Disave kola sigate čitinena akava izveštaj šaj pućena pe akava. Ama, ko akala stihija pominena pe duj različita manuša kola hine len isto anav, Mefivostej. Akana ka sikljova diso ando akava izveštaj.

O Saul, kova hine kralj ko Izrael hine le efta murša hem duj ćhaja. E Sauleso najphureder ćhavo vićinđa pe Jonatan. O kralj kasnije hine le pana jekh ćhavo kova vićinđa pe Mefivostej. Odole ćhave e Saulese bijanđa olesi inoča, i Resfa. Ama, zanimljivo tano so hem o Jonatan hine le ćhavo kova vićinđa pe Mefivostej. Akana haljovaja so e Sauleso ćhavo hem o unuko akharđe isto anav.

Ko jekh trenutko, o kralj Saul počminđa te mrzini e Gavaoncen kola živinđe maškaro Izraelcija hem manglja sarinen te mudari. Izgleda so but olendar hine mudarde. Odova hine pogrešno. Sose? Odolese so ko vreme ked živinđa o Isus Navin, o izraelska poglavarija ćerđe savez ando mir e manušencar ando Gavaon (Is. Nav. 9:3-27).

Odova savez važinđa hem ko Sauleso vreme. Ama, o kralj ipak dinđa sa pestar te mudari len. Sebepi odova, o Saul hem oleso ćher hine kriva aso odole manušengo rat (2. Sam. 21:1). Palo odova, o David ulo kralj. O Gavaoncija kolen o Saul na mudarđa alje te vaćeren oleja ando odova so ćerđa o Saul. O David pućlja len so šaj te ćerel sebepi odova so o Saul ćerđa hem ađahar te phravel o udara te šaj o Jehova te blagoslovini pe narodo. Umesto te roden pare, o Gavaoncija phenđe so rodena te umlaven pe efta ćhave ando manuš kova manglja te kosel len andi phuv (Br. 35:30, 31). O David ćerđa odova so on rodinđe (2. Sam. 21:2-6).

Ko odova vreme, o Saul hem o Jonatan na hine đivde, ama e Jonataneso ćhavo, o Mefivostej, hine đivdo. Ked hine tikno, ov doživinđa jekh nesreća hem aćhilo invalidi. Odolese, ov na hine maškaro okola kola đelje te mudaren e manušen ando Gavaon. O David ćerđa savez pe amaleja, e Jonataneja, so ka arakhi oleso ćher, a odova značini hem olese ćhave e Mefivosteje (1. Sam. 18:1; 20:42). Ko izveštaj pisini: „Ama, o kralj smilujinđa pe upro Jonataneso ćhavo o Mefivostej, e Sauleso unuko. O David ćerđa odova sose ov hem e Sauleso ćhavo o Jonatan dinđe lafi jekh jekhese anglo Jehova“ (2. Sam. 21:7).

O David ćerđa odova so o Gavaoncija rodinđe. Ov umlavđa e Saulese duje ćhaven, jekh olendar vićinđa pe Mefivostej, a avera panđ hine e Saulese unukija (2. Sam. 21:8, 9). Ađahar o David ćhinavđa o lošna buća kola ulje sebepi odova so o Saul ćerđa.

Akava nane samo diso so ulo beršencar angleder. E Devleso zakon hine jasno. Ko oleso Lafi pisini: „O ćhave ma te oven mudarde sebepi odova so ćerena olenge dada“ (Pon. zak. 24:16). Ako e Saulese duj ćhave hem panđ unukija na bi ovena kriva, o Jehova na bi mukhela te desini pe lenđe odova. Ko Zakon pana pisinđa: „O manuš nek ovel mudardo samo sebepi poklo greh.“ Izgleda so e Saulese efta potomkija ko disavo način učestvujinđe ko odova so o Saul ćerđa e Gavaoncenđe. Sebepi odova, on platinđe i kazna aso odova so ćerđe.

Ando akava izveštaj sikljovaja so o manuš kova ćerela diso soj tano pogrešno našti te opravdini kokri pes hem te phenel so ov samo ćerela odova so avera phenena lese. Jekh poslovica phenela: „Šukar dikh o drumo ko kova đaja hem sa te drumija ka oven sigurna“ (Posl. 4:24-27; Ef. 5:15).