1. Koja važno odluka sa o manuša valjani te anen?

 O MANUŠA avdije valjani te anen jekh važno odluka. Valjani te birinen da li ka služinen e pravo Devlese ili ka oven ki strana ando e Devleso najbaro dušmani, o Beng. Našti te phenen so nane ki nikasi strana. Olengi budućnost ka zavisini ando odova savi odluka ka anen (Mat. 25:31-33, 46). Ki „bari nevolja“, on ka oven obeležime te preživinen ili te oven uništime (Otkr. 7:14; 14:9-11; Jezek. 9:4, 6).

2. (a) Premalo Jevrejima 10:35-39, so hijam podstaknime te ćera? (b) Sar šaj i knjiga Otkrivenje te pomožini amen?

² Čitin Jevrejima 10:35-39. Ako odlučinđan te služine e Devlese, but šukar ćerđan. Odolese akana sigurno mangeja te pomožine hem averenđe te anen asavki odluka. Odova so pisini ki knjiga Otkrivenje šaj but te pomožini tut. Koro late pisini so ka ovel okolencar kola šunena e Devle hem okolencar kola na mangena te šunen le. Šukar tano te đana so pisini ki akija knjiga sose odova ka del amen snaga hem ponodri te služina e Jehovase. Odova so sikljiljam andi akija knjiga šaj te koristina te šaj te pomožina averenđe te služinen e Devlese.

3. Sostar ka vaćera ko akava članko?

³ Ko akava članko ka dobina odgovor ko akala pućiba: So ka ovel okolencar kola birinena o Jehova te ovel olengo vladari? So ka ovel okolencar kola podržinena  i skerletno zver, kolatar vaćeri pe ki knjiga Otkrivenje?

4. Kas o apostol Jovan dikhlja e Isuseja ko nebo?

⁴ O apostol Jovan ki vizija dikhlja duj grupe ando manuša kola tane ki Jehovasi strana hem dobinena večna blagoslovija. Ki prvo grupa hine 144 000 manuša (Otkr. 7:4). On hine lende andi phuv te vladinen e Isuseja ko nebo (Otkr. 5:9, 10; 14:3, 4). Isto ađahar, o Jovan ki vizija dikhlja sar terđona e Isuseja ki nebesko gora Sion (Otkr. 14:1).

5. So pana hari ka ovel e pomazanikonencar kola tane pana ki phuv?

⁵ Pana kotar prvo veko, hiljade manuša hine birime te oven deo ando 144 000 (Luka 12:32; Rimlj. 8:17). Ama, e Jovanese hine phendo so samo jekh tikno broj ando pomazanikija ka oven đivde ko poslednja dive. On ka dobinen o završno „pečati“ angleder so ka počmini i bari nevolja (Otkr. 7:2, 3; 12:17). Đi trajini i bari nevolja, on ka oven lende ko nebo te oven avere pomazanikonencar hem te vladinen e Isuseja ko Devleso Kraljevstvo (Mat. 24:31; Otkr. 5:9, 10).

6-7. (a) Koja grupa o Jovan dikhlja hem so phenđa olatar? (b) Sose o pomazanikija hem o „baro mnoštvo“ valjani te đanen so pisini ko 7. poglavlje ko Otkrivenje?

⁶ Palo odova, o Jovan dikhela jekh aver grupa, „o baro mnoštvo“, kole niko našti te đenel (Otkr. 7:9, 10). Aće so o Jovan phenela olendar: „On tane okola so avena andi bari nevolja. On thovđe pe bare fistanja hem parnjaćerđe len ko Bakreso rat“ (Otkr. 7:14). Palo odova so ka preživinen i bari nevolja, o baro mnoštvo ka živini večno ki phuv hem ka ovel le bare blagoslovija (Ps. 37:9-11, 27-29; Posl. 2:21, 22; Otkr. 7:16, 17).

⁷ Šaj li te zamisline so tu hijan deo ando sa akava so čitinaja ko 7. poglavlje ko Otkrivenje? Pana hari ađićeri amen but šužo vreme, bizo obzir da li ka živina ko nebo ja ki phuv. Odolese so birinđam te ova ki Jehovasi strana, ka ovel amen but blagoslovija. So pana vaćeri amenđe i knjiga Otkrivenje andi bari nevolja? (Mat. 24:21).

8. Ked ka počmini i bari nevolja hem sar but manuša ka reagujinen?

⁸ Sar so dikhljam ko okova članko, o politička elementija ando akava sveto pana hari ka napadinen o Baro Vavilon, i hovavni religija (Otkr. 17:16, 17). Tegani, ka počmini i bari nevolja. Da li ko odova vreme but manuša ka počminen te služinen e Jehovase? Na. Umesto odova, ko 6. poglavlje ko Otkrivenje pisini so o manuša kola na služinena e Jehovase ka roden pomoć ando političko hem trgovačko sistemi kova tano uporedimo e planinencar. Odolese so odola manuša na ka podržinen e Devleso Kraljevstvo, o Jehova upro lende ka dikhel sar upro pe dušmanija (Luka 11:23; Otkr. 6:15-17).

9. Sar e Jehovaso narodo ki bari nevolja ka ovel averćhane ando avera hem so ka ovel sebepi odova?

⁹ Ki bari nevolja, e Jehovase verna sluge ka oven averćhane ando avera.  Sose? Odolese so jedino on ka služinen e Jehovase hem na ka podržinen i „zver“ (Otkr. 13:14-17). Odova so ka aćhon verna e Jehovase, but ka holjanćeri olese dušmanen. Sebepi odova, i koalicija ando narodija ka napadini e Devlese narodo ki celo phuv. Ki Biblija odova napad vićini pe napad kotar Gog ando Magog (Jezek. 38:14-16).

10. Premalo Otkrivenje 19:19-21, sar o Jehova ka reagujini ked o dušmanija ka napadinen olese narodo?

¹⁰ Sar o Jehova ka reagujini? Ki Biblija pisini so ov but ka holjani (Jezek. 38:18, 21-23). Ko Otkrivenje ko 19. poglavlje pisini so pana ka ovel. O Jehova ka bićhali pe Ćhave te zaštitini olese narodo hem te uništini olenge dušmanen. Oleja ka oven o anđelija hem o 144 000 (Otkr. 17:14; 19:11-15). Ko krajo ando akava maribe, sa o manuša hem o organizacije ka oven uništime. (Čitin Otkrivenje 19:19-21.)

11. Ando kova važno događaj vaćeri i knjiga Otkrivenje?

¹¹ Zamislin sar ka ovel e verno manušenđe ked ka dikhen so e Devlese dušmanija tane uništime. Savi bari radost tegani ka ovel! Iako ka oven bahtale sose o Baro Vavilon ka ovel uništimo, isi pana jekh pobaro razlog asi olengi radost (Otkr. 19:1-3). On ka radujinen pe sebepi jekh važno događaj ando kova vaćeri i knjiga Otkrivenje – „e Bakreso bijav“ (Otkr. 19:6-9).

12. Premalo Otkrivenje 21:1, 2, ked ka ovel e Bakreso bijav?

¹² Ked ka ovel e Bakreso bijav? Hari angleder te počmini o Armagedon sa o pomaznikija ka oven ko nebo. Ama, tegani na ka ovel odova bijav. (Čitin Otkrivenje 21:1, 2.) E Bakreso bijav ka ovel palo Armagedon ked e Devlese dušmanija ka oven uništime (Ps. 45:3, 4, 13-17).

13. So e Bakreso bijav značini e Isusese hem e pomazanikonenđe?

¹³ So e Bakreso bijav značini e Isusese hem e pomazanikonenđe? Sar so jekh romni hem jekh rom ovena jekh ked khuvena ko brak, isto ađahar o Isus hem o pomazanikija ka oven ujedinime palo e Bakreso bijav. Ko odova trenutko, e Devleso Kraljevstvo ka počmini te vladini hem ka trajini 1 000 berš (Otkr. 20:6).

14-15. Sova tane uporedime o 144 000 ko 21. poglavlje ko Otkrivenje? (Dikh i slika ki naslovna strana.)

¹⁴ Ko Otkrivenje ko 21. poglavlje o 144 000 tane uporedime jekha šužja dizja koja vićini pe „Nevo Jerusalim“ (Otkr. 21:2, 9). Odija diz isi la „12 bara ko po temelji“ upro kola tane pisime „o 12 anava ando Bakrese 12 apostolija.“ Sose akava hine važno e Jovanese? Odolese so ko jekh ando odola bara hine pisimo oleso anav. Ćaće odija tani bari čast! (Otkr. 21:10-14; Ef. 2:20).

¹⁵ Nijekh diz nane sar akija diz. Olaki glavno ulica tani ćerdi ando zlato. Isi la 12 udara ando biserija. Olake zidija hem o temelji isi len dijamantija. Olaki  dužina, širina hem visina tane ista (Otkr. 21:15-21). Ama, nešto falinđa laće. Dikh so o Jovan phenela: „Ki diz na dikhljum o hram sose olako hram tano o Jehova, o Devel, o Svemoćno, hem o Bakro. E dizjaće na valjanđe ni o kham ni o mesec te ćeren laće svetlo, sose olako svetlo hine e Devlesi slava, a olaki svetiljka hine o Bakro“ (Otkr. 21:22, 23). Okola kola tane deo ando „Nevo Jerusalim“ ka oven e Jehovaja (Jevr. 7:27; Otkr. 22:3, 4). O Jehova hem o Isus tane o hram ki odija diz.

16. Kola blagoslovija ka ovel len o manuša đi ka trajini i Hiljadaberšengi vladavina?

¹⁶ Ked razmislinena ando Nevo Jerusalim, o pomazanikija oduševinena pe. Ama, hem okola kola ka živinen ki phuv šaj te razmislinen andi odija diz. Đi ka trajini i Hiljadaberšengi vladavina, o Nevo Jerusalim ka anel but bare blagoslovija. O Jovan dikhlja so odola blagoslovija tane sar „i reka kotar pani ando životi.“ Ko solduj strane andi reka hine „o kašta ando životi“ kase listija „koristinđe pe te lečinen pe o narodija“ (Otkr. 22:1, 2). Sa o manuša kola tegani ka živinen ka uživinen ko but šukar buća. Hari po hari o manuša kola ka šunen e Jehova ka oven savršena. Više na ka ovel nabormipe, muke, rojbe ni dukha (Otkr. 21:3-5).

17. Premalo Otkrivenje 20:11-13, ko ka ovel len o blagoslovija ki Hiljadaberšengi vladavina?

¹⁷ Ko ka ovel len akala blagoslovija? Najangleder, o baro mnoštvo kova ka preživini i bari nevolja hem o ćhave kola ka bijanđon ko nevo sveto. Ama, ko 20. poglavlje ko Otkrivenje pisini so ka uskrsninen okola so mulje. (Čitin Otkrivenje 20:11-13.) Ka uskrsninen „o pravednikija“ kola mulje angleder, ama hem o „nepravednikija“ kola na hine len prilika te sikljon ando Jehova (Dela 24:15; Jov. 5:28, 29). Da li akava značini so ki Hiljadaberšengi vladavina sare ka uskrsninen? Na. Okola kola hine lošna hem na manglje te služinen e Jehovase angleder te meren, na ka oven uskrsnime. On hine len prilika,  ama mothovđe so na zaslužinena te živinen ko raj (Mat. 25:46; 2. Sol. 1:9; Otkr. 17:8; 20:15).

18. So ka ovel e manušencar ko krajo ando hiljada berš?

¹⁸ Palo 1 000 berš, sa o manuša kola ka živinen ki phuv ka oven savršena. O greh kova nasledinđam ando Adam, više na ka ovel (Rimlj. 5:12). Isto ađahar, o Jehova ka cidel o prokletstvo ando Adameso greh. Odova značini so sa o manuša kola tegani ka živinen ki phuv ka dobinen pravo životi sose ka oven savršena (Otkr. 20:5).

19. Sose valjani te ovel i završno kušnja?

¹⁹ Amen đanaja so o Isus aćhilo verno e Jehovase ked o Beng iskušinđa le. Ama, da li sa o savršena manuša ka aćhon verna e Jehovase ked o Beng ka iskušini len palo 1 000 berš? Svako amender ka ovel le prilika te mothovi pi poslušnost e Jehovase (Otkr. 20:7). Okola kola ka aćhon lese verna, ka dobinen večno životi hem konačno ka uživinen ki pravo sloboda (Rimlj. 8:21). A okola kola ka pobuninen pe ka oven zauvek uništime zajedno e Bengeja hem olese demonencar (Otkr. 20:8-10).

20. Sar osetineja tut ked razmislineja ando proročanstvija kola pisinena ki knjiga Otkrivenje?

²⁰ Sar osetineja tut ked razmislineja so hem tu učestvujineja ko odova te ispuninen pe disave proročanstvija andi knjiga Otkrivenje? Sigurno mangeja averenđe te vaćere odolestar (Otkr. 22:17). Akana ked dikhljam so ka ovel ki budućnost hem amen šaj te phena odova so o apostol Jovan phenđa: „Amin! Ava, Gospode Isuse!“ (Otkr. 22:20).