredini odola osoba.

4. So o Beng mangela?

⁴ O Satana mangela o manuša te daran ando Jehova samo sebepi i kazna. Ov mangela amen te verujina ko odova so Elifas phenđa – so o Jehova tano uvek holjamo, so irini o lošnipe  hem so niked našti te ćera le te ovel bahtalo (Jov 4:18, 19). O Satana mangela te ovel amen odobor bari dar so šaj te ćhinava te služina e Jehovase. Ama, te šaj te cida amen kotar odija zamka, amen valjani te ovel amen ispravno dar ando Jehova, avere lafencar, strahopoštovanje.

5. So značini te ovel amen dar ando Devel?

⁵ Jekh manuš kova isi le ispravno dar ando Jehova, mangela le hem na mangela te ćerel diso so šaj te rumini olengo amalipe. O Isus hine le asavki „dar ando Devel“, avere lafencar hine le strahopoštovanje (Jevr. 5:7). Ov na darandilo ando Jehova sebepi i kazna (Is. 11:2, 3). Umesto odova, ov but manglja e Jehova hem manglja te šunel le (Jov. 14:21, 31). Sar o Isus hem amen valjani te ovel amen strahopoštovanje premalo Devel sebepi soj tano manglo, mudro, pravedno hem moćno. Isto ađahar, đanaja so o Jehova but mangela amen hem olese tano važno sar amen reagujinaja ked sikavi amen. Odoleja so ćeraja šaj te ćera o Jehova te ovel bahtalo ili te osetini dukh ko vilo (Ps. 78:41; Posl. 27:11).

6. Kova tano jekh način sar šaj te sikljova te ovel amen strahopoštovanje premalo Jehova? (Psalam 34:11)

⁶ Amen na bijanđovaja odoleja te ovel amen strahopoštovanje premalo Jehova, već mora te razvijina le. (Čitin Psalam 34:11.) Jekh način sar šaj odova te ćera tano te razmislina ando buća kola tane stvorime. Ked haljovaja sar o buća kola o Jehova stvorinđa mothovena olesi mudrost, moć hem mangipe premalo amende, amen pana pobuter poštujinaja le hem mangaja le (Rimlj. 1:20). Amari phen i Adrijen phenđa: „Ked dikhava sa so o Jehova stvorinđa hem kobor tani bari olesi mudrost, odova oduševini man hem pomožini man te haljovav so ov đanela soj tano najšukar maje.“ Odolese so but puti razmislini odolestar, oj phenđa: „Sose bi ćerava diso so bi ćhinavi mo amalipe e Jehovaja, kastar avela mo životi?“ Da li šaj akava kurko te arakhe vreme te razmisline ando buća kola o Jehova stvorinđa? Ako ćereja odova, to poštovanje hem to mangipe premalo leste pana pobuter ka barjol (Ps. 111:2, 3).

7. Sar i molitva šaj te pomožini amen te ovel amen strahopoštovanje premalo Jehova?

⁷ Pana jekh način sar šaj te razvijina strahopoštovanje premalo Jehova tano ađahar so redovno ka molina amen. So pobuter molinaja amen, ov ovela amenđe pana postvarno. Svako puti ked molinaja le te del amen snaga te istrajina ki disavi kušnja, odova setinćeri amen kobor tani bari olesi moć. Isto ađahar, ked zahvalinaja amen olese so dinđa pe Ćhave, odova setinćeri amen kobor mangela amen. Ked molinaja le te pomožini amen te ikljova ko krajo disave problemeja, odova setinćeri amen kobor tano mudro. Asavke molitve šaj te pomožinen amen pana pobuter te poštujina le. Isto ađahar, šaj te zorjaćeren amari odlučnost te cida amen ando buća kola šaj te ruminen amaro amalipe oleja.

8. So šaj te ćera te na našala o strahopoštovanje premalo Jehova?

⁸ Ako na mangaja te našala amaro strahopoštovanje premalo Devel, amen valjani te proučina oleso Lafi. Đi ćeraja odova, amaro cilj valjani te ovel te sikljova ando šukar hem ando lošna primerija. Akana ka dikha o primer ando Jehovase duj verna sluge. Ka vaćera ando Avdija, kova služinđa sar upravitelj ko Ahaveso dvoro hem ando prvosveštenik o Jodaj. Palo odova, ka dikha so šaj te sikljova ando kralj Joas kova ki početka služinđa e Jehovase, ama kasnije ćhinavđa.

9. Sar o strahopoštovanje premalo Jehova pomožinđa e Avdijase? (1. Kraljevima 18:3, 12)

⁹ Ked o Avdija b prvo puti pominđa pe ki Biblija, olestar hine pisimo: „O Avdija but darandilo ando Jehova.“ (Čitin 1. Kraljevima 18:3, 12.) Sar o strahopoštovanje premalo Jehova pomožinđa lese? Ov hine pošteno hem pouzdano manuš. Odolese, o kralj ćhivđa le te brinini pe ando oleso ćher. (Uporedin e stihoja ando Nemija 7:2.) Isto ađahar, ov hine hrabro, a odija osobina but valjanđa lese. O Avdija živinđa ked vladinđa o kralj Ahav, kova „ćerđa okova so hine lošno anglo Jehovase jaćha hem hine pana pološno ando sa okola kola hine angleder oleste“ (1. Kralj. 16:30). Isto ađahar, e Ahavesi romni, i Jezavelja, služinđa e hovavne devlese, e Valese. Odolese, oj mrzinđa e Jehova hem manglja te ćhinavi sa e manušen ando severno kraljevstvo te služinen lese. Čak mudarđa bute prorokonen (1. Kralj. 18:4). Sigurno e Avdijase na hine lokho te služini e Jehovase ko odova vreme.

10. Sar o Avdija mothovđa so hine but hrabro?

¹⁰ Sar o Avdija mothovđa so hine but hrabro? Ked i Jezavelja manglja te mudari e Devlese prorokonen, o Avdija garavđa 100 prorokonen hem ćhivđa len ko duj pećine, ki „svako po 50 hem anđa lenđe maro hem pani“ (1. Kralj. 18:13, 14). Ako bi e Jezavelja đanela so o Avdija ćerđa, oj bi mudari le. Naravno, o Avdija verovatno darandilo sose na manglja te merel. Ama, ov pobuter manglja e Jehova hem e manušen kola služinđe lese nego po životi.

11. Sar tane e Jehovase sluge avdije sar o Avdija? (Dikh i slika.)

¹¹ Avdije, but ando Jehovase svedokija živinena ko phuvja kuri tane amare aktivnostija zabranime. On mothovena soj tane podložna e vlastenđe, ama sar o Avdija, na ćhinavena te služinen e Jehovase (Mat. 22:21). Odola phralja mothovena strahopoštovanje premalo Jehova, ađahar so šunena e Devle, a na e manušen (Dela 5:29). Odolese hem ponodri propovedinena i šukar vest hem garavindoj ćedena pe (Mat. 10:16, 28).  Isto ađahar, on trudinena pe o phralja hem o phenja te ovel len dovoljno duhovno hrana. Te dikha o primer ando Anri kova živini ki jekh afričko phuv ki koja jekh vreme amare aktivnostija hine zabranime. Đi trajinđa i zabrana, o Anri manglja te pomožini te igari pe i duhovno hrana e phralenđe hem e phenjenđe. Ov pisini: „Me hijum but lađutno. Odolese hijum uverimo so o strahopoštovanje premalo Devel pomožinđa man te ovav hrabro.“ Da li hem tu šaj te ove hrabro sar o Anri? Naravno so šaj. Ama, samo ako isi tut strahopoštovanje premalo Jehova.

12. Sar o prvosveštenik o Jodaj hem olesi romni mothovđe so hine verna e Jehovase?

¹² O prvosveštenik o Jodaj hine le strahopoštovanje premalo Jehova. Odova podstakninđa le te ovel lese verno hem te ohrabrini averen te služinen e Jehovase. Odova dićhilo ked e Jezaveljaki ćhaj, i Gotolija, ćhivđa kokri pes te vladini ki Juda. O manuša hine len but razlogija te daran andi Gotolija. Oj hine but lošno hem manglja te ovel kraljica. Odolese pokušinđa te mudari sa pe unukonen te šaj oj te vladini (2. Let. 22:10, 11). Jekh ando odola unukija hine o Joas, kova aćhilo đivdo odolese so e Jodajesi romni, i Josaveta, spasinđa le. Oj hem olako rom garavđe odole ćhave hem brininđe pe olestar. Ađahar neko kotar Davidesi loza hem ponodri šaj hine te ovel kralj. Ko odova vreme, o Jodaj šaj hine le pobuter ando 100 berš. Ama, ov hine verno e Jehovase hem na dozvolinđa i dar andi Gotolija te ćhinavi le te ćerel odova soj tano ispravno (Posl. 29:25).

13. Sar o Jodaj mothovđa soj tano verno e Jehovase ked o Joas hine le efta berš?

¹³ Ked o Joas hine le efta berš, o Jodaj palem mothovđa soj tano verno e Jehovase. Ov ćerđa jekh plan. Ako bi odova plan uspini o Joas, kova hine e Davideso nasledniko, bi ovela kralj. A ako na, o Jodaj šaj hine te našalji po životi. Uzi Jehovasi pomoć, odova plan uspinđa. E Jodajese pomožinđe o poglavarija hem o Levitija hem on ćhivđe e Joase te ovel kralj, a e Gotolija mudarđe (2. Let. 23:1-5, 11, 12, 15; 24:1). O Jodaj palo odova „ćerđa savez maškar o Jehova, o kralj hem o narodo, so on hem ponodri ka oven e Jehovaso narodo“ (2. Kralj. 11:17). Isto ađahar, ov „ćhivđa e manušen te arakhen o udara ko Jehovaso ćher, te ne bi khuvela niko ko hine nečisto sebepi diso“ (2. Let. 23:19).

14. Sar o Jehova mothovđa čast e Jodajese?

¹⁴ O Jehova phenđa: „Me ka mothovav čast okolenđe, kola maje mothovena čast.“ O Jehova but blagoslovinđa e Jodaje (1. Sam. 2:30). Na primer, o Jehova dinđa ki Biblija te pisini pe odova so o Jodaj ćerđa, te bi amen sikljovaja diso olestar (Rimlj. 15:4). Ked o Jodaj mulo, ov mothovđa lese posebno čast, ađahar so „parunđe le maškaro kraljija ki Davidesi diz, sose ko Izrael ćerđa odova soj tano šukar, služinđa e ćaćutne Devlese hem brininđa pe ando oleso ćher“ (2. Let. 24:15, 16).

15. So šaj te sikljova kotar izveštaj ando Jodaj? (Dikh i slika.)

¹⁵ O izveštaj ando Jodaj šaj te pomožini amen te mothova pana pobaro strahopoštovanje premalo Jehova. O starešine šaj te oponašinen e Jodajeso primer, ađahar so uvek ka trudinen pe te zaštitinen e phralen hem e phenjen ki skupština (Dela 20:28). O phure šaj te sikljon ando Jodaj so ako isi len strahopoštovanje hem aćhona verna e Jehovase, ov šaj prekalo lende te ispunini pi namera. Ov na mislini so on više na vredinena. O terne šaj te razmislinen odolestar savo o Jehova hine  premalo Jodaj hem te oponašinen le ađahar so ka mothoven poštovanje e phure phralenđe hem e phenjenđe, pogotovo okolenđe kola beršencar služinena e Jehovase (Posl. 16:31). Isto ađahar, sare šaj te sikljova diso kotar poglavarija hem Levitija kola podržinđe e Jodaje. Hajde sare amen verno te podupirina okolen kola predvodinena, ađahar so ka ova lenđe poslušna (Jevr. 13:17).

16. So mothovi so o kralj Joas hine lošno?

¹⁶ O Jodaj pomožinđa e Joasese te ovel šukar manuš (2. Kralj. 12:2). Sebepi odova, đi hine terno akava kralj ćerđa odova soj tano šukar anglo Jehovase jaćha. Ama ked o Jodaj mulo, o Joas počminđa te šunel so vaćerena o knezija kola na služinđe e Jehovase. So hine sebepi odova? Ov hem celo narodo „počminđe te služinen aso obredna deblija hem e idolenđe“ (2. Let. 24:4, 17, 18). Iako o Jehova hine but tužno sebepi odova, „ov bićhalđa lenđe pe prorokonen te podstakninen len te irinen pe olese, ama akala na šunđe len.“ On čak na šunđe ni e Jodajese ćhave, e Zaharija c, kova na samo so hine e Jehovaso proroko hem svešteniko, nego hem e Joaseso rođako. O kralj Joas čak mudarđa e Zaharija, iako olesi porodica spasinđa oleso životi (2. Let. 22:11; 24:19-22).

17. So hine e Joaseja odolese so na hine le strahopoštovanje premalo Jehova?

 ¹⁷ O Joas na hine le strahopoštovanje premalo Jehova hem sebepi odova lošno nakhlja ko životi. O Jehova phenđa: „Okola so lađaćerena man, ka oven lađaćerde“ (1. Sam. 2:30). Jekh tikni sirijsko vojska kasnije porazinđa e Joasese bare vojska hem tegani but raninđe le. Ked i sirijsko vojska đelji pese, e Joase mudarđe olese sluge, odolese so mudarđa e Zaharija. O manuša mislinđe so ov na valjani te ovel parumo uduri kuri parunđe pe o kraljija sose hine but lošno (2. Let. 24:23-25).

18. Premalo Jeremija 17:7, 8 so šaj te ćera te na ova sar o Joas?

¹⁸ So šaj te sikljova ando Joaseso primer? Ov hine sar o kaš kaso koreno na hine hor hem kova zavisinđa ando jekh stubo kova ićerđa le. Ked odova stubo, o Jodaj, mulo hem ked počminđa te phudel i bavlal, avere lafencar ked počminđa o otpadništvo, o Joas pelo sar o kaš kaso koreno na hine hor. Akava poređenje mothovi so amaro strahopoštovanje premalo Jehova na zavisini ando odova da li o phralja ki skupština hem amare ćherutne tane šukar primer amenđe ja na. Ako mangaja te aćhova paše e Jehovaja, valjani te zorjaćera amaro mangipe premalo leste hem te ovel amen pana pobaro poštovanje. Odova šaj te ćera ađahar so redovno ka proučina, hor ka razmislina odolestar so čitinaja hem redovno ka molina amen. (Čitin Jeremija 17:7, 8; Kol. 2:6, 7.)

19. So o Jehova rodela amendar te ćera?

¹⁹ O Jehova na rodela amendar te ćera pobuter nego so amen šaj. Odova so rodela amendar tano pisimo ko Propovednik 12:13. Othe pisini: „Nek ovel tut dar ando ćaćutno Devel hem ićer tut ko olese zapovestija, sose odova tano sa so rodela pe ando manuš.“ I dar ando Devel ka pomožini amen te aćhova lese verna bizo obzir so ka desini pe ki budućnost, isto sar so odova ćerđe o Avdija hem o Jodaj. Ništa na ka rumini amaro amalipe e Jehovaja.