1. So disave e Jehovase sluge pućena pe?

 AMEN hijam but bahtale so đanaja so o Jehova tano zadovoljno pe narodoja. Ki Biblija pisini so „o Jehova radujini pe pekle narodose“ (Ps. 149:4). Ama, podijekhvar disave tane odobor obeshrabrime so pućena pe: „Da li tano o Jehova zadovoljno mancar?“ Ko purano vreme, but ando Jehovase sluge pućlje pe isto odova (1. Sam. 1:6-10; Jov 29:2, 4; Ps. 51:11).

2. Kasa tano o Jehova zadovoljno?

² I Biblija jasno mothovi so o nesavršena manuša šaj te ćeren e Jehova te ovel zadovoljno. Sar? Amen valjani te mothova vera ko Isus Hrist hem te krstina amen (Jov. 3:16). Odoleja mothovaja averenđe so kajinaja amen aso amare greške hem obećinaja e Jehovase so ka ćera olesi volja (Dela 2:38; 3:19). Ov tano but bahtalo ked ćeraja akala buća sose on mothovena so mangaja te ova paše oleja. Sa đi daja sa amendar te ispunina amaro obećanje, o Jehova tano zadovoljno amencar hem šaj te ova olese amala (Ps. 25:14).

3. Sostar ka vaćera ko akava članko?

³ Sose podijekh puti disave mislinena so o Jehova nane zadovoljno olencar? Sar o Jehova mothovi soj tano zadovoljno amencar? Sar šaj jekh hrišćanin te ovel sigurno so o Jehova tano zadovoljno oleja?

SOSE ŠAJ DISAVE MISLINENA SO O JEHOVA NANE ZADOVOLJNO OLENCAR?

4-5. Ko so šaj te ova sigurna iako mislinaja so na hijam vredna?

⁴ But amendar ando tiknipe isi len osećaj so na vredinena (Ps. 88:15). Jekh phral kova vićini pe Adrijan, phenela:  „Uvek mislinđum so na vredinava. Setinava man so ked hijum le tikno molinđum man mi porodica te živini ko raj, iako hijum le sigurno so na hijum dovoljno šukar te ovav uduri.“ O Toni kova na barilo ko ćaćipe, phenela: „Me roditeljija niked na phenđe maje so mangena man ili soj tane ponosna upro mande. Sebepi odova mislinđum so niked na ka oven zadovoljna mancar.“

⁵ Ako podijekh puti mislineja so na vredineja, ma bistri so o Jehova privucinđa tut koro peste (Jov. 6:44). Ov dikhela odova soj tano šukar koro tute, čak iako tu na dikheja odova. Isto ađahar, ov tačno đanela savo manuš hijan (1. Sam. 16:7; 2. Let. 6:30). Odolese, šaj te verujina ked phenela so hijam lese dragocena (1. Jov. 3:19, 20).

6. Sar o Pavle osetinđa pe ked razmislinđa ando greške kola angleder ćerđa?

⁶ Disave amendar angleder te upoznajinen o ćaćipe šaj ćerđe disave buća sebepi kola pana osetinena krivica (1. Petr. 4:3). Avera kola verno služinena e Jehovase šaj pana borinena pe protiv disave slabostija. Sar tano tuvaja? Da li podijekh puti mislineja so o Jehova našti te oprostini tuće? Ako ja, tegani šaj te utešini tut odova so hem avera e Jehovase verna sluge osetinđe pe ađahar. Na primer, o apostol Pavle osetinđa pe but lošno ked razmislinđa ando pe greške (Rimlj. 7:24). Naravno, o Pavle kajinđa pe hem krstinđa pe. Ama, pese phenđa soj tano „najtikno maškaro apostolija“ hem soj tano „najbaro“ grešniko (1. Kor. 15:9; 1. Tim. 1:15).

7. So na valjani te bistra?

⁷ Amaro nebesko Dad dela amen po lafi so ka oprostini amenđe ako kajinaja amen (Ps. 86:5). Odolese, ako ćaće kajinđam amen, šaj te ova uverime so ov ka oprostini amenđe (Kol. 2:13).

8-9. So šaj te pomožini amen te na mislina so o Jehova nane zadovoljno amencar?

⁸ Sare amen mangaja te služina e Jehovase najšukar so šaj. Ama, disave mislinena so niked na ka ćeren dovoljno e Jehovase hem so sebepi odova ov na ka ovel zadovoljno olencar. Jekh phen koja vićini pe Amanda, phenela: „Mislinava so te dav mo najšukar e Jehovase značini so uvek valjani te ćerav diso pobuter. But putija očekujinava te ćerav pobuter nego so šaj. Ked na ispuninava me očekivanja, mislinava so o Jehova tano razočarimo sar so hem me hijum razočarimi kokri mancar.“

⁹ So šaj te pomožini amen te na mislina so o Jehova nane zadovoljno amencar? Ma bistri so o Jehova nane strogo. Ov niked na rodela amendar pobuter ando odova so šaj te da le. Cenini so god ćeraja, sa đi tano odova ando vilo. Isto ađahar, razmislin ando primerija kotar Biblija ando manuša kola celone vileja verno služinđe lese. Na primer, razmislin ando apostol Pavle. Ov beršencar hine but revno, but putujinđa hem pomožinđa bute skupštinenđe. Ama, ked o buća ko oleso životi meninđe pe hem ked našti hine više te propovedini sar angleder, da li o Jehova na hine više zadovoljno oleja? Na. Ov hem ponodri ćerđa sa so šaj hem o Jehova blagoslovinđa le (Dela 28:30, 31). Isto ađahar, našti uvek isto te da e Jehovase, ama odova soj tano olese važno tano sose diso ćeraja. Akana ka dikha nekobor načinija sar o Jehova mothovi soj tano zadovoljno amencar.

 SAR O JEHOVA MOTHOVI SOJ TANO ZADOVOLJNO AMENCAR?

10. Sar šaj te „šuna“ e Jehova sar phenela amenđe soj tano zadovoljno amencar? (Jovan 16:27)

¹⁰ Prekali Biblija. O Jehova mangela te mothovi amenđe so mangela amen hem soj tano zadovoljno amencar. Ki Biblija isi amen duj situacije ked e Isusese phenđa soj tano oleso manglo Ćhavo hem soj tano pali olesi volja (Mat. 3:17; 17:5). Da li mangeja te šune sar o Jehova phenela tuće soj tano zadovoljno tuvaja? Ov na ka vaćeri tuvaja ando nebo, ama ka ćerel odova prekalo po Lafi. O Isus savršeno oponašinđa pe Dade. Odolese, ked čitinaja so o Isus phenđa pe učenikonđe, amen šaj te zamislina so o Jehova odola lafija phenela amenđe. (Čitin Jovan 16:27; Jov. 15:9, 15.)

11. Sose o kušnje na značinena so o Jehova nane zadovoljno amencar? (Jakovljeva 1:12)

¹¹ Prekalo odova so ćerela. O Jehova jedva ađićeri te pomožini amen. Ama, podijekh puti šaj te dozvolini te ovel amen disave kušnje, sar so o Jov hine le (Jov 1:8-11). O kušnje na značinena so o Jehova nane zadovoljno amencar. Umesto odova, dena amen prilika te mothova kobor tano baro amaro mangipe premalo Jehova hem kobor baro poverenje isi amen upro leste. (Čitin Jakovljeva 1:12.) Đi trajinena amare kušnje, šaj te dikha kobor o Jehova mangela amen hem sar pomožini amen te istrajina.

12. So šaj te sikljova ando Dmitrij?

¹² Razmislin ando amaro phral kotar Azija kova vićini pe Dmitrij. Ov našalđa pi buti hem masekoncar našti hine te arakhi aver. Odolese odlučinđa te đal pana pobuter ki služba hem ađahar te mothovi so isi le poverenje ko Jehova. Nakhlje nekobor masek, a ov pana našti hine te arakhi buti. Iznenada dobinđa jekh ozbiljno nabormipe kova peravđa le ko kreveti. Ov počminđa te mislini so nane šukar rom, dad hem pućlja pe da li tano o Jehova zadovoljno oleja. Jekh rat, olesi ćhaj štampinđa lese ko jekh lil o lafija ando Isaija 30:15, kuri pisini: „Arakhen o mir hem o pouzdanje, odova ka ovel tumari snaga.“ Anđa lese odova lil ko kreveti hem phenđa lese: „Tata, ked osetineja tut lošno setin tut ko akava stih.“ O Dmitrij haljilo so uzi Jehovasi pomoć olesi porodica isi la sa so valjani  laće, hajbe, šeja hem than kaj te živini. Ov phenela: „Odova so me valjanđum te ćerav tano te arakhav mo mir hem pouzdanje.“ Ako isi tut slična pharipa, šaj te ove sigurno so o Jehova ka brinini pe tutar hem ka pomožini tut te istrajine.

13. Prekalo kaste o Jehova šaj te phenel amenđe soj tano zadovoljno amencar hem sar?

¹³ Prekalo phralja hem phenja. O Jehova prekalo lende šaj te mothovi amenđe soj tano zadovoljno amencar. Na primer, ov šaj te podstaknini nekas te ohrabrini amen baš tegani ked odova valjani amenđe. Jekh phen kotar Azija doživinđa odova ked hine la baro stres. Našalđa pi buti hem but naborsalji. Palo odova, olako rom ćerđa ozbiljno greh hem više našti hine te služini sar starešina. Oj phenela: „Našti hine te haljovav sose akava desini pe. Mislinđum so me ćerđum diso lošno hem so o Jehova nane više zadovoljno mancar.“ Amari phen usrdno molinđa pe e Jehovase te uverini la soj tano zadovoljno olaja. Sar mothovđa laće odova? Oj phenela: „O starešine vaćerđe mancar hem pomožinđe maje te haljovav so o Jehova pana mangela man.“ Palo disavo vreme, oj palem molinđa pe e Jehovase asi pomoć. Oj phenela: „Odova isto dive dobinđum jekh lil ando phralja hem phenja kotar skupština. Ked čitinđum odova so pisinđe, osetinđum so o Jehova šunđa mi molitva.“ But putija o Jehova šaj te phenel amenđe soj tano zadovoljno amencar ako pažljivo šunaja so phenena amare phralja hem phenja (Ps. 10:17).

14. Kova tano aver način sar o Jehova mothovi soj tano zadovoljno amencar?

¹⁴ Isto ađahar, o Jehova šaj te mothovi soj tano zadovoljno amencar ađahar so podstaknini amare phralen hem phenjen  te den amen savet ked odova valjani. Na primer, ko prvo veko, o Jehova phenđa e Pavlese te pisini 14 lila e phralenđe hem e phenjenđe. Ko odola lila, o apostol Pavle dinđa len disave savetija ko jekh ljubazno način. Sose o Jehova phenđa e Pavlese te pisini odola savetija? O Jehova tano šukar Dad hem ukorini pe ćhaven sose mangela len (Posl. 3:11, 12). Odolese, ako neko dinđa amen disavo savet andi Biblija odova na značini so o Jehova nane zadovoljno amencar, već so but mangela amen (Jevr. 12:6). Ko kola pana načinija o Jehova mothovi soj tano zadovoljno amencar?

AVERA DOKAZIJA SO O JEHOVA TANO ZADOVOLJNO AMENCAR

15. Kase o Jehova dela po sveti duh hem sose šaj te ova sigurna ko odova?

¹⁵ O Jehova dela po sveti duh okolenđe kolencar tano ov zadovoljno (Mat. 12:18). Amen šaj te puća amen: „Da li mothovava o osobine kola tane plod ando Devleso sveti duh?“ Da li primetinđan so akana hijan postrpljivo averencar, nego angleder te penđare e Jehova? So pobuter trudineja tut te razvijine o osobine kola tane plod ando Devleso duho, ka ove posigurno so o Jehova tano zadovoljno tuvaja. (Dikh o okvir „ O plod ando duho tano. . .“)

16. Kas o Jehova koristini te propovedini i šukar vest hem sar osetineja tut sebepi odova? (1. Solunjanima 2:4)

¹⁶ O Jehova okolenđe kolencar tano zadovoljno dinđa te propovedinen i šukar vest. (Čitin 1. Solunjanima 2:4.) Amari phen koja vićini pe Džoslin uverinđa pe ko odova. Jekh dive, ked uštinđa ando sojbe osetinđa pe but uznemireno. Oj phenela: „Na hine man snaga ništa te ćerav hem osetinđum man so na hijum korisno. Hijum le pioniri hem odova dive valjanđum te đav ki služba. Odolese, uštinđum, molinđum man hem đeljum ki služba.“ Odova sabaj i Džoslin upoznajinđa jekha šukar romnja koja vićini pe Meri. Odija romni manglja te proučini i Biblija. Nekobor masek palo odova, i Meri phenđa laće so odova dive ked kucinđa ko olake udara oj molinđa pe e Devlese te pomožini la. Ked akana razmislini ando akava iskustvo, i Džoslin phenela: „Osetinava  ka phene o Jehova vaćeri maje: ’Me hijum zadovoljno tuvaja.‘ “ Naravno, na ka reagujinen sare ađahar. Ama, šaj te ova sigurna so o Jehova tano zadovoljno amencar ked daja sa amendar te propovedina i šukar vest.

17. So šaj te sikljova ando odova so i Viki phenđa kotar otkupnina? (Psalam 5:12)

¹⁷ Prekali otkupnina o Jehova oprostini o grehija okolenđe kolencar tano ov zadovoljno (1. Tim. 2:5, 6). Ama so ako tu pana mislineja so o Jehova nane zadovoljno tuvaja, iako verujineja ki otkupnina hem krstinđan tut? Ma bistri so amen našti uvek te uzdajina amen ko amare osećanja, ama odolese šaj uvek te uzdajina amen ko Jehova. Ov upro okola kola isi len vera ki otkupnina dikhela sar pravedna hem but ka blagoslovini len. (Čitin Psalam 5:12; Rimlj. 3:26.) Amare phenjaće koja vićini pe Viki but pomožinđa odova so razmislinđa andi otkupnina. Jekh dive, palo odova so hor razmislinđa andi otkupnina, oj haljilji: „O Jehova beršencar mothovđa so mangela man, ama me samći phenđum lese: ’Tu našti te mange asavke osoba savi hijum me. Te Ćhavesi žrtva našti te ućhari me grehija.‘ “ Ked razmislinđa andi otkupnina, počminđa te osetini e Jehovaso mangipe. Isto ađahar, ked amen razmislinaja andi otkupnina šaj te osetina e Jehovaso mangipe hem soj tano zadovoljno amencar.

18. Ko so šaj te ova uverime ako hem ponodri mangaja amare nebesko Dade?

¹⁸ Iako šaj ka trudina amen te primenina o predlogija ando akava članko, podijekh puti palem ka osetina amen obeshrabrime hem ka puća amen da li tano o Jehova zadovoljno amencar. Ako odova desini pe, ma bistri so o Jehova tano zadovoljno okolencar „kola mangena le“ (Jak. 1:12). Odolese, de sa tutar te ove paše oleja hem te dikhe sar mothovi soj tano zadovoljno tuvaja. Ma bistri so o Jehova „nane dur nikastar amendar“ (Dela 17:27).