1-2. Kola blagoslovija ka oven tut palo krštenje?

 AMEN hijam bahtale so krstinđam amen hem uljam deo andi Jehovasi porodica. Ćaće tani bari čast te ova paše e Jehovaja. Složinaja amen e lafencar kola o psalmista David pisinđa: „Bahtalo tano o manuš kole tu [Jehova] birineja hem aneja le uzo tute te ovel ko dvorija ando to hram“ (Ps. 65:4).

² O Jehova na dozvolini sarinenđe te oven ko dvorija ando oleso hram. Sar so vaćerđam ko okova članko, ov birini te ovel paše okolencar kola mothovđe so mangena te oven oleja paše (Jak. 4:8). Ked predajineja tut e Jehovase hem krstineja tut, tu oveja paše oleja ko jekh posebno način. Šaj te ove sigurno so palo to krštenje but ka blagoslovini tut hem so „ništa na ka nedostajini [tuće]“ (Mal. 3:10; Jer. 17:7, 8).

3. Koja važno odgovornost isi len o hrišćanija kola tane predajime hem krstime? (Propovednik 5:4, 5)

³ O krštenje tano samo početak andi ti služba e Jehovase. Palo odova, sigurno ka mange te de to najšukar te šaj te ićere tut ko to obećanje te služine e Jehovase, čak ked hijan ki disavi kušnja. (Čitin Propovednik 5:4, 5.)  Sar e Isuseso učeniko, ka valjani te sledine oleso primer hem te ićere tut ko olese zapovestija (Mat. 28:19, 20; 1. Petr. 2:21). Akava članko ka pomožini tut te ćere odova.

SLEDIN E ISUSE IAKO ISI TUT KUŠNJE HEM PHARIPA

4. Ko kova način e Isusese učenikija akharena „po mučeničko stubo“? (Luka 9:23)

⁴ Palo krštenje, to životi na ka ovel bizo problemija. U stvari, o Isus phenđa so olese učenikija svako dive ka akharen „po mučeničko stubo“. (Čitin Luka 9:23.) Da li odoleja o Isus manglja te phenel so olese učenikija uvek ka patinen? Na. Ov samo manglja te phenel so uzo blagoslovija, ka ovel len hem problemija hem so čak disave olendar ka oven but bare (2. Tim. 3:12).

5. Kola blagoslovija o Isus obećinđa so ka dobinen okola kola ćerena žrtve?

⁵ Šaj ti porodica protivinđa pe tuće ja žrtvujinđan disave materijalna buća te šaj te ćhive o Kraljevstvo ko prvo than (Mat. 6:33). Ako tano ađahar, tegani ov sigurno so o Jehova dikhela sa so ćereja olese (Jevr. 6:10). Verovatno uverinđan tut sar ispuninđe pe akala e Isusese lafija: „Verujinen maje, nane niko ko aćhavđa po ćher, ja pe phralen, ja pe phenjen, ja pe daja, ja pe dade, ja pe ćhaven, ja pe njive sebepi moklo ja sebepi i šukar vest, a akana ko akava vreme, te na dobini 100 puti poviše hem ćhera, hem phralja, hem phenja, hem daja, hem ćhave, hem njive, ama zajedno odoleja hem o progonstvo, a ko vreme so avela večno životi“ (Mar. 10:29, 30). O blagoslovija kola dobinđan sigurno tane pobare andi bilo koja žrtva koja ćerđan (Ps. 37:4).

6. Sose hem palo krštenje ka valjani te borine tut protiv i „želja ando telo“?

⁶ Palo krštenje, pana ka valjani te borine tut protiv i „želja ando telo“ (1. Jov. 2:16). U stvari, tu hem ponodri ka ove e Adameso nesavršeno potomko. Podijekh puti, ka osetine tut sar o apostol Pavle kova pisinđa: „Andre ko mo vilo, me ćaće uživinava ko Devleso zakon, ama ko mo telo dikhava aver zakon kova borini pe protiv o zakon ko me mislija hem akava zakon ando greh ićeri man sar robo“ (Rimlj. 7:22, 23). Šaj ka obeshrabrine tut so pana ka valjani te borine tut protiv o pogrešna želje. Ama, ako razmislineja ando obećanje kova dinđan e Jehovase ked predajinđan tut, ka ovel tut snaga te borine tut ked hijan ki disavi kušnja. Sar?

7. Sar to predanje ka pomožini tut hem ponodri te aćhove verno e Jehovase?

⁷ Ked predajinđan tut e Jehovase, tu odrekninđan tut kokri tutar. Odova značini so odbacinđan sa o želje hem o ciljija kola nane premali Jehovasi volja (Mat. 16:24). Odolese, ked ka ovel tut disavi kušnja na ka puće tut da li te aćhove verno e Jehovase ili na. Tu već odlučinđan odova hem odlučno hijan te radujine le. Tegani ka ove sar o Jov, kova iako hine le bare pharipa, phenđa: „Sa đi na merava, na ka ćhinavav te ovav besprekorno“ (Jov 27:5).

8. Sar šaj odova so razmislineja ando to predanje te pomožini tut te cide tut ando kušnje?

⁸ Ked razmislineja ando to predanje, odova šaj te del tut snaga te aćhove verno e Jehovase ko kušnje. Na primer, da li bi flertujineja nekase romeja ja romnjaja? Sigurno na! Tu već obećinđan e Jehovase so niked na ka ćere diso ađahar.  Ako na mukheja o pogrešna osećanja te astaren koreno ko to vilo, ka pomožine kokri tuće sose kasnije na ka valjani te borine tut protiv olende. Tu ka „cide tut kotar drumo ando rumime manuša“ (Posl. 4:14, 15).

9. Sar odova so razmislineja ando to predanje ka pomožini tut te ćhive e Jehova ko prvo than?

⁹ So ako arakhljan buti koja šaj te ćhinavi tut te ove redovno ko sastankija? Tu već đaneja so te ćere. Sigurno već angleder odlučinđan te na prihvatine asavki buti. Odolese, na ka ove ki kušnja te prihvatine asavki buti hem te nadine tut so kasnije ka arakhe disavo način te ćhive e Jehova ko prvo than. E Isuseso primer šaj but te pomožini tut. Ov hine odlučno te ugodini pe Dadese. Sar oleste, hem tu valjani te ove odlučno te ugodine e Jehovase (Mat. 4:10; Jov. 8:29).

10. Sar o Jehova ka pomožini tut „te sledine“ e Isuse hem palo krštenje?

¹⁰ O problemija hem o kušnje dena tut prilika te mothove so hijan odlučno te sledine e Isuse. Šaj te ove sigurno so o Jehova ka pomožini tuće. Ki Biblija pisini: „O Devel tano verno, hem na ka mukhel te oven iskušime pobuter odolestar so šaj te izdržinen, nego ka pomožini tumen ked ka avel o iskušenje, te šaj te izdržinen“ (1. Kor. 10:13).

SAR ŠAJ HEM PONODRI TE SLEDINE E ISUSE?

11. Kova tano jekh ando najšukar način hem ponodri te sledina e Isuse? (Dikh i slika.)

¹¹ O Isus služinđa e Jehovase celone vileja hem često molinđa pe lese (Luka 6:12). Jekh ando najšukar način te sledine e Isuse hem palo krštenje tano te nastavine te ćere o buća kola ka pomožinen  tut te ove pana popaše e Jehovaja. Ki Biblija pisini: „Ama kobor god đi akana napredujinđam, valjani hem ponodri te napredujina, te đa odole isto drumoja“ (Fil. 3:16). Sar đala o vreme, ka šune disave iskustvija kotar phralja hem phenja kola odlučinđe te ćeren diso pobuter ki služba e Jehovase. Šaj đelje ki Škola aso objavitelja ando Kraljevstvo ja đelje te živinen odothe kuri tani pobari potreba. Ako šaj te ćhive tuće asavko cilj, odova tano but šukar. E Jehovaso narodo tano spremno te proširini pi služba (Dela 16:9). Ama, so ako tu našti te ćere odova? Ma mislin so pohari vredineja ando okola so šaj te ćeren odova. Najvažno tano te istrajina đi o krajo (Mat. 10:22). Ma bistri so tu radujineja e Jehova ked ćereja sa so šaj ko te okolnostija. Odova tano jekh važno način sar sledineja e Isuse hem palo krštenje (Ps. 26:1).

12-13. So šaj te ćere ako mislineja so na hijan više odobor revno?(1. Korinćanima 9:16, 17; dikh o okvir „ Aćhov ki trka“)

¹² Ama, so ako palo disavo vreme osetineja so na molineja tut ando vilo hem so na uživineja više ki služba? So ako više na uživineja đi čitineja i Biblija sar angleder? Ako odova desini pe palo to krštenje, ma mislin so o Jehova lelja tutar po duho ja odbacinđa tut. Tu hijan nesavršeno manuš hem te osećanja šaj te meninen pe. Ako osetineja so na hijan više odobor revno razmislin ando apostol Pavle. Ov manglja te oponašini e Isuse, ama đanđa so podijekh puti na ka ovel le bari želja te ćerel odova so valjani. (Čitin 1. Korinćanima 9:16, 17.) Ov phenđa: „Čak hem ako odova ćerava protiv mi volja, ipak ćerava o zadatko  kova tano manđe dindo.“ Avere lafencar, o Pavle hine odlučno te ćerel po zadatko bizo obzir sar osetinđa pe ko odova momenti.

¹³ Isto ađahar, ma mukh te nesavršena osećanja te anen odluke umesto tute. Ov odlučno te ćere odova soj tano ispravno bizo obzir sar osetineja tut. Ako hem ponodri ćereja odova soj tano ispravno, sar đala o vreme te osećanja ka meninen pe. Đi tegani, ako redovno proučineja, molineja tut, đaja ko sastankija hem ki služba odova ka pomožini tut te sledine e Isuse hem palo krštenje. Ked te phralja hem phenja dikhena kobor istrajineja, odova šaj but te ohrabrini len (1. Sol. 5:11).

ISPITINEN TUMEN HEM PROVERINEN KOKRI TUMEN

14. So valjani redovno te ispitine hem sose? (2. Korinćanima 13:5)

¹⁴ Palo krštenje but tano važno redovno te ispitina kokri amen. (Čitin 2. Korinćanima 13:5.) Sar nakhela o vreme, šukar tano te razmislina ando amare navike te šaj te dikha da li molinaja amen svako dive, da li čitinaja hem proučinaja i Biblija hem da li đaja ko sastankija hem ki služba. Trudin tut te uživine đi ćereja akala buća hem razmislin sar šaj pana pobuter te pomožinen tuće. Šaj te puće tut: „Da li šaj te objasninav o osnovna buća andi Biblija? Sar šaj pana pobuter te uživinav ki služba? Kobor tane me molitve konkretna hem da li mothovena so potpuno uzdajinava man upro Jehova? Da li đava redovno ko sastankija? So šaj te ćerav te šaj pažljivo te šunav hem pana pobuter te učestvujinav ko sastankija?

15-16. So sikljovaja ando amaro phral o Robert?

¹⁵ But tano važno te đane kola tane te slabostija. Amaro phral o Robert phenela: „Ked hine man 20 berš ćerđum buti ekvaš dive. Jekh dive pali buti, jekh koleginica vićinđa man te đav koro late ćhere. Phenđa maje so ka ova kokri hem so šukar ka provodina amen. Ki početka, phenđum laće nekobor izgovorija, ama ko krajo jasno phenđum so na mangava hem objasninđum laće sose.“ O Robert cidinđa pe andi kušnja hem odova tano pohvalno. Ama, kasnije razmislinđa ando odova so hine hem haljilo so valjanđa averćhane te reagujini. Ov priznajini: „Na odbinđum me koleginica odobor odlučno hem sigate sar so o Josif  odbinđa e Petefrijese romnja (Post. 39:7-9). U stvari, hijum le iznenadimo kobor pharo hine maje te odbinav la. Akija situacija pomožinđa man te dikhav so valjani te zorjaćerav mo amalipe e Jehova.“

¹⁶ Ka ovel šukar hem tu te ispitine tut sar o Robert. Čak hem ako aćhiljan verno ki disavi kušnja, puć tut: „Kobor vreme valjanđa maje te phenav na?“ Ako dikheja so valjani te popravine tut ko diso, ma obeshrabrin tut. Ov bahtalo so akana đaneja te slabostija. Vaćer e Jehovase te slabostija hem ćer o buća kola ka zorjaćeren ti želja te šune le (Ps. 139:23, 24).

17. So o Robert uspinđa odolese so aćhilo verno e Jehovase?

¹⁷ Amen šaj pana diso te sikljova ando Roberteso iskustvo. Ov phenela: „Palo odova so odbinđum me koleginica, oj phenđa maje: ’Nakhljan o test!‘ Pućljum la ko so mislini. Objasninđa maje so olako amal kova angleder hine e Jehovaso svedoko phenđa laće so sa o terne Svedokija garavindoj ka ćeren odova soj tano pogrešno ako isi len prilika. Odolese, oj phenđa pe amalese so ka proverini da li hem me hijum asavko. Tegani haljiljum kobor hine maje drago so na lađaćerđum e Jehovaso anav.“

18. So hijan odlučno te ćere palo krštenje? (Dikh o okvir „ Duj but korisna člankija“.)

¹⁸ Ked predajineja tut e Jehovase hem krstineja tut, tu mothoveja so mangeja te posvetine oleso anav bizo obzir so ka desini pe. Šaj te ove sigurno so o Jehova đanela kola problemija isi tut hem kotar kola kušnje cideja tut. Ov ka blagoslovini odova so trudineja tut te aćhove lese verno. Prekalo po sveti duh, ov šaj te del tut snaga koja valjani tuće (Luka 11:11-13). Uzi Jehovasi pomoć, ka uspine te sledine e Isuse hem palo krštenje.