10. ČLANKO PROUČIBASE
Sose valjani te krstine tut?
Nek svako tumendar krstini pe (DELA 2:38)
ĐILI 34 Te živina verno
SOSTAR KA VAĆERA a
1-2. So desini pe ked neko krstini pe hem sostar ka vaćera ko akava članko?
DA LI nekad posmatrinđan okolen so ka krstinen pe? Tu šunđan sar on odgovorinena ko duj pućiba angleder so ka krstinen pe. Tegani, olengi familija hem olenge amala tane but ponosna upro lende. Ked o kandidatija aso krštenje ikljilje ando pani, tu šunđan o aplauz hem dikhljan kobor tane radosna. Svako kurko, hiljade manuša posvetinena po životi e Jehovase hem krstinena pe.
2 A sar tano tuvaja? Ako razmislineja ando krštenje, tu hijan diso posebno odolese so „rodeja e Jehova“ ko akava lošno sveto (Ps. 14:1, 2). Bizo obzir da li hijan terno ja phuro, akava članko tano pisimo baš tuće. Ama, hem okolenđe kola tane već krstime šaj but te koristini. On isi len cilj večno te služinen e Jehovase. Odolese, akana ka razmotrina trin razlogija sose služinaja e Jehovase.
MANGEJA O ĆAĆIPE HEM I PRAVEDNOST
O Satana beršencar klevetinđa e Jehovaso anav hem pana ćerela odova (Dikh o 3. hem o 4. odlomko)
3. Sose e Jehovase sluge mangena o ćaćipe hem i pravednost? (Psalam 119:128, 163)
3 O Jehova phenela pe narodose te „mangen o ćaćipe“ (Zah. 8:19). O Isus podstakninđa pe učenikonen te roden i pravednost (Mat. 5:6). Odova značini so valjani te ovel amen bari želja te ćera okova soj tano pravedno, šukar hem čisto anglo Devlese jaćha. Da li mangeja o ćaćipe hem i pravednost? Ja, ama sigurno mrzineja o hovajba hem okova soj tano pogrešno hem lošno. (Čitin Psalam 119:128, 163.) O manuš kova hovavi oponašini e Satana, kova tano vladari ando akava sveto (Jov. 8:44; 12:31). E Satanaso cilj tano te klevetini e Jehovaso anav. Pana ko edensko vrt, ov počminđa te vaćeri hovajba ando Devel. Ov mangela te mislina so o Jehova tano sebično hem nepošteno Vladari kova garavi amendar o šukar buća (Post. 3:1, 4, 5). O Satana hem ponodri ćhivela e manušen te mislinen lošno ando Jehova. Ako o manuša na „mangena o ćaćipe“, o Satana šaj te utičini upro olende te počminen te ćeren o lošna buća (Rimlj. 1:25-31).
4. Sar o Jehova mothovđa soj tano „Devel ando ćaćipe“? (Dikh i slika.)
4 O Jehova tano „Devel ando ćaćipe“ hem ov sikavi o ćaćipe okolen kola mangena le (Ps. 31:5). Odolese, o Satana našti te prevarini len pe hovajbaja. Isto ađahar, o Jehova sikavi pe slugen te oven poštena hem pravedna. Odova pomožini lenđe te ovel len samopoštovanje hem unutrašnjo mir (Posl. 13:5, 6). Da li hem tu osetinđan sar o Jehova pomožinđa tut ked počminđan te proučine i Biblija? Tu haljiljan so i najšukar odluka koja jekh manuš šaj te anel tani te đal e Jehovase drumoja (Ps. 77:13). Odolese mangeja te ćere odova soj tano šukar anglo Jehovase jaćha (Mat. 6:33). Isi tut bari želja te branine o ćaćipe hem te dokažine so o Satana vaćeri hovajba e Jehovastar. Sar šaj te ćere odova?
5. Sar šaj te mothove so mangeja o ćaćipe hem i pravednost?
5 Tu šaj te životoja te mothove so na verujineja ko Satanase hovajba, nego so mangeja o ćaćipe. Isto ađahar, šaj te mothove so mangeja o Jehova te ovel to Vladari hem so mangeja te ćere okova soj tano šukar. Sar šaj te mothove odova? Ađahar so ka predajine to životi e Jehovase ki molitva hem palo odova ka krstine tut. Ako mangeja o ćaćipe hem i pravednost odova ka podstaknini tut te krstine tut.
MANGEJA E ISUSE
6. Premalo Psalam 45:4, sose amen mangaja e Isuse?
6 Sose mangaja e Isuse? Disave razlogija tane pisime ko Psalam 45:4. (Čitin.) O Isus manglja o ćaćipe, i pravednost hem i poniznost. Amen isto mangaja odola osobine, odolese mangaja hem e Isuse. Razmislin kobor o Isus hine hrabro ked braninđa o ćaćipe (Jov. 18:37). Ama, sar o Isus sikavđa amen te ova ponizna?
7. Sar utičini upro tute odova soj tano o Isus ponizno?
7 O Isus sikavđa amen te ova ponizna pe primereja. Na primer, ov niked na lelja i slava pese nego uvek dinđa la e Jehovase (Mar. 10:17, 18; Jov. 5:19). Sar odova utičini upro tute? Odova sigurno podstaknini tut te mange e Devlese Ćhave hem te đa palo oleso primer. Sose tano o Isus ponizno? Odolese so mangela hem oponašini pe Dade kova tano ponizno (Ps. 18:35; Jevr. 1:3). O Isus savršeno mothovi e Jehovase osobine hem odolese amen but mangaja le.
8. Sose hijam bahtale soj tano o Isus amaro Kralj?
8 Amen hijam but bahtale soj tano o Isus amaro Kralj, odolese soj tano ov najšukar vladari. O Jehova lično sikavđa e Isuse hem ćhivđa le te vladini (Is. 50:4, 5). Isto ađahar, o Isus mothovđa baro mangipe (Jov. 13:1). Odolese soj tano amaro Kralj, o Isus zaslužini te manga le. Ov phenđa so okola so ćaće mangena le tane olese amala hem so on po mangipe mothovena ađahar so ićerena pe ko olese zapovestija (Jov. 14:15; 15:14, 15). Isi amen bari čast so šaj te ova e Jehovase Ćhavese amala.
9. Ko so tano amaro krštenje slično sar e Isuseso?
9 Jekh andi Isusesi zapovest tani olese učenikija te krstinen pe (Mat. 28:19, 20). Ko odova, ov aćhavđa amenđe primer. Oleso krštenje ko disave buća razlikujini pe ando amaro (Dikh o okvir „ Savi razlika isi maškaro Isuseso krštenje hem o krštenje ando olese učenikija?“). Ama, ko disave buća oleso krštenje hem amaro tano slično. Na primer, ked krstinđa pe o Isus dinđa lafi so ka ćerel pe Dadesi volja (Jevr. 10:7). Isto ađahar, ked e Isusese učenikija krstinena pe, on javno mothovena so predajinđe po životi e Jehovase. Akana, i najvažno buti ko olengo životi tani te ćeren e Jehovasi volja, a na pikli. On mothovena so đana palo Isuseso primer.
10. Sose mangeja e Isuse hem ko so odova mangipe podstaknini tut?
10 Tu verujineja soj tano o Isus e Jehovaso jedinobijando Ćhavo hem so o Jehova ćhivđa le te ovel amaro Kralj. Đaneja soj tano ov ponizno hem so savršeno oponašini pe Dade. Isto ađahar, đaneja so ov parvarđa e bokhalen, utešinđa okolen so hine obeshrabrime hem saćarđa e nabormen (Mat. 14:14-21). Avdije, šaj te dikhe sar vodini i skupština (Mat. 23:10). Odolese, hijan sigurno so ki budućnost sar Kralj ko Devleso Kraljevstvo ka ćerel but šukar buća. Sar šaj te mothove so mangeja le? Ađahar so ka đa palo oleso primer (Jov. 14:21). A odova šaj te ćere ađahar so ka predajine to životi e Jehovase hem ka krstine tut.
MANGEJA E JEHOVA
11. Kova tano o najvažno razlog sose valjani te krstine tut hem sose mislineja ađahar?
11 Kova tano o najvažno razlog sose valjani te krstine tut? O Isus phenđa so i najvažno zapovest tani: „Mang e Jehova, te Devle, celone vileja, celona dušaja, celona gođaja hem celona snagaja“ (Mar. 12:30). Da li akala lafija mothovena kobor mangeja e Devle?
Ando Jehova avena sa o šukar buća kola isi amen akana hem kola ka oven amen ki budućnost (Dikh o 12. hem o 13. odlomko)
12. Sose mangeja e Jehova? (Dikh i slika.)
12 Isi amen but razlogija te manga e Jehova. Na primer, amen đanaja so olestar „avela o životi“ hem so ov dela amen „svako šukar hem savršeno poklon“ (Ps. 36:9; Jak. 1:17). Sa o šukar buća ko životi avena ando Jehova.
13. Sose tani i otkupnina jekh but šukar poklon?
13 I otkupnina tani jekh but šukar poklon kova o Jehova dinđa amen. Sose šaj te phena odova? Razmislin kobor hine paše o Jehova hem o Isus. O Isus phenđa: „O dad mangela man“ hem me „mangava me Dade“ (Jov. 10:17; 14:31). On hine zajedno milijarde berša hem ulje sa popaše jekh jekheja (Posl. 8:22, 23, 30). Zamislin samo kobor hine pharo e Jehovase te mukhel pe Ćhave te patini hem ko krajo te merel. Odolese so o Jehova mangela tut hem e manušen, ov dinđa pe Ćhave sar žrtva te šaj tu hem sa avera manuša te živinen večno (Jov. 3:16; Gal. 2:20). Odova tano o najbaro razlog sose mangaja e Jehova.
14. Kova tano najvažno cilj ko životi kova šaj te ovel tut?
14 So pobuter sikljiljan ando Jehova to mangipe premalo oleste hine sa pobaro. Tu sigurno mangeja te ove paše oleja akana hem zauvek. Odova tano moguće. O Jehova podstaknini amen te radujina oleso vilo (Posl. 23:15, 16). Tu šaj te ćere odova na samo te lafencar, nego hem odoleja so ćereja. To način sar živineja ka mothovi kobor mangeja e Jehova (1. Jov. 5:3). A odova valjani te ovel tuće najvažno cilj ko životi.
15. Sar šaj te mothove so mangeja e Jehova?
15 Sar šaj te mothove so mangeja e Jehova? Najangleder ađahar so kokri ki jekh posebno molitva ka predajine to životi e jedino ćaćutne Devlese (Ps. 40:8). Palo odova, javno ka mothove so predajinđan tut e Jehovase ađahar so ka krstine tut. Sar so dikhljam ki početka, o krštenje tano o najradosno hem najvažno trenutko ko životi. Tegani, tu ka počmine te živine jekh nevo životi. Više na ka živine tuće, nego e Jehovase (Rimlj. 14:8; 1. Petr. 4:1, 2). Sa akava šaj izgledini tuće pharo, sose tani but važno odluka. Ama, ma bistri so o krštenje phravela tuće udara aso najšukar životi. Sar?
16. Premalo Psalam 41:12, so o Jehova ka ćerel okolenđe so služinena lese?
16 O Jehova tano but velikodušno. Bizo obzir kobor tu deja e Jehovase, ov uvek ka irini tuće poviše (Mar. 10:29, 30). Ov pana akana ko akava lošno sveto ka del tut šužo, ispunimo životi kova isi le svrha. Odova tano samo početak. O životi kova počmini ando dive ked krstineja tut niked na ka završini pe. Tu šaj te služine te Dadese, e Jehovase zauvek. O mangipe maškaro tute hem oleste ka ovel sa pobaro. Hem tu šaj te živine večno, sar o Jehova. (Čitin Psalam 41:12.)
17. So šaj te de e Jehovase so ov nane le?
17 Ked predajineja to životi e Jehovase hem krstineja tut, tegani isi tut čast te de nešto amare Dadese. Ov dinđa tut sa o šukar buća hem svako radosno trenutko ko životi. Tu šaj te irine lese aso odova ađahar so ka de le nešto so nane le – ti verno služba (Jov 1:8; 41:11; Posl. 27:11). Odova tano najšukar način sar šaj te koristine to životi. Ćaće, o mangipe premalo Jehova tano o najšukar razlog sose valjani te krstina amen.
SOSE TE AĐIĆERE?
18. So šaj te puće tut?
18 Onda, da li ka krstine tut? Samo tu šaj te odgovorine ko akava pućibe. Šaj te pomožini tuće ako pućeja tut: „Sose te ađićerav?“ (Dela 8:36). Razmislin ando trin razlogija kolendar vaćerđam. Sar prvo, tu mangeja o ćaćipe hem i pravednost. Puć tut: „Da li jedva ađićerava o dive ked sare ka vaćeren o ćaćipe hem ka ćeren okova soj tano pravedno?“ Sar dujto, tu mangeja e Isuse. Puć tut: „Da li mangava o Isus te ovel mo Kralj hem da li mangava te sledinav oleso primer?“ Sar trito, tu mangeja e Jehova. Puć tut: „Da li mangava te radujinav e Jehovaso vilo ađahar so ka služinav lese?“ Ako o odgovor ko akala pućiba tano ja, tegani sose ne bi krstineja tut? Sose te ađićere? (Dela 16:33).
19. Sose valjani te ove odlučno te krstine tut? Vaćer jekh poređenje (Jovan 4:34).
19 Ako na hijan odlučno da li valjani te krstine tut, razmislin ando jekh poređenje kova o Isus koristinđa. (Čitin Jovan 4:34.) E Isusese hine but važno te ćerel pe Dadesi volja hem odova uporedinđa e hranaja. Sose? I hrana tani šukar amenđe. O Isus đanđa so odova so o Jehova rodela amendar te ćera tano aso amaro šukaripe. O Jehova na mangela te ćera diso so ka povredini amen. Da li o Jehova mangela te krstine tut? Ja (Dela 2:38). Odolese, šaj te ove sigurno so ako šuneja odija zapovest ka ove bahtalo. Ked anglo tute isi disavo šužo habe, tu jedva ađićereja te ha le, sose onda ađićereja te krstine tut?
20. Sostar ka vaćera ko aver članko?
20 Sose disave ađićerena? But đene phenena: „Pana na hijum spremno.“ I odluka te predajine to životi e Jehovase hem te krstine tut tani i najvažno odluka ko to životi. Odolese, valjani te le tuće vreme hem pažljivo te razmisline da li hijan spremno. Ama, ako isi tut bari želja te krstine tut, sar šaj te spremine tu? Ko aver članko ka dobina odgovor ko akava pućibe.
ĐILI 28 Te ova e Jehovase amala
a Sare kola proučinena i Biblija valjani te krstinen pe. So šaj te podstaknini e manuše kova proučini te ćerel odova? O mangipe. Ama, so hem kas amen valjani te manga? Ko akava članko, ka dobina odgovor ko akava pućibe. Isto ađahar, ka dikha savo životi šaj te ovel len okola so ka krstinen pe.
