22. ČLANKO PROUČIBASE
Kastar šaj te roda mudrost?
O Jehova dela mudrost (POSL. 2:6)
ĐILI 89 Ćer sa so sikljoveja
SOSTAR KA VAĆERA *
1. Sose sarinenđe valjani mudrost ando Jehova? (Poslovice 4:7)
DA LI nekad valjanđan te ane disavi važno odluka? Tegani sigurno molinđan tut e Devlese asi mudrost (Jak. 1:5). O kralj Solomon pisinđa: „Rode mudrost sose oj tani najvažno ando sa.“ (Čitin Poslovice 4:7.) O Solomon na vaćerđa andi bilo savi mudrost, već andi mudrost koja avela ando Devel (Posl. 2:6). Da li i mudrost koja avela ando Devel šaj avdije te pomožini tuće te ikljove ko krajo te problemencar? Ja, šaj. Odolestar ka vaćera ko akava članko.
2. Kova tano jekh način sar šaj te ova mudra?
2 Jekh način sar šaj te ova mudra tano ako sikljovaja hem primeninaja odova so phenđe duj but mudra manuša. Najangleder, ka dikha savo primer aćhavđa amenđe o Solomon. Ki Biblija pisini: „O Devel e Solomonese dinđa bari mudrost hem razboritost“ (1. Kralj. 4:29). Palo odova, ka dikha kova primer aćhavđa amenđe o Isus. Ov hine najmudro manuš kova živinđa ki phuv (Mat. 12:42). Olestar hine pisimo: „E Jehovaso duho ka ovel upro leste. Odolese ov ka ovel mudro, but šukar ka haljol o buća“ (Is. 11:2).
3. Sostar ka vaćera ko akava članko?
3 O Devel e Isusese hem e Solomonese dinđa bari mudrost. Odolese, on šaj hine te den amen but mudra savetija aso buća kola tane važna ko amaro životi. Ko akava članko ka vaćera ando trin buća: sar valjani te dikha ko pare, ki buti hem sar valjani te dikha upro amende.
SAR VALJANI TE DIKHA KO PARE
4. Sar živinđa o Solomon, a sar živinđa o Isus?
4 O Solomon hine but barvalo hem hine le but šužo ćher (1. Kralj. 10:7, 14, 15). Ki aver strana, o Isus na hine le ni po šero kaj te ćhivel (Mat. 8:20). Ama, o solduj hine len ispravno stav premalo materijalna buća odolese so o Jehova dinđa len mudrost.
5. Sar o Solomon dikhlja ko pare?
5 O Solomon phenđa so o pare šaj te „arakhen amen“ (Prop. 7:12). E parencar šaj te ćina odova so valjani amenđe, ama hem odova so mangaja. Kobor god hine barvalo, o Solomon haljilo so o pare nane najvažna. Odolese phenđa: „Pošukar tano te birini pe šukar anav, nego baro barvalipe“ (Posl. 22:1). O Solomon dikhlja so o manuša kola but mangena o pare, but putija nane zadovoljna odoleja so isi len (Prop. 5:10, 12). Ov phenđa so amaro bahtalipe na valjani te zavisini ando odova da li isi amen pare, sose o pare sigate đana (Posl. 23:4, 5).
Da li sebepi amaro stav premalo materijalna buća šaj te ovel amenđe pharo te ćhiva e Jehova ko prvo than? (Dikh o 6. hem o 7. odlomko) *
6. Savo stav hine le o Isus premalo materijalna buća? (Matej 6:31-33)
6 O Isus hine le ispravno stav premalo materijalna buća. Ov uživinđa ko odova te hal hem te pijel pe amalencar (Luka 19:2, 6, 7). Đanaja so oleso prvo čudo hine ked kotar pani ćerđa vino (Jov. 2:10, 11). Ked mulo, odova dive akharđa jekh but skupo fistani (Jov. 19:23, 24). Ama, o Isus na dozvolinđa o materijalna buća te oven lese najvažna ko životi. Ov phenđa pe učenikonenđe: „Nijekh našti te robujini duje gospodarenđe. Našti te robujinen e Devlese hem e barvalipase“ (Mat. 6:24). O Isus sikavđa amen ko prvo than te ćhiva o Kraljevstvo, a o Jehova ka del amen odova so valjani amenđe. (Čitin Matej 6:31-33.)
7. Savo životi hine le jekh phral sose hine le ispravno stav premalo pare?
7 But phralja hem phenja hine len bare blagoslovija sose o pare na hine lenđe ko prvo than. Te dikha o primer ando amaro phral kova vićini pe Daniel. Ov phenela: „Pana ked hijum le terno, najvažno hine maje te služinav e Jehovase.“ Ov hine le skromno životi, odolese šaj hine te ćerel but buća ki Jehovasi organizacija. Ov pana phenela: „Me na kajinava man sebepi odova savo životi birinđum. Šaj hine te birinav te oven man but pare, ama da li tegani bi ovena man amala kola isi man akana? Da li bi ovava pobahtalo ked na bi dava e Jehovase mo najšukar? Nane pare kola šaj te zameninen o blagoslovija kola o Jehova dinđa man.“ Ako hem amenđe tano najvažno te služina e Jehovase, ov ka del amen bare blagoslovija.
SAR VALJANI TE DIKHA KI BUTI?
8. Sar đanaja so o Solomon hine le ispravno stav premali buti? (Propovednik 5:18, 19)
8 O Solomon phenđa so i buti šaj te anel bahtalipe. Odolese phenđa so i buti tani „poklon ando Devel.“ (Čitin Propovednik 5:18, 19.) Isto ađahar, phenđa: „Kotar svako trud isi disavi korist“ (Posl. 14:23). Ov đanđa so akava tano ćaće sose hine but bućarno manuš. Ov ćerđa ćhera, bašte, bazenija, sadinđa vinogradija hem gradinđa dizja (1. Kralj. 9:19; Prop. 2:4-6). Akija hine phari buti hem ov hine zadovoljno odoleja so ćerđa. Ama, đanđa so ako mangela ćaće te ovel bahtalo, valjani te ćerel diso pobuter. Ov ćerđa but buća e Jehovase. Na primer, nadgledinđa e manušen đi ćerđe e Jehovaso hram aso kova valjanđa lenđe efta berš (1. Kralj. 6:38; 9:1). Ama, palo sa akala buća kola ćerđa, ov haljilo so i najvažno buti tani te služini e Jehovase. Ov phenđa: „Odolese, so šaj te phena ko krajo? Nek ovel tut dar ando ćaćutno Devel hem ićer tut ko olese zapovestija“ (Prop. 12:13).
9. Sar o Isus mothovđa so hine le ispravno stav premali buti?
9 O Isus hine but bućarno manuš. Ked hine terno, ov ćerđa buti sar tesari (Mar. 6:3). Olese roditeljija na hine barvale. Odolese sigurno but ceninđe so o Isus pomožinđa lenđe. Sebepi so hine savršeno manuš, ov but šukar ćerđa pi buti hem e manušenđe sviđinđa pe odova so ćerđa. Sa akava mothovi amenđe so o Isus uživinđa ki pi buti. Ama, iako ćerđa but buti, ov ipak odvojinđa vreme e Jehovase (Jov. 7:15). Kasnije, ked počminđa te propovedini, ov phenđa e manušenđe: „Ma ćeren buti aso habe kova ruminđola, nego aso habe kova na ruminđola hem anela večno životi“ (Jov. 6:27). Isto ađahar, ki Propoved ki gora, phenđa: „Ćeden tumenđe o barvalipe ko nebo“ (Mat. 6:20).
Sar šaj te pazina ko odova i buti te na lel amaro vreme kova valjani te da e Jehovase? (Dikh o 10. hem o 11. odlomko) *
10. Kova problemi šaj te ovel amen ako šukar đala amenđe i buti?
10 Ked ićeraja amen ko Jehovase mudra savetija, tegani šaj te ovel amen ispravno stav premali buti. Amen sikljovaja so valjani te ova „bućarne hem poštena“ ki amari buti (Ef. 4:28). Amaro šef šaj te phenel amenđe so hijam, bućarne hem so but cenini amaro trud. Odolese, disavo puti šaj te razmislina so valjani te ćera pobuter te šaj te da šukar svedočanstvo. Ama ako ka ćera odova, tegani na ka ovel amen vreme amare porodicaće hem e Jehovase. Odolese tano but važno te razmislina sar šaj te arakha vreme aso najvažna buća.
11. Sar jekh phral sikljilo te ovel le ispravno stav premali buti?
11 Jekh amaro phral kova vićini pe Vilijam sikljilo sar valjani te dikhel ki buti. Đi ćerđa buti jekhe starešinaja, but pomožinđa le sar odova starešina dikhlja ki buti. O Vilijam phenela: „Akava phral tano but šukar primer sose isi le ispravno stav premali buti. Ov tano but bućarno hem o manuša kolencar ćerela buti ćaće ceninena le sose šukar ćerela pi buti. Ama, ko krajo ando dive, ov više na razmislini andi buti, već po vreme dela pe porodicaće hem e Jehovase. Hem đanena so, ov tano jekh ando najbahtale manuša kolen penđarava.“ *
SAR VALJANI TE DIKHA UPRO AMENDE?
12. Sar o Solomon ko početko mothovđa so hine ponizno manuš, ama so ulo ko krajo?
12 O Solomon hine ponizno sa đi hine verno e Devlese. Ked hine terno, ov đanđa so šaj te ćerel, a so našti hem pućlja e Jehova te pomožini lese (1. Kralj. 3:7-9). Ked počminđa te vladini, ov đanđa kobor tano opasno ked neko tano ponosno. Odolese phenđa: „O ponos avela angleder i propast, hem i oholost avela angleder te pere“ (Posl. 16:18). Ama, ko krajo o Solomon na ićerđa pe ko odova so pisinđa. Sar đelo o vreme, ov ulo ponosno hem na manglja te šunel e Devlese zapovestija. Na primer, jekh ando zapovestija ko kola o izraelsko kralj valjanđa te ićeri pe hine te „na ovel le but romnja, te na đal oleso vilo ko pogrešno drumo“ (Pon. zak. 17:17). O Solomon na šunđa akija zapovest. Ov hine le 700 romnja hem 300 inoče. But ando odola romnja na služinđe e Jehovase (1. Kralj. 11:1-3). Šaj o Solomon mislinđa so odova na ka ćerel lese problemi. Ama, sar đelo o vreme, sa odova cidinđa le ando Jehova (1. Kralj. 11:9-13).
13. So šaj te sikljova ando odova so o Isus hine ponizno?
13 O Isus mothovđa soj tano ponizno manuš. Angleder te avel ki phuv, ov pe Dadeja ćerđa but buća. Ki Biblija pisini so prekalo oleste „sa avera buća hine stvorime, sa soj tano ko nebo hem sa soj tano ki phuv“ (Kol. 1:16). Ked alo ki phuv hem ked krstinđa pe, ov setinđa pe ko sa odova so ćerđa đi hine ko nebo (Mat. 3:16; Jov. 17:5). Ama, ov na dozvolinđa sebepi odova te ovel ponosno. Iako đanđa but buća, ov na mislinđa soj tano pošukar averendar. O Isus phenđa pe učenikonenđe so „na alo te služinen lese, nego alo te služini hem te del po đivdipe sar otkupnina butenđe“ (Mat. 20:28). Isto ađahar, ov hine but skromno manuš. Odolese hem phenđa so na ćerela ništa kokri pestar (Jov. 5:19). Ćaće, ov hine but ponizno hem amen šaj but te sikljova olestar.
14. So o Isus sikavđa amen ando odova sar valjani te dikha upro amende?
14 O Isus sikavđa pe učenikonen sar valjani te dikhen upro peste. Ov phenđa lenđe: „A tumenđe tane hem sa o bala ko šero đende“ (Mat. 10:30). Akava stih tano but utešno, pogotovo ako mislinaja so ništa na vredinaja. O Jehova brinini pe amendar hem amen hijam but vredna anglo olese jaćha. Ako o Jehova mislini so hijam dostojna akana te služina lese hem ki budućnost te ova ko raj, tegani ko hijam amen te phena e Jehovase so nane u pravu.
So šaj te našala ako razmislinaja samo amendar? (Dikh o 15. odlomko) *
15. (a) So pisinđa ki jekh Stražarsko kula ando odova sar valjani te dikha upro amende? (b) Sar soj tano mothovdo ki slika ki 24. strana, so šaj te našala ako razmislinaja samo amendar?
15 Angleder 15 berš, ki Stražarsko kula pisinđa so valjani te pazina ko odova sar dikhaja upro amende. Odothe pisini: „Amen na valjani te ovel amen baro mišljenje amendar sose tegani šaj te ova ponosna. Ama, na valjani ni te mislina so ništa na vredinaja. Odolese, valjani te ovel amen ispravno mišljenje amendar, te ova svesna so šaj te ćera, a so našti. Jekh phen phenđa: ’Na hijum ni najlošno manuš ko sveto, ama ni najšukar manuš. Isi man me lošna strane hem me šukar strane.‘“ * Ćaće, valjani te pazina sar dikhaja upro amende.
16. Sose o Jehova dela amen mudra savetija?
16 Prekalo po Lafi, o Jehova dela amen but mudra savetija (Is. 48:17, 18). Ov ćerela odova odolese so mangela amen hem mangela te ova bahtale. Ko akava članko dikhljam so ked o manuša ćhivena o pare, i buti hem kokri pes ko prvo than, isi len but problemija. Odolese, valjani te da sa amendar te šuna o mudra savetija kola dobinaja ando Jehova hem te radujina oleso vilo (Posl. 23:15).
ĐILI 94 Zahvalna so isi amen e Devleso Lafi
^ O Solomon hem o Isus mothovđe so hine len mudrost koja avela ando Devel. Ko akava članko ka dikha sar šaj ispravno te dikha ko pare, ki buti hem ko odova sar razmislinaja amendar. O savetija kolendar o Isus hem o Solomon vaćerđe, šaj but te pomožinen amen avdije. Isto ađahar, ka dikha sar bute phralenđe hem phenjenđe pomožinđa odova so ićerđe pe ko odola savetija.
^ Dikh o članko „Pronaći zadovoljstvo u napornom radu“ ki Stražarsko kula kotar 1. februar 2015. berš ki srpsko ćhib.
^ Dikh o članko „Biblija vam može pomoći da pronađete radost“ ki Stražarsko kula kotar 1. avgust 2005. berš, ki srpsko ćhib.
^ SO DIKHAJA KO SLIKE: O Džon hem o Tom tane duj terne phralja kola tane ki isto skupština. E Džonese but vreme đala ko odova te brinini pe ando pe vorda. O Tom koristini pe vorda te vozini e phralen hem e phenjen ko sastankija hem ki služba.
^ SO DIKHAJA KO SLIKE: O Džon ćerela prekovremeno buti. Ov na mangela te razočarini pe šefe. Ked god oleso šefi pućela le te ćerel prekovremeno, ov ćerela odova. Odija isto rat, o Tom odolese so služini sar sluga pomoćnik, đelo jekhe starešinaja ki pastirsko poseta. Ov već angleder phenđa pe šefese so nekobor dive ko kurko našti te ćerel prekovremeno sose odova vreme mangela te del e Jehovase.
^ SO DIKHAJA KO SLIKE: O Džon mislini samo upro peste. O Tom ćhivđa e Jehova ko prvo than. Odolese đelo te pomožini te renovirini pe i kongresno dvorana hem uduri arakhlja pese but amala.
