1. Savi želja isi len o roditeljija?

 O RODITELJIJA isi len bari želja te pomožinen pe ćhavenđe te penđaren e Jehova hem te oven paše oleja. Ama, e Jehova našti te dikha. Tegani, sar šaj o roditeljija te pomožinen pe ćhavenđe upro Jehova te dikhen sar jekh osoba koja ćaće postojini hem te oven paše oleja? (Jak. 4:8).

2. Sar šaj o roditeljija te sikaven pe ćhaven ando Jehovase osobine?

² Jekh način sar šaj o roditeljija te pomožinen pe ćhavenđe te oven paše e Jehovaja tano ađahar so ka proučinen olencar i Biblija (2. Tim. 3:14-17). Ama, i Biblija phenela so isi pana jekh način sar šaj o ćhave te sikljon ando Jehova. Ki knjiga Poslovice, jekh dad setinćeri pe ćhave te na bistrel e Jehovase osobine kola dićhona ko odova soj tano stvorimo (Posl. 3:19-21). Akana ka dikha nekobor načinija sar šaj o roditeljija prekalo odova soj tano stvorimo te sikaven pe ćhaven ando odova savo tano o Jehova.

3. Sar šaj o roditeljija te pomožinen pe ćhavenđe?

³ Ki Biblija pisini so „iako našti te dikha e Devle, prekalo buća kola stvorinđa, pana kotar vreme ked ćerđa i phuv, o manuša šaj te dikhen so ov isi le moć hem soj tano jedino pravo Devel“ (Rimlj. 1:20). Tumen o roditeljija, verovatno uživinena te oven tumare ćhavencar avrijal. Koristinen odova vreme te pomožinen lenđe te dikhen sar tane povezime o „buća kola tane stvorime“ hem e Jehovase osobine. Akana ka dikha so šaj o roditeljija te sikljon ando Isuseso primer.

4. Sar o Isus sikavđa pe učenikonen prekalo odova soj tano stvorimo? (Luka 12:24, 27-30)

 ⁴ Zapazin sar o Isus prekalo odova soj tano stvorimo sikavđa averen. Jekh puti, ov phenđa pe učenikonenđe te dikhen o gavranija hem o ljiljanija. (Čitin Luka 12:24, 27-30.) O Isus šaj hine te pomini bilo koja aver životinja ja biljka. Ama, ov pominđa jekh ćirikli hem jekh luludi koja hine penđardi olese učenikonenđe. O učenikija šaj hine te dikhen sar o gavranija letinena upro olenge šere hem sar o ljiljanija cvetonena ki poljana. Šaj li te zamisline e Isuse sar vasteja mothovi premalo akala ćiriklja ja luluđa đi vaćeri olencar? Hem so ćerđa palo odova so pominđa len? Ov koristinđa odola duj buća te sikavi pe učenikonen kobor tano oleso Dad phravde vasteso hem šukar. Prekalo akala duj primerija ov sikavđa len so o Jehova ka parvari hem ka uravi pe slugen sar so odova ćerela e gavranenđe hem e luluđenđe.

5. So ando odova soj tano stvorimo šaj o roditeljija te koristinen te sikaven pe ćhaven ando Jehova?

⁵ Dajalen hem dadalen, sar šaj te oponašinen e Isuse đi sikavena tumare ćhaven? Šaj te phenen lenđe so tumenđe najviše sviđini pe ando odova so o Jehova stvorinđa. Na primer, koja tani tumari omiljeno životinja ja luludi. Ked ka phenen lenđe odova, tegani phenen lenđe hem so odova mothovi tumenđe ando Jehova. Palo odova, šaj te pućen len koja tani olengi omiljeno životinja hem luludi. Ako vaćerena lenđe diso soj tano olenđe zanimljivo, najverovatno so pana pobuter ka šunen tumen ked ka mangen te sikaven len ando Jehova.

6. So šaj te sikljova andi Kristoferesi daj?

⁶ Da li o roditeljija valjani te odvojinen but vreme te istražinen andi disavi životinja angleder so ka vaćeren pe ćhavencar so odova sikavi len ando Jehova? Pa, na valjani. O Isus na phenđa but ando odova sar o gavranija hraninena pe ja sar o luluđa barjona. Iako te ćhave šaj mangena te sikljon disave detaljija ando odova so o Jehova stvorinđa, podijekh puti disavo jednostavno pućibe tano dovoljno te pomožine len te haljon odova so mangeja te sikave len. Dikh so amaro phral o Kristofer phenela pestar ked hine tikno. Ov phenela: „Mi daj bi uvek phenela diso but kratko hem jednostavno ked manglja te pomožini amen te cenina odova soj tano uzo amende, a so stvorinđa o Jehova. Na primer, ked bi ovaja uzi disavi planina, oj bi phenela: ’Dikhen kobor tane bare hem šuže akala planine! Nane li o Jehova but šukar?‘ Ja ked bi ovaja negde uzo more, oj bi phenela: ’Dikhen kobor bari moć isi len o talasija! Nane li o Jehova moćno Devel?‘“ O Kristofer pana phenela: „Akala jednostavna, ama šukar pripremime pućiba podstakninđe amen te razmislina ando Jehova.“

7. Sar šaj te sikaven tumare ćhaven te razmislinen ando odova so o Jehova stvorinđa?

⁷ Sar te ćhave barjona, šaj te počmine te sikave len te razmislinen ando odova so o Jehova stvorinđa hem kokri te dikhen so odova sikavi len olestar. Šaj te vaćere andi jekh buti koja o Jehova ćerđa hem palo odova te puće len: „So akava sikavi tut ando Jehova?“ Šaj ka iznenadinen tumen so tumare ćhave ka phenen tumenđe (Mat. 21:16).

8. So šaj hine o roditeljija ko purano vreme te ćeren đi phirđe pe ćhavencar?

⁸ O roditeljija ko Izrael hine podstaknime te sikaven pe ćhaven ando Jehovase zapovestija đi phirđe „ko drumo“ (Pon. zak. 11:19). Ko odola drumija avrijal andi diz šaj  hine te dikhen razna životinje, ćiriklja hem luluđa. Ked o Izraelcija zajedno pe porodicaja phirđe ko odola drumija, on šaj hine te vaćeren pe ćhavenđe ando odova so o Jehova stvorinđa. Roditeljija, sigurno hem tumen avdije isi tumen prilike te vaćeren tumare ćhavencar ando odova so o Jehova stvorinđa. Te dikha sar disave roditeljija ćerđe odova.

9. So šaj te sikljova andi Punita hem Katja?

⁹ Jekh daj koja vićini pe Punita hem koja živini ki jekh bari diz ki Indija, phenela: „Ked đeljam te posetina amaren ko gav, odova hine prilika te pomožina amare ćhavenđe te sikljon ando odova so o Jehova ćerđa. Dikhljum so amare ćhave pošukar haljona odova soj tano stvorimo ked tane dur andi gužva.“ Dajalen hem dadalen, tumare ćhave verovatno niked na ka bistren sar hine lenđe ked đeljen ko disavo šužo than. I Katja, amari phen andi Moldavija, phenela: „Me najšukar uspomene ko kola pana setinava man tane ked hijum le me roditeljencar ko disavo than. Zahvalno hijum lenđe so ked hijum le tikni sikavđe man te terđovav hem te razmislinav ando odova so o Jehova stvorinđa hem te dikhav ole prekalo odova so ćerđa.“

10. So šaj o roditeljija te ćeren ako našti te legaren pe ćhaven ko disavo than avrijal i diz? (Dikh o okvir „ Pomoć aso roditeljija“.)

¹⁰ Ama, so ako našti te đan ko disavo than avrijal i diz? I Amol, koja isto živini ki Indija, phenela: „Odothe kaj me živinava, o roditeljija valjani po celo dive te ćeren buti hem šaj te ovel but skupo te đal pe negde. Ama, disavo parko ja disavi terasa ko krov šaj te oven thana kotar kola šaj te posmatrina odova soj tano stvorimo hem te vaćera ando Jehovase osobine.“ Ako hari razmislineja, hem tu šaj uzo to ćher te arakhe but buća ando odova soj tano stvorimo kola šaj te mothove te ćhavenđe (Ps. 104:24). Verovatno isi ćiriklja, insektija, luluđa hem pana diso. I Karina,  andi Nemačka, phenela: „Mi daj but mangela luluđa, odolese ked hijum le tikni ked god bi đaja negde te phira, oj bi mothovi maje disavi luludi.“ Tumen o roditeljija šaj te koristinen amare videa hem publikacije kola vaćerena ando odova so o Jehova stvorinđa te sikaven tumare ćhaven. Kuri god te živine, tu šaj te pomožine te ćhavenđe te dikhen odova so o Jehova ćerđa. Akana ka dikha nekobor e Jehovase osobine ando kola šaj te vaćere te ćhavencar.

11. Sar šaj o roditeljija te pomožinen pe ćhavenđe te dikhen e Jehovaso mangipe?

¹¹ Te šaj te pomožinen tumare ćhavenđe te dikhen e Jehovaso mangipe, šaj te vaćeren lenđe ando odova sar jekh životinja brinini pe ando pe ćhave (Mat. 23:37). Šaj te phenen lenđe hem kobor razna buća isi amen ki priroda ko kola šaj te uživina. I Karina, kola angleder pominđam, phenela: „Ked bi đaja negde phirindoj, mi daj bi podstaknini man te terđovav hem te dikhav sar svako luludi tani posebno hem sar olako šužipe mothovi e Jehovaso mangipe. Beršencar palo odova, me pana pažljivo posmatrinava o luluđa hem dikhava sar tane ćerđe, kobor šuže boje isi len hem kobor but vrste isi. On pana setinćerena man kobor o Jehova mangela amen.“

12. Sar šaj o roditeljija te pomožinen pe ćhavenđe te dikhen e Jehovasi mudrost? (Psalam 139:14; dikh i slika.)

¹² Pomožinen tumare ćhavenđe te dikhen e Jehovasi mudrost. O Jehova tano but pomudro amendar (Rimlj. 11:33). Na primer, šaj te phenen lenđe so o pani đala upre hem ćerela o oblakija hem so palo odova odola oblakija pomerinena pe kotar jekh than ko aver (Jov 38:36, 37). Isto ađahar, šaj te vaćeren lenđe so amaro telo tano but šukar ćerdo. (Čitin Psalam 139:14.) Te dikha sar odova ćerđa o Vladimir. Ov phenela: „Jekh dive, amaro ćhavo pelo kotar bicikla hem povredinđa pi koć. Palo nekobor dive, olese rane saćilje. Mi romni hem me objasninđam lese so o Jehova ćerđa amaro telo ađahar so ov šaj kokri te oporavini pe. Phenđam lese so diso ađahar niked na dikhaja ko buća kola o manuša ćerđe. Na primer, o vorda palo udes na popravinena pe kokri pestar. Odova pomožinđa amare ćhavese te haljol e Jehovasi mudrost.“

13. Sar šaj o roditeljija te pomožinen pe ćhavenđe te dikhen e Jehovasi moć? (Isaija 40:26)

 ¹³ O Jehova phenela amenđe te vazda amaro šero hem te razmislina sar o ćerenja bešena ko jekh than sebepi olesi bari moć. (Čitin Isaija 40:26.) Phenen tumare ćhavenđe te dikhen o ćerenja hem te razmislinen odolestar so dikhena. Amari phen i Tingting ando Tajvan setini pe so hine jekh puti ked hine tikni. Oj phenela: „Jekhvar, mi daj legarđa man ko kampovanje. Uduri šaj hine te dikha o ćerenja but jasno sose na hijam le ki diz kuri isi bari svetlost. Ko odova vreme, me amala ki škola na mukhlje man ki mira hem pućljum man da li ka aćhovav verno e Jehovase. Mi daj podstakninđa man te razmislinav andi moć koja o Jehova koristinđa te ćerel sa odola ćerenja hem te na bistrav so ov šaj te koristini odija moć te pomožini hem maje ki škola. Sa odova so dikhljum odothe podstakninđa man ked aljum maje ćhere pana pošukar te penđarav e Jehova hem odova zorjaćerđa mi odlučnost te aćhovav lese verno.“

14. Sar šaj o roditeljija prekalo odova soj tano stvorimo te pomožinen pe ćhavenđe te dikhen so o Jehova tano bahtalo Devel?

¹⁴ O buća kola o Jehova stvorinđa mothovena amenđe so ov tano bahtalo Devel hem so mangela hem amen te ova bahtale. O naučnikija primetinđe so but životinje ćhelena pese, na primer o ćiriklja hem o maćhe (Jov 40:20). Da li te ćhave asana ked dikhena sar jekh životinja ćhelela pese? Šaj dikhlje sar i mačka prastala pali jekh tikni loptica ando thava ja sar o đućela ćhelena pese jekh jekheja. Aver puti ked ka dikhe so te ćhave asana so dikhena sar o životinje ćhelena pese, phen lenđe so amen služinaja e Devlese kova tano bahtalo (1. Tim. 1:11).

15. So šaj o roditeljija te ćeren te šaj te đanen sostar olenge ćhave razmislinena? (Poslovice 20:5; dikh i slika.)

¹⁵ Disavo puti e roditeljenđe tano pharo te podstakninen pe ćhaven te vaćeren lenđe ando pe problemija. Ako tu hijan ki odija  situacija, šaj ka valjani te „ikale“ ando te ćhave odova sostar razmislinena. (Čitin Poslovice 20:5.) Disave roditeljenđe tano polokho te ćeren odova đi tane avri pe ćhavencar. Sose? Jekh razlog tano sose uduri nane so te ćhinavi len đi vaćerena. Jekh dad kotar Tajvan kova vićini pe Masahiko vaćeri ando pana jekh razlog. Ov phenela: „Ked hijam avri amare ćhavencar, na primer ked ukljaja ki planina ja phiraja uzi obala, on tane opuštena. Tegani tano polokho te vaćera olencar hem te dikha sostar razmislinena.“ I Katja, kola pominđam angleder, phenela: „Pali škola, mi daj bi legari man ko jekh but šužo parko. Tegani hijum le opušteno hem šaj hine te vaćerav laće so hine ki škola hem so brinini man.“

16. Sar šaj o porodice te uživinen ko buća kola o Jehova ćerđa?

¹⁶ Ked o porodice uživinena ko buća kola o Jehova ćerđa, on tane opuštena hem bahtale. Odova pomožini lenđe pana pobuter te mangen jekh jekhe. Ki Biblija pisini so isi „vreme ked asala pe“ hem „vreme ked ćhelela pe“ (Prop. 3:1, 4). O Jehova ćerđa but šuže thana ki phuv kuri šaj te ćera o buća kola mangaja. But porodice volinena zajedno te đan negde ki priroda, ko gav, ko planine ja ko more. Disave ćhave volinena te prastan ja te ćhelen pese ko parko, te dikhen e životinjen ja te plivinen ki reka, ko jezero ja ko more. Isi amen but prilike kuri šaj te ova avri hem te uživina ko odova so o Jehova stvorinđa.

17. Sose o roditeljija valjani te pomožinen pe ćhavenđe te uživinen ko odova so o Devel ćerđa?

¹⁷ Ko nevo sveto, o roditeljija hem o ćhave ka uživinen ko sa odova so avdije našti. Akana daraja ando disave životinje, ama tegani na ka dara olendar niti on ka daran amendar (Is. 11:6-9). Ka ovel amen vreme kobor god mangaja te uživina ko odova so o Jehova stvorinđa (Ps. 22:26). Đi sikavena tumare ćhaven ando Jehova, verovatno hem on ka složinen pe odoleja so o kralj David phenđa: „Jehova, nane asavke delija sar soj tane tekle“ (Ps. 86:8).