1. So podijekh puti pućaja amen?

SARE amen đanaja so pana hari sa o religije kola lađaćerena e Devle ka oven uništime, so o Gog ando Magog ka napadini amen hem so o Armagedon ka avel. Ked razmislineja ando akala buća, da li podijekh puti brinineja tut ja daraja? Da li nekad pućljan tut: „Ked sa akava ka ovel, da li ka aćhovav verno đi o krajo?“ Ako razmislinđan akalestar, tegani e Isusese lafija, ando kola ka vaćera ko akava članko, but ka pomožinen tut. O Isus phenđa pe učenikonenđe: „Ma brininen tumen. Mothoven vera“ (Jov. 14:1). I zorali vera ka pomožini amen te istrajina.

2. Sar šaj te zorjaćera amari vera hem sostar ka vaćera ko akava članko?

² Amen šaj te zorjaćera amari vera ađahar so ka razmislina ando odova so akana ćeraja ked isi amen kušnje. Tegani, ka dikha kuri amari vera valjani te ovel pana pobari. Svako puti ked nakhaja disavi kušnja, amari vera ovela pana pozorali. Odova ka pomožini amen te istrajina ko kušnje kola ka ovel amen. Ko akava članko, ka dikha štar situacije kola mothovđe so e Isusese učenikonenđe valjanđa pobari vera. Isto ađahar, ka dikha sar šaj avdije te istrajina ko slična problemija hem sar šaj odova te pomožini amen te ova spremna aso avera kušnje kola ađićerena amen.

3. So o lafija ando Matej 6:30, 33 pomožinena amen te haljova?

³ Normalno tano o murš te brinini pe andi pi porodica hem ando odova te ovel len so te han, so te uraven hem kaj te živinen. Ama, ko akava pharo vreme nane uvek lokho  te ćerel odova. Podijekh puti, o phralja našalena pi buti hem iako dena sa pestar te arakhen aver buti, but putija našti te arakhen la. Avera morandilje te odbinen disavi buti sose nane amenđe. Ko asavke situacije, valjani te ovel amen vera so o Jehova ka brinini pe te ovel amen odova soj tano amenđe potrebno. O Isus akalestar vaćerđa pe učenikonenđe ki Propoved ki gora. (Čitin Matej 6:30, 33.) Ked hijam potpuno sigurna so o Jehova na ka aćhavi amen, tegani šaj te ćhiva o Kraljevstvo ko prvo than ko amaro životi. Ked dikhaja sar o Jehova brinini pe amendar hem andi amari porodica, tegani o Jehova tano amenđe sa popaše hem amari vera tani sa pobari.

4-5. Sar o Jehova mothovđa so brinini pe andi porodica Kastro?

⁴ Te dikha sar jekh porodica andi Venecuela dikhlja sar o Jehova brinini pe olendar. Angleder, i porodica Kastro živinđa but skromno hem ćerđa buti ki pi farma. Ama, disave naoružana manuša alje, lelje olengi phuv, a olen uspudinđe ando odova than. O dad, kova vićini pe Migel, phenela: „Pućljam disave manušen te mukhen amen ki olengi njiva te sadina diso hajbase hem akana odolestar zavisinaja. Svako dive molinava man te ovel amen odova so valjani amenđe aso odova dive.“ Olengo životi nane lokho. Sebepi so isi len vera so o Jehova ka del len odova so valjani lenđe, on redovno đana ko sastankija hem ki služba. On ćhivena o Kraljevstvo ko prvo than ko po životi, a o Jehova dela len odova so ćaće valjani lenđe.

⁵ Đi hine len sa akala pharipa, o Migel hem olesi romni i Juri, razmislinđe ando odova sar o Jehova brinini pe olendar. Disavo puti, o Jehova pomožinđa lenđe prekalo phralja ađahar so on anđe lenđe diso hajbase ja arakhlje e Migelese disavi buti. A disavo puti, i podružnica bićhalđa lenđe humanitarno pomoć. O Jehova niked na aćhavđa len. Ked dikhlje kobor o Jehova brinini pe olendar, olengi vera ulji pana pobari. Ked olengi najphureder ćhaj, i Džozelin, razmislini ando odova sar o Jehova pomožinđa lenđe, oj phenela: „But ohrabrini man ked dikhava sar o Jehova brinini pe amendar. Ov tano mo amal hem uverimi hijum so ov uvek ka pomožini amenđe. O kušnje kola nakhljam pomožinena amen te ova spremna aso avera kušnje kola ađićerena amen.“

6. Sar šaj te zorjaćere ti vera ked nane tut dovoljno pare aso buća kola valjani tuće?

⁶ But tano pharo ked nane tut dovoljno pare te ćine odova so valjani te porodicaće. Ama, baš tegani šaj te ćere ko odova te ovel tut pana pobari vera. Molin tut hem čitin e Isusese lafija ando Matej 6:25-34 hem palo odova hor razmislin ando odova  so čitinđan. Isto ađahar, razmislin ando iskustvija kola mothovena so o Jehova pomožini okolenđe kola ćhivena o Kraljevstvo ko prvo than (1. Kor. 15:58). Odova ka pomožini tuće te haljove sar so o Jehova pomožinđa olenđe, ađahar ka pomožini hem tuće. Ov đanela so valjani tuće hem sar te del tut odova. Ked ka dikhe sar o Jehova brinini pe tutar, ti vera ka ovel pana pobari hem odova ka pomožini tuće te istrajine ko pana pobare kušnje (Avak. 3:17, 18).

7. Premalo Matej 8:23-26, sar jekh bari oluja mothovđa so e Isusese učenikonenđe valjanđa pobari vera?

⁷ Ked o Isus hem olese učenikija putujinđe čamcoja, hine jekh bari oluja. O Isus odova događaj koristinđa te pomožini pe učenikonenđe te haljon so valjani lenđe pobari vera. (Čitin Matej 8:23-26.) Odija oluja hine odobor zorali so o pani khuvđa ko čamco, ama tegani o Isus suća. O učenikija but darandilje, vazdinđe le ando sojbe hem pućlje le te pomožini lenđe. Ov phenđa lenđe: „Sose odobor darandiljen? Pana li nane tumen vera?“ O učenikija valjanđe te haljon so o Jehova tano sposobno te arakhi hem e Isuse hem okolen soj tane oleja. So sikljovaja ando akava? Valjani amenđe zorali vera te šaj te nakha o „bare oluje“ ko amaro životi.

8-9. So doživinđa i Anel hem so pomožinđa laće?

⁸ Te dikha o primer andi amari phen i Anel koja živini ko Portoriko. Palo odova so nakhlja, olaki vera ulji pana pobari. Oj ćaće doživinđa jekh bari oluja. Ko 2017. berš, o uragan Marija peravđa olako ćher hem oj aćhilji bizi buti. Oj phenela: „Ko odola phare dive, but brininđum man. Ama, sikljiljum te ovel man poverenje upro Jehova ađahar so molinđum man hem so na mukhljum o brige te ćhinaven man te ćerav odova so valjani.“

⁹ Isto ađahar, i Anel phenela so i poslušnost but pomožinđa laće ko odova pharo period. Oj phenela: „Odova so šunđum o uputstvija kola o Jehova dinđa prekali pi organizacija, pomožinđa man te ovel man mir. O phralja hem o phenja but pomožinđe man. On ohrabrinđe man hem dinđe man odova so valjanđa maje. O Jehova dinđa man pobuter ando odova so valjanđa hem mi vera ulji pana pozorali.“

10. So šaj te ćere ako isi tut disavi „bari oluja“ ko to životi?

¹⁰ Da li isi tut disavi „bari oluja“ ko to životi? Šaj doživinđan disavi prirodno katastrofa. Ja šaj hijan but nabormo hem odolese hijan obeshrabrimo hem na đaneja so te ćere. Iako podijekh puti brinineja tut, ma mukh sebepi odova te našale to poverenje upro Jehova. Vaćer e Jehovase sa so isi tut ko vilo. Razmislin sar o Jehova  pomožinđa tuće angleder hem ađahar ka zorjaćere ti vera (Ps. 77:11, 12). Ov sigurno so o Jehova niked na ka aćhavi tut.

11. Sose valjani te šuna okolen so predvodinena?

¹¹ So šaj tuće te pomožini ked isi tut pharipa? Sar e Anelaće, hem tuće šaj te pomožini i poslušnost. Sikljov te ovel tut poverenje ko phralja kola predvodinena sose o Jehova hem o Isus isi len poverenje upro lende. Disavo puti, on šaj te den amen dijekh uputstvo kova amenđe dićhola čudno. Ama, o Jehova blagoslovini i poslušnost. E Devleso Lafi hem o iskustvija ando olese verna sluge mothovena so i poslušnost šaj te spasini amaro životi (Izl. 14:1-4; 2. Let. 20:17). Hor razmislin ando odola primerija. Odova ka pomožini tuće te ovel tut želja te šune o uputstvija kola avena andi Jehovasi organizacija (Jevr. 13:17). Sebepi odova, ked ka avel i bari nevolja, tu na ka dara (Posl. 3:25).

12. Premalo Luka 18:1-8, sose valjani amenđe vera ked doživinaja nepravda?

¹² O Isus đanđa so ked olese učenikija ka doživinen nepravda, tegani ka dićhol kobor tani olengi vera zorali. Te šaj te pomožini lenđe te istrajinen, o Isus vaćerđa o poređenje kova tano pisimo ko Luka. Ov vaćerđa lenđe i priča andi udovica koja molinđa e nepravedno sudija te pomožini laće. Oj hine sigurno so ako na ćhinavi te molini le, ov ka pomožini laće. Ko krajo, ov ćerđa odova so oj rodinđa olestar. So sikljovaja? O Jehova nane nepravedno. Odolese, o Isus phenđa: „Da li tegani o Devel na ka ćerel i pravda te dobinen olese izabrana, kola dive hem rat rodena olestar pomoć?“ (Čitin Luka 18:1-8.) Isto ađahar, o Isus phenđa: „Ked ka avel o manušikano Ćhavo, da li ka arakhi asavki vera ki phuv?“ Ked doživinaja nepravda, odoleja so hijam strpljiva hem istrajna ka mothova so isi amen vera sar i udovica. Ked isi amen asavki vera, šaj te ova sigurna so o Jehova ka pomožini amen. Isto ađahar, valjani te ova uverime so i molitva isi la but bari snaga. Disavo puti, o Jehova ka odgovorini ko amare molitve ađahar sar so ni na ađićerđam.

13. Sar i molitva pomožinđa jekha porodicaće?

¹³ Te dikha o primer andi amari phen koja vićini pe Vero. Oj živini ki Demokratsko Republika Kongo. I Vero, olako rom, kova nane Svedoko, hem olengi ćhaj, koja hine la 15 berš, morandilje te mukhen po gav sose disave vojnikija napadinđe len. Đi hine ko drumo, on reslje đi ki jekh barikada. Odothe, o vojnikija terđarđe len hem phenđe lenđe so ka mudaren len. Ked i Vero počminđa te rovel, olaki ćhaj pokušinđa te smirini la ađahar so ko glaso  počminđa te molini pe hem but putija koristinđa e Jehovaso anav. Ked završinđa, o komandanti andi odija vojno grupa, pućlja la: „Ćhaje, ko sikavđa tut te moline tut?“ Oj phenđa: „Mi daj, sose đanela so pisini ko Matej 6:9-13.“ O komandanti phenđa laće: „Ćhaje, le te daja hem te dade hem đan tumenđe sastipnjaja. O Jehova, tumaro Devel, nek arakhi tumen.“

14. Ked amari vera šaj te ovel ispitimi hem so šaj te pomožini amenđe te istrajina?

¹⁴ Asavke iskustvija mothovena amenđe kobor tani i molitva važno. Ama, so ako o Jehova na odgovorinđa tuće odobor sig hem ko disavo posebno način? Sar i udovica ando Isuseso poređenje hem ponodri molin tut, ov sigurno so o Jehova na ka aćhavi tut hem so ka odgovorini ko te molitve ko pravo vreme. Molin tut e Jehovase te del tut po sveti duh (Fil. 4:13). Ma te bistre so o Jehova pana hari odobor ka blagoslovini tut so ka bistre sa o pharipa kola hine tut. Ked ka dikhe sar o Jehova pomožini tuće, ka ove pana pozoralo hem ka istrajine ko avera pharipa kola ađićerena tut.

15. Premalo Matej 17:19, 20, kova pharipe hine len e Isusese učenikija?

¹⁵ O Isus sikavđa pe učenikonen so i vera šaj te pomožini len te nakhen sa o pharipa. (Čitin Matej 17:19, 20.) Iako but putija paldinđe e demonen, jekh puti našti hine te ćeren odova. So hine o problemi? O Isus phenđa lenđe so valjani te ovel len pobari vera. Ov phenđa lenđe so ako isi len dovoljno vera, tegani on ka nakhen o pharipa kola tane bare sar planina. Avdije, hem amen šaj te ovel amen problemija kola šaj te dićhon amenđe so našti te rešina len.

16. Sar i vera pomožinđa amare phenjaće ked olako rom hine mudardo?

¹⁶ Te dikha o primer andi amari phen i Gejdi, kotar Gvatemala. Olako rom, o Edi, hine mudardo đi on duj irinđe pe kotar sastanko. Sar i vera pomožinđa laće te izdržini odija bari dukh? Oj phenela: „I molitva pomožinđa man te fordav mo pharipe upro Jehova hem sebepi odova hine man mir. Dikhljum sar o Jehova brinini pe mandar prekali mi porodica hem prekalo phralja andi skupština. I služba pomožinđa maje te osetinav man pošukar hem te nastavinav te živinav. Kotar akava iskustvo sikljiljum so savi god kušnja te ovel man o Jehova, o Isus hem olesi organizacija ka pomožinen man.“

17. So šaj te ćera ked isi amen problemija kola tane bare sar planina?

¹⁷ Da li hijan tužno sebepi so mulo tutar neko kas but mangljan? Tegani, odvojin vreme te zorjaćere ti vera ko uskrsenje ađahar so kotar Devleso Lafi ka proučine o  izveštaja kola vaćerena okolendar so uskrsninđe. Da li hijan tužno sebepi so neko andi ti porodica tano isključimo? Tegani, proučin e Devleso Lafi hem uverin tut so i disciplina tani uvek aso amaro šukaripe. Savo god problemi te ovel tut, koristin odija prilika te zorjaćere ti vera. Phrav e Jehovase to vilo. Ma cide tut ando avera, već družin tut te phralencar hem te phenjencar (Posl. 18:1). Ćer o buća kola ka pomožinen tuće te istrajine, iako ka valjani odova te ćere rovindoj (Ps. 126:5, 6). Đa redovno ko sastankija, ki služba hem čitin e Devleso Lafi. Razmislin ando buća kola o Jehova pana hari ka ćerel. Ked ka dikhe sar o Jehova pomožini tuće, ti vera ka ovel pana pobari.

18. So šaj te ćere ako dikheja so ti vera nane dovoljno zorali?

¹⁸ Ako o pharipa kola hine tut angleder ja kola isi tut akana, mothovena so ti vera nane odobor zorali, ma obeshrabrin tut. Dikh ko odova sar prilika te zorjaćere ti vera. Rode ando Jehova odova so e Isusese učenikija rodinđe olestar. On phenđe lese: „De amen pobuter vera“ (Luka 17:5). Isto ađahar, razmislin ando iskustvija kolendar vaćerđam ko akava članko. Sar o Migel hem i Juri, niked ma bistri sar o Jehova angleder pomožinđa tuće. Sar i Anel hem i ćhaj andi Vero, vilestar molin tut e Jehovase, posebno ked isi tut bare pharipa. Sar i Gejdi, de sa tutar te dikhe sar o Jehova pomožini tut prekali ti porodica hem prekalo te amala. Ked dikheja sar o Jehova pomožini tuće akana, ka ove sigurno so o Jehova ka pomožini tuće hem ko avera problemija kola ka ovel tut.

19. Ko so o Isus hine sigurno hem ko so šaj tu te ove sigurno?

¹⁹ O Isus pomožinđa pe učenikonenđe te dikhen kuri valjani lenđe pobari vera. Ov hine sigurno so o Jehova ka pomožini len te nakhen bilo kova pharipe kova ka ovel len (Jov. 14:1; 16:33). Ov hine sigurno so o baro mnoštvo ka preživini i bari nevolja sebepi so isi len zorali vera (Otkr. 7:9, 14). Da li ka ove jekh olendar? Po, ako uzi e Jehovasi pomoć akana ćereja sa so šaj te zorjaćere ti vera (Jevr. 10:39).