1-2. Sar šaj e Pavleso primer te pomožini e starešinenđe?

 O APOSTOL Pavle but manglja pe phralen hem dinđa sa pestar te pomožini lenđe (Dela 20:31). Sebepi odova, o phralja hem o phenja but manglje le. Jekh puti, ked o starešine ando Efes šunđe so niked više na ka dikhen le, on „sare but runđe“ (Dela 20:37). Isto ađahar, hem amare bućarne starešine but mangena pe phralen hem pe phenjen hem dena sa pestar te pomožinen len (Fil. 2:16, 17). Ama, podijekh puti e starešinenđe nane lokho te ćeren sa odova so valjani te ćeren. Tegani, so šaj te pomožini lenđe?

² E Pavleso primer šaj but te pomožini len (1. Kor. 11:1). Ov na ćerđa pe so šaj sa te ćerel. O Pavle hine nesavršeno manuš hem disavo puti hine lese pharo te ćerel odova soj tano ispravno (Rimlj. 7:18-20). Isto ađahar, ov hine le hem disave bare problemija. Ama, ov na ćhinavđa sebepi odova te pomožini pe phralenđe hem na našalđa pi radost. Ako o starešine dena sa pestar te oven sar o apostol Pavle, on hem ponodri ka služinen e Jehovase hem ka oven bahtale iako isi len problemija. Akana ka dikha sar šaj te ćeren odova.

3. Sostar ka vaćera ko akava članko hem so pana ka sikljova?

³ Ka akava članko, ka dikha kola štar buća e starešinenđe nane uvek lokho te ćeren: (1) te ovel len dovoljno vreme asi služba hem aso avera odgovornostija, (2) te ovel len dovoljno vreme te ohrabrinen pe phralen, (3) te na oven obeshrabrime sebepi pe mane hem (4) te sarađujinen averencar iako dikhena olenge mane. Ka sikljova so pomožinđa e Pavlese ked na hine lese lokho te ćerel odola buća hem sar šaj o starešine te oven sar oleste.

4. Sose e starešinenđe šaj te ovel pharo te ovel len dovoljno vreme asi služba?

⁴ Sose odova šaj te ovel pharo? Uzo odova so propovedinena, o starešine isi len hem but avera odgovornostija. Na primer, but olendar tane predsedavajućija ko sastanko ko radno dive hem vodinena e Skupštinako proučibe andi Biblija. Isto ađahar, on isi len hem avera govorija. On sikavena e phralen kola služinena sar sluge pomoćnikija sar te ćeren disave buća ki skupština hem hrabrinena pe phralen hem pe phenjen (1. Petr. 5:2). Isto ađahar, ked valjani te gradinen pe ja te popravinen pe amare dvorane ja avera objektija, amare starešine tane odothe te pomožinen. Ama, i najvažno buti koja o starešine ćerena tani te propovedinen i šukar vest, sar sa avera objaviteljija (Mat. 28:19, 20).

5. Savo primer aćhavđa o apostol Pavle?

⁵ So ćerđa o apostol Pavle? Ko Filipljanima 1:10 pisini: „Ćeren o buća kola tane ćaće važna.“ O apostol Pavle kokri ićerđa pe ko odova savet hem odolese hine šukar ki služba. Ov dobinđa zadatko te propovedini hem beršencar odova hine lese ko prvo than. O Pavle propovedinđa „javno hem kotar ćher ko ćher“ (Dela 20:20). Ov na propovedinđa samo nekobor satija ko dive ja samo jekhvar ko kurko, već koristinđa svako prilika te propovedini! Na primer, đi ađićerđa disave phralen ki Atina, ov propovedinđa disave bare manušenđe kola šukar reagujinđe (Dela 17:16, 17, 34). Čak ked hine phanlo, o Pavle propovedinđa e manušenđe kola hine odothe (Fil. 1:13, 14; Dela 28:16-24).

6. So o Pavle sikavđa averen te ćeren?

⁶ O apostol Pavle koristinđa po vreme ko najšukar način. But putija vićinđa averen te đan oleja ki služba. Na primer, ko po prvo misionarsko putovanje lelja peja e Marko, a ko dujto e Timoteje (Dela 12:25; 16:1-4). Sigurno o Pavle dinđa po najšukar te sikavi len sar te organizujinen o buća ki skupština, sar te brininen pe ando phralja hem phenja hem sar te oven pana pošukar učiteljija (1. Kor. 4:17).

7. Sar šaj o starešine te ićeren pe ko savet kova pisini ko Efešanima 6:14, 15?

⁷ So sikljovaja? O starešine šaj te oven sar o apostol Pavle na samo ked propovedinena kotar ćher ko ćher, već hem ked koristinena svako prilika te propovedinen. (Čitin Efešanima 6:14, 15.) Na primer, on šaj te svedočinen ked đana te pazarinen ja ked tane ki buti. Ja ked pomožinena te gradinen pe amare dvorane,  šaj te propovedinen e komšijenđe ja e manušenđe kolendar ćinena o materijali. Sar o Pavle, ked tane ki služba o starešine šaj te koristinen po vreme te sikaven averen hem e phralen kola služinena sar sluge pomoćnikija sar šaj pana pošukar te propovedinen hem te oven pana pošukar učiteljija.

8. So o starešine disavo puti valjani te ćeren?

⁸ O starešine niked na valjani te prihvatinen odobor odgovornostija ki skupština ja ki pokrajina hem sebepi odova te na ovel len vreme asi služba. Te šaj te ovel len vreme aso sa o buća, podijekh puti on valjani te đanen ked na valjani te prihvatinen disave odgovornostija. Ako razmislinena hem molinena pe, šaj ka haljon so ako ka prihvatinen disave odgovornostija na ka ovel len vreme aso najvažna buća, sar soj tane te ovel len porodično proučibe, redovno te propovedinen hem te sikaven pe ćhaven sar te propovedinen. Disavenđe tano pharo te odbinen disave odgovornostija, ama on šaj te oven sigurna so o Jehova haljola so on mangena te ćeren pe odgovornostija najšukar so šaj.

9. Sebepi so o starešine isi len but buća te ćeren, so šaj te ovel lenđe pharo?

⁹ Sose odova šaj te ovel pharo? Amare phralja hem phenja isi len but problemija. Ko akala poslednja dive, sarinenđe valjani ohrabrenje, pomoć hem uteha. Podijekh puti, o starešine valjani te pomožinen disavenđe te na đan ko lošno drumo (1. Sol. 5:14). Naravno, o starešine našti te rešinen sa amare problemija. Ama, o Jehova mangela on te den sa pestar te ohrabrinen hem te arakhen e Devlese narodo. Sar šaj o starešine, kola već isi len but buća te ćeren, te arakhen vreme te pomožinen pe phralenđe hem pe phenjenđe?

10. Premali 1. Solunjanima 2:7, sar o Pavle brininđa pe ando Devleso narodo?

¹⁰ So ćerđa o apostol Pavle? O Pavle uvek hine spremno te pohvalini pe phralen hem te ohrabrini len. Šukar tano o starešine te oven sar ov, te mangen pe phralen hem te oven šukar premalo lende. (Čitin 1. Solunjanima 2:7.) O Pavle pomožinđa pe phralenđe te haljon so o Jehova hem ov mangena len (2. Kor. 2:4; Ef. 2:4, 5). Ov hine olengo amal, družinđa pe olencar hem mothovđa so isi le poverenje ano lende ađahar so phravdo vaćerđa lenđe ando pe brige hem mane (2. Kor. 7:5; 1. Tim. 1:15). Ama, o Pavle na razmislinđa samo ando pe problemija, već manglja te pomožini pe phralenđe.

11. Sose o Pavle dinđa savet e phralenđe hem e phenjenđe?

¹¹ Disavo puti, o Pavle valjanđa te del savet e phralenđe hem e phenjenđe. Ama, niked na ćerđa odova sebepi so hine holjamo  upro lende. Ov dinđa len savet sose brininđa pe olendar hem na manglja te khuven ko problemija. O Pavle dinđa sa pestar avera lokho te haljon oleso savet hem brininđa pe sar odova savet ka utičini upro lende. Na primer, ked pisinđa lil e phralenđe ko Korint, ov dinđa len jekh ozbiljno savet. Palo odova, bićhalđa e Tite koro lende sose manglja te đanel sar reagujinđe ko oleso lil. Kobor samo hine bahtalo ked šunđa so prihvatinđe o savet! (2. Kor. 7:6, 7).

12. Sar šaj o starešine te ohrabrinen pe phralen?

¹² So sikljovaja? O starešine šaj te oven sar o Pavle, ađahar so ka arakhen vreme pe phralenđe. Odova šaj te ćeren ađahar so ka aven porano ki dvorana te šaj te vaćeren olencar hem te ohrabrinen len. But putija, na valjani lenđe but vreme te ohrabrinen nekas (Rimlj. 1:12; Ef. 5:16). O starešina kova trudini pe te ovel sar o Pavle ka koristini e Devleso Lafi te ohrabrini pe phralen hem te uverini len so o Devel mangela len. Isto ađahar, ov mothovi lenđe so mangela len, redovno vaćeri olencar hem dikhela sar šaj te pohvalini len. Ked valjani te del savet, koristini e Devleso Lafi. Ov tano phravdo, ama ljubazno sebepi so brinini pe sar olese lafija ka utičinen upro lende (Gal. 6:1).

13. Sar šaj jekh starešina te osetini pe sebepi pe mane?

¹³ Sose odova šaj te ovel pharo? O starešine nane savršena. Sar sa avera hem on ćerena greške (Rimlj. 3:23). Podijekh puti, olenđe šaj te ovel pharo te dikhen ispravno ko pe mane. Disave starešine šaj odobor te brininen pe sebepi pe mane, so šaj te obeshrabrinen pe. Avera starešine šaj te mislinen so olenge mane nane odobor ozbiljna hem so na valjani te menjinen pe.

14. Premalo Filipljanima 4:13, sar i poniznost pomožinđa e Pavlese ispravno te dikhel ko pe mane?

¹⁴ So ćerđa o apostol Pavle? O Pavle hine ponizno hem đanđa so našti kokri te cidel pe mane. Olese valjanđa e Devlesi pomoć. Angleder, but progoninđa e hrišćanen, ama kasnije haljilo so odova hine pogrešno hem hine spremno te menjini pe (1. Tim. 1:12-16). Uzi Jehovasi pomoć ulo jekh šukar, saosećajno hem ponizno starešina. O Pavle đanđa kola mane isi le, ama na razmislinđa stalno odolestar. Ov verujinđa so o Jehova ka oprostini lese (Rimlj. 7:21-25). O Pavle đanđa so našti te ovel savršeno. Umesto odova, dinđa sa pestar te menjini pe hem hine sigurno so o Jehova ka pomožini lese te ćerel po  zadatko. (1. Kor. 9:27; čitin Filipljanima 4:13.)

15. Sar o starešine valjani te dikhen ko pe mane?

¹⁵ So sikljovaja? O starešine nane naimenujime sebepi soj tane savršena. Ki aver strana, o Jehova očekujini olendar te priznajinen pe greške hem te menjinen pe (Ef. 4:23, 24). Đi proučini e Devleso Lafi, o starešina valjani te dikhel so šaj te menjini koro peste hem te ćerel ko odova. Tegani, ka ovel bahtalo hem o Jehova ka pomožini lese te ovel šukar starešina (Jak. 1:25).

16. So šaj te ovel ako jekh starešina samo dikhela averenge mane?

¹⁶ Sose odova šaj te ovel pharo? Ked o starešine sarađujinena avere phralencar hem phenjencar, lokho šaj te dikhen olenge mane. Ama, ako na pazinena lokho šaj te holjanen, te oven stroga ja te kritikujinen averen. O apostol Pavle upozorinđa e hrišćanen so bi o Beng mangela te oven asavke (2. Kor. 2:10, 11).

17. Sar o Pavle dikhlja upro pe phralja hem phenja?

¹⁷ So ćerđa o apostol Pavle? O Pavle uvek mislinđa najšukar ando pe phralja hem phenja. Ov šukar đanđa kola mane isi len, sose podijekh puti on ćerđe diso so dukhavđa le. Ama, ov đanđa so ako neko grešini, odova na značini soj tano lošno manuš. Ov manglja pe phralen hem razmislinđa ando olenge šukar osobine. Ako olenđe hine pharo te ćeren odova soj tano ispravno, ov uvek verujinđa so on mangena te ćeren odova soj tano šukar, ama samo valjani lenđe pomoć.

18. So sikljoveja odolestar sar o Pavle pomožinđa e Evodijaće hem e Sintihijaće te rešinen po problemi? (Filipljanima 4:1-3)

¹⁸ Te dikha sar o Pavle pomožinđa duje phenjenđe ki skupština ko Filipi. (Čitin Filipljanima 4:1-3.) I Evodija hem i Sintihija hine len disavo problemi maškaro peste hem više na hine amalinja. O Pavle na kritikujinđa len, već razmislinđa ando olenge šukar osobine. On hine verna phenja kola beršencar služinđe e Jehovase. O Pavle đanđa so o Jehova mangela len. Ov mislinđa najšukar olendar hem odova podstakninđa len te rešinen po problemi. Sebepi so o Pavle dikhlja odova soj tano šukar ko avera, ov hine bahtalo hem hine amal averencar ki skupština.

19. (a) So šaj te pomožini e starešinenđe te mislinen najšukar ando pe phralja hem phenja? (b) So šaj te sikljove andi slika ki koja o starešina čistini i dvorana?

¹⁹ So sikljovaja? Starešine, dikhen o šukar osobine kola tumare phralja hem phenja isi len. Svako olendar tano nesavršeno, ama svako olendar isi le hem šukar osobine sebepi kola poštujinaja len (Fil. 2:3). Ćaće tano so o starešine podijekh  puti valjani te den savet jekhe phralese ja jekha phenjaće. Ama, sar o Pavle, on trudinena pe te dikhen so bešela palo nekase lafija hem postupkija. On đanena so odija osoba mangela e Jehova, soj tani verno hem so mangela te ćerel odova soj tano šukar. O starešine kola dikhena odova soj tano šukar ko avera pomožinena e phralenđe hem e phenjenđe te osetinen pe soj tane mangle ki skupština.

20. Sar šaj o starešine hem ponodri te sikljon ando Pavle?

²⁰ Šukar bi ovela o starešine hem ponodri te sikljon ando Pavle. Na primer, ko Indeks publikacija, šaj te arakhe tema „Pavle“ hem palo odova o podnaslov „primer za starešine“. Đi čitineja odova materijali, puć tut: „Sar šaj e Pavleso primer te pomožini man te aćhovav bahtalo đi služinava sar starešina?“

21. Ko so šaj o starešine te oven sigurna?

²¹ Starešine, ma bistren so o Jehova na rodela tumendar te oven savršena, već te oven verna (1. Kor. 4:2). O Jehova hine bahtalo sebepi odova so o Pavle ćerđa hem so hine lese verno. Ov sigurno so o Jehova cenini odova so tu ćereja ki olesi služba. O Jehova niked na ka „bistrel odova so ćerđen hem o mangipe kova mothovđen premalo oleso anav, ađahar so služinđen okolenđe kola tane sveta hem so pana služinena olenđe“ (Jevr. 6:10).