1. So primetinena o manuša kola prvo puti avena ko sastanak? (Dikh i slika.)

 ZAMISLIN jekh bračno par kova prvo puti alo ko sastanko. On tane oduševime so sare ljubazno pozdravinđe len hem mangena jekh jekhe. Ked irinđe pe ćhere, i romni ko drumo phenđa pe romese: „Akala manuša razlikujinena pe ando avera hem baš uživinđum olencar.“

2. Sose disave ćhinavđe te služinen e Jehovase?

² O mangipe kova isi ko Jehovaso narodo tano diso posebno. Ama, e Jehovase svedokija nane savršena (1. Jov. 1:8). So pošukar upoznajinaja e phralen hem e phenjen, verovatno sa poviše dikhaja olenge mane (Rimlj. 3:23). Nažalost, disave čak ćhinavđe te služinen e Jehovase sebepi averengi nesavršenost.

3. Premalo so tane penđarde e Isusese učenikija? (Jovan 13:34, 35)

³ Dikh pana jekh puti o vodećo stih ando akava članko. (Čitin Jovan 13:34, 35.) Sar đanaja kola tane o prava hrišćanija? Premalo mangipe, a na premali savršenost. Primetin so o Isus na phenđa: „Premalo odova tumen ka đanen so hijen me učenikija.“ Ov phenđa: „Premalo odova sare ka đanen so hijen me učenikija.“ Akale lafencar o Isus phenđa so sare ka penđaren olese učenikonen premalo mangipe, na samo olese sledbenikija.

4. So disave mangena te đanen ando prava hrišćanija?

 ⁴ Disave manuša kola nane e Jehovase svedokija šaj pućena pe: „Sar tane e Isusese učenikija penđarde premalo mangipe? Sar o Isus mothovđa mangipe premalo pe apostolija? Sar šaj avdije te đa palo e Isuseso primer?“ Šukar tano te razmislinen ando akala pućiba čak hem okola soj tane krstime. Odova ka podstaknini amen pana pobuter te mothova mangipe, pogotovo ked dikhaja averenge greške (Ef. 5:2).

5. So značinena e Isusese lafija ando Jovan 15:12, 13?

⁵ O Isus phenđa so olese učenikija ka mangen jekh jekhe ko jekh posebno način. (Čitin Jovan 15:12, 13.) O Isus dinđa zapovest: „Mangen jekh jekhe sar so me mangljum tumen!“ So značini akava? Sar so o Isus phenđa, odova tano o samopožrtvovano mangipe – mangipe kova podstaknini amen te ova spremna čak hem te mera amare phralenđe ako valjani. b

6. Sar andi Biblija dikhaja kobor tano o mangipe važno?

⁶ Ki Biblija pisini soj tano o mangipe but važno. Butenge omiljena stihija tane: „O Devel tano mangipe“ (1. Jov. 4:8). „Mang te pašutne sar kokri tut“ (Mat. 22:39). „O mangipe ućhari but grehija“ (1. Petr. 4:8). „O mangipe niked na ćhinavđola“ (1. Kor. 13:8). Akala hem avera stihija mothovena kobor tano važno te mothova akija osobina.

7. Sose o Satana našti te sikavi e manušen te mangen jekh jekhe hem te oven ko jekhipe?

⁷ But manuša pućena pe: „Sar šaj te đanav koja tani i pravo religija? Svako  religija phenela so oj sikavi o ćaćipe, ama svako sikavi različita buća ando Devel.“ O Satana ćerđa but hovavne religije te bi e manušenđe ovela pharo te dikhen koja tani i pravo religija. Ama, ov niked našti te ćedel e manušen ando celo sveto te oven ko jekhipe hem te mangen jekh jekhe. Samo o Jehova šaj te ćerel odova. O mangipe avela ando Jehova. Samo okola so isi len oleso sveti duh hem blagoslov šaj te ovel len mangipe maškaro peste (1. Jov. 4:7). Odolese, o Isus phenđa so samo olese učenikija ka ovel len asavko mangipe.

8-9. Sar o mangipe maškaro Jehovase svedokija utičinđa upro but manuša?

⁸ Sar so o Isus prorekninđa, but manuša haljilje koj tane o prava hrišćanija sebepi o mangipe kova mothovđe jekh jekhese. Na primer, jekh phral kova vićini pe Ijan setini pe sar hine lese ko prvo kongres, kova ićerđa pe ko jekh stadion paše uzo oleso ćher. Ov hine ko odova stadion te dikhel utakmica nekobor masek angleder o kongres. Ov phenela: „Hine but bari razlika maškar o manuša kola hine ko kongres hem okola so hine ki utakmica. O Svedokija hine ljubazna hem šukar uravde, a olenge ćhave šukar ponašinđe pe.“ Pana phenela: „On hine len mir hem hine zadovoljna, a odova beršencar rodinđum. Na setinava man nijekh govor kova hine odova dive, ama pana setinava man sar o Svedokija ponašinđe pe.“ c Amen isi amen šukar delija odolese so mangaja jekh jekhe. Isto ađahar, sebepi o mangipe amen hijam šukar premalo amare phralja hem poštujinaja len.

⁹ Jekh phral kova vićini pe Džon osetinđa pe isto ađahar ked počminđa te đal ko sastankija. Ov phenela: „Sare hine but šukar, ka phene tane savršena. O mangipe kova hine len uverinđa man so arakhljum o ćaćipe.“ d Akala hem avera iskustvija mothovena soj tano e Jehovaso narodo o prava hrišćanija.

10. Ked posebno isi amen prilika te mothova so mangaja e phralen? (Dikh i fusnota.)

¹⁰ Sar so već hine phendo, amare phralja nane savršena. Podijekh puti, on ka ćeren ili ka phenen diso so ka povredini amen e (Jak. 3:2). Tegani, odoleja so ka ćera hem so ka phena isi amen prilika te mothova kobor mangaja len. Sar šaj tegani te oponašina e Isuse? (Jov. 13:15).

11. Kola lošna osobine mothovđe o Jakov hem o Jovan? (Dikh i slika.)

¹¹ O Isus na očekujinđa ando pe učenikija te oven savršena. Ov pomožinđa len te ciden pestar o lošna navike te šaj te oven ugodna anglo Jehovase jaćha. Jekh puti, o apostolija, o Jakov hem o Jovan, phenđe pe dajaće te rodel ando Isus te ovel len posebno than ko Kraljevstvo (Mat. 20:20, 21). On mothovđe  soj tane ponosna hem so mangena te oven považna averendar (Posl. 16:18).

12. Da li samo o Jakov hem o Jovan mothovđe lošna osobine? Objasnin.

¹² Ki odija situacija na mothovđe samo o Jakov hem o Jovan lošna osobine. Dikh sar o apostolija reagujinđe: „Ked odova šunđe okola deš đene, holjanđe upro odola duj phralja“ (Mat. 20:24). Šaj samo te zamislina sar o Jakov hem o Jovan svađinđe pe akale deše apostolencar. Disave šaj phenđe: „So mislinena ko hijen tumen te roden posebno than ko Kraljevstvo? Amen isto dinđam sa amendar te pomožina e Isusese. Hem amen zaslužinaja te ovel amen isto than sar tumende!“ Bizo obzir so mislinđe ili phenđe, tegani on bisterđe so uvek valjani te mothoven mangipe hem te oven šukar jekh premalo jekheste.

13. Sar o Isus reagujinđa ko apostolenge mane? (Matej 20:25-28)

¹³ So o Isus tegani ćerđa? Ov na holjanđa. Na phenđa so ka rodel avere apostolen, kola tane pobuter ponizna hem kola uvek ka mothoven mangipe maškaro peste. Umesto odova, o Isus strpljivo vaćerđa olencar odolese so đanđa so on mangena te ćeren odova soj tano šukar. (Čitin Matej 20:25-28.) O Isus hem ponodri hine šukar premalo lende, iako akava na hine lenđe ni  prvo ni zadnjo puti te svađinen pe koj tano olendar pobaro (Mar. 9:34; Luka 22:24).

14. Ki savi kultura o apostolija barilje?

¹⁴ O Isus sigurno lelja ko obzir ki koja kultura o apostolija barilje hem sar oj utičinđa upro lende (Jov. 2:24, 25). O jevrejska religiozna vođe sikavđe e manušen soj tane važna samo ako isi len disavo položaj (Mat. 23:6; dikh o članko „Sinagoga – mesto gde su Isus i njegovi učenici propovedali“ ki Stražarsko kula kotar 1. april 2010. berš str. 16-18, ki srpsko ćhib). Isto ađahar, odola vođe mislinđe soj tane pošukar averendar (Luka 18:9-12). f O Isus haljilo so odova šaj te utičini ko odova sar o apostolija dikhena averen hem kokri pes (Posl. 19:11). Ov đanđa so olese učenikija ka grešinen hem hine strpljivo olencar ked ćerđe greške. Isto ađahar, đanđa so isi len šukar vilo, odolese strpljivo sikavđa len te oven pana pobuter ponizna hem te mothoven mangipe jekh premalo jekheste, a na te mothoven pe koj tano pošukar.

15. So šaj te sikljova kotar odova so ulo e Jakoveja hem e Jovaneja?

¹⁵ Amen šaj te sikljova but ando odova so ulo e Jakoveja hem e Jovaneja. Odova so pućlje te ovel len posebno than ko Kraljevstvo hine pogrešno. Ama, avera apostolija isto grešinđe odolese so mukhlje odova te rumini olengo jekhipe. O Isus hine šukar premalo sarinende. So sikljovaja odolestar? Nane bitno samo so avera ćerena, nego sar me reagujinava ko olenge greške. So šaj te pomožini amenđe? Ked disavo phral povredinđa amen, šaj te puća amen: „Sose odobor povredinđa man odova so akava phral ćerđa? Da li odova mothovi ko so me valjani te ćerav buti? Da li odova phral isi le disave problemija? Čak hem ako isi man opravdana razlogija te holjanav, da li šaj te mothovav mangipe hem te oprostinav lese?“ Ked mothovaja mangipe maškaro amende, tegani mothovaja so hijam e Isusese prava učenikija.

16. So pana sikljovaja ando Isus?

¹⁶ E Isuseso primer podstaknini amen hem te haljova amare phralen (Posl. 20:5). O Isus šaj hine te čitini e manušengo vilo, a amen našti. Ama, amen šaj te ova strpljiva amare phralencar hem phenjencar ked ćerena disave greške (Ef. 4:1, 2; 1. Petr. 3:8). Amenđe ka ovel polokho te haljova len ako šukar penđaraja len. Hajde te dikha jekh primer.

17. Sar jekhe pokrajinsko nadglednikose pomožinđa odova so pošukar upoznajinđa jekhe phrale?

¹⁷ Jekh pokrajinsko nadgledniko setini pe ko jekh phral andi jekh skupština ki koja služinđa ki Istočno Afrika. Ki početka, ov mislinđa so akava phral nane ljubazno. So o pokrajinsko nadgledniko ćerđa? Ov phenela: „Umesto te izbeginav le, odlučinđum pošukar te penđarav le.“ Ked poviše vreme hine  oleja, o pokrajinsko nadgledniko haljilo sar akava phral barilo hem sar odova utičinđa upro odova sar ponašini pe averencar. Ov pana phenela: „Ked haljiljum kobor hine lese pharo te ćerel promene te šaj te ovel šukar averencar hem ked dikhljum kobor promene već ćerđa, divinđum man lese. Amen uljam but šukar amala.“ Ked trudinaja amen te haljova amare phralen hem phenjen, polokho tano te mothova lenđe mangipe.

18. So valjani te puća amen ako neko povredinđa amen? (Poslovice 26:20)

¹⁸ Ko disave situacije šaj mislinaja so valjani te vaćera okoleja kova povredinđa amen. Tegani, valjani te puća amen: „Da li šukar haljiljum so ulo? (Posl. 18:13). Da li šaj nenamerno povredinđa man? (Prop. 7:20). Da li me nekad ćerđum slično greška? (Prop. 7:21, 22). Ako ka vaćerav oleja, da li o problemi ka ovel pana pobaro?“ (Čitin Poslovice 26:20.) Ked razmislinaja ando akala pućiba, o mangipe šaj te podstaknini amen te na razmislina odolestar so hine.

19. So hijan odlučno te ćere?

¹⁹ E Jehovase svedokija dokažinena soj tane e Isusese prava učenikija ađahar so mothovena mangipe maškaro peste. Svako amendar mothovi soj tano e Isuseso učeniko ađahar so mangela pe phralen, iako dikhela olenge greške. Ked mothovaja mangipe, avera šaj te haljon so amari religija tani pravo hem te počminen te služinen e Jehovase. Odolese, hajde te da sa amendar te mothova mangipe sose premalo odova penđarena pe o prava hrišćanija.