1-2. So valjani te ćerel jekh osoba angleder te krstini pe?

 KO ZADNJA panđ berš, više ando jekh milioni manuša krstinđe pe. Disave olendar, sar o Timotej, „kotar tiknipe“ đanena aso ćaćipe (2. Tim. 3:14, 15). A disave upoznajinđe o ćaćipe ked barilje. Na primer, jekh romni koja proučinđa i Biblija krstinđa pe ked hine la 97 berš!

² Ako proučineja i Biblija ja bariljan ko ćaćipe, da li razmislineja odolestar te krstine tut. Odova tano but šukar cilj! Angleder te krstine tut, valjani te predajine to životi e Jehovase. Ko akava članko ka razmotrina so značini te predajine to životi e Jehovase. Isto ađahar, ka dikha sose na valjani te dara te predajine tut hem te krstine tut, ako hijan spremno aso odova.

SOJ TANO O PREDANJE?

3. Vaćer disave primerija ando manuša kola hine predajime e Jehovase.

³ Ked ki Biblija phenela pe nekase soj tano predajimo odova značini soj tano odvojimo asi disavi posebno namera. O Izraelcija sar narodo hine predajime e Jehovase. Ama, disave olendar hine predajime e Jehovase ko jekh posebno način. Na primer, o Aron akharđa jekh sijajno pločica kotar zlato, sveto znak ando predanje. Odija zlatno pločica mothovđa so ov hine odvojimo te služini e Jehovase ko posebno način – sar prvosvešteniko (Lev. 8:9). Isto ađahar, o nazireja hine predajime e Jehovase  ko posebno način. O lafi „nazirej“ kova avela ando hebrejsko lafi nazir značini „odvojimo“ ili „predajimo“. O nazireja valjanđe te šunen disave zapovestija kola posebno olenđe hine pisime ko Mojsijeso zakon (Br. 6:2-8).

4. (a) So amenđe značini ked predajinaja amen e Jehovase? (b) So značini te „odreknine tut“ kokri tutar? (Dikh i slika.)

⁴ Ked predajinaja amaro životi e Jehovase, amen birinaja te ova e Isusese učenikija hem te ćhiva e Jehovasi volja ko prvo than. Sar ćeraja odova? O Isus phenđa: „Ako neko mangela te đal palo mande, nek odreknini pe kokri pestar“ (Mat. 16:24). O grčka lafija kola tane prevodime sar „nek odreknini pe kokri pestar“ šaj te oven prevodime hem sar „ov valjani te phenel na kokri pese“. Sar e Jehovaso predajimo sluga, tu ka valjani te phene na aso buća kola šaj te ćhinaven tut te ćere e Jehovasi volja (2. Kor. 5:14, 15). Odova značini so ka valjani te phene na aso „delija ando telo“, sar soj tano o nemoral (Gal. 5:19-21; 1. Kor. 6:18). Da li ka ovel tuće pharo te ićere tut ko akala zapovestija? Na, ako mangeja e Jehova hem ako hijan uverimo so olese zakonija tane aso to šukaripe (Ps. 119:97; Is. 48:17, 18). O phral kova vićini pe Nikolas, phenđa: „Ko Jehovase merilija šaj te dikhe sar rešetke kotar zatvor kola ćhinavena tut te ćere odova so mangeja ja sar rešetke kotar laveso kavez kola zaštitinena tut andi opasnost.“

5. (a) Sar predajineja tut e Jehovase? (b) Koja razlika isi maškaro predanje hem krštenje? (Dikh i slika.)

⁵ Sar predajineja tut e Jehovase? Ki jekh molitva obećineja so ka služine samo olese hem so olesi volja ka ćhive ko  prvo than. Isto ađahar, obećineja lese so hem ponodri ka mange le „celone vileja, celona dušaja, celona gođaja hem celona snagaja“ (Mar. 12:30). O predanje tano maškaro tute hem o Jehova. Ki aver strana, o krštenje tano javno hem mothovi averenđe so već predajinđan tut e Jehovase. To predanje tano jekh posebno obećanje hem valjani te trudine tut te ispunine le sar so o Jehova očekujini tutar te ćere odova (Prop. 5:4, 5).

SOSE PREDAJINEJA TUT E JEHOVASE?

6. Sose jekh osoba odlučini te predajini po životi e Jehovase?

⁶ O glavno razlog sose predajineja tut e Jehovase tano sose mangeja le. To mangipe na temeljini pe samo ko te emocije. Odova mangipe tano ukorenimo ko odova so „šukar [penđareja] olesi volja hem ko razumevanje kova o duh dela“. Sebepi akala buća to mangipe premalo leste barilo (Kol. 1:9). Đi proučinđan e Devleso Lafi uverinđan tut (1) so o Jehova tano ćaćutno Devel, (2) so i Biblija avela olestar hem (3) so ov koristini pi organizacija te ispunini pi namera.

7. So valjani te ćera angleder te predajina amen e Devlese?

⁷ Okola kola predajinena pe e Jehovase valjani te đanen o osnovna sikljoviba andi Biblija hem te živinen premalo olese merilija. On dena sa pestar te vaćeren averenđe odova so sikljilje (Mat. 28:19, 20). Olengo mangipe premalo Jehova barilo hem mangena verno te služinen lese. Da li hem tu mangeja odova?  Ako mangeja e Jehova celone vileja, tegani na ka predajine tut hem na ka krstine tut samo sose sare odova ćerena ja sose mangeja te radujine te učitelje ili te roditeljen.

8. Sar i zahvalnost ka pomožini tut te predajine tut e Jehovase? (Psalam 116:12-14)

⁸ Ked ka razmisline so sa o Jehova ćerđa tuće, tu ka osetine bari zahvalnost hem ka ovel tut bari želja te predajine to životi olese. (Čitin Psalam 116:12-14.) Ki Biblija pisini so „svako šukar hem savršeno poklon“ avela ando Jehova (Jak. 1:17). Jekh ando najbare poklonija tani i žrtva ando oleso Ćhavo, o Isus Hrist. Zamislin samo kobor tano šukar odova poklon. Sebepi i otkupnina, šaj te ove paše e Jehovaja hem šaj te ovel tut večno životi (1. Jov. 4:9, 10, 19). To predanje e Jehovase tano najšukar način te mothove kobor hijan zahvalno aso najbaro mangipe kova mothovđa tuće hem aso sa avera buća kola dinđa tut (Pon. zak. 16:17; 2. Kor. 5:15). Odolestar vaćeri pe ki 46. lekcija, ki 4. tačka ki knjiga Ov bahtalo zauvek! hem ko video So šaj amen te da e Devlese.

DA LI HIJAN SPREMNO ASO PREDANJE HEM KRŠTENJE?

9. Sose jekh osoba na valjani te uporedini pe averencar ked valjani te predajini pe e Jehovase?

⁹ Šaj mislineja so na hijan spremno aso predanje hem krštenje. Šaj valjani te ćere pana disave promene te šaj te živine premalo Jehovase merilija ili valjani tuće pobuter vreme te zorjaćere ti vera (Kol. 2:6, 7). Na napredujinena isto sa o manuša kola proučinena hem nane sa o terne spremna aso predanje hem krštenje ko ista berša. Trudin tut te haljove kola pana promene valjani te ćere hem palo odova ćer odova so šaj hem ma uporedin tut averencar (Gal. 6:4, 5).

10. So šaj te ćere ako haljiljan so pana na hijan spremno te predajine tut hem te krstine tut? (Dikh o okvir „ Okolenđe kola barilje ko ćaćipe“.)

¹⁰ Čak hem ako haljiljan so pana na hijan spremno te predajine tut e Jehovase, odova nek ovel hem ponodri to cilj. Molin tut e Jehovase te pomožini tut te menine odova so valjani ko to životi (Fil. 2:13; 3:16). Šaj te ove sigurno so o Jehova ka šunel ti molitva hem ka pomožini tut (1. Jov. 5:14).

SOSE DISAVE DARANA TE PREDAJINEN PE HEM TE KRSTINEN PE?

11. Sar o Jehova ka pomožini amen te aćhova lese verna?

¹¹ Disave tane spremna aso predanje hem krštenje, ama ipak darana. Sose? On šaj pućena pe: „So ako ka ćerav disavo ozbiljno greh hem ka ovav isključimo?“ Ako isi tut asavki dar, ov uverimo so o Jehova ka del tut sa so valjani tuće te ićere tut ko olese merilija „te šaj te [ćere] le te ovel bahtalo“ (Kol. 1:10). Isto ađahar, ov ka del tut snaga te ćere odova soj tano ispravno. Ov mothovđa so šaj te ćerel odova sose butenđe pomožinđa (1. Kor. 10:13). O Jehova pomožini pe slugenđe te aćhon lese verna, odolese samo hari manuša tane isključime.

12. So šaj te pomožini amen te na ćere ozbiljno greh?

¹² Svako nesavršeno manuš šaj te avel ki situacija te ćerel odova soj tano pogrešno (Jak. 1:14). Ama, tu kokri odlučineja so ka ćere ked hijan ki kušnja. I  činjenica tani so tu isi tut kontrola upro to životi. Disave manuša phenena so našti te kontrolišinen odova sar osetinena pe ili so ćerena, ama odova nane tačno. Tu šaj te kontrolišine te pogrešna želje. Čak ked hijan ki kušnja, tu šaj te odlučine te na ćere odova soj tano lošno. Odolese, molin tut svako dive, redovno proučin e Devleso Lafi, đa ko sastankija hem vaćer averenđe ando Jehova. Ako redovno ćereja akala buća, odova šaj te del tut snaga te aćhove verno e Jehovase. Niked ma bistri so o Jehova ka pomožini tut te ćere odova soj tano ispravno (Gal. 5:16).

13. Savo šukar primer aćhavđa amenđe o Josif?

¹³ Ka ovel tuće polokho te aćhove verno e Jehovase ako angleder odlučineja sar ka reagujine ko iskušenje. Ki Biblija isi primerija ando manuša kola ćerđe odova, iako hine nesavršena. Na primer, e Petefrijesi romni nekobor puti pokušinđa te ćhivel e Josife te sovel olaja. Ama, ov angleder đanđa sar ka reagujini. Ki Biblija pisini so odbinđa la hem phenđa laće: „Sar šaj te ćerav asavko baro lošnipe hem te grešinav e Devlese?“ (Post. 39:8-10). Jasno dikhaja so o Josif đanđa sar te reagujini čak angleder so oj bilo so pokušinđa. Odolese, hine lese polokho te ćerel odova soj tano ispravno ked hine ko iskušenje.

14. So valjani te ćera angleder te ova ki kušnja?

¹⁴ Sar šaj te oponašine e Josife? Tu šaj akana te odlučine so ka ćere ked ka ove ki kušnja. Sikljov odmah te phene na aso buća kola o Jehova mrzini hem čak ma razmislin olendar (Ps. 97:10; 119:165). Odova ka pomožini tut te na ćere greh ked hijan ki kušnja odolese so već đaneja so te ćere.

15. Sar šaj jekh osoba te mothovi e Jehovase so revno rodela le? (Jevrejima 11:6)

¹⁵ Šaj đaneja so arakhljan o ćaćipe hem mangeja te služine e Jehovase, ama mislineja so pana na hijan spremno aso predanje hem krštenje. Tegani valjani te ćere odova so ćerđa o kralj David. Šaj ki molitva te phene e Jehovase: „Devla penđar mo vilo hem dikh savo manuš hijum. Ispitin hem dikh me mislija kola uznemirinena man. Dikh isi li ano mande diso so cidela man ko lošno  drumo hem legar ma ko drumo andi večnost“ (Ps. 139:23, 24). O Jehova blagoslovini „okolen kola revno rodena le“. Tu mothoveja e Jehovase so revno rodeja le ađahar so deja sa tutar te rese đi o predanje hem o krštenje. (Čitin Jevrejima 11:6.)

OV PAŠE E JEHOVAJA HEM PONODRI

16-17. Sar o Jehova privucini okolen kola barilje ko ćaćipe? (Jovan 6:44)

¹⁶ O Isus phenđa so o Jehova privucinđa olese učenikonen koro peste. (Čitin Jovan 6:44.) Razmislin kobor tani šukar akija misao hem sar utičini upro tute. O Jehova dikhlja diso šukar ki svako osoba koja privucinđa koro peste. Olese tano svako manuš „sar oleso dragoceno vlasništvo“ (Pon. zak. 7:6). Ađahar dikhela hem upro tute.

¹⁷ Šaj hijan terni osoba koja barilji ko ćaćipe hem šaj mislineja so služineja e Jehovase samo sebepi te roditeljija, a na sose o Jehova privucinđa tut lično koro peste. Ama, o Jehova na dikhela tut sar deo andi disavi grupa. Ov privucini svakone posebno, pa hem okolen so barilje ko ćaćipe. Isto ađahar, i Biblija phenela: „Oven paše e Devleja hem ov ka ovel paše tumencar“ (Jak. 4:8; 1. Let. 28:9). Odova značini so ked tu ćereja prvo korako te ove paše oleja, ov ka ovel paše tuvaja sar so pisini ki Jakovljeva 4:8. (Uporedin e stihoja andi 2. Solunjanima 2:13.)

18. Sostar ka vaćera ko aver članko? (Psalam 40:8)

¹⁸ Ked ka odlučine te predajine tut hem te krstine tut, tu ka mothove so isi tut sar e Isuseso stav. Ov phenđa so ka ćerel sa so o Dad rodela olestar. (Čitin Psalam 40:8; Jevr. 10:7.) Ko aver članko ka razmotrina so šaj te pomožini tut te služine verno e Jehovase palo krštenje.