1. Kola blagoslovija isi amen sose hijam deo andi Jehovasi organizacija?

 AMEN hijam but bahtale so hijam deo andi Jehovasi porodica ko akala phare dive. O životi ko akava sveto tano sa popharo. Ama, o Jehova pomožini amen prekalo amare phralja hem phenja (Ps. 133:1). Ov pomožini amen te ovel amen bahtali porodica (Ef. 5:33–6:1). Isto ađahar, dela amen mudrost te đana so te ćera ked isi amen problemija hem dela amen mir.

2. So valjani te ćera hem sose?

² Amen valjani te da sa amendar hem ponodri te služina e Jehovase. Sose? Odolese so disavo puti šaj te povredini amen neko ando phralja hem phenja ja šaj te razočarina amen odolese so ćerđam disavi greška, pogotovo ako ćerđam la nekobor putija. Amen valjani te istrajina ki služba e Jehovase ked (1) amaro phral ja phen povredini amen, (2) ked amaro bračno drug razočarini amen ja (3) ked hijam razočarime sebepi amare greške. Ko akava članko ka razmotrina svako andi akija situacija. Isto ađahar, ka dikha so šaj te sikljova ando Jehovase trin verna sluge.

ISTRAJIN KED DISAVO PHRAL ILI PHEN POVREDINI TUT

3. Save problemija isi le e Devleso narodo?

³ Problemi. Disave phralja ili phenja šaj isi len disave navike kola nervirinena amen. Avera šaj te ćeren diso so ka razočarini amen ili šaj nane ljubazna amencar. O starešine šaj te ćeren disave greške. Sebepi odova disave šaj te sumnjinen da li tani akija e Devlesi organizacija. Umesto te nastavinen te služinen e Devlese „piko pikeja“ pe phralencar hem pe phenjencar, on šaj te ciden pe okolendar kola povredinđe len ili čak te na aven više ko sastankija (Sof. 3:9). Da li tano odova mudro? Akana ka dikha so šaj  te sikljova ando jekh verno sluga kova hine le slična problemija.

4. Kola pharipa hine le o apostol Pavle?

⁴ Biblijako primer. O apostol Pavle đanđa so olese phralja hem phenja tane nesavršena. Na primer, ked alo ki skupština ko Jerusalim disave olendar darandile olestar (Dela 9:26). Kasnije, disave vaćerđe lese palo dumo sose manglje te ćhiven averen te našaljen po poverenje upro leste (2. Kor. 10:10). O Pavle dikhlja sar jekh starešina anđa pogrešno odluka sebepi koja šaj hine avera te spotakninen pe (Gal. 2:11, 12). Isto ađahar, oleso saradnik, o Marko, but razočarinđa le (Dela 15:37, 38). Sebepi sa akala buća, ov šaj hine te cidel pe ando phralja hem te na družini pe olencar sose but povredinđe le. Ama, ov pozitivno razmislinđa ando pe phralja hem phenja hem nastavinđa te služini e Jehovase verno. Ama, so pomožinđa le te ovel istrajno?

5. So pomožinđa e Pavlese te na vazdel pe vasta ando phralja hem phenja? (Kološanima 3:13, 14; dikh i slika.)

⁵ O Pavle manglja e phralen hem e phenjen. O mangipe pomožinđa lese te na usredsredini pe ko olenge mane, nego ko olenge šukar osobine. Isto ađahar, sebepi o mangipe ov oprostinđa pe phralenđe. Sar so hem pisinđa ko Kološanima 3:13, 14. (Čitin.) Razmislin sar o Pavle oprostinđa e Markose. Iako o Marko aćhavđa le ko prvo misionarsko putovanje, o Pavle na ićerđa i holi ano peste. Kasnije, ked pisinđa e skupštinaće ko Kolos, ov pohvalinđa e Marko hem phenđa soj tano šukar saradniko kova but utešini le (Kol. 4:10, 11). Đi hine ko phanlipe ko Rim, o Pavle rodinđa baš o Marko te avel te pomožini lese (2. Tim. 4:11). O Pavle na vazdinđa pe vasta kotar pe phralja. So šaj te sikljova olestar?

6-7. So šaj te pomožini amen hem ponodri te manga amare phralen hem phenjen iako isi len mane? (1. Jovanova 4:7)

⁶ So sikljovaja? O Jehova mangela te istrajina hem te mothova mangipe amare phralenđe hem phenjenđe. (Čitin 1. Jovanova 4:7.) Ako jekh phral ja phen povredini amen, na valjani te mislina so manglje namerno te ćeren odova, već so na razmislinđe angleder diso te phenen (Posl. 12:18). O Jehova mangela pe verna slugen, iako isi len mane. Ov  na odustajini amendar ked ćeraja greške niti ićeri i holi (Ps. 103:9). Ćaće tano but važno te oponašina amare mangle Dade, e Jehova hem te oprostina okolenđe kola povredinđe amen (Ef. 4:32–5:1).

⁷ Ma bistri so sar tano o kraj sa popaše amen valjani te aćhova paše amare phralencar hem phenjencar. Šaj te ađićera so ka ovel baro progonstvo. Čak šaj te ova ko phanlipe sebepi amari vera. Tegani, amare phralja hem phenja but ka valjanen amenđe (Posl. 17:17). Te dikha so hine e Hosepeja a jekhe starešinaja kotar Španija. Ov hem avera phralja hine ćhivde ko phanlipe sebepi pi neutralnost. Ov phenela: „Ko phanlipe but tano lokho te nervirinen tut o phralja, odolese so niko amendar nane le pi privatnost. Morandiljam mangipaja te podnosina jekh jekhe hem spremno te oprostina. Odova pomožinđa amenđe te ova ko jekhipe hem te zaštitina jekh jekhe. Uzo amende hine but manuša kola na služinđe e Jehovase. Jekh puti, povredinđum mo vas hem našti hine ništa kokri te ćerav. Ama, jekh phral thovđa me šeja hem pomožinđa maje ko avera načinija. Osetinđum iskreno mangipe tegani ked najviše valjanđa maje.“ Ćaće tano but šukar akana te rešina amare problemija jekh jekheja.

ISTRAJIN KED TO BRAČNO DRUG RAZOČARINI TUT

8. Kola problemija šaj te oven ko brak?

⁸ Problemi. Ko svako brak isi problemija. Ki Biblija pisini so okola kola tane ko brak ka ovel len „neve problemija ko životi“ (1. Kor. 7:28). Sose? Odolese so o rom hem i romni tane nesavršena manuša, isi len različito karakter hem različita buća sviđinena pe ili na sviđinena pe lenđe. Isto ađahar, šaj avena ando različita kulture. Podijekh puti primetinena disave osobine kola na primetinđe angleder te len pe. Akala buća šaj te ćeren problemija ko brak. Umesto te rešinen o problemija hem te haljon so o solduj tane nesavršena, on krivinena jekh jekhe. Šaj čak podijekh puti mislinena so najšukar rešenje tano te razvedinen pe ja te odvojinen pe. b Ama, da li tano odova tačno? Akana ka dikha so šaj te sikljova andi jekh verno romni koja istrajinđa, iako hine la bare problemija ko brak.

9. Savo pharipe hine la i Avigeja?

⁹ Biblijako primer. E Avigejako rom hine o Naval aso kova i Biblija phenela so hine grubo hem lošno manuš (1. Sam. 25:3). Sigurno na hine laće lokho te živini asavke romeja. Da li i Avigeja hine la prilika te mukhel le? Ja, ked o David alo te mudari olake rome sose vređinđa ole hem olese manušen (1. Sam. 25:9-13). Tegani i Avigeja šaj hine te našel hem te mukhel e Davide te mudari le. Ama, na ćerđa odova. Umesto odova, aćhilji hem ubedinđa e Davide te na ćerel odova (1. Sam. 25:23-27). Sose ćerđa odova?

10. Sose i Avigeja verovatno na mukhlja pe rome iako hine la bare pharipa?

¹⁰ I Avigeja manglja e Jehova hem poštujinđa olese merilija ando brak. Verovatno  đanđa so o Devel phenđa e Adamese hem e Evaće ked ćerđa o prvo brak (Post. 2:24). Đanđa so o Jehova upro brak dikhela sar diso sveto. Oj manglja te šunel e Devle hem odova podstakninđa la te ćerel sa so šaj te spasini po ćher hem pe rome. Odolese, sigate reagujinđa hem ćhinavđa e Davide te mudari e Navale. Isto ađahar, hine spremno te izvinini pe aso diso so na ćerđa. O Jehova ćaće manglja akala hrabro hem šukar romnja. So šaj o romnja hem o roma te sikljon olatar?

11. (a) So o Jehova očekujini ando bračna parija? (Efešanima 5:33) (b) So sikljoveja andi Karmen? (Dikh i slika.)

¹¹ So sikljovaja? O Jehova mangela o bračna parija te poštujinen o brak hem te aćhon zajedno čak hem ako nekase tano pharo. Ov tano but bahtalo ked dikhela so o bračna parija trudinena pe te rešinen pe problemija hem te mothoven mangipe hem poštovanje jekh jekhese. (Čitin Efešanima 5:33.) Akana ka razmotrina o primer andi amari phen i Karmen. Šov berš palo odova so khuvđa ko brak, upoznajinđa e Jehovase svedokonen hem kasnije krstinđa pe. Oj phenela: „Me romese odova hić na sviđinđa pe. Ov ulo ljubomorno upro Jehova. But putija vređinđa man hem pretinđa maje so ka aćhavi man.“ Ama, i Karmen istrajinđa ko po brak. Oj 50 berš dinđa sa pestar te mothovi pe romese mangipe hem poštovanje. I Karmen pana phenela: „Sar nakhlje o berša, sikljiljum pana pošukar te haljovav sar mo rom osetini pe hem te vaćerav oleja taktično. Đanava so mo brak tano sveto anglo Jehovase jaćha. Odolese, dinđum sa mandar te arakhav mo brak. Sebepi o mangipe premalo Jehova, niked na mangljum te aćhavav me rome.“ c Ako isi tut problemija ko brak, šaj te ovel tut poverenje so o Jehova ka pomožini tut te rešine len hem te istrajine.

ISTRAJIN KED HIJAN RAZOČARIMO UPRO TUTE

12. Savo problemi šaj te ovel amen ako ćeraja disavo ozbiljno greh?

¹² Problemi. Šaj te ova but obeshrabrime ako ćeraja disavo ozbiljno greh. I Biblija vaćeri so tegani šaj te ovel amenđe but pharo (Ps. 51:17). Jekh phral kova vićini pe Robert beršencar trudinđa pe te ovel sluga pomoćnik. Ama,  ov ćerđa ozbiljno greh hem haljilo so izdajinđa e Jehova. Ov phenela: „Ked haljiljum so ćerđum, mi savest but mučinđa man. Hine man problemija sastipaja. Čak runđum đi molinđum man. Setinava man so mislinđum so o Devel više niked na ka mangel te šunel me molitve.“ Ako ćerđam disavo ozbiljno greh, šaj te ova but obeshrabrime hem te mislina so o Jehova vazdinđa pe vasta amendar (Ps. 38:4). Ako osetineja tut ađahar, razmotrin sar jekh e Jehovaso verno sluga istrajinđa, iako ćerđa ozbiljno greh.

13. Kova ozbiljno greh ćerđa o Petar hem kola greške ćerđa angleder odova?

¹³ Biblijako primer. I rat angleder o Isus te ovel mudardo, o Petar ćerđa nekobor greške sebepi kola ćerđa jekh ozbiljno greh. Odolese so hine but samouvereno, hvalinđa pe so jedino ov ka aćhol verno, čak hem ako sa avera ka aćhaven e Isuse (Mar. 14:27-29). Ama, ked đelje ko getsimansko vrt, e Petare nekobor putija lelja o sojbe (Mar. 14:32, 37-41). Palo odova, ked o manuša alje te astaren e Isuse, ov aćhavđa le (Mar. 14:50). Ko krajo, trin putija odrekninđa pe ando Isus, iako dinđa sovel so na ka ćerel odova (Mar. 14:66-71). Sar o Petar reagujinđa ked haljilo savo ozbiljno greh ćerđa? Khuvđa le o rojbe hem hine le baro osećaj andi krivica (Mar. 14:72). Šaj samo te zamislina kobor e Petarese hine pharo ked nekobor satija palo odova oleso amal, o Isus, hine mudardo.

14. So pomožinđa e Petarese istrajno te služini e Jehovase? (Dikh i slika .)

¹⁴ Isi nekobor buća kola pomožinđe e Petarese istrajno te služini e Jehovase. Ov na cidinđa pe averendar, već đelo ko pe phralja hem phenja hem on sigurno but ohrabrinđe le (Luka 24:33). Isto ađahar, ked uskrsninđa, o Isus pojavinđa pe lese, najverovatno te ohrabrini le (Luka 24:34; 1. Kor. 15:5). Kasnije, umesto te kritikujini le sebepi olese greške, o Isus phenđa pe amalenđe so ov ka ovel le bare odgovornostija (Jov. 21:15-17). O Petar đanđa so ćerđa bari greška, ama nastavinđa te trudini pe te ćerel odova soj tano šukar. Sose? Odolese so đanđa so oleso Gospodari, o Isus, na vazdinđa pe vasta olestar. Isto ađahar, e Petarese hem ponodri pomožinđe o phralja. So sikljovaja ando oleso primer?

15. Ko so o Jehova mangela te ova sigurna? (Psalam 86:5; Rimljanima 8:38, 39; dikh i slika.)

 ¹⁵ So sikljovaja? O Jehova mangela te ova sigurna so ov mangela amen hem soj tano spremno te oprostini amenđe. (Čitin Psalam 86:5; Rimljanima 8:38, 39.) Ked grešinaja, amen isi amen osećaj andi krivica. Odova tano normalno hem šukar. Ama, na valjani te mislina so o Jehova više na mangela amen hem so našti te oprostini amenđe. Umesto odova, valjani odmah te roda pomoć. O Robert, kolestar angleder vaćerđam, phenela: „Me ćerđum greh sose osloninđum man upro mande ked hine man kušnje.“ Ov haljilo so valjani te vaćeri e starešinencar. O Robert phenela: „Ked ćerđum odova, odmah osetinđum e Jehovaso mangipe prekalo lende. O starešine na odustajinđe mandar, već pomožinđe maje te haljovav so o Jehova na irinđa maje po dumo.“ Šaj te ova sigurna so o Jehova mangela amen hem soj tano spremno te oprostini amenđe ako ando vilo kajinaja amen, rodaja pomoć hem daja sa amendar te na ćera isto greška (1. Jov. 1:8, 9). Odova pomožini amen te na vazda amare vasta kokri amendar ked spotakninaja amen ja ked ćeraja disavo ozbiljno greh.

16. Sose hijan odlučno istrajno te služine e Jehovase?

¹⁶ O Jehova but cenini odova so trudinaja amen te služina lese ko akala phare poslednja dive. Uzi olesi pomoć, amen šaj te istrajina iako hijam razočarime sebepi amare ili averenge greške. Amen šaj hem ponodri te manga amare phralen hem phenjen hem te oprostina lenđe, čak iako povredinđe amen. Šaj te mothova so mangaja e Devle hem so poštujinaja o brak ađahar so daja sa amendar te rešina o problemija kola pojavinena pe. Ako ćerđam disavo greh, šaj te roda e Jehovastar pomoć, te prihvatina oleso mangipe hem oproštaj hem te nastavina te služina lese. Šaj te ova sigurna so but ka blagoslovini amen ako „na ćhinavaja te ćera odova soj tano šukar“ (Gal. 6:9).