1-2. Sose na valjani te obeshrabrine tut ako na hijan spremno aso krštenje? (Dikh i slika ki naslovno strana.)

 AKO mangeja te krstine tut, odova tano but šukar cilj. Da li akana hijan spremno aso odova? Ako mislineja so hijan hem te starešine isto slažinena pe odoleja, tegani nane so te ađićere. Palo krštenje, o Jehova but ka blagoslovini tut.

² Ama, da li neko phenđa tuće so valjani te ćere disave promene angleder te krstine tut? Da li kokri haljiljan so valjani diso te menine? Ako ja, ma obeshrabrin tut. Bizo obzir da li hijan terno ja phuro, tu šaj te ćere o potrebna promene hem te ispunine odova najvažno cilj.

3. So o etiopsko dvoranin pućlja e Filipe hem so šaj te puća amen? (Dela 8:36, 38)

³ Čitin Dela 8:36, 38. O etiopsko dvoranin pućlja e Filipe: „So sprečini man te krstinav man?“ Ov manglja te krstini pe, ama da li hine spremno aso odova?

4. Sar o Etiopljanin mothovđa so manglja te sikljol o pohor buća?

⁴ O Etiopljanin „hine ko Jerusalim te poklonini pe e Devlese“ (Dela 8:27). Ov verovatno prihvatinđa i jevrejsko religija. Sigurno sikljilo ando Jehova kotar Hebrejska spisija. Ama, manglja te đanel diso pobuter. So ćerđa ov ked o Filip reslja le ko drumo? Čitinđa o svitko  ando prorok Isaija (Dela 8:28). Othe hine o hor sikljoviba andi Biblija. Ov na sikljilo samo o osnovna sikljoviba, nego manglja te đanel hem o pohor buća.

5. So o Etiopljanin ćerđa ked sikljilo o ćaćipe ando Jehova?

⁵ O Etiopljanin hine baro manuš hem služinđa e kandakaće, e etiopsko kraljicaće. „Ov brininđa pe ando kraljicako blago“ (Dela 8:27). Znači, ov hine zauzeto manuš hem hine le but obaveze. Ama, ipak arakhlja vreme te služini e Jehovase. Ov na samo so sikljilo ando ćaćipe, nego hem primeninđa odova so sikljilo. Putujinđa baro drumo andi Etiopija đi o Jerusalim te šaj te đal ko hram. Aso odova valjanđa lese but vreme hem pare, ama ov manglja te služini e Jehovase hem na dikhlja kobor odova ka koštini le.

6-7. So ćerđa o Etiopljanin te šaj te barjol oleso mangipe premalo Jehova?

⁶ O Etiopljanin sikljilo ando Filip disave važna buća. Na primer, haljilo soj tano o Isus, o Mesija (Dela 8:34, 35). Sigurno hine but bahtalo ked haljilo so o Isus ćerđa olese. So ćerđa palo odova? Ov šaj hine te aćhol odova so hine, jekh poštujimo jevrejsko prozeliti ili avere lafencar stranco kova prihvatinđa te služini e Jehovase. Ama, oleso mangipe premalo Jehova hem oleso Ćhavo barilo, odolese ov manglja te krstini pe hem te ovel e Isuseso sledbeniko. O Filip dikhlja soj tano ov spremno hem odmah krstinđa le.

⁷ Ako oponašineja o primer ando Etiopljanin tu šaj te spremine tut aso krštenje. Hem tu ka phene: „So sprečini man te krstinav man?“ O Etiopljanin hem ponodri sikljilo o ćaćipe, primeninđa odova so sikljilo hem dinđa sa pestar oleso mangipe premalo Jehova te barjol. Akana ka dikha sar šaj hem tu te ćere odola ista buća.

8. Premalo Jovan 17:3, so valjani te ćera?

⁸ Čitin Jovan 17:3. Da li akala e Isusese lafija podstakninđe tut te proučine i Biblija? Buten podstakninđe. Ama, da li akala lafija mothovena amenđe so valjani hem ponodri te sikljova? Ja. Amen niked na ka ćhinava „te penđara... e jedino ćaćutne Devle“ (Prop. 3:11). Amen večno ka sikljova ando Jehova. So pobuter sikljovaja olestar, amen ovaja sa popaše oleja (Ps. 73:28).

9. So valjani te ćera palo odova so sikljiljam o osnovna biblijake sikljoviba?

 ⁹ Ked počminaja te sikljova ando Jehova, amen sikljovaja prvo o osnovna biblijake sikljoviba. Ko po lil e Jevrejenđe, o apostol Pavle phenđa so odola sikljoviba tane „o osnovna buća“. Ov na phenđa so on nane važna, nego phenđa soj tane sar thud (Jevr. 5:12; 6:1). Ov podstakninđa e hrišćanen te sikljon hem o pohor buća ando Devleso Lafi, na samo o osnovna sikljoviba. Da li isi tut želja pohor te istražine i Biblija? Da li mangeja te đane pana pobuter ando Jehova hem andi olesi namera?

10. Sose tano disavenđe pharo te proučinen?

¹⁰ Butenđe tano pharo te proučinen. Sar tano tuvaja? Da li đelji tuće šukar i škola? Da li volinđan te čitine hem te učine? Ili mislinđan so odova na đala tuće baš? But manuša mislinena ađahar. Ama, o Jehova šaj te pomožini tut. Ov tano savršeno hem najšukar Učitelj.

11. Sar o Jehova mothovi soj tano amaro „Veličanstveno Učitelj“?

¹¹ O Jehova phenela soj tano „to Veličanstveno Učitelj“ (Is. 30:20, 21). Sar Učitelj ov tano strpljivo, šukar hem haljola amen. Ov dikhela o šukar buća ko pe učenikija (Ps. 130:3). Niked na očekujini pobuter ando odova so šaj te ćera. Ma bistri, ov stvorinđa ti godi, koja tani jekh but šukar poklon (Ps. 139:14). Amen isi amen prirodno želja te sikljova. Amaro Stvoritelj mangela zauvek te sikljova hem te uživina ko odova. Akana valjani te „manga“ o ćaćipe andi Biblija (1. Petr. 2:2). Ćhiv tuće razumna ciljija hem svako dive čitin hem proučin i Biblija (Is. Nav. 1:8). O Jehova ka pomožini tut te uživine đi čitineja hem đi sikljoveja pana pobuter olestar.

12. Sose valjani ko amaro lično proučavanje te proučina ando Isuseso životi hem služba?

¹² Redovno odvojin vreme te razmisline ando Isuseso životi hem služba. Ako mangaja te služina e Jehovase, neophodno tano te đa palo Isuseso primer, pogotovo ko akava pharo vreme (1. Petr. 2:21). O Isus phenđa pe učenikonenđe so ka ovel len problemija (Luka 14:27, 28). Ama, ov hine uverimo so olese učenikija hem tegani ka aćhon verna e Devlese sar oleste (Jov. 16:33). Proučin ando Isuseso životi hem ćhiv tuće ciljija te oponašine le.

13. Aso so šaj te moline tut e Jehovase hem sose?

¹³ Nane dovoljno samo te ovel amen đandipe. O đandipe valjani amenđe te šaj pobuter te sikljova ando Jehova hem te razvijina šukar osobine, sar soj tane o mangipe hem i vera (1. Kor. 8:1-3). Đi sikljoveja, molin tut e Jehovase te pomožini tut te ovel tut pobuter vera (Luka 17:5). Ov uslišini asavke molitve. Ako razvijineja vera đi sikljoveja ando Jehova, tegani but ka napredujine (Jak. 2:26).

14. Sar o apostol Petar istakninđa kobor tano važno te primenina odova so sikljovaja? (Dikh i slika.)

¹⁴ O apostol Petar istakninđa kobor tano važno e Isusese učenikija te primeninen odova so sikljona. Ov vaćerđa ando Noje. O Jehova phenđa e Nojese so ka avel o Potop hem so ka oven uništime sa o lošna manuša. Ama, odova so  đanđe so ka avel o Potop, na hine dovoljno e Nojese hem olese porodicaće te spasinen pe. Zanimljivo tano so ked o Petar pominđa e Noje, ov vaćerđa ando vreme đi „ćerđa pe i arka“, angleder te avel o Potop (1. Petr. 3:20). Znači, o Noje hem olesi porodica primeninđe odova so sikljilje ađahar so gradinđe i arka (Jevr. 11:7). Palo odova, o Petar uporedinđa o krštenje odoleja so o Noje ćerđa. Ov pisinđa: „Odoleja hine predstavimo o krštenje kova akana hem tumen spasini“ (1. Petr. 3:21). Sar so o Noje hem olesi porodica valjanđe but te trudinen pe te ćeren i arka ađahar hem amen valjani te da sa amendar te pripremina amen aso krštenje. So valjani te ćere te šaj te ove spremno aso krštenje?

15. Sar šaj te mothova so ćaće kajinaja amen?

¹⁵ Najangleder valjani te kajine tut aso te grehija (Dela 2:37, 38). Ako ando vilo kajinaja amen, tegani ka ćera o potrebna promene. Da li ćhinavđan te ćere o buća kola o Jehova na mangela sar soj tane o nemoral, o cigare ili i melali ćhib? (1. Kor. 6:9, 10; 2. Kor. 7:1; Ef. 4:29). Ako pana na ćerđan odova, de sa tutar te menine tut. Puć e osoba koja proučini tuvaja ili e starešinen te pomožinen tut hem te den tut savet. Ako hijan terno hem živineja te roditeljencar, puć olen te pomožinen tut te cide tutar o lošna navike kola šaj te sprečinen tut te krstine tut.

16. So značini te ovel amen šukar duhovna navike?

¹⁶ Isto ađahar, valjani te oven amen šukar duhovna navike. Odova značini so valjani te đa redovno ko sastankija hem te učestvujina koro lende (Jevr. 10:24, 25). Ked ka pođine ki služba uvek trudin tut te ove redovno. So pobuter propovedineja, pana poviše ka uživine (2. Tim. 4:5). Ako hijan terno hem živineja te roditeljencar, puć tut: „Da li me roditeljija valjani te phenen maje te đav ko sastankija hem ki služba ili odova kokri ćerava?“ Ako brinineja tut andi ti duhovnost, tu  mothoveja so isi tut bari vera, so mangeja e Jehova hem so hijan lese zahvalno aso sa. Isto ađahar, odoleja ka mothove so hijan „odano e Devlese“ (2. Petr. 3:11; Jevr. 13:15). Ako sa o buća ćereja ando vilo, odova ka ovel ugodno e Jehovase. (Uporedin e stihoja andi 2. Korinćanima 9:7.) Ked deja e Jehovase toklo najšukar, odova ka ćerel tut but bahtalo.

17-18. Koja tani i najvažno osobina koja ka pomožini tut te napredujine đi o krštenje hem sose tani odobor važno? (Poslovice 3:3-6)

¹⁷ Đi napredujineja premalo krštenje, ka oven tut disave pharipa. Disave manuša šaj ka maren tuće muj so meninđan ti religija ili čak šaj te protivinen pe tuće (2. Tim 3:12). Šaj trudineja tut te cide tutar disavi lošno navika, ama podijekh puti tano tuće pharo. Ili šaj našalđan to strpljenje hem hijan holjamo odolese so dićhola tuće so to cilj tano but dur. So šaj tegani te pomožini tuće? I najvažno osobina – o mangipe premalo Jehova.

¹⁸ I najšukar osobina koja šaj te ovel tut tani o mangipe premalo Jehova. (Čitin Poslovice 3:3-6.) Odova mangipe šaj te pomožini amenđe te ikljova ko krajo amare problemencar. Ki Biblija ko but thana pisini so o Jehova mothovi verno mangipe pe slugenđe. Odova značini so ov niked na ka aćhavi pe slugen hem niked na ka ćhinavi te mangel len (Ps. 100:5). Tu hijan ćerdo premali Devlesi slika (Post. 1:26). Sar šaj tu te mothove asavko mangipe?

19. Sar šaj pana pobuter te ove zahvalno aso odova so o Jehova ćerđa tuće? (Galatima 2:20)

¹⁹ Ov zahvalno (1. Sol. 5:18). Svako dive puć tut: „Sar o Jehova mothovđa maje so mangela man?“ Palo odova, zahvalin tut e Jehovase ki molitva aso konkretna buća kola ćerđa tuće. Sar o apostol Pavle hem tu dikh sar o Jehova direktno tuće dela šukar buća odolese so mangela tut. (Čitin Galatima 2:20.) Puć tut: „Da li mangava te mothovav e Jehovase kobor mangava le?“ O mangipe premalo Jehova ka pomožini tut te istrajine ko kušnje hem ko pharipa. Odova ka podstaknini tut te oven  tut šukar duhovna navike hem ađahar te mothove te nebesko Dadese kobor mangeja le.

20. So valjani te ćere te šaj te predajine to životi e Jehovase hem kobor tani važno odija odluka?

²⁰ Sar đala o vreme, o mangipe premalo Jehova ka podstaknini tut te predajine to životi olese ki jekh posebno molitva. Ma bistri, ked predajineja tut e Jehovase, tu šaj večno te pripadine olese. Tegani obećineja so ka služine lese hem ked ka ovel tuće lokho hem ka ovel tuće pharo. Odova obećanje dela pe samo jekh puti ko životi. O predanje tano jekh but ozbiljno odluka. Ama, razmislin akalestar: Tu ka ane but odluke ko životi, ama i najšukar odluka koja šaj te ane tani te predajine to životi e Jehovase (Ps. 50:14). O Satana ka probini te ćhivel tut te našalje to mangipe premalo Jehova hem te na služine lese više. Niked ma per ko olese zamke (Jov 27:5). O mangipe premalo Jehova ka pomožini tut te ićere tut ko to obećanje hem te ove sa popaše oleja.

21. Sose šaj te phena so o krštenje nane kraj nego početak?

²¹ Palo predanje, vaćer te starešinencar andi ti skupština kotar krštenje. Niked ma bistri so o krštenje nane kraj, nego početak. Odova tano početak andi ti služba e Jehovase hem niked na ka ovel le krajo. Odolese, akana valjani te zorjaćere to mangipe premalo Jehova. Ćhiv tuće ciljija kola ka pomožinen tut to mangipe te ovel sa pobaro. Odova ka podstaknini tut te krstine tut. O dive ked ka krstine tut ka ovel o najšukar dive ko to životi! Ama, odova tano samo početak. Niked ma ćhinav te barjaćere to mangipe premalo Jehova hem premalo oleso Ćhavo!