1. So i knjiga Otkrivenje mothovi ando Devleso narodo?

 I KNJIGA Otkrivenje mothovi so ko nebo vladini e Devleso Kraljevstvo hem so o Satana tano fordimo kotar nebo (Otkr. 12:1-9). Odova anđa mir ko nebo, ama bare pharipa e manušenđe ki phuv. Sose? Odolese soj tano o Satana holjamo hem napadini okolen kola verno služinena e Jehovase ki phuv (Otkr. 12:12, 15, 17).

2. So ka pomožini amen te aćhova verna e Jehovase?

² Sar šaj te aćhova verna e Jehovase, iako o Satana napadini amen? (Otkr. 13:10). Šaj te pomožini amen odova so đanaja so ka ovel ki budućnost. Na primer, ko Otkrivenje o apostol Jovan pisinđa kola blagoslovija pana hari ka oven amen. Jekh ando odola blagoslovija tano so e Devlese dušmanija ka oven uništime. Akana ka dikha so i knjiga Otkrivenje vaćeri olendar hem so pana hari ka ovel olencar.

3. Sar tane e Devlese dušmanja mothovde ki knjiga Otkrivenje?

³ Pana ko početko ki knjiga Otkrivenje pisini so odova so odothe čitinaja tano mothovdo ko „znakija“ ja te phena ko simbolično način (Otkr. 1:1). Odothe pisini ando nekobor zverija kola predstavinena e Devlese dušmanen. Na primer, odothe čitinaja „sar ando more ikljola i zver.“ Oj isi la „deš šinga hem efta šere“ (Otkr. 13:1). A jekh aver zver „ikljola andi phuv.“ Oj vaćeri sar zmaj hem mukhela „jag ando nebo“ (Otkr. 13:11-13). Palo odova pisini andi „skerletno zver“ upri koja bešela i bludnica. Akala  trin zverija predstavinena e Devlese dušmanen kola beršencar borinena pe protiv o Devel hem oleso Kraljevstvo. Odolese tano važno te đana koj tane on (Otkr. 17:1, 3).

4-5. Sar odova so pisini ko Danilo 7:15-17 pomožini amenđe te haljova kas predstavinena o zverija hem i bludnica ando Otkrivenje?

⁴ Angleder so ka dikha koj tane odola dušmanija, amen valjani te haljova kas predstavinena o zverija hem i bludnica. Najšukar način te haljova odova tano te mukha kokri i Biblija te objasnini amenđe. But simbolična buća andi knjiga Otkrivenje tane već objasnime ko avera knjige andi Biblija. Na primer, o prorok Danilo dikhlja ko suno so „o štar bare zverija ikljilje ando more“ (Dan. 7:1-3). Ov pisinđa so odola bare zverija predstavinena štar „kraljija“ ili vladavine. (Čitin Danilo 7:15-17.) Akava jasno objašnjenje pomožini amen te haljova so o zverija kola pominena pe ko Otkrivenje predstavinena o politička sile.

⁵ Akana ka dikha disave simbolična buća kolendar vaćeri pe ko Otkrivenje. Isto ađahar, ka dikha sar i Biblija pomožini amen te haljova so značinena odola buća. Najangleder, ka dikha kas o zverija predstavinena. Palo odova, ka dikha so ka ovel olencar. Hem ko krajo, ka vaćera so odova značini amenđe.

6. So predstavini i zver koja isi la efta šere ando Otkrivenje 13:1-4?

⁶ Koj tani i zver koja isi la efta šere? (Čitin Otkrivenje 13:1-4.) Dikhljam so akija zver izgledini sar leopard, ama isi la pre sar medved hem muj sar lav, hem isi la deš šinga. O štar zverija ando kola vaćeri pe ko Danilo 7. poglavlje isto isi len akala karakteristike. Ama, ki knjiga Otkrivenje sa akala karakteristike isi la jekh zver. Odova značini so akija zver na predstavini samo jekh vladavina ili svetsko carstvo. O Jovan vaćerđa so oj vladini „upro sa o plemenija, narodija, ćhibja hem nacije.“ Odolese bi valjani te ovel pobari andi bilo koja aver vlast (Otkr. 13:7). Akija zver predstavini sa o politička sile kola vladinđe upro manuša đi akana * (Prop. 8:9).

7. So predstavini svako šero andi zver?

⁷ So predstavini svako šero andi zver? O odgovor arakhaja ko Otkrivenje 17. poglavlje sose othe pisini sar izgledini „o kip andi zver“ koja pomini pe ko 13. poglavlje ando Otkrivenje. Ko Otkrivenje 17:10 pisini: „On predstavinena o efta kraljija: panđ olendar pelje, jekh vladini, a aver pana na alo, ama ked ka avel, ka aćhol kratko.“ Ando sa o politička sile kola o Beng koristinđa, efta hine uporedime sar „šere“ sose hine len but bari moć. Odola svetska sile but utičinđe upro e Devleso narodo. Ked o apostol Jovan hine đivdo, panđ olendar već vladinđe. Odola hine o Egipat, i Asirija, o Vavilon, i Medo-Persija hem i Grčka. I šovto svetsko sila, o Rim, pana vladinđa ked o Jovan dobinđa i vizija. Ama, ko ka ovel i eftato svetsko sila?

8. Ko predstavini o eftato šero andi zver?

⁸ Akana ka dikha sar o proročanstvija andi knjiga Danilo pomožinena amen te  haljova ko predstavini o eftato šero andi zver. Koja svetsko sila vladini ko vreme ando krajo, ko „Gospodeso dive“? (Otkr. 1:10). Odija sila predstavinena duj države, i Veliko Britanija hem i Amerika, avere lafencar i angloameričko svetsko sila. Odolese šaj te phena so odija sila tani o eftato šero andi zver kolatar vaćeri pe ko Otkrivenje 13:1-4.

9. Kas predstavini i zver koja isi la „duj šinga sar bakro“?

⁹ Ko Otkrivenje 13. poglavlje dikhaja so o eftato šero andi zver, i angloameričko svetsko sila, tani sar i zver koja isi la „duj šinga sar bakro, ama vaćerđa sar zmaj.“ Akija zver ćerela „bare čudija“, čak mukhela „i jag ando nebo ki phuv anglo sa o manuša“ (Otkr. 13:11-15). Ko Otkrivenje ko 16. hem ko 19. poglavlje pisini so akija zver tani „o hovavno prorok“ (Otkr. 16:13; 19:20). O Danilo pomini diso slično, a odova tano so i angloameričko svetsko sila „ka uništini odobor but buća so o manuša ka čudinen pe“ (Dan. 8:19, 23, 24). Baš odova desinđa pe ko Dujto svetsko rat. O duj atomska bombe kola hine fordime utičinđe ko odova te završini pe o maribe ko Tiho okeani. Odola atomska bombe ćerđe o naučnikija andi Britanija hem Amerika. Odoleja so ćerđe akala bombe i angloameričko svetsko sila u stvari „mukhlja i jag ando nebo ki phuv.“

10. Kas predstavini o „kip andi zver“? (Otkrivenje 13:14, 15; 17:3, 8, 11)

¹⁰ Akana ka vaćera andi aver zver. Oj izgledini skoro isto sar i zver koja isi la efta šere, samo so akija zver isi la skerletno (loli) boja. Oj vićini pe „kip andi zver“ hem olatar vaćeri pe sar ando „oftoto kralj.“ * (Čitin Otkrivenje 13:14, 15; 17:3, 8, 11.) Odova „kralj“ pojavinđa pe jekh vreme, palo odova više na hine, a kasnije palem pojavinđa pe. Akava ispuninđa pe upro Ujedinjena nacije, i organizacija koja podupirini o političko sistemi. Oj prvo pojavinđa pe sar Društvo naroda. Palo odova prestajinđa te postojini đi trajinđa o Dujto svetsko rat. Ama, kasnije palem pojavinđa pe sar Ujedinjena nacije.

11. So ćerena o zverija kola predstavinena o politička vlastija hem sose na valjani te dara olendar?

¹¹ Prekali propaganda, o zverija kola predstavinena o politička vlastija, ka ćhiven e manušen te protivinen pe e Jehovase hem olese narodose. O Jovan phenđa so odova ka ovel sar ka phene on „đana ko kraljija ando celo sveto“ te ćeden len aso maribe kova vićini pe Armagedon, o „baro dive ando Svemoćno Devel“ (Otkr. 16:13, 14, 16). Ama, amen nane amen sostar te dara. Amaro baro Devel, o Jehova ka reagujini sigate hem ka spasini okolen kola podupirinena olesi vlast (Jezek. 38:21-23).

12. Savo ka ovel o kraj ando zverija?

¹² Savo ka ovel o kraj ando zverija? Ko Otkrivenje 19:20 pisini: „I zver hine astardi, a olaja hem o hovavno prorok kova anglo late ćerđa čudesna znakija, kolencar prevarinđa okolen kola priminđe o žig andi zver hem okolen kola klaninđe pe olake kipese. O solduj hine fordime đivde ko jezero andi jag ko kova  thabljola o sumpor.“ Đi pana tane ki vlast, odola e Devlese dušmanija ka oven zauvek uništime.

13. Kola problemija o vlastija ćerena e hrišćanenđe?

¹³ So akava značini amenđe? Sar hrišćanija, amen valjani te ova verna e Devlese hem aso oleso Kraljevstvo (Jov. 18:36). Te šaj te ćera odova, valjani te aćhova neutralna hem te na mešina amen ki politika. Odova šaj te ovel but pharo, odolese so o svetska vlastija rodena amendar te podržina len hem ko lafija hem ko delija. Okola kola podržinena len priminena o žig andi zver (Otkr. 13:16, 17). Ako neko primini akava žig o Jehova na ka prihvatini le hem na ka dobini o večno životi (Otkr. 14:9, 10; 20:4). Odolese tano but važno te aćhova neutralna, iako o vlastija ćhivena amen te podržina len!

14. Premalo Otkrivenje 17:3-5 so o apostol Jovan pana dikhlja?

¹⁴ O apostol Jovan pisinđa so ked dikhlja pana diso ov but čudinđa pe. So dikhlja? Jekha romnja koja bešlja upri jekh ando divlja zverija (Otkr. 17:1, 2, 6). Oj izgledinđa sar i „bari bludnica“ hem olako anav hine „Baro Vavilon“. Oj ćerđa „blud“ e „kraljencar andi phuv.“ (Čitin Otkrivenje 17:3-5.)

15-16. Kas predstavini o „Baro Vavilon“ hem sar đanaja odova?

¹⁵ Koj tano o „Baro Vavilon“? Akija romni našti te predstavini o politička organizacije. Sose? Odolese so ko Otkrivenje pisini so oj hem o politička vođe ćerena blud (Otkr. 18:9). Odova soj tani mothovdi so bešela upri zver značini so mangela te kontrolišini e vladaren. Isto ađahar, oj našti te predstavini ni o trgovačko sistemi, odolese so on na pominena pe zajedno ki Biblija. O trgovačko sistemi ko Otkrivenje tano opisujimo sar „o trgovcija ando celo sveto“ (Otkr. 18:11, 15, 16).

¹⁶ Ki Biblija, o lafi „bludnica“ šaj te odnosini pe upro okola kola phenena so služinena e Devlese, ama učestvujinena ko disave oblikija ando idolopoklonstvo ili ko nesavo aver način ovena amala e svetoja (1. Let. 5:25; Jak. 4:4). Ama, i Biblija phenela so okola so verno služinena e Devlese tane „sar čestito ćhaj“ (2. Kor. 11:2; Otkr. 14:4). O purano Vavilon hine centar andi hovavni religija. Odolese šaj te phena so o Baro Vavilon predstavini sa o hovavne religije. U stvari, ov tano o svetsko carstvo andi hovavni religija (Otkr. 17:5, 18; dikh o članko ko amaro sajt „Šta je Vavilon Veliki?“, ki srpsko ćhib).

17. Savo krajo ka ovel le o Baro Vavilon?

¹⁷ Savo krajo ka ovel le o Baro Vavilon? Ko Otkrivenje 17:16, 17 šaj te arakha o odgovor ko akava pućibe. Odothe pisini: „A o deš šinga kola dikhljan hem i zver, on ka zamrzinen e bludnica hem ka uništinen la hem ka huljaven la nangi. Ka han olako mas hem ka tharen la ki jag. Sose o Devel ko vilo ćhivđa lenđe te ćeren olesi zamisao.“ O Jehova ka ćhivel e narodon te koristinen i skerletno zver, a odija zver tani o Ujedinjena nacije, te napadini o svetsko carstvo andi hovavni religija hem te uništini la (Otkr. 18:21-24).

18. Sar šaj te mothova so na podržinaja odova so i hovavni religija sikavi?

 ¹⁸ So akava značini amenđe? Amen valjani hem ponodri „te služina amare Devlese ko način kova ov smatrini soj tano čisto hem kova nane melalo“ (Jak. 1:27). Amen niked na valjani te mukha o hovavne sikljoviba, o običaja, o proslave, odova sar o manuša dikhena ko moral hem o okultizam te utičini upro amende. Valjani hem ponodri te pomožina e manušenđe te ikljon andi hovavni religija te na bi anglo e Devlese jaćha ovena kriva aso grehija kola oj ćerela (Otkr. 18:4).

19. Koj tano o „baro zmaj kova hine lolo sar jag“?

¹⁹ I knjiga Otkrivenje vaćeri hem ando „baro zmaj kova hine lolo sar jag“ (Otkr. 12:3). Akava zmaj borini pe protiv o Isus hem o anđelija (Otkr. 12:7-9). Isto ađahar, ov napadini e Devlese narodo hem o manušikane vladavine dobinena moć olestar (Otkr. 12:17; 13:4). Ama, koj tano o zmaj? Ov tano „o najpurano sap, kova vićini pe Beng hem Satana“ (Otkr. 12:9; 20:2). Ov bešela palo sa e Jehovase dušmanija.

20. Savo ka ovel o krajo ando zmaj?

²⁰ Savo ka ovel o krajo ando zmaj? Ko Otkrivenje 20:1-3 pisini so jekh anđeo ka fordel e Satana ko bezdan. Odova e Bengese ka ovel samći tano ko phanlipe. Đi ka ovel ko bezdan, o Satana na ka šaj te „prevarini e narodon đi na nakhena 1 000 berš.“ Ko krajo, o Beng hem olese demonija ka oven „fordime ko jezero andi jag hem ando sumpor.“ Odova značini so on zauvek ka oven uništime (Otkr. 20:10). Zamislin o sveto kuri na ka oven o Satana hem olese demonija. Odova ka ovel but šužo vreme!

21. Sose šaj te ova bahtale sebepi odova so pisini ki knjiga Otkrivenje?

²¹ Ćaće hijam bahtale so šaj te haljova o buća ando kola vaćeri pe ki knjiga Otkrivenje. Amen dikhljam kola tane e Jehovase dušmanija hem so ka ovel olencar. Ko Devleso Lafi pisini: „Bahtalo tano okova kova čitini hem okola kola šunena o lafija kotar akava proročanstvo“ (Otkr. 1:3). Save blagoslovija ka ovel len e Jehovase sluge ked e Devlese dušmanija ka oven uništime? Odolestar ka vaćera ko aver članko.